Chapter 101

[English text for this chapter is available]

nārada uvāca |
te gaṇādhipatīndṛṣṭvā naṃdībhamukhaṣaṇmukhān |
amarṣādabhyadhāvaṃta dvaṃdvayuddhāya dānavāḥ || 1 ||
[Analyze grammar]

naṃdinaṃ kālanemiśca śuṃbho laṃbodaraṃ tathā |
niśuṃbhaḥ ṣaṇmukhaṃ vegādabhyadhāvata daṃśitaḥ || 2 ||
[Analyze grammar]

niśuṃbhaḥ kārtikeyasya mayūraṃ paṃcabhiḥ śaraiḥ |
hṛdi vivyādha vegena mūrchitaḥ sa papāta ca || 3 ||
[Analyze grammar]

tataḥ śaktidharaḥ śaktiṃ yāvajjagrāha roṣitaḥ |
tāvanniśuṃbho vegena svaśaktyā tamapātayat || 4 ||
[Analyze grammar]

tato naṃdīśvaro bāṇaiḥ kālanemimavidhyata |
saptabhiśca hayānketūṃstribhiḥ sārathimacchinat || 5 ||
[Analyze grammar]

kālanemistu saṃkruddho dhanuściccheda naṃdinaḥ |
tadapāsya saśūlena taṃ vakṣasya hanaddṛḍham || 6 ||
[Analyze grammar]

saśūlabhinnahṛdayo hatāśvo hatasārathiḥ |
adreḥ śikharamāmucya śailādriṃ so'pyapātayat || 7 ||
[Analyze grammar]

atha śuṃbho gaṇeśaśca rathamūṣakavāhanau |
yudhyamānau śaravrātaiḥ parasparamavidhyatām || 8 ||
[Analyze grammar]

atha śuṃbhaṃ gaṇādhyakṣo hṛdi vivyādha patriṇā |
sārathiṃ paṃcabhirbāṇaiḥ pātayāmāsa bhūtale || 9 ||
[Analyze grammar]

tataḥ śuṃbho'tikruddho'pi bāṇaṣaṣṭyā gaṇādhipam |
mūṣakaṃ ca tribhirviddhvā nanāda jaladasvanaḥ || 10 ||
[Analyze grammar]

mūṣakaḥ śarabhinnāṃgaścacāla kṛtavedanaḥ |
laṃbodaraḥ samuttīrya padātirabhavannṛpa || 11 ||
[Analyze grammar]

tato laṃbodaraḥ śuṃbhaṃ hatvā paraśunā hṛdi |
apātayattadā bhūmau mūṣakaṃ cāruhatpunaḥ || 12 ||
[Analyze grammar]

kālanemirniśuṃbhaśca ubhau laṃbodaraṃ śaraiḥ |
yugapajjaghnatuḥ kopāttotreṇeva mahādvipam || 13 ||
[Analyze grammar]

taṃ pīḍyamānamālokya vīrabhadro mahābalaḥ |
abhyadhāvata vegena bhūtakoṭiyutastadā || 14 ||
[Analyze grammar]

kūṣmāṃḍā bhairavāścāpi vetālā yoginīgaṇāḥ |
piśācā yoginīsaṃghā gaṇāścāpi tamanvayuḥ || 15 ||
[Analyze grammar]

tataḥ kilakilāśabdaiḥ siṃhanādaiḥ saghurghuraiḥ |
vināditā ḍamarukaiḥ pṛthivī samakaṃpata || 16 ||
[Analyze grammar]

tato bhūtāni dhāvaṃti bhakṣayaṃti sma dānavān |
utpataṃti pataṃti sma nanṛtuścaraṇāṃgaṇe || 17 ||
[Analyze grammar]

naṃdī ca kārtikeyaśca samāyātau tvarānvitau |
nijaghnatū raṇe daityānniraṃtara śaravrajaiḥ || 18 ||
[Analyze grammar]

chinnabhinnāha tairdaityaiḥ pātitairbhartsitaistathā |
vyākulā sā bhavatsenā viṣaṇṇavadanā tadā || 19 ||
[Analyze grammar]

pravidhvastāṃ tataḥ senāṃ dṛṣṭvā sāgaranaṃdanaḥ |
rathenātipatākena gaṇānabhiyayau balī || 20 ||
[Analyze grammar]

hastyaśvarathasaṃhrādaḥ śaṃkhabherīravastadā |
abhavatsiṃhanādaśca senayorubhayostadā || 21 ||
[Analyze grammar]

jālaṃdharaśaravrātairnīhārapaṭalairiva |
dyāvāpṛthivyorācchannamaṃtaraṃ samapadyata || 22 ||
[Analyze grammar]

gaṇeśaṃ paṃcabhirvidhvā śailādrimapi paṃcabhiḥ |
vīrabhadraṃ ca viṃśatyā nanāda jaladasvanaḥ || 23 ||
[Analyze grammar]

kārtikeyastato daityaṃ śaktyā vivyādha satvaraḥ |
vyāghūrṇaḥ śaktinirbhinnaḥ kiṃcidvyākulamānasaḥ || 24 ||
[Analyze grammar]

tataḥ krodhaparītākṣaḥ kārtikeyaṃ jalaṃdharaḥ |
gadayā tāḍayāmāsa sa ca bhūmitale'patat || 25 ||
[Analyze grammar]

tathaiva naṃdinaṃ vegādapātayata bhūtale |
tato gaṇeśvaraḥ kruddho gadāṃ paraśunācchinat || 26 ||
[Analyze grammar]

vīrabhadrastribhirbāṇairhṛdi vivyādha dānavam |
saptabhiśca hayānketūndhanuśchannaṃ ca cicchide || 27 ||
[Analyze grammar]

tato'tikruddho daityeṃdraḥ śaktimudyamya dāruṇām |
gaṇeśaṃ pātayāmāsa rathamanyaṃ samāruhat || 28 ||
[Analyze grammar]

abhyayādatha vegena vīrabhadraṃ ruṣānvitaḥ |
tatastau sūryasaṃkāśau yuyudhāte parasparam || 29 ||
[Analyze grammar]

vīrabhadrastasya hayāṃstathā bāṇairapātayat |
dhanuściccheda daityeṃdro yuyudhe parighāyudhaḥ || 30 ||
[Analyze grammar]

sa vīrabhadraṃ tvarayābhigamya jaghāna daityaḥ parighena mūrdhni |
sa cāpi daityaḥ pravibhinnamūrddhā papāta bhūmau rudhiraṃ samudgiran || 31 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārttikamāhātmye śrīkṛṣṇasatyabhāmāsaṃvāde daityasenāparābhavonāma ekādhikaśatatamo'dhyāyaḥ || 101 ||
[Analyze grammar]