Chapter 80

[English text for this chapter is available]

śrīpārvatyuvāca |
aho viṣṇośca māhātmyaṃ vada viśveśvara prabhoḥ |
yanmāhātmyaṃ punaḥ śrutvā na bhave jāyate kvacit || 1 ||
[Analyze grammar]

mahādeva uvāca |
śṛṇu sundari vakṣyāmi viṣṇormāhātmyamuttamam |
śrutvā tu labhate puṇyaṃ hyaṃte mokṣamavāpnuyāt || 2 ||
[Analyze grammar]

devavrataṃ mahāprājñaṃ dhyānayogaparāyaṇam |
āśrayaṃ sarvaśāstrāṇāṃ yateṃdriyamakalmaṣam || 3 ||
[Analyze grammar]

apradhṛṣyaṃ mahābhāgaṃ devairapi savāsavaiḥ |
satyasaṃdhaṃ jitakrodhaṃ samatve pariniṣṭhitam || 4 ||
[Analyze grammar]

nārāyaṇe jagannāthe śaraṇye bhaktavatsale |
parāṃ niṣṭhāmanuprāptaṃ vāṅmanaḥ kāya karmabhiḥ || 5 ||
[Analyze grammar]

guṇanāmāśrayaṃ śāṃtaṃ bhīṣmaṃ kuru pitāmaham |
praṇamya śirasā bhūmau papracchedaṃ yudhiṣṭhiraḥ || 6 ||
[Analyze grammar]

yudhiṣṭhira uvāca |
kecidāhuḥ paraṃ dharmaṃ kecidāhuḥ paraṃ dhanam |
keciddānaṃ praśaṃsaṃti samudāyaṃ tathāpare || 7 ||
[Analyze grammar]

sāṃkhyaṃ kecitpraśaṃsaṃti yogamanye tathā param |
kecijjñānaṃ praśaṃsaṃti kecidāhuḥ paraṃ śrutam |
samyakdhyānaṃ paraṃ kecitkecidvairāgyamuttamam || 8 ||
[Analyze grammar]

agniṣṭomādikaṃ karma tathā kecitparaṃ viduḥ |
ātmajñānaṃ paraṃ kecitsamaloṣṭāśmakāṃcanāḥ || 9 ||
[Analyze grammar]

yamāṃśca niyamāṃścaiva kecidvairāgyamuttamam |
kāruṇyaṃ ca pare kecidahiṃsāṃ ca tapasvinaḥ || 10 ||
[Analyze grammar]

śaucaṃ kecitparaṃ prāhuḥ keciddevārcanaṃ narāḥ |
vyāmohaṃ cātra gacchaṃti vyāmugdhāḥ pāpakarmabhiḥ || 11 ||
[Analyze grammar]

yadeteṣu paraṃ kṛtyamanuṣṭheyaṃ mahātmabhiḥ |
vaktumarhasi dharmajña sarvaśāstrabhṛtāṃ vara || 12 ||
[Analyze grammar]

mahādeva uvāca |
bhūrloke yā kathā jātā bhaiṣmī yaudhiṣṭhirī sati |
tāmahaṃ saṃpravakṣyāmi lokānāṃ ca hitāya vai |
etānpraśnāṃstadā śrutvā prāha bhīṣmo yudhiṣṭhiram || 13 ||
[Analyze grammar]

bhīṣma uvāca |
śrūyatāmidamatyaṃtaṃ gūḍhaṃ saṃsāramocanam |
śrotavyaṃ yattvayā samyagjñātavyaṃ dharmanaṃdana || 14 ||
[Analyze grammar]

atraivodāharaṃtīmaṃ puṇyaṃ caiva purātanam |
puṃḍarīkasya saṃvādaṃ maharṣernāradasya ca || 15 ||
[Analyze grammar]

brāhmaṇaḥ śrutisaṃpannaḥ puṃḍarīko mahāmatiḥ |
āśrame prathame tiṣṭhangurūṇāṃ vaśagaḥ sadā || 16 ||
[Analyze grammar]

jiteṃdriyo jitakrodhaḥ saṃdhyopāsanatatparaḥ |
vedavedāṃganipuṇaḥ śāstreṣu ca vicakṣaṇaḥ || 17 ||
[Analyze grammar]

samidbhiḥ sādhuhavyena sāyaṃprātarhutānalaḥ |
dhyātvā jagatpatiṃ viṣṇuṃ samyagārādhayadvibhum || 18 ||
[Analyze grammar]

