Chapter 185

[English text for this chapter is available]

devyuvāca |
itihāso'yamīśāna śreyasāṃ sādhanaṃ param |
ākarṇya karuṇāpūrṇa mamakāṃkṣā pravarttate || 1 ||
[Analyze grammar]

ekādaśasya māhātmyamadhyāyasya kathāśrayam |
vyāvarṇaya virūpākṣa vaktṝṇāṃ prathama prabho || 2 ||
[Analyze grammar]

īśvara uvāca |
ākarṇaya kathāṃ kāṃte gītāvarṇanasaṃśrayām |
viśvarūpābhidhānasya māhātmyamapi pāvanam || 3 ||
[Analyze grammar]

adhyāyasya viśālākṣi vaktuṃ tāvanna śakyate |
sahasrāṇi kathāḥ saṃti tatraikā kathyate mayā || 4 ||
[Analyze grammar]

praṇītāyāstaṭe nadyā meghaṃkaramiti śrutam |
nagaraṃ garimādhāra tuṃgaprākāragopuram || 5 ||
[Analyze grammar]

viśālāśramaśālāsu svarṇastaṃbhavibhūṣitam |
śrīmadbhiḥ sukhibhiḥ śāṃtaiḥ sadācārairjiteṃdriyaiḥ || 6 ||
[Analyze grammar]

adhiṣṭhitaṃ javaiścāruśṛṃgāṭakamanoharam |
maṇistaṃbhasphuratsvarṇāpaṇacatvaraśobhitam || 7 ||
[Analyze grammar]

patākākiṃkiṇīkvāṇa kadaṃbaka kalasvaram |
vedādhyayananirghoṣavācālita digaṃtaram || 8 ||
[Analyze grammar]

tūryasaṃghoṣaṇākīrṇa viśālavyomamaṃḍalam |
patākāpallodbhūtavātanirjitavigraham || 9 ||
[Analyze grammar]

rājāmārgavaradvāranārīmaṃjīrasiṃjitaiḥ |
vallakīveṇukairgīterbhāti vājīṃdra heṣitaiḥ || 10 ||
[Analyze grammar]

prekṣamāṇamivābhīkṣṇaṃ dikpālānāṃ puraiḥ samam |
āste jagatpatiryatra śārṅgapāṇirvirājitaḥ || 11 ||
[Analyze grammar]

mūrtimatparamaṃ brahma jagallocanajīvitam |
lakṣmīnayanarājīva pūjitākāragauravaḥ || 12 ||
[Analyze grammar]

trivikramavapurmeghaśyāmalaḥ komaladyuti |
śrīvatsavakṣārājīva vanamālāvibhūṣitaḥ || 13 ||
[Analyze grammar]

anekabhūṣaṇopetaḥ saratna iva vāridhiḥ |
calatsaudāminīdāma sāṃdrameghasamadyutiḥ || 14 ||
[Analyze grammar]

tasyāste mukuṭe sākṣātśārṅgapāṇiḥ paraḥ pumān |
taṃ dṛṣṭvā mucyate jaṃturjanmasaṃsārabaṃdhanāt || 15 ||
[Analyze grammar]

yasminpure mahātīrthaṃ vidyate mekhalābhidham |
yatra snātvā narairnityaṃ prāpyate vaiṣṇavaṃ padam || 16 ||
[Analyze grammar]

tatra vīkṣya jagannāthaṃ narasiṃhaṃ kṛpārṇavam |
saptajanmārjitāddhorānmucyate duṣkṛtānnaraḥ || 17 ||
[Analyze grammar]

mekhalāyāṃ gaṇādhīśaṃ vilokayati yo naraḥ |
sa nistarati vighnāni dustarāṇyapi sarvadā |
brahmacaryaparo dāṃto nirmamo nirahaṃkṛtiḥ || 18 ||
[Analyze grammar]

