Chapter 180

[English text for this chapter is available]

śrībhagavānuvāca |
ṣaṣṭhādhyāyasya māhātmyaṃ pravakṣyāmi varānane |
yadākarṇayatāṃ nṝṇāṃ muktiḥ karatale sthitā || 1 ||
[Analyze grammar]

asti godāvarī tīre pratiṣṭhānaṃ puraṃ mahat |
pippaleśābhidhāno'haṃ yatrāsmi smeralocane || 2 ||
[Analyze grammar]

yatra godāvarī tīra śīkarairavaśītalaiḥ |
haṃsāḥ pakṣapuṭaiḥ kīrṇairharaṃti yamināṃ śramam || 3 ||
[Analyze grammar]

sphuratpadmāvalīkośaparāgasurabhīkṛtam |
ślāghyaṃ godāvarītoyaṃ yena te nirjarā narāḥ || 4 ||
[Analyze grammar]

dhiksudhāmauṣadhīśasya vikṛtkṣayavidhāyinīm |
mahārāṣṭravadhūkānāṃ majjaṃtīnāṃ munīśvarāḥ || 5 ||
[Analyze grammar]

spṛśaṃti yatra vaktrāṇi phullapaṃkajaśaṃkayā |
yatrakhelanmahārāṣṭrāḥ kvaṇatkaṃkaṇasuṃdarāḥ || 6 ||
[Analyze grammar]

haraṃti dhvanayo līnāṃ manāṃsyapi tapasvinām |
atyuccasaudhaśikharavihāri vanitāmukham || 7 ||
[Analyze grammar]

paśyannanudinaṃ yatra kṣīyate mṛgalāṃcchanaḥ |
atyuccasaudhavalabhī mahāmaṇimarīcibhiḥ || 8 ||
[Analyze grammar]

cuṃbyaṃte munigaṃdharvairdūrvācaṃdanacaṃcalaiḥ |
yasminnādhūyamānānāṃ patākānāṃ samīraṇaiḥ || 9 ||
[Analyze grammar]

gataśramā raveryāne bhavaṃti rathavājinaḥ |
rāśīkṛtairmalayajairasaṃkhyātairvaṇiggaṇaiḥ || 10 ||
[Analyze grammar]

yasminnupalaśeṣo'sau lakṣyate malayācalaḥ |
puṃjīkṛtāni dṛśyaṃte yatra muktāphalānyapi || 11 ||
[Analyze grammar]

nagarīdevatā hāsya stabakā iva sarvataḥ |
tatra jñānaśrutirnāmnā medinīvallabho'bhavat || 12 ||
[Analyze grammar]

yasminnuddharati kṣoṇīṃ śeṣo'yaṃ maṇisaṃnibhāṃ |
api pratāpamārtaṃḍamaṃḍalī tīvratejasi || 13 ||
[Analyze grammar]

nityamadhvaradhūmena śyāmalāḥ kalpaśākhinaḥ |
asādhāraṇadātṛtvaṃ paśyaṃta iva lajjayā || 14 ||
[Analyze grammar]

yadadhvarapuroḍāśa carvaṇāsvādalaṃpaṭāḥ |
na tatyajuḥ suparvāṇaḥ pratiṣṭhānapuraṃ manāk || 15 ||
[Analyze grammar]

yasyadānāṃbudhārābhiḥ pratāpajyotsnayāniśam |
makhadhūmaiśca saṃpuṣṭā vavṛṣuḥ samaye ghanāḥ || 16 ||
[Analyze grammar]

svalpamātramapi kvāpi na padaṃ prāpurītayaḥ |
nītayaḥ prasaraṃti sma yasminśāsati medinīm || 17 ||
[Analyze grammar]

vāpikūpataḍāgānāṃ cchadmanā yo'nuvāsaram |
hṛdayasthāni medinyā nidhānāni vyalokayat || 18 ||
[Analyze grammar]

pāṃḍurābhiḥ patākābhiḥ prāsādo yasya rājate |
viyadgaṃgātaraṃgoghairhimādririva sānumān || 19 ||
[Analyze grammar]

dānaistapobhiryajñaiśca prajānāṃ pālanena ca |
tuṣṭāḥ svargaukasastasmai varaṃ dātuṃ samāgaman || 20 ||
[Analyze grammar]

