Chapter 71

[English text for this chapter is available]

ṛṣaya ūcuḥ |
sūta jīva ciraṃ sādho tvayātikaruṇātmanā |
saṃvādo hyadbhutaḥ prokto yaścāsīnnāradeśayoḥ || 1 ||
[Analyze grammar]

bhagavannāmamahimā nāradena mahātmanā |
kīdṛkśrutaḥ samākhyāhi śraddhayā śṛṇvatāṃ guro || 2 ||
[Analyze grammar]

sūta uvāca |
śṛṇudhvaṃ munayaḥ sarve purāvṛttaṃ vadāmyaham |
yasmiñchrute dvijaśreṣṭhāḥ kṛṣṇe bhaktirvivarddhate || 3 ||
[Analyze grammar]

ekadā nārado draṣṭuṃ pitaraṃ susamāhitaḥ |
jagāma meruśikharaṃ siddhacāraṇasevitam || 4 ||
[Analyze grammar]

tatra devaṃ samāsīnaṃ brahmāṇaṃ jagatāṃ patim |
namaskṛtyābravīdviprā nārado munisattamaḥ || 5 ||
[Analyze grammar]

nārada uvāca |
nāmno'sya yāvatīśaktirvada viśveśvara prabho |
kīdṛktu nāmamahimā avyayasya mahātmanaḥ || 6 ||
[Analyze grammar]

yo'yaṃ viśveśvaraḥ sākṣādayaṃ nārāyaṇo hariḥ |
paramātmā hṛṣīkeśaḥ sarvajīveṣu saṃgataḥ || 7 ||
[Analyze grammar]

māyāvimohitāḥ sarve bhagavaṃtamadhokṣajam |
naiva jānaṃtyasāre'sminnarā mūḍhāḥ kalau yuge || 8 ||
[Analyze grammar]

brahmovāca |
asminkalau viśeṣeṇa nāmoccāraṇapūrvakam |
bhaktiḥ kāryā yathā vatsa tathā tvaṃ śrotumarhasi || 9 ||
[Analyze grammar]

dṛṣṭaṃ pareṣāṃ pāpānāmanuktānāṃ viśodhanam |
viṣṇorjiṣṇoḥ prayatnena smaraṇaṃ pāpanāśanam || 10 ||
[Analyze grammar]

mithyā jñātvā tataḥ sarvaṃ harernāmapaṭhanjapan |
sarvapāpavinirmukto yāti viṣṇoḥ paraṃpadam || 11 ||
[Analyze grammar]

ye vadaṃti narā nityaṃ harirityakṣaradvayam |
tasyoccāraṇamātreṇa vimuktāste na saṃśayaḥ || 12 ||
[Analyze grammar]

prāyaścittāni sarvāṇi kṛṣṇānusmaraṇaṃ param |
prātarniśi tathā sāyaṃ madhyāhnādiṣu saṃsmaran || 13 ||
[Analyze grammar]

nārāyaṇamavāpnoti sadyaḥ pāpakṣayaṃ naraḥ |
viṣṇusaṃsmaratā deva samastakleśasaṃkṣaye || 14 ||
[Analyze grammar]

muktiṃ prayāti svargāptistasya viṣṇostu kīrttanāt |
vāsudeve mano yasya japahomārcanādiṣu || 15 ||
[Analyze grammar]

tadakṣayaṃ vijānīyādyāvadiṃdrāścaturdaśa |
kva nākapṛṣṭhagamanaṃ punarāvṛttilakṣaṇam || 16 ||
[Analyze grammar]

kva japo vāsudevasya muktibījamanuttamam |
tanmukhaṃ paramaṃ tīrthaṃ yatrāvarttaṃ vitanvatī || 17 ||
[Analyze grammar]

namo nārāyaṇāyeti bhāti prācī sarasvatī |
tasmādaharniśaṃ viṣṇusmaraṇātpuruṣottamaḥ || 18 ||
[Analyze grammar]

na yāti narakaṃ putra saṃkṣīṇakalikalmaṣaḥ |
satyaṃ satyaṃ punaḥ satyaṃ bhāṣitaṃ mama suvrata || 19 ||
[Analyze grammar]

nāmoccāraṇamātreṇa mahāpāpātpramucyate |
rāmarāmeti rāmeti rāmeti ca punarjapan || 20 ||
[Analyze grammar]

sa cāṃḍālo'pi pūtātmā jāyate nātra saṃśayaḥ |
kurukṣetraṃ tathā kāśī gayā vai dvārikā tathā || 21 ||
[Analyze grammar]