tasminmeghaṃkare kaścidabhūdbrāhmaṇasattamaḥ |
sunaṃda iti vikhyāto vedaśāstraviśāradaḥ || 19 ||
[Analyze grammar]

vaśīkṛteṃndriyagrāmo vāsudevaparāyaṇaḥ |
devasya śārṅgiṇaḥ pārśve gītādhyāyamimaṃ priye || 20 ||
[Analyze grammar]

ekādaśaṃ paṭhatyeṣa viśvarūpapradarśanam |
adhyāyasya prabhāvena brahmajñānamavāpa saḥ || 21 ||
[Analyze grammar]

paramānaṃdasaṃdoha ślāghyasaṃvitsamādhinā |
pratyaṅmukheṃdriyatayāniścalāṃ sthitimīyuṣā || 22 ||
[Analyze grammar]

satataṃ sthīyate tena jīvanmuktena yoginā |
ekadā sa mahāyogī siṃharāśisthite gurau || 23 ||
[Analyze grammar]

godāvarītīrthayātrāṃ vidhātumupacakrame |
prathame'hni samāgatya virajaṃ tīrthamuttamam || 24 ||
[Analyze grammar]

nābhimārabhya tīrtheṣu sa samabhyarcya devatām |
marjjanmajjanjagaddhātrīṃ kamalāṃ sa vyalokayat || 25 ||
[Analyze grammar]

tāṃ saṃpūjya mahāmāyāṃ sarvakāmaphalapradām |
tārātīrthe tataḥ snātvā kapilāsaṃgame tataḥ || 26 ||
[Analyze grammar]

aṣṭatīrthamasau cakre vidhāya pitṛtarpaṇam |
kumārīśaṃ śivaṃ natvā kapilādvāramāyayau || 27 ||
[Analyze grammar]

tatra nirmajjya nirdhutaprāgjanmāṃtaraduṣkṛtaḥ |
saṃpūjya natvā śrutvā ca devaṃ vai madhusūdanam || 28 ||
[Analyze grammar]

uṣitvā tatra tāṃ rātriṃ prāgātprātaḥ saha dvijaiḥ |
narasiṃhavane tatra tīrthe rāmasya dīrghikā |
prahlādapūjitaḥ sākṣādāste yatra nṛkesarī || 29 ||
[Analyze grammar]

taṃ dṛṣṭvā devadeveśaṃ pūjayitvā tu bhaktitaḥ |
tatra taṃ divasaṃ nītvā sa yayāvaṃbikāpuram || 30 ||
[Analyze grammar]

anugraheṇa bhaktānāmaṃbikā tatra tiṣṭhati |
pūrayaṃti manuṣyāṇāṃ vāṃcchitānyakhilānyapi || 31 ||
[Analyze grammar]

pūjayitvāṃbikāṃ bhaktyā puṣpagaṃdhānulepanaiḥ |
upahāraiśca vividhaiḥ stautraiḥ praṇamanairapi || 32 ||
[Analyze grammar]

viprastasmātpurā prāptaḥ kaṃṭhasthānābhidhaṃ puram |
yatrāste paramā śaktirmahālakṣmīrmahādyutiḥ || 33 ||
[Analyze grammar]

tāmavekṣya sudhābhānubhāskaradyutimaṃḍalām |
saṃsāratāpavicchedapadmapīyūṣavāhinīm || 34 ||
[Analyze grammar]

yogirājahṛdaṃbhoja rājahaṃsaniṣevitām |
anāhatamahānādamayīmadvayarūpiṇīm || 35 ||
[Analyze grammar]

mahālakṣmīṃ bhagavatīṃ vāṃchitārthapradāyinīm |
ārādhya bhaktibhāvena cetasā sa munīśvaraḥ || 36 ||
[Analyze grammar]

vivāhamaṃḍapaṃ prāpa puraṃ vipraiḥ samanvitaḥ |
pure tatra pratigṛhaṃ vāsasthānamayācata || 37 ||
[Analyze grammar]