tapaḥ svādhyāyanirataḥ sākṣādbrahmasuto yathā |
udakeṃdhanapuṣpādyairasakṛtpūjayangurum || 19 ||
[Analyze grammar]

mātāpitrośca śuśrūṣurbhikṣāhārī vimatsaraḥ |
brahmavidyāmadhīyānaḥ prāṇāyāmaparāyaṇaḥ || 20 ||
[Analyze grammar]

tasya sarvātmabhūtasya saṃsāre nispṛhasya ca |
mahātmano buddhirāsītsaṃsārārṇavatāriṇī || 21 ||
[Analyze grammar]

mātaraṃ pitaraṃ caiva bhātṝnatha suhṛjjanān |
mitrāṇi mātulāṃścaiva sakhīnsaṃbaṃdhibāṃdhavān || 22 ||
[Analyze grammar]

dhanadhānyasamṛddhaṃ ca grahaṃ vā śakrasaṃnibham |
kṣetrāṇi sumahārhāṇi sarvasasyodbhavāni ca || 23 ||
[Analyze grammar]

parityajya mahāsatvastṛṇānīva mahāsukhī |
vicacāra mahīṃ ramyāṃ śākamūlaphalāśanaḥ || 24 ||
[Analyze grammar]

gaṃgāṃ ca yamunāṃ caiva gomatīmatha gaṃḍikām |
śatadruṃ ca payoṣṇīṃ ca sarayūṃ ca sarasvatīm || 25 ||
[Analyze grammar]

prayāgaṃ narmadāṃ caiva śoṇaṃ caiva mahānadam |
prabhāsaṃ viṃdhyatīrthāni himavatprabhavāni ca || 26 ||
[Analyze grammar]

āśrameṣu ca yāni syurnaimiṣe puṣkarādiṣu |
kurukṣetre ca yāni syustathā govarddhanādiṣu || 27 ||
[Analyze grammar]

anyāni sumahātejāstīrthāni susamāhitaḥ |
vicacāra mahāyogī yathākāle yathāvidhi || 28 ||
[Analyze grammar]

kadācidātmavāndhīraḥ śālagrāmaṃ tapodhanaḥ |
puṃḍarīko mahābhāgaḥ pūrvakarmavaśānugaḥ || 29 ||
[Analyze grammar]

saṃsevyamānaṃ munibhistatvavidbhistapodhanaiḥ |
munīnāmāspadaṃ ramyaṃ purāṇeṣvapi viśrutam || 30 ||
[Analyze grammar]

bhūṣitaṃ caiva cakrādyaiścakrāṃkitaśilātalam |
ramyaṃ viviktavistīrṇaṃ sadā viṣṇuprasādakam || 31 ||
[Analyze grammar]

kiṃca cakrāṃkitāstatra prāṇinaḥ puṇyadarśanāḥ |
viciraṃti yathākāmaṃ pūṇyatīrthapradarśinaḥ || 32 ||
[Analyze grammar]

tasminkṣetre mahāpuṇye śāligrāme mahāmatiḥ |
snātvā devahde tīrthe sarasvatyāṃ ca suvrataḥ || 33 ||
[Analyze grammar]

jātismaryāṃ cakrakuṃḍe cakranadyāśriteṣu ca |
tathānyānyapi tīrthāni tasminneva cacāra saḥ || 34 ||
[Analyze grammar]

tataḥ kṣetraprabhāvena tīrthānāṃ caiva tejasā |
manaḥprasādamabhajattasminneva mahāmanāḥ || 35 ||
[Analyze grammar]

so'pi tīrthaviśuddhātmā puṃḍarīkastapodhanaḥ |
tatraiva vasatiṃ cakre dhyānayogaparāyaṇaḥ || 36 ||
[Analyze grammar]

tatraiva siddhimākāṃkṣannārādhya garuḍadhvajam |
śāstroktena vidhānena bhaktyā paramayā punaḥ || 37 ||
[Analyze grammar]

uvāsa ciramekākī nirdvaṃdvaḥ sajiteṃdriyaḥ |
śākamūlaphalāhāraḥ saṃtuṣṭaḥ samadarśanaḥ || 38 ||
[Analyze grammar]

yamaiścaniyamaiścaiva tathaivāsanabaṃdhanaiḥ |
prāṇāyāmaiśca tīrthaiśca pratyāhāraiśca saṃtataiḥ || 39 ||
[Analyze grammar]

dhāraṇābhistathā dhyānaiḥ samādhibhirataṃdritaḥ |
yogābhyāsaṃ sadā samyakcakre vigatakilbiṣaḥ || 40 ||
[Analyze grammar]

