Chapter 132

[English text for this chapter is available]

pārvatyuvāca |
anaṃtavāsudevasya kīdṛśaṃ smaraṇaṃ smṛtam |
yacchrutvā na punarmoho mānuṣāṇāṃ prajāyate || 1 ||
[Analyze grammar]

mahādeva uvāca |
dṛṣṭatatvena deveśi smaraṃti viṣṇuṃ nityaśaḥ |
tṛṣāturo yathā vāri tadvadviṣṇuṃ smarāmyaham || 2 ||
[Analyze grammar]

himenākulitaṃ viśvaṃ smaratyagniṃ yathā tathā |
tadvadeva tu vai viṣṇuṃ smaraṃti vibudhādayaḥ || 3 ||
[Analyze grammar]

pativratā yathā nārī patiṃ smarati nityaśaḥ |
tathā smaraṃti lokeśaṃ viṣṇuṃ viśveśvareśvaram || 4 ||
[Analyze grammar]

bhayārttaḥ śaraṇaṃ yadvadarthalobhī yathā dhanam |
putrakāmo yathā putraṃ tathā viṣṇuṃ smarāmyaham || 5 ||
[Analyze grammar]

dūrastho'pi yathā gehaṃ cātako mādhavaṃ yathā |
brahmavidyāṃ brahmavidastathā viṣṇuṃ smarāmyaham || 6 ||
[Analyze grammar]

haṃsā mānasamicchaṃti ṛṣayaḥ smaraṇaṃ hareḥ |
bhaktāśca bhaktimicchaṃti tathā viṣṇuṃ smarāmyaham || 7 ||
[Analyze grammar]

prāṇināṃ vallabho deho yatra ātmā'vatiṣṭhati |
āyurvāṃcchaṃti ye jīvāstathā viṣṇuṃ smarāmyaham || 8 ||
[Analyze grammar]

bhramarāśca yathā puṣpaṃ cakravākā divākaram |
yathātmavallabhā bhaktistathā viṣṇuṃ smarāmyaham || 9 ||
[Analyze grammar]

aṃdhenākulitā lokā dīpaṃ vāṃcchaṃti vai yathā |
tathā vai puruṣā loke smaraṇaṃ keśavasya ca || 10 ||
[Analyze grammar]

yathā śramārttā viśrāmaṃ nidrā vyasanino yathā |
gatālasyā yathā vidyāṃ tathā viṣṇuṃ smarāmyaham || 11 ||
[Analyze grammar]

mātaṃgāḥ pārvatīṃ bhūmiṃ siṃhā vanagajādikam |
tathaiva smaraṇaṃ viṣṇoḥ kartavyaṃ pāpabhīrubhiḥ || 12 ||
[Analyze grammar]

sūryakāṃte raveryogādvahnistatra prajāyate |
evaṃ vai sādhusaṃyogāddharau bhaktiḥ prajāyate || 13 ||
[Analyze grammar]

śītaraśmeryathā kāṃtaścaṃdrayogādapaḥ śrayet |
evaṃ vaiṣṇavasaṃyogānmuktirbhavati śāśvatī || 14 ||
[Analyze grammar]

kumudvatī yathā somaṃ dṛṣṭvā puṣpaṃ vikāsate |
tadvaddeve kṛtā bhaktirmuktidā sarvadā nṛṇām || 15 ||
[Analyze grammar]

yathānalāyāḥ saṃtrastā bhramarī smaraṇaṃ caret |
tena smaraṇayogena nalāsārūpyatāmiyāt || 16 ||
[Analyze grammar]

gopībhirjārabuddhyā ca viṣṇośca smaraṇaṃ kṛtam |
tāśca sāyujyatāṃ nītāstathā viṣṇuṃ smarāmyaham || 17 ||
[Analyze grammar]

ke'pi vai duṣṭabhāvena cchadmabhāvena kecana |
ke cāpi lobhabhāvena ciṃtayaṃti janārdanam || 18 ||
[Analyze grammar]