na lebhe vasatiṃ sthātuṃ gehe kasminnapi dvijaḥ |
darśitaṃ grāmapālena viśālaṃ vāsamaṃdiram || 38 ||
[Analyze grammar]

praviśya vaśatiṃ cakre brāhmaṇaḥ saṃgibhiḥ saha |
tataḥ prabhāte vimale sunaṃdo'sau dvijottamaḥ || 39 ||
[Analyze grammar]

bahirālokayāṃcakre vāsagehānnijaṃ vapuḥ |
adhvanyānakhilānyatra jātānkvāpi yadṛcchayā || 40 ||
[Analyze grammar]

gamyamānaḥ samāyāṃtaṃ grāmapālo dadarśa saḥ |
taṃ babhāṣe grāmapāla āyuṣmānasi sarvaśaḥ || 41 ||
[Analyze grammar]

bhāgadheyavatāṃ puṃsāṃ puṇyaḥ puṇyavatāmasi |
prabhāvo vidyate vatsa kopi lokottarastvayi || 42 ||
[Analyze grammar]

kva prayātāḥ sahāyāste kathaṃ tatsadanādbahiḥ |
tatpaśya muniśārdūla kathayāmi tavāgrataḥ || 43 ||
[Analyze grammar]

kiṃtu nānyaṃ tvayā tulyaṃ paśyāmīha tapasvinam |
kiṃ jānāsi mahāmaṃtraṃ kāṃ vidyāmavalaṃbase || 44 ||
[Analyze grammar]

kasya devasya kāruṇyācchaktirlokottarā tvayi |
tatkāruṇyavaśāttiṣṭha grāme'sminbrāhmaṇottama || 45 ||
[Analyze grammar]

śuśrūṣāmakhilāmeva bhagavaṃste karomyaham |
iti saṃvāsayāmāsa tasmingrāme munīśvaram || 46 ||
[Analyze grammar]

paricaryā ca tasyāsau bhaktyā cakre divāniśam |
divaseṣu prayāteṣu saptāṣṭasu sameyivān || 47 ||
[Analyze grammar]

prātarāgatya tasyāgre ruroda bhṛśaduḥkhitaḥ |
adya me bhāgyahīnasya guṇavānbhaktimānsutaḥ || 48 ||
[Analyze grammar]

jājvalyamānadaṃṣṭreṇa bhakṣito niśi rakṣasā |
ityevaṃ rakṣakeṇoktaṃ taṃ papraccha sa saṃyamī || 49 ||
[Analyze grammar]

kvāste sa rākṣasaḥ putro bhakṣitaste kathaṃ vada |
grāmapāla uvāca |
vartate nagare ghoraḥ puruṣādo niśācaraḥ || 50 ||
[Analyze grammar]

sa khādati narānetya nityaṃ nagaragocarān |
sa sarvairnāgarairatra prārthitaḥ puruṣaiḥ purā || 51 ||
[Analyze grammar]

rakṣa rākṣasa naḥ sarvāngrāsaṃ te kalpayāmahe |
pathikā niśi nidraṃti ye ca tānbhuṃkṣva rākṣasa || 52 ||
[Analyze grammar]

etasminsadane pāṃthāngrāmapālapraveśitān |
āhāraṃ kalpayāṃcakrurātmīyaprāṇaguptaye || 53 ||
[Analyze grammar]

bhavānsuptogṛhe'muṣminnadhanyaiḥ saṃyutaḥ paraiḥ |
te grastāḥ kila cānena na tvaṃ muktosi dvijottama || 54 ||
[Analyze grammar]

prabhāvaṃ bhavato vetti bhavāneva dvijottama |
madīya tanayasyādya mitramekamupāgatam || 55 ||
[Analyze grammar]

ajānatā mayā so'pi tanayasya priyaḥ sakhā |
anyaiḥ pāṃthajanaiḥ sārddhaṃ tasmingehe praveśitaḥ || 56 ||
[Analyze grammar]