tatoṃtarikṣamārgeṇa dhunvānāḥ pakṣasaṃhatīḥ |
mṛṇāladhavalā devī devahaṃsā vinirgatāḥ || 21 ||
[Analyze grammar]

tvarayā gacchatāṃ teṣāmanyonyaṃ tatra bhāṣiṇām |
bhadrāśvapramukhā dvitrāḥ purastānniryayurjavāt || 22 ||
[Analyze grammar]

sarvairmiladbhirūcuste purastādgacchato javāt |
kathaṃ vegena niryātā bhavaṃtaḥ purataḥ sthitāḥ || 23 ||
[Analyze grammar]

sarvairmilitvā gaṃtavyamasminnadhvani durgame |
prakāśamānaṃ puratastejaḥpuṃjaṃ na paśyatha || 24 ||
[Analyze grammar]

jñānaśrutermahībhartuḥ puṇyamūrtteratisphuṭam |
niśamyeti vacaḥ samyakpāścātyānā puraḥ sthitāḥ || 25 ||
[Analyze grammar]

haṃsā hasitvā sāvajñamūcurvacanamuccakaiḥ |
raikyābhidhasya durddharṣa tejaso brahmavādinaḥ || 26 ||
[Analyze grammar]

kiṃ nu jñānaśruterasya rājñastīvrataraṃ mahaḥ |
iti śuśrāva haṃsānāṃ giro jñānaśrutirnṛpaḥ || 27 ||
[Analyze grammar]

atyuccasaudhabhavanamāruhya ca sukhaṃ sthitaḥ |
tataḥ sārathimāhūya bhūpālo vismayānvitaḥ || 28 ||
[Analyze grammar]

saṃdideśa mahātmā'sau raikya ānīyatāmiti |
tato'vadhārya bhūpālavacaḥ pīyūṣagarbhitam || 29 ||
[Analyze grammar]

nirjagāmamaho nāmnā sārathiḥ prathayanmudam |
yatra vārāṇasīnāma nagarī muktidāyinī || 30 ||
[Analyze grammar]

yatra viśveśvaro nāma hyupadeṣṭā jagatpatiḥ |
tato gayābhidhe kṣetre yatra devo gadādharaḥ || 31 ||
[Analyze grammar]

uddhartumakhilānlokānvasatyutphullalocanaḥ |
tato gaurīguroḥ pārśve sarvaistīrthairanekadhā || 32 ||
[Analyze grammar]

paryaṭangatavānyatra kedāraḥ pāpadāraṇaḥ |
yamālokya sakṛnmartyā muktāḥ syurnātra saṃśayaḥ || 33 ||
[Analyze grammar]

mahāpāpavirnimuktā bhuktvā bhogānyathepsitān |
tato gauḍeṣu niryāto yatrāste puruṣottamaḥ || 34 ||
[Analyze grammar]

yasyāvalokanādeva narāḥ svarlokagāminaḥ |
tato dvārāvatīṃ prāgānnagarīṃ muktidāyinīm || 35 ||
[Analyze grammar]

yatrāste gomatī tīre rukmiṇīvallabho hariḥ |
snātvā ca gomatītīrthe paṃcakṛṣṇānvilokya ca || 36 ||
[Analyze grammar]

martyo muktimavāpnoti bhuktvā bhogānyathepsitān |
tataḥ samudramāsādya somanāthaṃ vilokya ca || 37 ||
[Analyze grammar]

bhuktimuktipradaṃ devaṃ tato niragamansudhīḥ |
avaṃtikāṃ purīṃ prāpto bhuktimuktipradāyinīm || 38 ||
[Analyze grammar]

yatromayā sukhaṃ krīḍanmahākālosti śaṃkaraḥ |
athoṃkāraṃ samāsādya śarmadaṃ narmadātaṭe |
bhuktimuktipradātāraṃ tvarayā nirgatastataḥ || 39 ||
[Analyze grammar]

aśvamedhakaraṃ nāmnā nagaraṃ paryaṭaṃstataḥ |
yatra śārṅgadharaḥ sākṣādāste lakṣmīpatiḥ svayam || 40 ||
[Analyze grammar]

tato viṣṇugayāṃ prāptaḥ kuṇḍaṃ loṇārasaṃjñitam |
yatra snātvā ca pītvā ca mucyate bandhanānnaraḥ || 41 ||
[Analyze grammar]