bhaktyā vā snehabhāvena dveṣabhāvena vā punaḥ |
ke'pi svāmittvabhāvena buddhayā vā buddhipūrvakam || 19 ||
[Analyze grammar]

yenakenāpi bhāvena ciṃtayaṃti janārdanam |
ihaloke sukhaṃ bhuktvā yāṃti viṣṇoḥ sanātanam || 20 ||
[Analyze grammar]

aho viṣṇośca māhātmyamadbhutaṃ lomaharṣaṇam |
yadṛcchayāpi smaraṇaṃ tridhāmuktipradāyakam || 21 ||
[Analyze grammar]

na dhanena samṛddhena vipulāvidyayā tathā |
ekena bhaktiyogena samīpe dṛśyate kṣaṇāt || 22 ||
[Analyze grammar]

sāṃnidhye'pi sthito dūre netrayoraṃjanaṃ yathā |
bhaktiyogena dṛśyena bhaktaiścaiva sanātanaḥ || 23 ||
[Analyze grammar]

idaṃ tatvamidaṃ tatvaṃ mohito devamāyayā |
bhaktitatvaṃ yadā prāptaṃ tadā viṣṇumayaṃ jagat || 24 ||
[Analyze grammar]

iṃdrādyairamṛtaṃ prāptaṃ sukhārthe śṛṇu suṃdari |
tathāpi duḥkhitāste vai bhaktyā viṣṇoryathā vinā || 25 ||
[Analyze grammar]

bhaktimevāmṛtaṃ prāpya punarduḥkhaṃ na jāyate |
vaikuṃṭhākhyaṃ padaṃ prāpya modate viṣṇusannidhau || 26 ||
[Analyze grammar]

vāri tyaktvā yathā haṃsaḥ payaḥ pibati nityaśaḥ |
evaṃ dharmānparityajya viṣṇorbhaktiṃ samāśrayet || 27 ||
[Analyze grammar]

anyabhaktiṃ parityajya viṣṇubhaktiṃ samāśrayet |
toyaṃ baddhvā tu vastreṇa kṛtaṃ kāryaṃ kathaṃ bhavet || 28 ||
[Analyze grammar]

prāpya dehaṃ vinā bhaktiṃ kriyate sa vṛthāśramaḥ |
viṣṇubhaktiṃ vinā dharmānupadiśaṃti ye janāḥ |
te pataṃti sadā ghore narake nātra saṃśayaḥ || 29 ||
[Analyze grammar]

bāhubhyāṃ sāgaraṃ tartuṃ yadvanmūrkho'bhivāṃchati |
saṃsārasāgaraṃ tadvadviṣṇubhaktiṃ vinā naraḥ || 30 ||
[Analyze grammar]

viṣṇubhaktiṃ ca rakṣaṃti karmaṇā pātyate yadi |
akiṃcanaḥ spṛhāyukto merau dhatte yathā spṛhām || 31 ||
[Analyze grammar]

tava bhaktau tathā deva mayā hi kriyate spṛhā |
janmāṃtare hi sā bhaktirmāmakī yatkaroti hi || 32 ||
[Analyze grammar]

vahniryatheha svalpo'pi dahate vividhaṃ vanam |
tadvadeva tu sā bhaktiraṇumātrā kṛtā mayā || 33 ||
[Analyze grammar]

śataiśca śrūyate bhaktiḥ sahasrairapi budhyate |
teṣāṃ madhye tu deveśi bhaktohyekaḥ prajāyate || 34 ||
[Analyze grammar]

buddhiṃ pareṣāṃ dāsyaṃti loke bahuvidhā janāḥ |
svayamācarate so'pi naraḥ koṭiṣu dṛśyate || 35 ||
[Analyze grammar]

pūjayā hasyate bhaktirjayena parihasyate |
evaṃ bhāvo hi deveśe bhaktistenaiva gṛhyate || 36 ||
[Analyze grammar]

sāgare ca yathā pātaḥ kūpe trāṇopaveśanam |
yasya bhāvo hi tadvacca bhaktiḥ sā tena gṛhyate || 37 ||
[Analyze grammar]

mūle siktasya vṛkṣasya patraṃ śākhāsu dṛśyate |
bhajanādeva bho devi phalamagre pratiṣṭhitam || 38 ||
[Analyze grammar]

pānīyahāriṇā yadvatghaṭe cittaṃ pradhīyate |
tadvaddeve harau cittaṃ dhṛtvā mokṣamavāpnuyāt || 39 ||
[Analyze grammar]