śrutvā tatra praviṣṭaṃ taṃ niśīthe tanayo mama |
tamānetuṃ gataḥ so'pi bhakṣitastena rakṣasā || 57 ||
[Analyze grammar]

duḥkhitena mayā proktaḥ prātaḥ sa piśitāśanaḥ |
mamāpi putro duṣṭātmanbhavatā niśi bhakṣitaḥ || 58 ||
[Analyze grammar]

bhavajjaṭharanirmagnaḥ suto'sau yena jīvati |
asti caivamupāyaste brūhi me tvaṃ niśācara || 59 ||
[Analyze grammar]

rākṣasa uvāca |
aṃtaḥpraviṣṭā tvatputramajñātvāhamabhakṣayam |
ajānanbhakṣitaḥ pāṃthaiḥ sahito'sau sutastava || 60 ||
[Analyze grammar]

yathā jīvati me kukṣau yathā bhavati rakṣitaḥ |
tathā vihitamapyasti daivena parameṣṭhinā || 61 ||
[Analyze grammar]

gītaikādaśamadhyāyaṃ yaḥ paṭhatyaniśaṃ dvijaḥ |
tatprabhāvena me muktirmṛtānāṃ punarudbhavaḥ || 62 ||
[Analyze grammar]

grāmapāla uvāca |
kathamekādaśādhyāyasāmarthyamidamadbhutam || 63 ||
[Analyze grammar]

iti pṛṣṭo mayā vipra sa babhāṣe niśācaraḥ || 64 ||
[Analyze grammar]

purā gṛdhreṇa kenāpi nabhomārgeṇa gacchatā |
asthikhaṃḍaṃ svatuṃḍāgrātpātitaṃ kvāpi vāriṇi || 65 ||
[Analyze grammar]

taṃ jalāśayamāgatyako'pi jñānīśvarastadā |
mahātīrthamiti jñātvā vidadhe pitṛtarpaṇam || 66 ||
[Analyze grammar]

tamūcire janāḥ sarve tīrthametatkathaṃ vada |
japatyekādaśādhyāyaṃ trisandhyaṃ niyateṃdriyaḥ || 67 ||
[Analyze grammar]

kṛtamaunastu vipro'sau caurairvyāpāditaḥ pathi |
tasyāsthiśakalaṃ gṛdhravadanātpatitaṃ jale || 68 ||
[Analyze grammar]

tena tīrthamidaṃ divyaṃ jātaṃ pātakanāśanam |
tataste mānavāḥ sarve sasnustatra jalāśaye || 69 ||
[Analyze grammar]

niṣkalmaṣatayā caivaṃ prāpuste paramaṃ padam |
ekādaśasya sāmarthyādadhyāyasya bhaviṣyati || 70 ||
[Analyze grammar]

mamāpi muktiḥ pāṃthānāṃ punarutthānameva ca |
yo mayā kaścidudgīrṇo brāhmaṇo'traiva tiṣṭhati || 71 ||
[Analyze grammar]

sa ca ekādaśādhyāyaṃ japati sma niraṃtaram |
sa tenādhyāyamaṃtreṇa saptavārābhimaṃtritam || 72 ||
[Analyze grammar]

vidhāya vāri vipreṃdraḥ kṣipedyadi mamopari |
tato me śāpanirmuktirbhaviṣyati na saṃśayaḥ |
iti tenāsmi saṃdiṣṭaḥ samāyātastvadaṃtikam || 73 ||
[Analyze grammar]

vipra uvāca |
rākṣasaḥ kena pāpena jātosau vada rakṣaka |
yatkṣapāyāṃ gṛhe tasminnarānkhādati nidritān || 74 ||
[Analyze grammar]

grāmapāla uvāca |
asmingrāme purā kaścidāsīdvipraḥ kṛṣīvalaḥ |
ekadā śālikedārarakṣaṇe vyākulo dvijaḥ || 75 ||
[Analyze grammar]