tataḥ kolhāpuraṃ nāma gato rudragayāṃ prati |
āste bhagavatī yatra lakṣmīrbhaktipradāyinī || 42 ||
[Analyze grammar]

pañcanadyāṃ naraḥ snātvā mahālakṣmīṃ vilokya ca |
bhuktvā bhogānyathākāmaṃ bhaktiṃ ca pratipadyate || 43 ||
[Analyze grammar]

tato'malagiriṃ nāma nagarīṃ pratipadya ca |
nandikeśvaramāruhya somanātho'sti yatra tu || 44 ||
[Analyze grammar]

dṛṣṭvā caturbhujaṃ devaṃ varadānodyataṃ śivam |
somanāthaṃ nṛṇāṃ muktirbhavatyeva na saṃśayaḥ || 45 ||
[Analyze grammar]

tuṅgabhadrānadī tīre dṛṣṭvā hariharaṃ tataḥ |
yugeyuge bhujā yasya patantyavanimaṇḍale || 46 ||
[Analyze grammar]

yadvilokya narāḥ sarve ramyaṃ hariharaṃ vapuḥ |
bhuktvā bhogānyathākāmaṃ mucyante bandhanānnarāḥ || 47 ||
[Analyze grammar]

svarge kalpaśataṃ sthitvā muktasaṃsārabandhanāḥ |
tataḥ svāminamālokya lokānāṃ svāminaṃ vibhum || 48 ||
[Analyze grammar]

yamālokya na paśyanti nirayaṃ jātucinnarāḥ |
svarge kalpaśataṃ sthitvā muktasaṃsāravāsanāḥ || 49 ||
[Analyze grammar]

muktiṃ ca pratidadyante nātra kāryā vicāraṇā |
tataḥ śrīśailamāsādya siddhagandharvasevitam || 50 ||
[Analyze grammar]

girijāvallabho yatra mallinātho'bhidhānataḥ |
uddhartumakhilāṃllokānsaṃsārāmbhodhimadhyataḥ || 51 ||
[Analyze grammar]

svarge kalpaśataṃ sthitvā muktasaṃsārabaṃdhanāḥ |
muktiṃ ca pratipadyaṃte nātra kāryā vicāraṇā || 52 ||
[Analyze grammar]

tataḥ śrīśailamāsādya siddhagaṃdharvasevitam |
girijāvallabho yatra mallinātho'bhidhānataḥ || 53 ||
[Analyze grammar]

uddhartumakhilāṃllokānsaṃsārāṃbudhimadhyataḥ |
kālekāle paraṃ jyotiryaḥ saṃdarśayate svayam || 54 ||
[Analyze grammar]

avalokayatāṃ nṝṇāṃ yamanusmaratāmapi |
dūre tiṣṭhaṃti saṃtrastā dūraṃ nirayayātanāḥ || 55 ||
[Analyze grammar]

svarge loke sukhaṃ bhuktvā muktasaṃsārabaṃdhanāḥ |
muktiṃ ca pratipadyaṃte mānavā nātra saṃśayaḥ || 56 ||
[Analyze grammar]

rāmosti sānujaḥ sārddhaṃ jānakyāpi tato gataḥ |
tatra snātvā ca pītvā ca mucyate narakāddhruvam || 57 ||
[Analyze grammar]

kalpakoṭiśataṃ bhuktvā svargalokasukhaṃ narāḥ |
muktasaṃsāravartmāno muktiṃ yāṃti na saṃśayaḥ || 58 ||
[Analyze grammar]

tato nivṛtya āyātaḥ paśyanbhīmarathī taṭe |
dvibhujaṃ viṭhṭhalaṃ devaṃ bhuktimuktipradāyakam || 59 ||
[Analyze grammar]

yatra godāvarījanmasthānaṃ brahmagirirmahān |
gautamālayamāsādya yatrāste tryaṃbako haraḥ || 60 ||
[Analyze grammar]

aruṇāvaruṇayormadhye yatra godāvarī nadī |
tatra snātvā ca pītvā ca brahmahatyā vilīyate || 61 ||
[Analyze grammar]

asaṃkhyatīrthasaṃpannaṃ dṛṣṭvā brahmagiriṃ narāḥ |
muktimeva prapadyaṃte muktāḥ saṃsāraduḥkhataḥ || 62 ||
[Analyze grammar]

gautamyubhayatīrastha tīrthānveṣaṇakautukī |
tato jagāma sūtastu mathurāṃ pāpanāśinīm || 63 ||
[Analyze grammar]

