Chapter 99

[English text for this chapter is available]

nārada uvāca |
sa māṃ saṃpūjya vidhivaddānaveṃdro 'tibhaktitaḥ |
saṃprahasya tadā vākyaṃ jagāda nṛpasattama || 1 ||
[Analyze grammar]

jalaṃdhara uvāca |
kutastvāgamyate brahmankiṃ ca dṛṣṭaṃ tvayā kvacit |
yadarthamiha cāyātastadā jñāpaya māṃ mune || 2 ||
[Analyze grammar]

nārada uvāca |
gataḥ kailāsaśikharaṃ daityeṃdrāhaṃ yadṛcchayā |
tatromayā sahāsīnaṃ dṛṣṭavānasmi śaṃkaram || 3 ||
[Analyze grammar]

yojanāyutavistīrṇe kalpadruma mahāvane |
kāmadhenuśatākīrṇe ciṃtāmaṇi sudīpite || 4 ||
[Analyze grammar]

taṃ dṛṣṭvā mahadāścaryaṃ vitarko me'bhavattadā |
kvāpīdṛśī bhavedvṛddhistrilokyāṃ vā na veti ca || 5 ||
[Analyze grammar]

tāvattavāpi daityeṃdra samṛddhiḥ sambhṛtā mayā |
tadvilokanakāmo'haṃ tvatsānnidhyamihāgataḥ || 6 ||
[Analyze grammar]

tvatsamṛddhimimāṃ paśyanstrīratnarahitāṃ dhruvam |
tarkayāmi śivādanyattrilokyāṃ na samṛddhimān || 7 ||
[Analyze grammar]

apsaro nāgakanyāśca yadyapi tvadvaśe sthitāḥ |
tathāpi tā na pārvatyā rūpeṇa sadṛśā dhruvam || 8 ||
[Analyze grammar]

yasyā lāvaṇyajaladhau nimagnaścaturānanaḥ |
svadhairyamamucatpūrvaṃ tayā kānyopamīyate || 9 ||
[Analyze grammar]

vītarāgo'pi hi yathā madanāriḥ svalīlayā |
viśvataṃtro'pi tapasā sa cātmavaśagaḥ kṛtaḥ || 10 ||
[Analyze grammar]

sauṃdaryagahane bhrāmanśabarīrūpayā purā |
yasyāḥ punaḥ punaḥ paśyanrūpaṃ dhātā visarjane || 11 ||
[Analyze grammar]

sasarjāpsarasastāstāstatsamaikāpi nābhavat |
ataḥ strīratnasaṃbhoktuḥ samṛddhistasya sā varā || 12 ||
[Analyze grammar]

tathā na tava daityeṃdra sarvaratnādhipasya ca |
evamuktvā tamāmaṃtrya gate mayi sa daityarāṭ || 13 ||
[Analyze grammar]

tadrūpaśravaṇādāsīdanaṃgajvarapīḍitaḥ |
atha saṃpreṣayāmāsa dūtaṃ ca siṃhikāsutam || 14 ||
[Analyze grammar]

tryaṃbakāya tadā kiṃcidviṣṇumāyāvimohitaḥ |
kailāsamagamadrāhuḥ sarvaśukleṃduvarcasam || 15 ||
[Analyze grammar]

kārtsnyena kṛṣṇapakṣeṃduvarcasaṃ svāṃgajena tu |
niveditastadādeśānnaṃdinā ca praveśitaḥ |
tryaṃbakābhrūlatāsaṃjñā prerito vākyamabravīt || 16 ||
[Analyze grammar]

rāhuruvāca |
devapannagasevyasya trailokyādhipateḥ prabhoḥ |
sarvaratneśvarasya tvamājñāṃ śṛṇu vṛṣadhvaja || 17 ||
[Analyze grammar]

śmaśānavāsino nityaṃ muṃḍamālādharasya ca |
digaṃbarasya te bhāryā kathaṃ haimavatī śubhā || 18 ||
[Analyze grammar]

ahaṃ ratnādhinātho'smi sā ca strī ratnasaṃjñakā |
tasmānmamaiva sā yogyā naiva bhikṣāśinastava || 19 ||
[Analyze grammar]

nārada uvāca |
vadatyevaṃ tadā rāhau bhrūmadhyācchūlapāṇinaḥ |
abhavatpuruṣo raudrastīvrāśanisamasvanaḥ || 20 ||
[Analyze grammar]

siṃhāsyaḥ pracalajjihvaḥ sajvalannayano mahān |
ūrdhvakeśaḥ śuṣkatanurnṛsiṃha iva cāparaḥ || 21 ||
[Analyze grammar]

sa taṃ khāditumārebhe dṛṣṭvā rāhurbhayāturaḥ |
adhāvadativegena bahiḥ sa ca dadhāra tam || 22 ||
[Analyze grammar]

sa ca rāhurmahābāhurmeghagaṃbhīrayā girā |
uvāca devadeveśaṃ pāhi māṃ śaraṇāgatam || 23 ||
[Analyze grammar]

brāhmaṇaṃ māṃ mahādeva khādituṃ samupāgataḥ |
etasmādrakṣa deveśa śaraṇāgatavatsala || 24 ||
[Analyze grammar]

mahādevo vacaḥ śrutvā brāhmaṇasya tadābravīt |
naivāsau vadhyatāmeti dūto'yaṃ paravānyataḥ || 25 ||
[Analyze grammar]

muṃceti puruṣaḥ śrutvā rāhuṃ tatyāja soṃbare |
rāhuṃ tyaktvā sa ṣuruṣo mahādevaṃ vyajijñapat || 26 ||
[Analyze grammar]

puruṣa uvāca |
kṣudhā māṃ bādhate svāminkṣutkṣāmaścāsmi sarvathā |
kiṃ bhakṣyaṃ mama deveśa tadājñāpaya māṃ prabho || 27 ||
[Analyze grammar]

īśvara uvāca |
saṃbhakṣayātmanaḥ śīghraṃ māṃsaṃ tvaṃ hastapādayoḥ || 28 ||
[Analyze grammar]

nārada uvāca |
saśivenaivamājñaptaścakhāda puruṣaḥ svayam |
hastapādodbhavaṃ māṃsaṃ śiraḥśeṣo yadābhavat || 29 ||
[Analyze grammar]

dṛṣṭvā śiro'vaśeṣaṃ tu suprasannaḥ sadāśivaḥ |
puruṣaṃ bhīmakarmāṇaṃ tamuvāca savismayaḥ || 30 ||
[Analyze grammar]

īśvara uvāca |
tvaṃ kīrtimukhasaṃjño hi bhava maddvāragaḥ sadā |
tvadarcāṃ naiva kurvaṃti naiva te matpriyaṃkarāḥ || 31 ||
[Analyze grammar]

nārada uvāca |
tadāprabhṛti devasya dvāre kīrtimukhaḥ sthitaḥ |
nārcayaṃtīha ye pūrvaṃ teṣāmarcā vṛthā bhavet || 32 ||
[Analyze grammar]

rāhurvimukto yastena so'patadbarbarasthale |
ataḥ sa barbarodbhūta iti bhūmau pṛthāṃ gataḥ || 33 ||
[Analyze grammar]

tataśca rāhuḥ punareva jātamātmānamasminniti manyamānaḥ |
sametya sarvaṃ kathayāṃ babhūva jalaṃdharāyeśaviceṣṭitaṃ tat || 34 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikāmāhātmye śrīkṛṣṇasatyabhāmāsaṃvāde dūtasaṃvādo jālaṃdharopākhyānaṃnāma navanavatitamo'dhyāyaḥ || 99 ||
[Analyze grammar]