vaidikaiścāṃgikaiścaiva tathā paurāṇikairapi |
ārādhayati sarveśaṃ tataḥ śuddhimavāpa saḥ || 41 ||
[Analyze grammar]

rāgadveṣavinirmuktaḥ svadharmaiva rūpavān |
ārādhayāmāsa devaṃ tadgatenāṃtarātmanā || 42 ||
[Analyze grammar]

tutoṣa bhagavānviṣṇuḥ puṃḍarīkāyatekṣaṇaḥ |
bhagavānnāradamiti prasanno'smyasya dhīmataḥ || 43 ||
[Analyze grammar]

tataḥ kadācittaṃ deśaṃ nāradaḥ paramārthavit |
jagāma sumahātejāḥ sākṣādādityasannibhaḥ || 44 ||
[Analyze grammar]

taṃ draṣṭukāmo bhagavānpuṃḍarīkaṃ taponidhim |
viṣṇubhaktiparītātmā vaiṣṇavānāṃ hite rataḥ || 45 ||
[Analyze grammar]

sa dṛṣṭvā nāradaṃ prāptaṃ tejomaṃḍalamaṃḍitam |
mahāmatirmahodāraḥ sarvavedaikabhājanam || 46 ||
[Analyze grammar]

prāṃjaliḥ praṇato bhūtvā prahṛṣṭenāṃtarātmanā |
arghaṃ dattvā vidhānena praṇāmamakarotpunaḥ || 47 ||
[Analyze grammar]

ko'yamatyadbhutākārastejasvī hṛdyaveṣadhṛk |
ātodyahastaḥ sumukho jayamaṃḍalamaṃḍitaḥ || 48 ||
[Analyze grammar]

vivasvānathavā vahniriṃdro varuṇa eva vā |
iti saṃciṃtayansthitvā jagāda paramadyutim || 49 ||
[Analyze grammar]

puṃḍarīka uvāca |
ko bhavāniha saṃprāptaḥ kuto vā paramadyutiḥ |
tvaddarśanaṃ hi bhagavanprāyeṇa bhuvi durlabham || 50 ||
[Analyze grammar]

naiva dṛṣṭaḥ pumānvāpi mayā tava samaḥ prabho |
vaktumarhasyaśeṣeṇa yatpradiṣṭaṃ mayānagha || 51 ||
[Analyze grammar]

nārada uvāca |
nārado'haṃmanuprāptastvaddarśanakutūhalāt |
prabhāvaṃ bhagavadbhaktaṃ tvādṛśaṃ satataṃ dvija || 52 ||
[Analyze grammar]

smṛtaḥ saṃtoṣito vāpi pūjito vā dvijottamaḥ |
punāti bhagavadbhaktaścāṃḍālo'pi yadṛcchayā || 53 ||
[Analyze grammar]

dāso'haṃ vāsudevasya devadevasya śārṅgiṇaḥ |
śaṃkhacakragadāpāṇestrailokyasyaikacakṣuṣaḥ || 54 ||
[Analyze grammar]

ityukto nāradenāsau bhaktiparyākulātmanā |
provāca madhuraṃ vipraṃ taddarśanasuvismitaḥ || 55 ||
[Analyze grammar]

puṃḍarīka uvāca |
dhanyo'haṃ dehināṃ madhye supūjyo'haṃ surairapi |
kṛtārthāḥ pitaro me'dya saṃprāptaṃ janmanaḥ phalam || 56 ||
[Analyze grammar]

anugṛhṇīṣva devarṣe tvadbhaktasya viśeṣataḥ |
taṃ kariṣyāmyahaṃ vidvanbhrāmyamāṇaḥ svakarmabhiḥ || 57 ||
[Analyze grammar]

kartavyaṃ paramaṃ guhyaṃ upadeṣṭuṃ tvamarhasi |
tvaṃ gatiḥ sarvabhūtānāṃ vaiṣṇavānāṃ viśeṣataḥ || 58 ||
[Analyze grammar]

nārada uvāca |
anekānīha śāstrāṇi karmāṇi ca tathā dvija |
dharmavargaṃ bahuvidhaṃ tathaiva bhuvi mānasam || 59 ||
[Analyze grammar]

vailakṣaṇyaṃ ca jagatastasmādeva dvijottama |
anyathā sarvasatvānāṃ sukhaṃ vā duḥkhameva ca || 60 ||
[Analyze grammar]

vijñānamātraṃ kṣaṇikaṃ nirātmakamidaṃ jagat |
iti kaiścitparijñātaṃ bāhyārthanirapekṣakam || 61 ||
[Analyze grammar]

avyaktājjāyate nityaṃ nityānnityamidaṃ jagat |
ityevaṃ prāhurapare tatraiva layameti ca || 62 ||
[Analyze grammar]