sarvaṃ tīrthaṃ kṛtaṃ tena nāmoccāraṇamātrataḥ |
kṛṣṇakṛṣṇeti kṛṣṇeti iti vāyo japanpaṭhan || 22 ||
[Analyze grammar]

ihalokaṃ parityajya modate viṣṇusaṃnidhau |
nṛsiṃheti mudā vipra satataṃ prajapanpaṭhan || 23 ||
[Analyze grammar]

mahāpāpātpramucyeta kalau bhāgavato naraḥ |
dhyāyankṛte yajanyajñaistretāyāṃ dvāpare'rcayan || 24 ||
[Analyze grammar]

yadāpnoti tadāpnoti kalau saṃkīrtya keśavam |
etajjñātvā nimagnāśca jagadātmani keśave || 25 ||
[Analyze grammar]

sarvapāpaparikṣīṇā yāṃti viṣṇoḥ paraṃ padam |
matsyaḥ kūrmo varāhaśca nṛsiṃho vāmanastathā || 26 ||
[Analyze grammar]

rāmo rāmaśca kṛṣṇaśca buddhaḥ kalkī tataḥ smṛtaḥ |
ete daśāvatārāśca pṛthivyāṃ parikīrtitāḥ || 27 ||
[Analyze grammar]

eteṣāṃ nāmamātreṇa brahmahā śudhyate sadā |
prātaḥ paṭhanjapandhyāyanviṣṇornāma yathā tathā || 28 ||
[Analyze grammar]

mucyate nātra saṃdehaḥ sa vai nārāyaṇo bhavet |
sūta uvāca |
śrutvā vai nārado hyetadvismayaṃ paramaṃ gataḥ || 29 ||
[Analyze grammar]

uvāca pitaraṃ tatra kimuktaṃ devasattama |
devāḥ sahasraśaḥ saṃti rudrāḥ saṃti sahasraśaḥ || 30 ||
[Analyze grammar]

pitaraḥ saṃti śataśaḥ yakṣāśca kinnarāstathā |
bhūtāḥ pretāḥ piśācāśca ye keciddevayonayaḥ || 31 ||
[Analyze grammar]

teṣāṃ nāmnā ca māhātmyaṃ śrutaṃ dṛṣṭaṃ tathā na ca |
śrīviṣṇornāmamāhātmyaṃ yādṛśaṃ ca śrutaṃ mayā || 32 ||
[Analyze grammar]

yasya vai nāmamātreṇa mucyate nātra saṃśayaḥ |
kiṃ vai tīrthakṛte deva pṛthivyāmaṭane kṛte || 33 ||
[Analyze grammar]

yasya vai nāmamahimā śrutvā mokṣamavāpnuyāt |
tanmukhaṃ tu mahattīrthaṃ tanmukhaṃ kṣetrameva ca || 34 ||
[Analyze grammar]

yanmukhe rāmarāmeti tanmukhaṃ sarvakāmikam |
kāni vai tasya nāmāni kati vīryāṇi suvrata || 35 ||
[Analyze grammar]

tatsarvaṃ ca viśeṣeṇa mama brūhi pitāmaha |
brahmovāca |
vyāpako'yaṃ sadā viṣṇuḥ paramātmā sanātanaḥ || 36 ||
[Analyze grammar]

anādinidhanaḥ śrīmānbhūtātmā bhūtabhāvanaḥ |
yasmādahaṃ hi saṃjāto so'yaṃ viṣṇuḥ sadāvatu || 37 ||
[Analyze grammar]

so'yaṃ kālasya kālo vai so'yaṃ mama tu pūrvajaḥ |
akṣayaḥ puṃḍarīkākṣo matimānavyayaḥ pumān || 38 ||
[Analyze grammar]

śeṣaśāyī sadā viṣṇuḥ sahasraśīrṣā mahatprabhuḥ |
sarvabhūtamayaḥ sākṣādviśvarūpo janārdanaḥ || 39 ||
[Analyze grammar]

kaiṭabhārirayaṃ viṣṇurdhātā devo jagatpatiḥ |
tasyāhaṃ nāmagotraṃ ca na vedmi puruṣarṣabha || 40 ||
[Analyze grammar]

vedavādyapyahaṃ tāta nāhaṃ jñātā kadācana |
atastvaṃ gaccha devarṣe yatrāsti kila viśvarāṭ || 41 ||
[Analyze grammar]

sa ca tattvaṃ muniśreṣṭha sarvaṃ te kathayiṣyati |
sa eva puruṣaḥ śrīmānkailāsādhipatiḥ sadā || 42 ||
[Analyze grammar]