nātidūre mahāgṛdhraḥ pāṃthamekamabhakṣayat |
taṃ vimocayituṃ dūrāddayāṃcakre'pi tāpasaḥ || 76 ||
[Analyze grammar]

bhuktvā pāṃthaṃ khagastāvanniragādaṃbarādhvanā |
tataḥ sa tāpasaḥ kopāttaṃ babhāṣe kṛṣīvalam || 77 ||
[Analyze grammar]

dhiktvāṃ hālika durbuddhe kaṭhoramatinirghṛṇa |
kukṣibharaṃ paratrāṇa vimukhaṃ hatajīvitam || 78 ||
[Analyze grammar]

coraiśca daṃṣṭribhiḥ sarppairarivahniviṣāṃbubhiḥ |
gṛdhrarākṣasabhūtaiśca vetālādibhirāhatān || 79 ||
[Analyze grammar]

janānupekṣate śaktaḥ sa tadvadhaphalaṃ labhet |
na mocayati yo vipraṃ prabhuścorādibhirdhṛtam || 80 ||
[Analyze grammar]

sa yāti narakaṃ ghoraṃ sa punarjāyate vṛkaḥ |
nihanyamānaṃ vipine gṛdhravyāghreṇa pīḍitam || 81 ||
[Analyze grammar]

muṃcamuceti yo vakti sa yāti paramāṃ gatim |
gavāmarthe hatā vyāghrairvyādhairduṣṭaiśca rājabhiḥ || 82 ||
[Analyze grammar]

tepi yāṃti padaṃ viṣṇorduṣprāpyaṃ yogināmapi |
aśvamedhasahasrāṇi vājapeyaśatāni ca || 83 ||
[Analyze grammar]

śaraṇāgatasaṃtrāṇa kalāṃ nārhaṃti ṣoḍaśīm |
dīnasyopekṣaṇaṃ kṛtvā bhītasya ca śarīriṇaḥ || 84 ||
[Analyze grammar]

puṇyavānapi kālena kuṃbhīpāke sa pacyate |
paśyannapi bhavān pāṃthaṃ duṣṭagṛdhreṇa bhakṣitam || 85 ||
[Analyze grammar]

nivāraṇasamarthopi na cakre yannivāraṇam |
niṣkṛposi yatastasmādbhaviṣyasi niśācaraḥ || 86 ||
[Analyze grammar]

imāṃ śāpaṃ mune śrutvā kaṃpamānakalevaraḥ |
praṇamya hāliko vipraṃ babhāṣe karuṇaṃ vacaḥ || 87 ||
[Analyze grammar]

atrāhaṃ kṣetrarakṣāyāṃ ciraṃ kṣiptena cakṣuṣā |
na vedmi nikaṭaṃ gṛdhra hanyamānamimaṃ naram || 88 ||
[Analyze grammar]

tena me'nugrahaṃ kartuṃ kṛpaṇasya tvamarhasi |
vipra uvāca |
yo vettyekādaśādhyāyaṃ japatyanudinaṃ ca yaḥ || 89 ||
[Analyze grammar]

tenābhimaṃtritaṃ vāri yadā śirasi tāvake |
patiṣyati tadā śāpāttava muktirbhaviṣyati || 90 ||
[Analyze grammar]

ityuktvā tāpaso yāto hāliko rākṣaso'bhavat |
tadāgaccha dvijaśreṣṭha tenādhyāyena maṃtraya |
tīrthodakaṃ svahastena tasya mūrddhani nikṣipa || 91 ||
[Analyze grammar]

mahādeva uvāca |
iti tatprārthitaṃ tasya śrutvā ca karuṇāplutaḥ |
tatheti sahapālena munī rakṣoṃtikaṃ yayau || 92 ||
[Analyze grammar]