ātmano bahavaḥ proktā nityāḥ sarvagatāstathā |
anye matimatāṃ śreṣṭhāstatvālokanatatparāḥ || 63 ||
[Analyze grammar]

yāvaccharīramātmānaṃ pratipannāstathāpare |
hastikīṭādidehe'pi mahāṃtamaṃḍameva ca || 64 ||
[Analyze grammar]

yathā'dyajagatovṛttistathā kālāṃtareṣvapi |
pravāho nityamevaiṣa kaḥ kartteti ca kecana || 65 ||
[Analyze grammar]

yadyatpratyakṣaviṣayaṃ tattadatra na vidyate |
kutaḥ svargādayaḥ saṃtītyanye vijitamānasāḥ || 66 ||
[Analyze grammar]

nirīśvaramidaṃ prāhuḥ seśvaraṃ ca tathāpare |
atyaṃtabhinnamatayaḥ paramārthaparāṅmukhāḥ || 67 ||
[Analyze grammar]

evaṃ manye'pi kuhakā yathāmati yathāśrutam |
vadaṃti vividhairbhedaiḥ svayukti sthitikārakāḥ || 68 ||
[Analyze grammar]

tarkeṣvavahito bhūtvā kathayāmi tapodhana |
paramārthamimaṃ puṇyaṃ ghoraṃ saṃsāranāśanam || 69 ||
[Analyze grammar]

tanmūlamanujānaṃti tato devādayo narāḥ |
pramāṇenopalabhyaṃte na pramāṇaṃ vimohitaiḥ || 70 ||
[Analyze grammar]

anāgatamatītaṃ ca viprakṛṣṭamatīva yat |
na gṛhītaṃ yathāśaktyā varttamānārthaniṣṭhitam || 71 ||
[Analyze grammar]

āgamo munibhiḥ prokto pūrvarūpakramāgataḥ |
pramāṇaṃ sa tu vijñeyaḥ paramārthaprasādhakaḥ || 72 ||
[Analyze grammar]

yadabhyāsabalājjñānaṃ rāgadveṣamalāpaham |
utpadyate dvijaśreṣṭha so'yamāgamasaṃjñakaḥ || 73 ||
[Analyze grammar]

phalaṃ karma ca yattatvaṃ vijñānaṃ darśanaṃ vibhum |
jātyādikalpanāhīnaṃ dvitīyāgamalakṣaṇam || 74 ||
[Analyze grammar]

ātmasaṃvedanaṃ nityaṃ sanātanamatīṃdriyam |
cinmātramamṛtaṃ jñeyamanaṃtamajamavyayam || 75 ||
[Analyze grammar]

vyaktāvyaktasvarūpeṇa vyaktasthitamanaṃjanam |
vyāptā viṣṇuriti khyātaṃ khyātabhinnamavasthitam || 76 ||
[Analyze grammar]

yogidhyeyamavijñeyaṃ paramārthaparāṅmukhaiḥ |
lakṣyate buddhibhirbhinnamabhibhinnaṃ na cātmani || 77 ||
[Analyze grammar]

śṛṇuṣvāvahitastāta kathayāmi tavānagha |
yatproktaṃ brahmaṇā pūrvaṃ pṛcchato mama suvrata || 78 ||
[Analyze grammar]

kadācidbrahmalokasthaṃ brahmāṇaṃ ca pitāmaham |
praṇipatya yathānyāyamapṛcchamajamavyayam || 79 ||
[Analyze grammar]

kimu jñānaṃ paraṃ proktaṃ kaśca yogaḥ paro mataḥ |
etanme tattvato brahmansamācakṣva pitāmaha || 80 ||
[Analyze grammar]

brahmovāca |
śṛṇuṣvāvahitastāta jñānayogamanuttamam |
alpagraṃthaṃ prabhūtārthamaduḥkhopāsanakriyam || 81 ||
[Analyze grammar]

yaḥ paraṃ parayā proktaḥ puruṣaḥ paṃcaviṃśakaḥ |
sa eva sarvabhūtātmā tena ityabhidhīyate || 82 ||
[Analyze grammar]

nārāyaṇo jagaddhāma paramātmā sanātanaḥ |
jagataḥ sṛṣṭisaṃhāra paripālanatatparaḥ || 83 ||
[Analyze grammar]