sarveṣāṃ viṣṇubhaktānāmayaṃ śreṣṭhaḥ parātparaḥ |
paṃcavaktro hyumākāṃtaḥ sarvaduḥkhanibarhaṇaḥ || 43 ||
[Analyze grammar]

viśveśvaro viśvanāthaḥ sarvadā bhaktavatsalaḥ |
tatra gaccha suraśreṣṭha tatsarvaṃ kathayiṣyati || 44 ||
[Analyze grammar]

piturvacanamākarṇya tatra gaṃtuṃ pracakrame |
vijñātuṃ nāmamāhātmyaṃ kailāsabhavanaṃ prati || 45 ||
[Analyze grammar]

yatra viśveśvaro devo nityaṃ tiṣṭhati bhūtidaḥ |
dadarśa nāradastatra devaṃ taṃ surapūjitam || 46 ||
[Analyze grammar]

kailāsaśikharāsīnaṃ devadevaṃ jagadgurum |
paṃcavaktraṃ daśabhujaṃ trinetraṃ śūlapāṇinam || 47 ||
[Analyze grammar]

kapālinaṃ sakhaṭvāṃgaṃ tīkṣṇaṃ śūlāsidhāriṇam |
pinākadhāriṇaṃ bhīmaṃ varadaṃ vṛṣavāhanam || 48 ||
[Analyze grammar]

bhasmāṃgaṃ vyālaśobhāḍhyaṃ śaśāṃkakṛtaśekharam |
nīlajīmūtasaṃkāśaṃ sūryakoṭisamaprabham || 49 ||
[Analyze grammar]

krīḍaṃtaṃ tatra deveśaṃ sāṣṭāṃgaṃ daṃḍavatpunaḥ |
taṃ dṛṣṭvā tu mahādevo vismayotphullalocanaḥ || 50 ||
[Analyze grammar]

vaiṣṇavānāṃ paraḥ śreṣṭhaḥ prāha vāḍavasattamam |
kasmādiha samāyāto vada devarṣisattama || 51 ||
[Analyze grammar]

nārada uvāca |
ekasminneva kāle tu gato'haṃ brahmaṇoṃtikam |
śrutaṃ tatra mayā deva viṣṇormāhātmyamuttamam || 52 ||
[Analyze grammar]

brahmaṇā kathitaṃ tatra mamāgre devasattama |
nāmno'sya yāvatī śaktiḥ sā śrutā brahmaṇo mukhāt || 53 ||
[Analyze grammar]

tatra pṛṣṭaṃ mayā pūrvaṃ viṣṇornāmasahasrakam |
tadāhaṃ brahmaṇā coktaṃ nāhaṃ jānāmi nārada || 54 ||
[Analyze grammar]

jānātyayaṃ mahārudrastatsarvaṃ kathayiṣyati |
mahāścaryaṃ tu saṃprāpya hyāgatastava sannidhau || 55 ||
[Analyze grammar]

asminkaliyuge ghore'lpāyuṣaścaiva mānavāḥ |
vidharmeṣu ratā nityaṃ nāmaniṣṭhā na vai punaḥ || 56 ||
[Analyze grammar]

pākhaṃḍinastathā viprā dharmeṣu viratāḥ sadā |
saṃdhyāhīna vratabhraṣṭā duṣṭā malinarūpiṇaḥ || 57 ||
[Analyze grammar]

yathā viprāstathā kṣatrā vaiśyāścaiva punaḥ punaḥ |
evaṃ śūdrāstathānye ca na vai bhāgavatā narāḥ || 58 ||
[Analyze grammar]

śūdrā dvijātibāhyāśca kalau viśveśvara prabho |
dharmādharmau na jānaṃti hitaṃ vā'hitameva vā || 59 ||
[Analyze grammar]

evaṃ jñātvā hyahaṃ svāminnāgataḥ saṃnidhau tava |
punaśca nāmamāhātmyaṃ śrutaṃ vai brahmaṇo mukhāt || 60 ||
[Analyze grammar]

tvaṃ devaḥ sarvadevānāṃ tvaṃ nātho mama sarvadā |
tripurāriśca viśvātmā dhātā tvaṃ ca punaḥ punaḥ || 61 ||
[Analyze grammar]

kathayasva prasādena viṣṇornāmasahasrakam |
saubhāgyajananaṃ puṃsāṃ paraṃ bhaktikaraṃ sadā || 62 ||
[Analyze grammar]

brāhmaṇānāṃ brahmadaṃ ca kṣatriyāṇāṃ jayapradam |
vaiśyānāṃ dhanadaṃ nityaṃ śūdrāṇāṃ sukhadāyakam || 63 ||
[Analyze grammar]

