Chapter 88

[English text for this chapter is available]

sūtauvāca |
ataḥparaṃ kārtikamāhātmyaṃ prastūyate |
sūta uvāca |
ekadā dvārakāmāgādṛṣiḥ kṛṣṇadidṛkṣayā |
puṣpāṇyādāya divyāni kalpavṛkṣotthitāni ca || 1 ||
[Analyze grammar]

nāradaṃ svāgatenāsau kṛṣṇaḥ satkāramācarat |
idamarghyamidaṃ pādyamityuvācāsanaṃdadat || 2 ||
[Analyze grammar]

nāradastāni puṣpāṇi kṛṣṇāyopājahāra ca |
kṛṣṇaḥ ṣoḍaśasāhasrastrībhyastāni vyabhajyata || 3 ||
[Analyze grammar]

vismṛtya satyabhāmāṃ tu sarvābhyastānyadātprabhuḥ |
satyabhāmā tataḥ kruddhā krodhāgāraṃ samāviśat || 4 ||
[Analyze grammar]

samājñāya tataḥ kṛṣṇastatra gatvā samāhitaḥ |
satyabhāmāṃ mānayitvā garuḍaṃ manasā smaran || 5 ||
[Analyze grammar]

smṛtamātrastu garuḍastadāgatyāgrataḥ sthitaḥ |
āruhya vegātpatraṃ tamityuvāca priyāṃ prabhuḥ || 6 ||
[Analyze grammar]

satye tvaṃ mākṛthāḥ krodhaṃ tvatkṛte devataiḥ saha |
virudhya devarājānaṃ ropayiṣye tavāṃgaṇe || 7 ||
[Analyze grammar]

kalpadrumaṃ mahābhāge'parādhaṃ me kṣamāṃ kuru |
iti kṛtvā pratijñāṃ tu kṛṣṇaḥ sa satyabhāmayā || 8 ||
[Analyze grammar]

devalokamagāttūrṇaṃ yatra devaḥ sa vṛtrahā |
yācitaḥ kalpavṛkṣārthamuttaraṃ dattavānprabhum || 9 ||
[Analyze grammar]

nāyaṃ devadrumo bhūmyāṃ prāptuṃ yogyastvayā prabho |
tadā kruddho mahābāhurvṛkṣamutpāṭya mūlataḥ || 10 ||
[Analyze grammar]

vāhamāropayāmāsa vegena balavattaraḥ |
tadā vajradharo vegādvajramudyamya vīryavān || 11 ||
[Analyze grammar]

garuḍaṃ tāḍayāmāsa kalpavṛkṣaṃ tyajeriti |
tadā patrarathaḥ patraṃ kuliśasyāpi gauravāt || 12 ||
[Analyze grammar]

ekaṃ visarjayāmāsa tvarayā prajagāma ca |
tena vajraprahāreṇa trayobhūva patatriṇaḥ || 13 ||
[Analyze grammar]

mayūro nakulaścāṣaḥ kṛṣṇo dvārāvatīmagāt |
āgatya satyabhāmāyā gṛhe cainamaropayat |
tadaiva nārado'bhyāgātsatyayā mānito bahu || 14 ||
[Analyze grammar]

satyabhāmovāca |
īdṛśaḥ kalpavṛkṣo'yaṃ patiretādṛśaḥ prabhuḥ |
bhavebhave kathaṃ prāpyastadākhyātu bhavānmama || 15 ||
[Analyze grammar]

iti pṛṣṭastadā prāha nārado munisattamaḥ |
prāpyate satyabhāme'yaṃ tulāpuruṣa dānataḥ || 16 ||
[Analyze grammar]

satyabhāmā tadā kṛṣṇaṃ kalpavṛkṣasamanvitam |
nāradāyaiva sā prādāttolayitvā vidhānataḥ |
sarvopaskaramākṛṣya nāradastridivaṃ yayau || 17 ||
[Analyze grammar]

sūta uvāca |
śriyaḥpatimathāmaṃtrya gate devarṣisattame |
harṣotphullānanā satyā vāsudevamathābravīt || 18 ||
[Analyze grammar]

satyabhāmovāca |
dhanyāsmi kṛtakṛtyāsmi saphalaṃ jīvitaṃ ca me |
majjanmani nidāne ca dhanyau tau pitarau mama || 19 ||
[Analyze grammar]

yau māṃ trailokasubhagāṃ janayāmāsaturdhruvam |
ṣoḍaśastrīsahasrāṇāṃ vallabhāhaṃ yatastava || 20 ||
[Analyze grammar]

yasmānmayādipuruṣaḥ kalpavṛkṣasamanvitaḥ |
yathoktavidhinā samyaṅnāradāya samarpitaḥ || 21 ||
[Analyze grammar]

yadvārtāmapi jānaṃti bhūmisaṃsthāna jaṃtavaḥ |
so'yaṃ kalpadrumo gehe mama tiṣṭhati sāṃpratam || 22 ||
[Analyze grammar]

trailokyādhipateścāhaṃ śrīpaterativallabhā |
ato'haṃ praṣṭumicchāmi kiṃcittvāṃ madhusūdana || 23 ||
[Analyze grammar]