trayāṇāmātmanāṃ caiko devadevaḥ sanātanaḥ |
ārādhyaḥ sarvadā brahmante paśyaṃti jagatpatim || 84 ||
[Analyze grammar]

yathā jagadavasthānaṃ yathā kālāṃtare punaḥ |
bhūtaṃ bhavyaṃ bhaviṣyaṃ ca viprakṛṣṭaṃ tathaiva ca || 85 ||
[Analyze grammar]

sthūlaṃ sūkṣmaṃ tathā cānyatpaśyaṃti jñānacakṣuṣā |
taccittāstadgataprāṇā nārāyaṇaparāyaṇāḥ || 86 ||
[Analyze grammar]

anyathā maṃdabuddhīnāṃ pratibhāti durātmanām |
kutarkajñānaduṣṭānāṃ vibhakteṃdriyavādinām || 87 ||
[Analyze grammar]

nārada uvāca |
śrūyatāmanyadapi vai kathyamānaṃ mayānagha |
brahmaṇaiva purā proktaṃ jagataḥ kāraṇātmanā || 88 ||
[Analyze grammar]

devānāmiṃdramukhyānāmṛṣīṇāṃ caiva suvrata |
hitāni kathayāmāsa pṛcchatāṃ kamalāsanaḥ || 89 ||
[Analyze grammar]

brahmovāca |
nārāyaṇaparo dharmastathālokāśca śāśvatāḥ |
nārāyaṇaparā yajñāḥ śāstrāṇi vividhāni ca || 90 ||
[Analyze grammar]

vedāḥ sāṃgāstathā cānye viṣṇurviśveśvaro hariḥ |
pṛthivyādīni vibudhāḥ paṃcabhūtāni so'vyayaḥ || 91 ||
[Analyze grammar]

sarvaṃ viṣṇumayaṃ jñeyaṃ vibudhaiḥ sakalaṃ jagat |
tathāpi mānuṣāḥ pāpa na jānaṃti vimohitāḥ || 92 ||
[Analyze grammar]

tasyaiva māyayā vyāptaṃ carācaramidaṃ jagat |
tanmanāstadgataprāṇo jānāti paramārthavit || 93 ||
[Analyze grammar]

īśvaraḥ sarvabhūtānāṃ viṣṇustrailokyapālakaḥ |
tasminnetajjagatsarvaṃ tiṣṭhati prabhavatyapi || 94 ||
[Analyze grammar]

jagatsaṃharate rudraḥ pālane viṣṇurucyate |
utpattau cāhamevātra tathānye lokapālakāḥ || 95 ||
[Analyze grammar]

sarvādhāro nirādhāraḥ sakalo niṣkalastathā |
aṇurmahāṃstathāpyanyattasmācca parataḥ paraḥ || 96 ||
[Analyze grammar]

tameva śaraṇaṃ yāta sarvasaṃhārakarmagam |
sa pitā janitāsmākaṃ kīrtito madhusūdanaḥ || 97 ||
[Analyze grammar]

evamuktāḥ surāḥ sarve brahmaṇā padmayoninā |
praṇemuḥ sarvalokeśaṃ devaṃ viṣṇuṃ janārdanam || 98 ||
[Analyze grammar]

tasmāttvamapi viprarṣe nārāyaṇaparo bhava |
tadanyaḥ ko mahodāraḥ prārthitaṃ dāturmahati || 99 ||
[Analyze grammar]

pitaraṃ mātaraṃ caiva tameva puruṣottamam |
parigṛhṇīṣva lokeśaṃ devadevaṃ jagatpatim || 100 ||
[Analyze grammar]

agnikāryeṇa vai tena tapasādhyayanena vai |
toṣayeddevadeveśaṃ guruṃ nityamataṃdritaḥ || 101 ||
[Analyze grammar]

svarge kṣayaṃ tathā bhogamanuṣṭheyaṃ tathaiva ca |
parigṛhṇīṣva viprarṣe tameva puruṣottamam || 102 ||
[Analyze grammar]

kiṃ tena maṃtrairbahubhiḥ kiṃ tena bahubhirvrataiḥ |
oṃ namonārāyaṇāyeti maṃtraḥ sarvārthasādhakaḥ || 103 ||
[Analyze grammar]

cīravāsā jaṭī vipra daṃḍīmuṃḍita eva vā |
vibhūṣito vā vipreṃdra na liṃgaṃ dharmakāraṇam || 104 ||
[Analyze grammar]

