Chapter 90

[English text for this chapter is available]

satyovāca |
sarve'pi kālāvayavāstavakālasvarūpiṇaḥ |
samānāstu kathaṃ nātha māsānāṃ kārtiko varaḥ || 1 ||
[Analyze grammar]

ekādaśī tithīnāṃ ca māsānāṃ kārttikaḥ priyaḥ |
kathaṃ te devadeveśa kāraṇaṃ kiṃ ca kathyatām || 2 ||
[Analyze grammar]

śrīkṛṣṇa uvāca |
sādhu pṛṣṭaṃ tvayā satye śṛṇuṣvaikāgramānasā |
pṛthorvainyasya saṃvādaṃ devarṣernāradasya ca || 3 ||
[Analyze grammar]

evameva purā pṛṣṭo nāradaḥ pṛthunā priye |
uvāca kārttikādhikye kāraṇaṃ sarvavinmuniḥ || 4 ||
[Analyze grammar]

nārada uvāca |
śaṃkhanāmābhavatpūrvamasuraḥ sāgarātmajaḥ |
trilokīmathane śakto mahābalaparākramaḥ || 5 ||
[Analyze grammar]

jitvā devānnirākṛtya svargalokānmahāsuraḥ |
iṃdrādilokapālānāmadhikārāṃstathāharat || 6 ||
[Analyze grammar]

tadbhayādatha te devāḥ suvarṇādriguhāṃ gatāḥ |
nyavasanbahuvarṣāṇi sāvarodhāḥ savāsavāḥ || 7 ||
[Analyze grammar]

suvarṇādri guhādurgasaṃsthitāstridaśā yadā |
tadvaśyā na babhūvuste tadā daityo vyacārayat || 8 ||
[Analyze grammar]

hṛtādhikārāstridaśā mayā yadyapi nirjitāḥ |
bhavaṃti balayuktāste karaṇīyaṃ mamātra kim || 9 ||
[Analyze grammar]

adya jñātaṃ mayā devā vedamaṃtrabalānvitāḥ |
tānhariṣye tataḥ sarve balahīnā bhavaṃti hi || 10 ||
[Analyze grammar]

iti matvā tato daityo viṣṇumālakṣya nidritam |
satyalokājjahārāśu vedānāṃ ca gaṇaṃ prabhuḥ || 11 ||
[Analyze grammar]

nītāstu tena te vedāstadbhayātte nirākraman |
toye niviviśuste'tra yajñamaṃtrasamanvitāḥ || 12 ||
[Analyze grammar]

tānmārgamāṇaḥ śaṃkho'pi samudrāṃtargato bhraman |
na dadarśa tato daityaḥ kvacidekatra saṃsthitān || 13 ||
[Analyze grammar]

atha brahmā suraiḥ sārddhaṃ viṣṇuṃ śaraṇamanvayāt |
pūjopakaraṇaṃ gṛhya vaikuṃṭhabhavanaṃ gataḥ || 14 ||
[Analyze grammar]

tatra tasya prabodhāya gītavādyādikāḥ kriyāḥ |
cakrurdevā gaṃdhapuṣpadhūpadīpānmuhurmuhuḥ || 15 ||
[Analyze grammar]

atha prabuddho bhagavāṃstadbhaktiparitoṣitaḥ |
dadṛśe taiḥ suraistatra sahasrārkasamadyutiḥ || 16 ||
[Analyze grammar]

upacāraiḥ ṣoḍaśabhiḥ saṃpūjya tridaśāstadā |
daṃḍavatpatitā bhūmau tānuvācātha keśavaḥ || 17 ||
[Analyze grammar]

viṣṇuruvāca |
varado'haṃ suragaṇā gītavādyādi maṃgalaiḥ |
mano'bhilaṣitānkāmānsarvāneva dadāmi vaḥ || 18 ||
[Analyze grammar]

iṣasya śuklaikādaśyā yāvadudbodhinī bhavet |
niśāturyāṃśaśeṣeṇa gītavādyādi maṃgalaiḥ || 19 ||
[Analyze grammar]

kurvaṃti manujā nityaṃ bhavadbhiryadyathākṛtam |
te matpriyakarā nityaṃ matsāṃnidhyaṃ vrajaṃti hi || 20 ||
[Analyze grammar]

pādyārghācamanīyādyairbhavadbhiryadyathākṛtam |
tadadbhutaguṇaṃ yasmājjātaṃvaḥ sukhakāraṇam || 21 ||
[Analyze grammar]

vedāḥ śaṃkhahṛtāḥ sarve tiṣṭhaṃtyudakasaṃsthitāḥ |
tānānayāmyahaṃdevāhatvāsāgaranaṃdanam || 22 ||
[Analyze grammar]

adyaprabhṛtivedāstumaṃtrabījamakhānvitāḥ |
pratyabdaṃkārtikemāsiviśramaṃtvapsusarvadā || 23 ||
[Analyze grammar]

adyaprabhṛtyahamapi bhavāmi jalamadhyagaḥ |
bhavaṃto'pi mayā sārddhamāyāṃtu samunīśvarāḥ || 24 ||
[Analyze grammar]

kāle'sminnevakurvaṃti prātaḥsnānaṃ dvijottamāḥ |
te sarvayajñāvabhṛthaiḥ susnātāḥ syurna saṃśayaḥ || 25 ||
[Analyze grammar]

ye kārtike vrataṃ samyaṅnityaṃ kurvaṃti mānavāḥ |
te dehāṃte tvayā śakra prāpyā madbhavanaṃ sadā || 26 ||
[Analyze grammar]

vighnebhyo rakṣaṇaṃ teṣāṃ yayā kāryaṃ mamājñayā |
deyā tvayā ca varuṇa putrapautrādi saṃtatiḥ || 27 ||
[Analyze grammar]

dhanavṛddhirdhanādhyakṣa tvayā kāryā mamājñayā |
mamarūpadharāḥ sākṣājjīvanmuktāśca te narāḥ || 28 ||
[Analyze grammar]

ājanmamaraṇādyaiśca kṛtametadvratottamam |
yathoktavidhinā samyakte mānyā bhavatāmapi || 29 ||
[Analyze grammar]

ekādaśyāṃ yataścāhaṃ bhavadbhiḥ pratibodhitaḥ |
ataścaiṣā tithirmānyā sadaiva prītidā mama || 30 ||
[Analyze grammar]

vratadvayaṃ samyagidaṃnaraiḥ kṛtaṃ kṛṣṇasya sānnidhyadamasti nānyat |
dānāni tīrthāni tapāṃsi yajñāḥ svarlokadānena sadā surottamāḥ || 31 ||
[Analyze grammar]

iti śrīpādmemahāpurāṇe paṃcapaṃcāśatsahasra saṃhitāyāṃ kārtikamāhātmye śrīkṛṣṇasatyabhāmāsaṃvāde śaṃkhāsuravadhaudyamonāma navatitamo'dhyāyaḥ || 90 ||
[Analyze grammar]