yatra svāyaṃbhuvaṃ devaṃ bhajaṃti suramānavāḥ |
ādyaṃ bhagavataḥ sthānaṃ mahanmuktipradāyakam || 64 ||
[Analyze grammar]

trailokyeśa janisthānaṃ vikhyātaṃ vedaśāstrayoḥ |
nānādevagaṇairjuṣṭaṃ dvijarṣigaṇasevitam || 65 ||
[Analyze grammar]

kāliṃdīkūlasaṃśobhi hyarddhacaṃdra prabhākṛti |
sarvatīrthanivāsaika pūrṇamānaṃdasuṃdaram || 66 ||
[Analyze grammar]

govarddhanagiriprakhyaṃ puṇyadrumalatāvṛtam |
dviṣaḍvanaṃ mahāpuṇyaṃ viśrāṃti śrutisārabhṛt || 67 ||
[Analyze grammar]

tataḥ kāśmīranagaramapaśyatpratyaguttaram |
dṛṣṭvā dharmadhuraṃ kṣetraṃ kurukṣetraṃ samaṃtataḥ || 68 ||
[Analyze grammar]

yatrābhraṃlihagehānāṃ paṃktayaḥ śaṃkhapāṇḍurāḥ |
tā jātā dhūrjaṭeḥ spaṣṭa aṭṭahāsadaśā iva || 69 ||
[Analyze grammar]

bhaktiprasādamālānāṃ suvarṇakalaśairvṛtam |
svaḥ siṃdhoḥ patitānīva hemapadmāni mārutaiḥ || 70 ||
[Analyze grammar]

yatra prāsādaśikhare nīlapaṭṭapatākikāḥ |
śaivālavalayābhāṃti svaḥ siṃdhorlatikā iva || 71 ||
[Analyze grammar]

yatra kāśmīramāśritya nityaṃ vasati bhāratī |
naucedyugapadevedaṃ kathaṃ likhati vāṅmayam || 72 ||
[Analyze grammar]

viśrāmaṃtyāḥ sarasvatyāściraṃ yatra madālasāḥ |
mṛṇālacaṃcavo haṃsā vāhanāni caraṃtyamī || 73 ||
[Analyze grammar]

kalāviśeṣaṃ prahitā yatra boddhuṃ viraṃcinā |
tārā iva virājaṃte haṃsā yātāḥ samaṃtataḥ || 74 ||
[Analyze grammar]

sthalapadmāni dṛśyaṃte karasparśasukhāni ca |
śayanāya nitaṃbinyā yasmindānavavairiṇā || 75 ||
[Analyze grammar]

upanyāsairdvijātīnāṃ yatra na śrūyate sphuṭam |
mūko'pi nirjaro vācā padakallolaḍaṃbaraḥ || 76 ||
[Analyze grammar]

yasminnadhvaradhūmena vyāptaṃ gaganamaṃḍalam |
api ca kṣālitaṃ meghaiḥ kālimānaṃ na muṃcati || 77 ||
[Analyze grammar]

galitāyāḥ sudhāyāstu yatrādhvaramahārciṣā |
lāṃchitaṃ chadmanāsthānaṃ dṛśyate tuhinatviṣi || 78 ||
[Analyze grammar]

janmābhyāsavaśādeva paṭhaṃti baṭavaḥ svayam |
yatropādhyāyasānnidhyamāśritya sakalāḥ kalāḥ || 79 ||
[Analyze grammar]

yatra brāhmaṇapatnīnāṃ kaṃkaṇadhvani huṃkṛtiḥ |
luṃpatyanudinaṃ bhrāmyadbhramarāṇāṃ ca garjitam || 80 ||
[Analyze grammar]

yatra brāhmaṇapatnīnāṃ kapolaphalakaṃ muhuḥ |
spṛśansamīraṇo maṃdaṃ vāti śāpabhayādiva || 81 ||
[Analyze grammar]

māṇikyeśvaranāmāsau yatra śītāṃśuśekharaḥ |
vasatyanudinaṃ devo varadānāya dehinām || 82 ||
[Analyze grammar]

arcito bhūpatīnjitvā maṇikeśena cādṛtaḥ |
māṇikyeśvara ityākhyāṃ tadāprabhṛti yo dadhau || 83 ||
[Analyze grammar]