tadahaṃ śrotumicchāmi tvatsakāśānmaheśvara |
tvaṃ samartho'si bhaktānāṃ sarvadā keśavaṃ prati || 64 ||
[Analyze grammar]

kathayasva prasādena yadi gopyaṃ na suvrata |
idaṃ pavitraṃ paramaṃ sarvatīrthamayaṃ sadā || 65 ||
[Analyze grammar]

ato vai śrotumicchāmi vada viśveśvara prabho |
śrutvā nāradavākyāni vismayotphullalocanaḥ || 66 ||
[Analyze grammar]

romāṃcitastato jāto viṣṇornāmāni saṃsmaran |
īśvara uvāca |
etadgopyaṃ paraṃ brahmanviṣṇornāmasahasrakam || 67 ||
[Analyze grammar]

etacchrutvā naro vatsa na labheddurgatiṃ kvacit |
kadācicca gate kāle pārvatī māmuvāca ha || 68 ||
[Analyze grammar]

pārvatyuvāca |
kailāsādhipate mahyaṃ kathayasva yathātatham |
tvaṃ kiṃ japasi deveśa paraiśvaryasamāhitaḥ || 69 ||
[Analyze grammar]

sadā tvaṃ bhasmaliptāṃgaḥ kṛttivāsāḥ sadā katham |
jaṭādharaḥ kathaṃ jāto vada viśveśvara prabho || 70 ||
[Analyze grammar]

tvaṃ devaḥ sarvadevānāṃ tvaṃ guruḥ sarvakarmaṇām |
tvaṃ patirmama viśveśa viśvanātha jagatprabho || 71 ||
[Analyze grammar]

mahādeva uvāca |
iti pṛṣṭaṃ mama brahmanpārvatyā ca punaḥ punaḥ |
tadā sarvaṃ mayā khyātaṃ tasyāścāgre viśeṣataḥ || 72 ||
[Analyze grammar]

śṛṇu nārada vakṣyāmi yaduktaṃ pārvatīṃ prati |
yena prasanno bhagavānmuktidātā na saṃśayaḥ || 73 ||
[Analyze grammar]

mamāyaṃ tu pitā sākṣādbandhuścaiva tu sarvadā |
tasyāhaṃ sarvadā bhakto hyayaṃ mama patiḥ sadā || 74 ||
[Analyze grammar]

tadahaṃ saṃpravakṣyāmi śṛṇuṣva gadato mama |
sūta uvāca |
evamuktvā nāradāya kathayāmāsa vai dvijāḥ || 75 ||
[Analyze grammar]

umāyai yatpurā proktaṃ viṣṇornāmasahasrakam |
maheśāccaiva tatprāptaṃ kailāse nāradena vai || 76 ||
[Analyze grammar]

kadāciddaivayogena kailāsātsa samāgataḥ |
naimiṣāraṇyasaṃjñaṃ tu tīrthaṃ vai paramādbhutam || 77 ||
[Analyze grammar]

tatrasthā ṛṣayaḥ sarve dṛṣṭvā taṃ ṛṣisattamam |
pūjāṃ cakrurviśeṣeṇa nāradāya mahātmane || 78 ||
[Analyze grammar]

āgataṃ nāradaṃ jñātvā vismayotphullalocanāḥ |
puṣpavṛṣṭiṃ pracakruste vaiṣṇavā dvijasattamāḥ || 79 ||
[Analyze grammar]

pādyamarghyaṃ tataḥ kṛtvā kṛtvā cārārtikaṃ tataḥ |
nivedya phalamūlāni daṃḍavatpatitā bhuvi || 80 ||
[Analyze grammar]

ūcuśca kṛtakṛtyāḥ sma deśe hyasminmahāmune |
bhavato darśanaṃ jātaṃ pavitraṃ pāpanāśanam || 81 ||
[Analyze grammar]

tvatprasādācca deveśa purāṇāni śrutāni ca |
brahmankena prakāreṇa sarvapāpakṣayo bhavet || 82 ||
[Analyze grammar]

vinā dānena tapasā vinā tīrtha tapo makhaiḥ |
vinā dānairvinā dhyānairvinā ceṃdriyanigrahaiḥ |
vinā śāstrasamūhaiśca kathaṃ muktiravāpyate || 83 ||
[Analyze grammar]

nārada uvāca |
kailāsaśikharāsīnaṃ devadevaṃ jagadgurum |
praṇipatya mahādevaṃ paryapṛcchadumāpriyam || 84 ||
[Analyze grammar]

pārvatyuvāca |
bhagavaṃstvaṃ paro devaḥ sarvajñaḥ sarvapūjitaḥ |
sa tvamattyarcyate devairiṃdrasūryādikairapi || 85 ||
[Analyze grammar]