ekādaśena tenāṃbu viśvarūpeṇa maṃtritam |
nikṣiptaṃ tasya śirasi tena vipreṇa yoginā || 93 ||
[Analyze grammar]

gītādhyāyaprabhāveṇa śāpamokṣamavāpa saḥ |
vihāya rākṣasaṃ dehaṃ caturbāhustato'bhavat || 94 ||
[Analyze grammar]

nigīrṇā ye janāstena pāṃthā āsansahasraśaḥ |
caturbhujā babhūvuste śaṃkhacakragadādharāḥ || 95 ||
[Analyze grammar]

te vimānānyāruruhustāvadūce sa rākṣasam |
madīyastanayaḥ kastaṃ darśayasva niśācara || 96 ||
[Analyze grammar]

ityukte grāmapālena divyadhīrāha rākṣasaḥ |
evaṃ caturbhujaṃ viddhi tamālaśyāmaladyutim || 97 ||
[Analyze grammar]

māṇikyamukuṭaṃ divyamaṇikuṃḍalamaṃḍitam |
hārahārimahāskaṃdhaṃ svarṇakeyūrabhūṣitam || 98 ||
[Analyze grammar]

rājīvalocanaṃ snigdhaṃ haste kṛtasaroruham |
divyaṃ vimānamārūḍhaṃ devatvaṃ prāptamātmajam || 99 ||
[Analyze grammar]

iti tasya vacaḥ śrutvā sutaṃ dṛṣṭvā ca tādṛśam |
svagehaṃ netumārebhe jahāsa sa sutastataḥ || 100 ||
[Analyze grammar]

kati vārāṇi jāto'si tvaṃ putro mama rakṣaka |
pūrvaputrastvadīyo'smi adhunā vibudho'smyaham || 101 ||
[Analyze grammar]

yāsyāmi vaiṣṇavaṃ dhāma brāhmaṇasya prasādataḥ |
niśācaro'pi prāpto'yaṃ paśya dehaṃ caturbhajam || 102 ||
[Analyze grammar]

ekādaśasya māhātmyādyāti svargaṃ samaṃ janaiḥ |
viprādasmāttamadhyāyamadhīṣva tvaṃ japāniśam || 103 ||
[Analyze grammar]

bhaviṣyati na saṃdehastavāpi gatirīdṛśī |
tāta tasmātsatāṃ saṃgaṃ durlabhaṃ sarvathā janaiḥ || 104 ||
[Analyze grammar]

sopyadya te samutpanno hyātmanaḥ sādhayepsitam |
kiṃ dhanairbhogadānairvā kiṃ yajñaistapasā nu kim || 105 ||
[Analyze grammar]

kiṃ pūrtairvāparaṃ śreyo viśvarūpasya pāṭhataḥ |
tadviṣṇoḥ paramaṃ rūpamadhyāyasya śrutena ca || 106 ||
[Analyze grammar]

yatpūrṇānaṃdasaṃdoha kṛṣṇabrahmāsyanirgatam |
kurukṣetre'rjune mitre tatkaivalyarasāyanam || 107 ||
[Analyze grammar]

nṛṇāṃ ca bhavabhītānāmādhivyādhibhayāpaham |
anekajanmaduḥkhaghnaṃ nānyatpaśyāmi tatsmara |
śiva uvāca |
ityuktvā saha taiḥ sarvairyayau viṣṇoḥ paraṃ padam || 108 ||
[Analyze grammar]

tamadhyāyaṃ tato viprādgrāmapālaḥ papāṭha saḥ |
tāvubhau tasya māhātmyājjagmaturvaiṣṇavaṃ padam || 109 ||
[Analyze grammar]

ityekādaśamāhātmya kathā tubhyaṃ nirūpitā |
yasyāḥ śravaṇamātreṇa mahāpātakasaṃkṣayaḥ || 110 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe gītāmāhātmye satīśvarasaṃvāde paṃcāśītyadhikaśatatamo'dhyāyaḥ || 185 ||
[Analyze grammar]