śaiśave ca yathā mātā guḍaṃ stokaṃ dadāti vai |
punaryācati vai bālo guḍaṃ vai lobhakāraṇāt || 40 ||
[Analyze grammar]

nīre nīraṃ yathākṣiptaṃ dugdhe dugdhaṃ ghṛte ghṛtam |
tadvadbhedaṃ na paśyaṃti viṣṇubhaktiprasādataḥ || 41 ||
[Analyze grammar]

bhānuḥ sarvagato yadvadvahniḥ sarvagato yathā |
bhaktiḥ sthitastathā bhaktaḥ karmabhirnaiva bādhyate || 42 ||
[Analyze grammar]

ajāmilaḥ svadharmaṃ ca tyaktvā pāpaṃ samācaran |
putraṃ nārāyaṇaṃ smṛtvā muktiṃ vai prāptavāndhruvam || 43 ||
[Analyze grammar]

divārātrau ca ye bhaktā nāmamātropajīvinaḥ |
vaikuṃṭhavāsinaste vai tatra vedā hi sākṣiṇaḥ || 44 ||
[Analyze grammar]

aśvamedhādiyajñānāṃ phalaṃ svarge'pi dṛśyate |
tatphalaṃ tu samagraṃ vai bhuktvā vai saṃpataṃti ca || 45 ||
[Analyze grammar]

viṣṇubhaktistathā devi bhuktvā bhogānanekaśaḥ |
vaikuṃṭhaṃ prāpya vā teṣāṃ punarāgamanaṃ kadā || 46 ||
[Analyze grammar]

viṣṇubhaktiḥ kṛtā yena viṣṇuloke vasatyasau |
dṛṣṭāṃtaṃ paśya deveśi viṣṇubhaktiprasādataḥ || 47 ||
[Analyze grammar]

grāvāṇo jalamadhyasthāḥ śataśastena tāritāḥ |
vinā jalaṃ somakāṃto viṣṇubhaktasya mānasam || 48 ||
[Analyze grammar]

darduro vasate nīre ṣaṭpado hi vanāṃtare |
gaṃdhaṃ vetti kumudvatyā bhakto bhaktau tathā hareḥ || 49 ||
[Analyze grammar]

gaṃgātaṭe vasaṃtyeke eke vai śatayojanam |
kaścidgaṃgāphalaṃ vetti viṣṇubhaktiṃ parastathā || 50 ||
[Analyze grammar]

karpūrāgurubhāraṃ hi uṣṭro vahati nityaśaḥ |
madhyagaṃdhaṃ na jānāti tathā viṣṇuṃ bahirmukhāḥ || 51 ||
[Analyze grammar]

mṛgāḥ śālaṃ hi jighraṃti kastūrīgaṃdhamicchavaḥ |
svanābhisthaṃ na jānaṃti tathā viṣṇuṃ bahirmukhāḥ || 52 ||
[Analyze grammar]

upadeśo hi mūrkhāṇāṃ vṛthā vai naganaṃdini |
tathaiva viṣṇubhakterhi upadeśo bahirmukhe || 53 ||
[Analyze grammar]

ahinā ca payaḥ pītaṃ tatpayo hi viṣāyate |
tathā vai cānyabhaktānāṃ viṣṇubhaktirviṣāyate || 54 ||
[Analyze grammar]

cakṣurvinā yathā dīpaṃ dṛṣṭvā darpaṇameva ca |
samīpasthā na paśyaṃti tathā viṣṇuṃ bahirmukhāḥ || 55 ||
[Analyze grammar]

pāvako hi yathā dhūmairādarśopi malena ca |
yatholbenāvṛto garbho dehe kṛṣṇastathāvṛtaḥ || 56 ||
[Analyze grammar]

