Chapter 89

[English text for this chapter is available]

śrīkṛṣṇa uvāca |
tato guṇavatī śrutvā rakṣasā nihatāvubhau |
pitṛbhartajaduḥkhārttā karuṇaṃ paryadevayat || 1 ||
[Analyze grammar]

guṇavatyuvāca |
hā nātha hā pitastyaktvā gacchataṃ kva mayā vinā |
bālāhaṃ kiṃ karomyadya hyanāthā bhavatā vinā || 2 ||
[Analyze grammar]

ko nu māmāsthitāṃ gehe bhojanācchādanādibhiḥ |
akiṃcitkuśalāṃ snehātpālayiṣyati duḥkhitām || 3 ||
[Analyze grammar]

hatabhāgyā gatasukhā hateśā hatajīvitā |
śaraṇaṃ kaṃ vrajāmyadya tvannāthā batabāliśā || 4 ||
[Analyze grammar]

śrīkṛṣṇa uvāca |
evaṃ bahuvilapyātha kurarīva bhṛśāturā |
papāta bhūmau vikalā raṃbhā vātahatā yathā || 5 ||
[Analyze grammar]

cirādāśvasya sā bhūmau vilapya karuṇaṃ bahu |
nimagnā duḥkhajaladhau śokārttā samavarttata || 6 ||
[Analyze grammar]

sāgrahopaskarānsarvānvikrīya śubhakarmakṛt |
tayoścakre yathāśakti pāralaukika satkriyām || 7 ||
[Analyze grammar]

tasminneva pure vāsaṃ cakre prabhṛtijīvitam |
viṣṇubhaktiparā śāṃtā satyaśaucā jiteṃdriyā || 8 ||
[Analyze grammar]

vratadvayaṃ tayā samyagājanma maraṇātkṛtam |
ekādaśīvrataṃ samyaksevanaṃ kārttikasya ca || 9 ||
[Analyze grammar]

etadvratadvayaṃ kāṃte mamātīva priyaṃkaram |
bhuktimuktikaraṃ samyakputrasaṃpattikārakam || 10 ||
[Analyze grammar]

kārtike māsi ye nityaṃ tulāsaṃsthe divākare |
prātaḥ snāsyaṃti te muktā mahāpātakino'pi ca || 11 ||
[Analyze grammar]

saṃmārjanaṃ gṛhe viṣṇoḥ svastikādi nivedanam |
viṣṇupūjāṃ prakurvaṃti jīvanmuktāśca te narāḥ || 12 ||
[Analyze grammar]

snānaṃ jāgaraṇaṃ dīpaṃ tulasīvanasevanam |
kārttike ye prakurvaṃti te narā viṣṇumūrttayaḥ || 13 ||
[Analyze grammar]

itthaṃ dinatrayamapi kārtike ye prakurvate |
devānāmapi te vaṃdyāḥ kiṃ yairājanmataḥ kṛtam || 14 ||
[Analyze grammar]

itthaṃ guṇavatī samyakpratyabdaṃ pratinīyate |
nityaṃ viṣṇoḥ parikare bhaktā tatparamānasā || 15 ||
[Analyze grammar]

kadācijjarasā sātha kṛśāṃgī jvarapīḍitā |
snātuṃ gaṃgāṃ gatā kāṃte kathaṃcicchanakaistathā || 16 ||
[Analyze grammar]

yāvajjalāṃtaragatā kaṃpitā śītapīḍitā |
tāvatsā vihvalā paśyadvimānaṃ prāptamaṃbarāt || 17 ||
[Analyze grammar]

śaṃkhacakragadāpadmahastairāsannamaṃbarāt |
viṣṇurūpadharaiḥ samyagvainateyadhvajāṃkitaiḥ || 18 ||
[Analyze grammar]

ārohayanvimānaṃ tamapsarogaṇasevitam |
cāmarairvījyamānāṃ tāṃ vaikuṃṭhamanayangaṇāḥ || 19 ||
[Analyze grammar]

atha sā tadvimānasthā jvaladagniśikhopamā |
kārttikavratapuṇyena matsānnidhyagatābhavat || 20 ||
[Analyze grammar]

atha brahmādidevānāṃ yathā prārthanayā bhuvam |
āgacchatā gaṇāḥ sarve yātāste'pi mayā saha || 21 ||
[Analyze grammar]

etepi yādavāḥ sarve madgaṇā eva bhāmini |
pitā te devaśarmābhūtsatrājidadhipo hyayam || 22 ||
[Analyze grammar]

yaścaṃdraśarmā so'krūrastvaṃ sā guṇavatī śubhe |
kārttikavratapuṇyena bahumatprītivarddhanī || 23 ||
[Analyze grammar]

mama dvāre tvayā pūrvaṃ tulasīvāṭikā kṛtā |
tasmādayaṃ kalpavṛkṣastavāṃgaṇataḥ śubhe || 24 ||
[Analyze grammar]

kārtike dīpamānaṃ ca yattvayā tu kṛtaṃ purā |
tvaddehagehasaṃstheyaṃ tasmāllakṣmī sthirābhavat || 25 ||
[Analyze grammar]

yacca vratādikaṃ sarvaṃ viṣṇave bhartṛrūpiṇe |
niveditavatī tasmānmama bhāryātvamāgatā || 26 ||
[Analyze grammar]

ājanmamaraṇātpūrvaṃ kārttike yadvrataṃ kṛtam |
kadācidapi tenaiva madviyogaṃ na paśyasi || 27 ||
[Analyze grammar]

evaṃ ye kārttike māsi narā vrataparāyaṇāḥ |
matsānnidhyaṃ gatāste'pi prītidā tvaṃ yathā mama || 28 ||
[Analyze grammar]

yajñadānavratatapaḥ kāriṇo mānavāḥ khalu |
kārttikavratapuṇyasya nāpnuvaṃti kalāmapi || 29 ||
[Analyze grammar]

itthaṃ niśamya bhuvanādhipatestadānīṃ prākpuṇyajanmabhava vaibhava jātaharṣā |
viśveśvaraṃ tribhuvanaikanidānabhūtaṃ kṛṣṇaṃpraṇamya vacanaṃ nijagāda satyā || 30 ||
[Analyze grammar]

iti śrīpādmemahāpurāṇe paṃcapaṃcāśatsahasrasaṃhitāyāṃ kārttikamāhātmye śrīkṛṣṇasatyabhāmāsaṃvāde satyāpūrvajanmavarṇanaṃnāmaikonanavatitamo'dhyāyaḥ || 89 ||
[Analyze grammar]