ye nṛśaṃsā durātmānaḥ pāpācāraparāḥ sadā |
tepi yāṃti paraṃ sthānaṃ nārāyaṇaparāyaṇāḥ || 105 ||
[Analyze grammar]

lipyaṃte na ca pāpaughairvaiṣṇavaṃ vītakilbiṣāḥ || 106 ||
[Analyze grammar]

punaṃti sakalaṃ lokaṃ ahiṃsājitamānasāḥ || 107 ||
[Analyze grammar]

kṣatrabaṃdhuriti khyāto rājā prāṇivihiṃsakaḥ |
prāptavānparamaṃ dhāma vaiṣṇavaṃ keśavālayāt || 108 ||
[Analyze grammar]

aṃbarīṣo mahāsatvo rājā paramatatvavit |
hṛṣīkeśaṃ samārādhya vaiṣṇavaṃ padamāptavān || 109 ||
[Analyze grammar]

anye brahmarṣayaḥ śāṃtā bahavaḥ saṃśitavratāḥ |
dhyātvā ca paramātmānaṃ saṃsiddhiṃ paramāṃ gatāḥ || 110 ||
[Analyze grammar]

prahlādaḥ paramāhlādaḥ purā nārāyaṇaṃ harim |
sevito'bhyarcito dhyātastenaiva parirakṣitaḥ || 111 ||
[Analyze grammar]

bharato nāma tejasvī rājā paramadhārmikaḥ |
upāsyainaṃ ciraṃ kālaṃ parāṃ muktimavāptavān || 112 ||
[Analyze grammar]

brahmacārī gṛhastho vā vānaprastho'tha bhikṣukaḥ |
keśavārādhanaṃ hitvā naiva yāṃti parāṃ gatim || 113 ||
[Analyze grammar]

janmāṃtarasahasreṣu yasya syānmatirīdṛśī |
dāso'haṃ viṣṇubhaktānāmiti sarvārthasādhakaḥ || 114 ||
[Analyze grammar]

sa yāti viṣṇusālokyaṃ puruṣo nātra saṃśayaḥ |
kiṃ punastadgataprāṇāḥ puruṣāḥ saṃśitavratāḥ || 115 ||
[Analyze grammar]

ananyamānasairnityaṃ dhyātavyastatvaciṃtakaiḥ |
nārāyaṇo jagadvyāpī paramātmā sanātanaḥ || 116 ||
[Analyze grammar]

bhīṣma uvāca |
ityevamuktvā devarṣistatraivāṃtaradhīyata |
paropakāranirato nāradaḥ paramārthavit || 117 ||
[Analyze grammar]

puṃḍarīko'pi dharmātmā nārāyaṇaparāyaṇaḥ |
oṃ namo nārāyaṇāyeti maṃtramaṣṭākṣaraṃ japan || 118 ||
[Analyze grammar]

prasīda mama viśvātmanniti vācaṃ vadansadā |
hṛtpuṃḍarīke goviṃdaṃ pratiṣṭhāpyāmṛtātmakam || 119 ||
[Analyze grammar]

tapasvī vimale saumye śālagrāme tapodhanaḥ |
uvāsa ciramekākī nirdvaṃdvo niṣparigrahaḥ || 120 ||
[Analyze grammar]

svapne'pi keśavānnānyatpaśyatīti mahāmatiḥ |
nidrāpi naiva tasyāsītpuruṣārthavirodhinī || 121 ||
[Analyze grammar]

tapasā brahmacaryeṇa śaucena ca viśeṣataḥ |
janmajanmāṃtarārūḍhe saṃskāre ca yathā tathā || 122 ||
[Analyze grammar]

prasādāddevadevasya sarvalokasya sākṣiṇaḥ |
avāpa paramāṃ siddhiṃ vaiṣṇavīṃ vītakilbiṣaḥ || 123 ||
[Analyze grammar]

śaṃkhacakragadāpāṇiṃ pītavāsasamacyutam |
śyāmalaṃ puṃḍarīkākṣaṃ sa dadarśa sadākṛtim || 124 ||
[Analyze grammar]

siṃhā vyāghrāstathā cānye mṛgāḥ prāṇivihiṃsakāḥ |
virodhaṃ sahajaṃ hitvā sametāstasya saṃnidhau || 125 ||
[Analyze grammar]

vicaraṃti yathākāmaṃ prasanneṃdriyavṛttayaḥ |
parasparahitaṃ ramyaṃ saṃprāptaṃ pāṃḍunaṃdana || 126 ||
[Analyze grammar]