dugdhe sarpiḥ sthitaṃ yadvattile tailaṃ tu sarvadā |
carācare tathā viṣṇurdṛśyate naganaṃdini || 57 ||
[Analyze grammar]

ekasūtre maṇigaṇā dhāryaṃte bahavo yathā |
evaṃ brahmādibhirviśvaṃ saṃprotaṃ brahmacinmaye || 58 ||
[Analyze grammar]

yathā kāṣṭhe sthito vahnirmaṃthanādeva dṛśyate |
evaṃ sarvagato viṣṇurdhyānādeva pradṛśyate || 59 ||
[Analyze grammar]

ādireko bhaveddīpastasmājjātāḥ sahasraśaḥ |
evamekaḥ sthito viṣṇuḥ sarvavyāpya pratiṣṭhati || 60 ||
[Analyze grammar]

yathā sūryodaye jyotiḥ puṣkare tiṣṭhate sadā |
dṛśyate bahudhā nīre loke viṣṇustathā hi saḥ || 61 ||
[Analyze grammar]

mārutaḥ prakṛtistho'pi nānāgaṃdhavahaḥ sadā |
īśvaraḥ sarvajīvastho bhuṃkte prakṛtijānguṇān || 62 ||
[Analyze grammar]

śarkarā viṣasaṃyogānnīraṃ bhavati yādṛśam |
saṃbhūttvā tādṛśo hyātmā karmaṇaḥ phalamaśnute || 63 ||
[Analyze grammar]

urvī ca nīrasaṃyogānnānāvṛkṣā prajāyate |
prakṛterguṇasaṃyogānnānāyoniṣu jāyate || 64 ||
[Analyze grammar]

gaje vai maśake caiva deve vā mānuṣe'pi vā |
nādhiko na ca nyūno vai niṣṭho dehe sa niścalaḥ || 65 ||
[Analyze grammar]

brahmādistaṃbaparyaṃtā ye cātra bhuvi mānavāḥ |
devā yajñāstathā nāgā gaṃdharvāḥ kinnarādayaḥ || 66 ||
[Analyze grammar]

teṣu sarveṣu dṛśyaṃte jale caṃdramaso yathā |
sa saccidānaṃdaśivaḥ sa maheśo hi dṛśyate || 67 ||
[Analyze grammar]

sa vai viṣṇustathā proktaḥ so'yaṃ sarvagato hariḥ |
vedāṃtavedyaḥ sarveśaḥ kālātīto hyanāmayaḥ || 68 ||
[Analyze grammar]

evaṃ taṃ vetti yo devi sa bhakto nātra saṃśayaḥ |
eko hi bahudhā jñeyo bahudhāpyeka eva saḥ || 69 ||
[Analyze grammar]

nāmarūpavibhedena jalpyate bahudhā bhuvi |
cakṣuṣā na raverjyotirbhānunā cakṣuredhate || 70 ||
[Analyze grammar]

paramātmā tathā cātmā pratidehe tu sarvadā |
ghaṭe ghaṭe yathākāśastasminbhagne yathā sthitaḥ || 71 ||
[Analyze grammar]

rūpe rūpe tathā tvaṃ hi bhagne tasminsuniścalaḥ |
yathā kāṣṭhamayaṃ rūpaṃ patate prabhuṇā vinā || 72 ||
[Analyze grammar]

krimibhedamayo deho patate cātmanā vinā |
hemno bhavaṃti varṇāśca vahninā yāṃti pūrvavat || 73 ||
[Analyze grammar]

tadvajjīvāḥ prapadyaṃte bhaktā vai pūrvarūpatām |
svaghanenāvṛtaṃ sūryaṃ mūḍhāḥ paśyaṃti niṣprabham || 74 ||
[Analyze grammar]

tathā'jñānadhiyo mūḍhā na jānaṃti tamīśvaram |
nirvikalpaṃ nirākāraṃ vedāṃ taiḥ paripāṭhyate || 75 ||
[Analyze grammar]

nirākārācca sākāraṃ svecchayā ca prakāśate |
tasmātsaṃjātamākāśaṃ niḥśabdaṃ guṇavarjitam || 76 ||
[Analyze grammar]

