Chapter 108

[English text for this chapter is available]

nārada uvāca |
itthaṃ tadvacanaṃ śrutvā dharmadattaḥ savismayaḥ |
praṇamya daṃḍavadbhūmau vākyametaduvāca ha || 1 ||
[Analyze grammar]

dharmadatta uvāca |
ārādhayaṃti sarve'pi viṣṇuṃ bhaktārttināśinam |
yajñairdānairvrataistīrthaistapobhiśca yathāvidhi || 2 ||
[Analyze grammar]

viṣṇuprītikaraṃ teṣāṃ viṣṇusānnidhyakārakam |
yatkṛtvā tāni cīrṇāni sarvāṇyapi bhavaṃti hi || 3 ||
[Analyze grammar]

gaṇāvūcatuḥ |
sādhu pṛṣṭaṃ tvayā vipra śṛṇuṣvaikāgramānasaḥ |
setihāsāṃ kathāṃ vipra kathyamānāṃ purābhavām || 4 ||
[Analyze grammar]

kāṃtipuryāṃ purā cola cakravarttī nṛpo'bhavat |
yasya nāmnā ca te deśāścolākhyā abhavankila || 5 ||
[Analyze grammar]

yasminśāsati bhūcakraṃ daridro naiva duḥkhitaḥ |
pāpabuddhiḥ sarugvāpi naiva kaścidabhūnnaraḥ || 6 ||
[Analyze grammar]

yasyāpyatyaṃtayajñasya tāmraparṇī taṭāvubhau |
suvarṇayūpaiḥ śobhāḍhyāvāstāṃ caitrarathopamau || 7 ||
[Analyze grammar]

sa kadācidagādrājā hyanaṃtaśayanaṃ dvija |
yatrāsau jagatāṃ nātho yoganidrāmupāsate || 8 ||
[Analyze grammar]

tatra śrīramaṇaṃ devaṃ saṃpūjya vidhivannṛpaḥ |
maṇimuktāphalairdivyaiḥ svarṇapuṣpaiśca śobhanaiḥ || 9 ||
[Analyze grammar]

praṇamya daṃḍavadyāvadupaviṣṭaḥ sa tatra vai |
tāvadbrāhmaṇamāyāṃ tamapaśyaddevasannidhau || 10 ||
[Analyze grammar]

devārcanārthamāyāṃtaṃ tulasyudakapāṇinam |
svapurīvāsinaṃ tatra viṣṇudāsā vayaṃ dvijam || 11 ||
[Analyze grammar]

tatrābhyetya sa viprarṣirdevadevamapūjayat |
viṣṇusūktena saṃsnāpya tulasīmaṃjarīdalaiḥ || 12 ||
[Analyze grammar]

tulasīpūjayā tasya ratnapūjāṃ tathā kṛtām |
ācchāditāṃ samālokya rājā kruddho'bravīdvacaḥ || 13 ||
[Analyze grammar]

rājovāca |
māṇikyasvarṇapūjātra śobhāḍhyā yā mayā kṛtā |
viṣṇudāsa kathaṃ seyamācchannā tulasīdalaiḥ || 14 ||
[Analyze grammar]

viṣṇubhaktiṃ na jānāsi varāko'si mato mama |
yastvimāmatiśobhāḍhyāṃ pūjāmācchādayasyaho || 15 ||
[Analyze grammar]

iti tadvacanaṃ śrutvā sakrodhaḥ sa dvijottamaḥ |
rājño gauravamullaṃghya jagāda vacanaṃ tadā || 16 ||
[Analyze grammar]

viṣṇudāsa uvāca |
rājanmuktiṃ na jānāsi garvito'si nṛpaśriyā |
kiṃsvidviṣṇuvrataṃ pūrvaṃ tvayā cīrṇaṃ vadasva tat || 17 ||
[Analyze grammar]

gaṇāvūcatuḥ |
tadbrāhmaṇavacaḥ śrutvā prahasya sa nṛpottamaḥ |
viṣṇudāsaṃ tadā garvāduvāca vacanaṃ dvija || 18 ||
[Analyze grammar]

itthaṃ cetkathyase vipra viṣṇubhaktyātigarvitaḥ |
bhaktiste kiyatīviṣṇordaridrasyādhanasya ca || 19 ||
[Analyze grammar]

yajñadānādikaṃ caiva viṣṇutuṣṭikaraṃ kṛtam |
nāpi devālayaṃ pūrvaṃ tvayā vipra kvacitkṛtam || 20 ||
[Analyze grammar]

īdṛśasyāpi te garva eṣa tiṣṭhati bhaktitaḥ |
tacchṛṇvaṃtu vaco me'dya sarvepyete dvijottamāḥ || 21 ||
[Analyze grammar]

sākṣātkāramahaṃ viṣṇoreṣa vādo gamiṣyati |
yathā tu sarve'pi tato bhaktiṃ jñāsyatha cāvayoḥ || 22 ||
[Analyze grammar]

gaṇāvūcatuḥ |
ityuktvā sa nṛpo gacchannijaṃ rājagṛhaṃ dvijaḥ |
ārebhe vaiṣṇavaṃ satraṃ kṛtvācāryaṃ tu mudgalam || 23 ||
[Analyze grammar]

ṛṣisaṃghasamājuṣṭaṃ babhūva bahudakṣiṇam |
yadvadbrahmakṛtaṃ pūrvaṃ gayākṣetre samṛddhimat || 24 ||
[Analyze grammar]

viṣṇudāso'pi tatraiva tasthau devālaye vratī |
paṃcaitānniyamānkṛtvā viṣṇutuṣṭikarānsadā || 25 ||
[Analyze grammar]

māghorjayorvrataṃ samyaktulasīvanapālanam |
ekādaśīvrataṃ jāpyaṃ dvādaśākṣaravidyayā || 26 ||
[Analyze grammar]

upacāraiḥ ṣoḍaśabhirgītanṛtyādimaṃgalaiḥ |
nityaṃ viṣṇostathā pūjāṃ vratānyetāni so'karot || 27 ||
[Analyze grammar]

nityaṃ saṃsmaraṇaṃ viṣṇorgacchanbhuṃjansvapannapi |
sarvabhūtasthitaṃ viṣṇumapaśyatsamadarśanaḥ || 28 ||
[Analyze grammar]

māghakārtikayornityaṃ viśeṣaniyamānapi |
akarodviṣṇutuṣṭyarthaṃ sodyāpanavidhiṃ tathā || 29 ||
[Analyze grammar]

evaṃ samārādhayatoḥ śriyaḥ patiṃ tayostu coleśvaraviṣṇudāsayoḥ |
agādanehā bahu tadvratasthayostanniṣṭhakarmendriyakarmaṇostayoḥ || 30 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe kārtikamāhātmye śrīkṛṣṇasatyabhāmāsaṃvāde kalahopākhyāne aṣṭādhikaśatatamo'dhyāyaḥ || 108 ||
[Analyze grammar]