tathā prasannaṃ salilaṃ sarasāṃ saritāmapi |
ṛtavaḥ suprannāśca vimaleṃdriyasaṃyutāḥ || 127 ||
[Analyze grammar]

mārutāśca sukhasparśā vṛkṣāḥ puṣpaphalānvitāḥ |
ānukūlyaṃ yayuḥ sarve padārthāstasya dhīmataḥ || 128 ||
[Analyze grammar]

prasannamabhavattasmai prasannaṃ sacarācaram |
prasanne devadeveśe goviṃde bhaktavatsale || 129 ||
[Analyze grammar]

tataḥ kadācidbhagavānpuṃḍarīkasya dhīmataḥ |
āvirāsījjagannāthaḥ puṃḍarīkāyatekṣaṇaḥ || 130 ||
[Analyze grammar]

śaṃkhacakragadāpāṇiḥ pītavāsāḥ samujjvalaḥ |
puṃḍarīkaviśālākṣaścaṃdrabiṃbanibhānanaḥ || 131 ||
[Analyze grammar]

kiṃkiṇīkuṃḍalī hārī keyūrī kaṭisūtravān |
śrīvatsāṃkaḥ pītavāsāḥ kaustubhena vibhūṣitaḥ || 132 ||
[Analyze grammar]

vanamālāparītāṃgaḥ sphuranmukuṭakuṃḍalaḥ |
sphuratā brahmasūtreṇa muktādāmavilaṃbinā || 133 ||
[Analyze grammar]

virājamāno deveśaścāmaravyajanādibhiḥ |
devaiḥ siddhaiḥ sadeveṃdrairgaṃdharvairmunibhirvaraiḥ || 134 ||
[Analyze grammar]

yakṣairnāgavaraiścaivasevyamāno'psarogaṇaiḥ |
taṃ dṛṣṭvā devadeveśaṃ puṃḍarīko'naghaḥ svayam || 135 ||
[Analyze grammar]

tato buddhyā mahātmānaṃ tuṣṭāva ca janārdanam |
prāṃjaliḥ praṇato bhūtvā prahṛṣṭenāṃtarātmanā || 136 ||
[Analyze grammar]

puṃḍarīka uvāca |
namo'stu viṣṇave tubhyaṃ sarvalokaikacakṣuṣe |
niraṃjanāya nityāya nirguṇāya mahātmane || 137 ||
[Analyze grammar]

tvamīśaḥ sarvabhūtānāṃ tathaiva ca nirīśvaraḥ |
tathābhayārtināśāyagoviṃdogaruḍadhvajaḥ || 138 ||
[Analyze grammar]

anugraheṇabhūtānāṃanekākāradhāriṇe |
tvayi sarvamidaṃ prāhustvanmayaṃ caiva kevalam || 139 ||
[Analyze grammar]

tvamasmājjagato bhinno nirmitaṃ ca jagattvayā |
namostu nābhiprasavanalināya namo namaḥ || 140 ||
[Analyze grammar]

namaḥ samastavedāṃtaviśrutātmavibhūtaye |
tvameva sarvadeveśa kāraṇaṃ kaiṭabhārdana || 141 ||
[Analyze grammar]

prasīda hṛdayāvāsa śaṃkhacakragadādhara |
namaḥ samastabhūtānāmādibhūtāya bhūbhṛte || 142 ||
[Analyze grammar]

anekarūparūpāya viṣṇave prabhaviṣṇave |
yasya brahmādayo devā na vidaṃti sureśvarāḥ || 143 ||
[Analyze grammar]

mahimānaṃ tapomeyaṃ tasmai tubhyaṃ namāmyaham |
vācāmagocaro yasya mahimā tava nāpyate || 144 ||
[Analyze grammar]

jātyādibhirasaṃspṛṣṭaḥ sadā dhyeyo'si tattvataḥ |
tathā vibhedarūpeṇa bhaktānāmanukaṃpayā || 145 ||
[Analyze grammar]

matsyakūrmādirūpeṇa dṛśyase puruṣottama |
bhīṣma uvāca |
puṃḍarīko jagannāthaṃ saṃstuvanpuruṣottamam || 146 ||
[Analyze grammar]

tamevālokayadvīra ciraprārthitadarśanam |
tamāha bhagavānviṣṇuḥ padmanābhastrivikramaḥ || 147 ||
[Analyze grammar]

puṃḍarīkaṃ mahābhāgaṃ tathā gaṃbhīrayā girā || 148 ||
[Analyze grammar]