ākāśānmāruto jātaḥ saśabdaṃ ca tadā'bhavat |
vātādajāyata jyotirjyotiṣaścābhavajjalam || 77 ||
[Analyze grammar]

tajjale rukmagarbhaśca virāḍvai viśvarūpadhṛk |
tasya nābhisaroje ca brahmāṃḍānāṃ ca koṭayaḥ || 78 ||
[Analyze grammar]

prakṛtiḥ puruṣastasmānnirmitaṃ tu tridhā jagat |
tayordvayośca saṃyogāttattvayogo 'bhyajāyata || 79 ||
[Analyze grammar]

sātvikī viṣṇusaṃbhūtirbrahmā vai rājasaḥ smṛtaḥ |
śivastu tāmasaḥ prokta ebhiḥ sarvaṃ pravartitam || 80 ||
[Analyze grammar]

ekā brāhmī sthitirloke karmabījānusārataḥ |
tayā saṃharate viṣṇuḥ sarvalokānuśeṣataḥ || 81 ||
[Analyze grammar]

tiṣṭhatyasau tadā tatra bhagavānviṣṇuravyayaḥ |
evaṃ sarvagato viṣṇurādimadhyāṃta eva ca || 82 ||
[Analyze grammar]

avidyayā na jānaṃti lokā vai karmaniścitāḥ |
varṇocitāni karmāṇi yaḥ kāleṣu prakārayet || 83 ||
[Analyze grammar]

yatkarmaviṣṇudaivatyaṃ na hi garbhasya kāraṇam |
vedāṃtaśāstre munibhiḥ sarvadaiva vicāryate || 84 ||
[Analyze grammar]

brahmajñānamidaṃ dehe tadahaṃ parikīrttaye |
śubhāśubhasya kāryaṃ ca kāraṇaṃ mana eva hi || 85 ||
[Analyze grammar]

manasā śudhyate sarvaṃ tadā brahma sanātanam |
mana eva sadā baṃdhurmana eva sadā ripuḥ || 86 ||
[Analyze grammar]

manasā tāritāḥ kecinmanasā yātitāśca ke |
madhye sarvaparityāgaḥ bāhye karma tathācaran || 87 ||
[Analyze grammar]

evameva kṛtaṃ karma kurvannapi na lipyate |
padmapatraṃ yathā nīra leśairapi na lipyate || 88 ||
[Analyze grammar]

agniragnau yathā kṣipto bhaktyā ca kiṃ prayojanam |
yadā bhaktiraso jñāto na muktī rocate tadā || 89 ||
[Analyze grammar]

yogairaṣṭavidhairviṣṇurna prāpyaśceha janmani |
bhaktyā vā prāpyate viṣṇuḥ sarvadā sulabho bhavet || 90 ||
[Analyze grammar]

vedāṃtaiḥ prāpyate jñānaṃ jñānena jñeyameva ca |
tattu jñeyaṃ yadā prāptaṃ tadā śūnyamidaṃ jagat || 91 ||
[Analyze grammar]

balena prāpyate viṣṇuryogairaṣṭavidhaiśca kim |
sarveṣāmeva bhāvānāṃ bhāvaśuddhiḥ praśasyate || 92 ||
[Analyze grammar]

āliṃgyate yathā kāṃtā yathā bhāvastathā phalam |
upānadyuktapādo hi vetti carmamayīṃ mahīm || 93 ||
[Analyze grammar]

buddhiryathāvidhā yasya tadvatsa manyate jagat |
dugdhena sikto niṃbo'pi kaṭubhāvaṃ na tu tyajet || 94 ||
[Analyze grammar]

prakṛtiṃ yāṃti bhūtāni upadeśo nirarthakaḥ |
chitvā vai sahakāraṃ ca phalaṃ patraṃ kathaṃ labhet || 95 ||
[Analyze grammar]

iṃdriyāṇāṃ sukhārthena vṛthā janma kathaṃ nayet |
sthālyāṃ vaiḍūryamayyāṃ hi pacyate cauṣadhaṃ yathā || 96 ||
[Analyze grammar]

dahyate cāgadastadvadvṛthājanma kathaṃ bhavet |
nidhānaṃ ca gṛhe kṣiptvā śubhaḥ sevāṃ kathaṃ caret || 97 ||
[Analyze grammar]

tyaktvā vaikuṃṭhanāthaṃ tamanyamārge kathaṃ ramet |
bhaktihīnaiścaturvedaiḥ paṭhitaiḥ kiṃ prayojanam || 98 ||
[Analyze grammar]