yadi tvaṃ matpriyakaraḥ kathayasvātra vistarāt |
śrutvā tacca punaścāhaṃ karomi hitamātmanaḥ || 24 ||
[Analyze grammar]

yathākalpaṃ tvayā deva viyuktā syāṃ na karhicit |
sūta uvāca |
iti priyāvacaḥ śrutvā smerāsyo'yaṃ gadāgrajaḥ || 25 ||
[Analyze grammar]

satyā kare karaṃ kṛtvāgamatkalpatarostalam |
niṣiddhyānucaraṃ lokaṃ savilāsaṃ priyānvitaḥ || 26 ||
[Analyze grammar]

prahasya satyāmāmaṃtrya provāca jagatāṃpatiḥ |
tatprīti paritoṣārthaṃ lasatpulakitāṃgajaḥ || 27 ||
[Analyze grammar]

kṛṣṇa uvāca |
na me tvattaḥ priyatamā kācidanyā nitaṃbinī |
ṣoḍaśastrīsahasrāṇāṃ priye prāṇasamā hyasi || 28 ||
[Analyze grammar]

tvadarthaṃ devarājena virodho daivataiḥ saha |
tvayā yatprārthitaṃ kāṃte śṛṇu yacca mahadbhavet || 29 ||
[Analyze grammar]

adeyamathavākāryamakathyamapi yatpunaḥ |
tvatkṛtaṃ tu kathaṃ praśnaṃ kathayāmi na tu priye |
pṛcchasva sarvaṃ kathaye yatte manasi vartate || 30 ||
[Analyze grammar]

satyovāca |
dānaṃ vrataṃ tapo vāpi kiṃ tu pūrvaṃ mayākṛtam |
yenāhaṃ martyajā martye bhavānīvā'bhavaṃ kila || 31 ||
[Analyze grammar]

tavāṃgārddhaharā nityaṃ garuḍoparigāminī |
iṃdrādidevatāvāsamagamaṃ ca tvayā saha || 32 ||
[Analyze grammar]

atastvāṃ praṣṭumicchāmi kiṃ kṛtaṃ tu mayā śubham |
janmāṃtare ca kiṃ śīlā kā cāhaṃ kasya kanyakā || 33 ||
[Analyze grammar]

śrīkṛṣṇa uvāca |
śṛṇuṣvaikamanāḥ kāṃte yattvaṃ vai pūrvajanmani |
puṇyaṃ vrataṃ kṛtavatī tatsarvaṃ kathayāmi te || 34 ||
[Analyze grammar]

āsītkṛtayugasyāṃte māyāpuryāṃ dvijottamaḥ |
ātreyo devaśarmeti vedavedāṃgapāragaḥ || 35 ||
[Analyze grammar]

ātitheyo'gniśuśrūṣuḥ sauravrata parāyaṇaḥ |
sūryamārādhayannityaṃ sākṣātsūryya ivāparaḥ || 36 ||
[Analyze grammar]

tasyātivayasaścāsīnnāmnā guṇavatī sutā |
aputraḥ sa svaśiṣyāya caṃdra nāmne dadau sutām || 37 ||
[Analyze grammar]

tameva putravanmene sa ca taṃ pitṛvadvaśī |
tau kadācidvanaṃ yātau kuśedhmaharaṇārthinau || 38 ||
[Analyze grammar]

himādripādajavane ceratustau yatastataḥ |
tau tato rākṣasaṃ ghoramāyāṃtaṃ samapaśyatām || 39 ||
[Analyze grammar]

bhayavihvalasarvāṃgāvasamarthau palāyitum |
nihatau rakṣasā tena kṛtāṃtasamarūpiṇā || 40 ||
[Analyze grammar]

tau tu kṣetraprabhāveṇa dharmaśīlatayā punaḥ |
vaikuṃṭhabhavanaṃ nītau madgaṇairmatsamīpagaiḥ || 41 ||
[Analyze grammar]

yāvajjīvaṃtu yattābhyāṃ sūryapūjādikaṃ kṛtam |
tena vai karmaṇā tābhyāṃ suprīto'haṃ kilābhavam || 42 ||
[Analyze grammar]

śaivāḥ saurāśca gāṇeśā vaiṣṇavāḥ śaktipūjakāḥ |
māmeva prāpnuvaṃtīha varṣāṃbhaḥ sāgaraṃ yathā || 43 ||
[Analyze grammar]

eko'haṃ paṃcadhā jātaḥ krīḍayannāmabhiḥ kila |
devadatto yathā kaścitputrādyāhvānanāmabhiḥ || 44 ||
[Analyze grammar]

tataśca tau madbhavanādhivāsinau vimānayānau ravivarcasāvubhau |
mattulyarūpau mama sannidhānagau divyāṃganā caṃdanabhogabhoginau || 45 ||
[Analyze grammar]

iti śrīpādmemahāpurāṇe paṃcapaṃcāśatsahasrasaṃhitāyāṃ śrīkṛṣṇasatyabhāmā saṃvāde aṣṭāśītitamo'dhyāyaḥ || 88 ||
[Analyze grammar]