śrībhagavānuvāca |
prīto'smi vatsa bhadraṃ te puṃḍarīka mahāmate |
varaṃ vṛṣṇīṣva dāsyāmi yatte manasi varttate || 149 ||
[Analyze grammar]

etacchrutvā tu vacanaṃ devadevasya bhāṣitam |
evaṃ vijñāpayāmāsa puṃḍarīko mahāmatiḥ || 150 ||
[Analyze grammar]

puṃḍarīka uvāca |
kvāhamatyaṃta durbuddhiḥ kva bhavaṃto hitaiṣiṇaḥ |
yaddhitaṃ mama deveśa tadājñāpaya mādhava || 151 ||
[Analyze grammar]

evamuktaḥ sa bhagavānsuprītaśca tato'bravīt |
puṃḍarīkaṃ mahābhāgaṃ kṛtāṃjalimupasthitam || 152 ||
[Analyze grammar]

āgaccha kuśalaṃ te'stu mayaiva saha suvrata |
upakārī ca nityātmā mayā tvaṃ sarvadā saha || 153 ||
[Analyze grammar]

bhīṣma uvāca |
evamuktavati prītyā śrīdhare bhaktavatsale |
divi duṃdubhayo neduḥ puṣpavarṣaṃ papāta ha || 154 ||
[Analyze grammar]

brahmādayastathā devāḥ sādhusādhviti cābruvan |
jaguḥ siddhāśca gaṃdharvāḥ kinnarāśca viśeṣataḥ || 155 ||
[Analyze grammar]

tatraiva tamupādāya devadevo jagatpatiḥ |
jagāma garuḍārūḍhaḥ sarvalokanamaskṛtaḥ || 156 ||
[Analyze grammar]

tasmāttvamapi rājeṃdra viṣṇubhaktisamanvitaḥ |
taccittastadgataprāṇastadbhaktānāṃ hite rataḥ || 157 ||
[Analyze grammar]

arcayitvā yathāyogyaṃ bhajasva puruṣottamam |
śṛṇuṣva tatkathāṃ puṇyāṃ sarvapāpapraṇāśinīm || 158 ||
[Analyze grammar]

yenopāyena rājeṃdra viṣṇubhaktisamanvitaḥ |
prīto bhavati viśvātmā tatkuruṣva suvistaram || 159 ||
[Analyze grammar]

aśvamedhaśatairiṣṭvā vājapeyaśatairapi |
prāpnuvaṃti narā naiva nārāyaṇaparāṅmukhāḥ || 160 ||
[Analyze grammar]

sakṛduccaritaṃ yena harirityakṣaradvayam |
baddhaḥ parikarastena mokṣāya gamanaṃ prati || 161 ||
[Analyze grammar]

lābhasteṣāṃ jayasteṣāṃ kutasteṣāṃ parājayaḥ |
yeṣāmiṃdīvaraśyāmo hṛdayastho janārdanaḥ || 162 ||
[Analyze grammar]

ya idaṃ śṛṇuyānnityaṃ paṭhedvāpi samāhitaḥ |
sarvapāpavinirmukto viṣṇulokaṃ sa gacchati || 163 ||
[Analyze grammar]

īśvara uvāca |
etadvai nāmamāhātmyaṃ śrutvā vai naganaṃdini |
dharmārthakāmamokṣāstu bhavaṃti ca na saṃśayaḥ || 164 ||
[Analyze grammar]

śukle kule'vatīrṇo yo brāhmaṇo vedatatparaḥ |
vaiṣṇavo viṣṇurūpo'sau nānyo viprastu karhicit || 165 ||
[Analyze grammar]

mukhe nāmoccaranviṣṇorhṛdaye dhyānatatparaḥ |
śaṃkhacakradharo vidvanmālāṃ tulasijāṃ dadhat || 166 ||
[Analyze grammar]

jīvanmuktaḥ sa vijñeyo bhuktvā bhogāṃstvanekaśaḥ |
ekaviṃśatikulaiḥ sārddhaṃ viṣṇuloke sa modate || 167 ||
[Analyze grammar]

puṃḍarīko yathā śaktyā mukto hyatra na saṃśayaḥ |
bhaktibhāvena goviṃdastuṣṭiṃ prāpnoti śāśvatīm || 168 ||
[Analyze grammar]

kalau vai harigītaṃ tu svagṛhe vā viśeṣataḥ |
sāmagānasamaṃ proktaṃ devārcanasamādhiṣu || 169 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe umāmaheśvarasaṃvāde viṣṇumahimānāmāśītitamo'dhyāyaḥ || 80 ||
[Analyze grammar]