śvāpaco bhaktiyuktastu tridaśairapi pūjyate |
svakare kaṃkaṇaṃ baddhvā darpaṇaiḥ kiṃ prayojanam || 99 ||
[Analyze grammar]

brahmarudrādibhirdevairdattaiśvaryāśca sevakāḥ |
arpitaṃ naiva gṛhṇaṃti prabhoścaiva tu kiṃcana || 100 ||
[Analyze grammar]

akiṃcanāya bhaktāya dātuṃ nālaṃ gato varam |
niḥśarīrasya kṛṣṇasya tatra dhyānaṃ kathaṃ bhavet || 101 ||
[Analyze grammar]

sākāraṃ bahavo dṛṣṭvā gatā bhaktyā ca tatpadam |
pūjā bhaktiḥ kathaṃ śūnye sākāre kathyate budhaiḥ || 102 ||
[Analyze grammar]

śūnyamārge kathaṃ yāti ādhāreṇa vinā naraḥ |
sākāro yaḥ svayaṃ svāmī nirākāraḥ sa vai prabhuḥ || 103 ||
[Analyze grammar]

sākāro hi sukhenaiva nirākāro na dṛśyate |
sevārasaśca sākāre nirākāreṇa vairasaḥ || 104 ||
[Analyze grammar]

sākāreṇa nirākāro jñāyate svayameva hi |
harismṛtiprasādena romāṃcita tanuryadā || 105 ||
[Analyze grammar]

nayanānaṃdasalilaṃ muktirdāsī bhavettadā |
bālye ca yatkṛtaṃ pāpaṃ tatkathaṃ na vinaśyati || 106 ||
[Analyze grammar]

pūjādānavrataistīrthairjapahomaistvadarpitaiḥ |
nijadharmaṃ parityajya tapo ghoraṃ kathaṃ caret || 107 ||
[Analyze grammar]

svadharme nidhanaṃ śreyaḥ paramadharmo bhayāvahaḥ |
vidhiṃ saṃtyajya śāstrīyaṃ tapo ghoraṃ kathaṃ caret || 108 ||
[Analyze grammar]

āśrameṇa vinā mūḍho naiva siddhimavāpnuyāt |
brahmaṇā nirmitā varṇāḥ sve sve dharme niyojitāḥ || 109 ||
[Analyze grammar]

svadharmeṇāgataṃ dravyaṃ śukladravyaṃ taducyate |
śukladravyeṇa yaddānaṃ dīyate śraddhayānvitam || 110 ||
[Analyze grammar]

svalpenāpi mahatpuṇyaṃ tasya saṃkhyā na vidyate |
nīcasaṃgena yaddravyamānītaṃ gṛhakarmasu || 111 ||
[Analyze grammar]

tena dravyeṇa yaddānaṃ kṛtaṃ vai manujādibhiḥ |
tatphalaṃ na bhavette vai naiva tatphalabhāginaḥ || 112 ||
[Analyze grammar]

yādṛśaṃ kurute karma iṃdriyāṇāṃ sukhecchayā |
tādṛśīṃ yonimāpnoti mūḍho hi jñānadurbalaḥ || 113 ||
[Analyze grammar]

iha yatkurute karma tatparatropabhujyate |
puṇyamācarataḥ puṃso yadi duḥkhaṃ prajāyate || 114 ||
[Analyze grammar]

tadā tāpo na karttavyastatkarma pūrvadehajam |
pāpamācarataḥ puṃso jāyate duḥkhameva ca || 115 ||
[Analyze grammar]