rājñā kāśmīradeveśa digjayotsavakāriṇā |
asau supūjito yasmānmāṇikyairbhūribhūtibhiḥ || 84 ||
[Analyze grammar]

saṃsevamānaṃ tadvāri chāyāṃ śakaṭikopari |
kaṃḍūyamānamaṃgāni yaṃtā raikyamapaśyata || 85 ||
[Analyze grammar]

rājñāpi kathitaistaistaiścihnaiḥ paricitaṃ javāt |
praṇataḥ sārathī raikyaṃ praṇamya tamabhāṣata || 86 ||
[Analyze grammar]

sārathiruvāca |
kasminbrahmankinnāmāsi svachaṃdo'si niraṃtaram |
kimarthamatra viśrāṃtaḥ kiṃ ca kartuṃ cikīrṣasi || 87 ||
[Analyze grammar]

ityākarṇya ca tadvākyaṃ paramānaṃdanirbharaḥ |
smṛtvā sārathimityūce vayaṃ pūrṇamanorathāḥ || 88 ||
[Analyze grammar]

paraṃ kenāpi bahunā paricaryāvidhāyinā |
bhavitavyaṃ manovṛttiṃ jānatāsmākameva hi || 89 ||
[Analyze grammar]

hṛdayasthitamādāya raikyābhiprāyamādarāt |
śanairniragamadyaṃtā yatrāste vasudhādhipaḥ || 90 ||
[Analyze grammar]

tataḥ praṇamya bhūpālaṃ yathāvṛttaṃ nyavedayat |
baddhāṃjalipuṭo hṛṣṭaḥ sārathiḥ svāmidarśanāt || 91 ||
[Analyze grammar]

tato niśamya tadvākyaṃ vismayasmeralocanaḥ |
śraddhālurabhavadbhūpo raikyasaṃbhāvanāvidhau || 92 ||
[Analyze grammar]

ādāyāśvatarīyugmayuktāṃ śakaṭikāmagāt |
muktāhāradukūlāni sahasraṃ ca gavāṃ nṛpaḥ || 93 ||
[Analyze grammar]

gato'sau tatra yatrāste yogī kāśmīramaṃḍale |
tannivedya puro rājā daṃḍavatpatito bhuvi || 94 ||
[Analyze grammar]

ānamya parayā bhaktyā raikyo rājñe cukopa ha |
re śūdra māmakaṃ vṛttaṃ na jānāsi durīśvara || 95 ||
[Analyze grammar]

gṛhāṇa śakaṭīmetāmutthāpyāśvatarī yutām |
vastrāṇi muktāhārāṃśca gāśca dogdhrīrapi svayam || 96 ||
[Analyze grammar]

itthamājñatavānbhūpo raikyasya bhayamādadhe |
tataḥ śāpabhayādrājā tatpadāṃbhoruhadvayam || 97 ||
[Analyze grammar]

gṛhṇanbhaktyā prasīdeti brahmannityūcivānsvayam || 98 ||
[Analyze grammar]

rājovāca |
bhagavaṃstava māhātmyametadatyudbhutaṃ kutaḥ |
prasannībhūya bhagavannākhyāhi mama tattvataḥ || 99 ||
[Analyze grammar]

raikya uvāca |
gītānāṃ ṣaṣṭhamadhyāyaṃ japāmi pratyahaṃ nṛpa |
tenaiva tejorāśirme surāṇāmapi duḥsahaḥ || 100 ||
[Analyze grammar]

gītānāṃ ṣaṣṭhamadhyāyaṃ raikyādabhyasya yatnataḥ |
jñānaśrutirmahīpālo muktimāpa tataḥ sudhīḥ || 101 ||
[Analyze grammar]

raikyo'pi sukhamālebhe māṇikyeśvarasannidhau |
gītānāṃ ṣaṣṭhamadhyāyaṃ japanmokṣapradāyakam || 102 ||
[Analyze grammar]

marālaveṣamāsthāya varadānārthamāgatāḥ |
divaukaso'pi nirjagmuḥ svairaṃ vismayakāritāḥ || 103 ||
[Analyze grammar]

imamadhyāyamapyekaṃ yo japetsatataṃ naraḥ |
so'pi tatpadavīmeti viṣṇoreva na saṃśayaḥ || 104 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe gītā |
māhātmye aśītyadhikaśatatamo'dhyāyaḥ || 180 ||
[Analyze grammar]