na karttavyastadā harṣaḥ sukhe tatra sureśvari |
rajjubaddhāśca paśavaḥ prabhuṇā svecchayā yathā || 116 ||
[Analyze grammar]

nīyaṃte karmabaṃdhena manujā api bhūtale |
śākhāmṛgo vanacaro nṛtyate ca gṛhe gṛhe || 117 ||
[Analyze grammar]

evaṃ ca karmaṇā jīvā nīyaṃte sarvayoniṣu |
krīḍatā kaṃduko yadvatpreryate prabhuṇecchayā || 118 ||
[Analyze grammar]

karmaṇā vā tathā jaṃturnīyate sukhaduḥkhayoḥ |
prāṇī svakarmabhirbaddho na śakto baṃdhanigrahe || 119 ||
[Analyze grammar]

devā vai karmabhirbaddhā ṛṣayaśca tathāpare |
kailāse rudradehasthā bhujaṃgā viṣabhojinaḥ || 120 ||
[Analyze grammar]

asamarthāḥ sudhā bhoktuṃ karmayonirbalīyasī |
nīrogadehadātā yo budhaiḥ sūryo hi kathyate || 121 ||
[Analyze grammar]

tadrathe sārathiḥ paṃguḥ karmayonirbalīyasī |
iṃdradyumno hi rājarṣirgajatvaṃ karmaṇā gataḥ || 122 ||
[Analyze grammar]

samarthasvāminā tasminkarmayonirvṛthā kṛtā |
rudrabrahmādayo devā mānavāścāsurāśca ye || 123 ||
[Analyze grammar]

te sarve karmabaddhāśca vicaraṃti mahītale |
karmādhīnaṃ jagatsarvaṃ viṣṇunā nirmitaṃ purā || 124 ||
[Analyze grammar]

tatkarmakeśavādhīnaṃ rāmanāmnā vinaśyati |
sarvatrāpi sthitaṃ toyaṃ muktidaṃ tu sitāsite || 125 ||
[Analyze grammar]

evamācaratāṃ karma muktidaṃ keśavārcanam |
iṃdriyāṇāṃ sukhārthāya yaḥ karma manasācaret || 126 ||
[Analyze grammar]

ahaṃ kṛtena manyeta kevalaṃ dehameva hi |
manasā saṃsmaranjaṃtuḥ prāyaścittaṃ samācaret || 127 ||
[Analyze grammar]

sa pūrvakarmabhoktā ca agre karma na varddhate |
praśaṃsaṃti grahānkecitkecitpretapiśācakān || 128 ||
[Analyze grammar]

keciddevānpraśaṃsaṃti hyoṣadhīḥ kecidūcire |
kecinmaṃtraṃ ca siddhiṃ ca kecidbuddhiparākramam || 129 ||
[Analyze grammar]

udyamaṃ sāhasaṃ dhairyaṃ kecinnītiṃ balaṃ tathā |
ahaṃkarmapraśaṃsābhiḥ sarve kāmānuvartinaḥ || 130 ||
[Analyze grammar]

iti me niścitā buddhiḥ kathyate pūrvasūribhiḥ |
yadā puṇyamayo jaṃtuḥ pāpaṃ kiṃcinnaḥ vidyate || 131 ||
[Analyze grammar]

jñānaṃ hi dvividhaṃ caiva tadā puṇyaṃ sukhaṃ bhavet |
pāpaṃ puṇyaṃ samaṃ yasya tadā karmasu vidyate || 132 ||
[Analyze grammar]

samaṃ yogaṃ yadā dvaṃdvaṃ tadānaṃdapadaṃ vrajet |
bāhye sarvaparityāgī manasā saṃspṛhī bhavet || 133 ||
[Analyze grammar]

tadvṛthācaritaṃ tasya tena tatpāpabhoginaḥ |
bāhye karoti karmāṇi manasā niḥspṛho bhavet || 134 ||
[Analyze grammar]

tyāgo'sau madhyamo jñeyo na tu pūrṇaphalaṃ labhet |
bāhyamadhye parityajya buddhyā śūnyāvalaṃbanam || 135 ||
[Analyze grammar]

tyāgaḥ sa uttamo jñeyo yogināmapi durllabhaḥ |
krodhātsarvaṃ tyajaṃtyeke kecidvādaprabhāvataḥ || 136 ||
[Analyze grammar]

kaṣṭātsarvaṃ tyajaṃtyeke tyāgāḥ sarvenumadhyamāḥ |
subuddhyā śraddhayā yukto na krodhādivaśaṃgataḥ || 137 ||
[Analyze grammar]

karmaṇāṃ hyavalipto'pi sugatiṃ yāti mānavaḥ |
śucīnāṃ śrīmatāṃ gehe dhīmatāṃ yogināmapi || 138 ||
[Analyze grammar]

yogādbhraṣṭastu jāyeta kule vai dvijapūrvake |
svalpenaiva tu kālena pūrṇaṃ yogaṃ ca viṃdati || 139 ||
[Analyze grammar]

cidānaṃdapadaṃ gacchedyogabhaktiprasādataḥ |
paṃkenaiva yathā paṃkaṃ rudhiraṃ rudhireṇa vai || 140 ||
[Analyze grammar]

hiṃsayā karmaṇā karma kathaṃ kṣālayituṃ kṣamaḥ |
hiṃsākarmamayoyajñaḥ kathaṃ karmakṣaye kṣamaḥ || 141 ||
[Analyze grammar]

svargakāmakṛtā yajñā svarge te cālpasaukhyadāḥ |
anityāni tu saukhyāni bhavaṃti ca bahūnyapi || 142 ||
[Analyze grammar]

nityaṃ saukhyaṃ na teṣvasti vinā bhaktyā hareḥ kvacit |
sārvabhaumasukhaṃ rājyaṃ svarge cāpi tathā sukham || 143 ||
[Analyze grammar]

anyatkiṃcinna vāṃchāmi garbhavāsādbibhemyaham |
grāvā vai bhidyate lohairmāṇikyaṃ naiva bhidyate || 144 ||
[Analyze grammar]

nānākāmamayī buddhyā viṣṇubhaktirna bhidyate |
bako jalacarānbhuṃkte maṃḍūkādīṃśca varjayet || 145 ||
[Analyze grammar]

tathā yamaḥ sarvahaṃtā varjayetkṛṣṇasevakān |
yo rakṣati sa hartā ca sa vai pālaka ucyate || 146 ||
[Analyze grammar]

aparādhaśatairyuktaṃ svaṃ sthāne yatra vāsitā |
yathā kṛtāparādhasya kṛṣṇastasya kṛpākaraḥ || 147 ||
[Analyze grammar]

phalaṃ ca labhate vādya rakṣakaḥ kiṃ karoti cet |
evamātmā ca dehesminparavaśyakṛpākaraḥ || 148 ||
[Analyze grammar]

prāpto na pāraḥ śanakairmallairyuktā na vāpi tā |
vyādhasya muktidātā ca kubjakā tāritā svayam || 149 ||
[Analyze grammar]

brahmādyairdurlabhaḥ svapne sulabho gopamaṃdire |
gopocchiṣṭaṃ yadā bhuktaṃ tadā te tāritāḥ svayam || 150 ||
[Analyze grammar]

yogibhirgīyate nityaṃ paramātmā janārdanaḥ |
avyayaḥ puruṣaḥ śrīmāndṛṣṭvā tairdevi vismaye || 151 ||
[Analyze grammar]

etatsmaraṇakaṃ divyaṃ ye paṭhaṃti dine dine |
sarvapāpavinirmuktā yāṃti viṣṇoḥ sanātanam || 152 ||
[Analyze grammar]

anayā bhāvabuddhyā ca paṭhanaṃ viṣṇusannidhau |
ihaloke sukhaṃ bhuktvā paraṃ padamavāpnuyāt || 153 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṇḍe viṣṇusmaraṇaṃnāma dvātriṃśādhikaśatatamo'dhyāyaḥ || 132 ||
[Analyze grammar]