labhaṃte'bhimatāṃ siddhiṃ sarve'bhyarcya varapradam |
tvaṃ janmamṛtyurahitaḥ svayaṃbhūḥ sarvaśaktimān || 86 ||
[Analyze grammar]

sadā dhyāyasi kiṃ svāmindigvāsā madanāṃtakaḥ |
tapaścarasi kasmāttvaṃ jaṭilo bhasmadhūsaraḥ || 87 ||
[Analyze grammar]

kiṃ vā japasi deveśa paraṃ kautūhalaṃ hi me |
anugrāhyā yadā te'smi tattvaṃ kathaya suvratam || 88 ||
[Analyze grammar]

mahādeva uvāca |
nedaṃ kasyāpi kathitaṃ gopanīyamidaṃ mama |
kiṃtu vakṣyāmi te bhadre tvaṃ bhaktāsi priyāsi me || 89 ||
[Analyze grammar]

purā satyayuge devi viśuddhamatayo'khilāḥ |
yajaṃti viṣṇumevaikaṃ jñātvā sarveśvareśvaram || 90 ||
[Analyze grammar]

prayāṃti paramāmṛddhimaihikāmuṣmikīṃ priye |
yāṃ na prāptāḥ surāḥ sarve ṛṣayaḥ kleśasaṃyutāḥ || 91 ||
[Analyze grammar]

te tāṃ gatiṃ prapadyaṃte ye nāmakṛtaniścayāḥ |
manmukhādapi saṃśrutya devā viṣṇubahirmukhāḥ || 92 ||
[Analyze grammar]

vedaiḥ purāṇaiḥ siddhāṃtairbhinnairvibhrāṃtacetasaḥ |
niścayaṃ nādhigacchaṃti kiṃ tatvaṃ kiṃ paraṃ padam || 93 ||
[Analyze grammar]

tulāpuruṣadānādyairaśvamedhādibhirmakhaiḥ |
vārāṇasīprayāgādi tīrthasnānādibhiḥ priye || 94 ||
[Analyze grammar]

gayāśrāddhādibhiḥ pitryairvedapāṭhādibhirjapaiḥ |
tapobhirugrairniyamairyamairbhūtadayādibhiḥ || 95 ||
[Analyze grammar]

guruśuśrūṣaṇaiḥ sevyairdharmairvarṇāśramānvitaiḥ |
jñānadhyānādibhiḥ samyakcaritairjanmakoṭibhiḥ || 96 ||
[Analyze grammar]

na yāṃti tatparaṃ śreyo viṣṇuṃ sarveśvareśvaram |
sarvabhāvaiḥ samāśritya purāṇapuruṣottamam || 97 ||
[Analyze grammar]

ananyagatayo martyā bhogino'pi paraṃtape |
jñānavairāgyarahitā brahmacaryādivarjitāḥ || 98 ||
[Analyze grammar]

sarvadharmojjhitā viṣṇornāmamātraikajalpinaḥ |
sukhena yāṃ gatiṃ yāṃti na tāṃ sarve'pi dhārmikāḥ || 99 ||
[Analyze grammar]

smarttavyaḥ satataṃ viṣṇurvismartavyo na jātucit |
sarve vidhiniṣedhāḥ syuretasyaiva vidhiṃ karāḥ || 100 ||
[Analyze grammar]

kiṃtu brahmādayo devā ṛṣayaśca niraṃhasaḥ |
nirbhayaṃ viṣṇunāmnaiva yatheṣṭaṃ padamāgatāḥ || 101 ||
[Analyze grammar]

alabdhvā cātmanaḥ pūjāṃ samyagārādhito hariḥ |
mayāsmādapi ca śreṣṭhaṃ vāṃcchatāhaṃ kṛtātmanā || 102 ||
[Analyze grammar]

tataḥ sākṣājjagannātha prasanno bhaktavatsalaḥ |
aṃśāṃśenātmanaivaitānpūjayāmāsa keśavaḥ || 103 ||
[Analyze grammar]

devānpitṝndvijānhavyakavyādyaiḥ karuṇāmayaḥ |
tataḥ prabhṛti pūjyaṃte trailokye sacarācare || 104 ||
[Analyze grammar]

brahmādayaḥ surāḥ sarve prasādācchārṅgadhanvanaḥ |
māṃ covāca yathā mattaḥ pūjyaḥ śreṣṭho bhaviṣyasi || 105 ||
[Analyze grammar]

tvāmārādhya tathā śaṃbho gṛhīṣyāmi varaṃ sadā |
dvāparādau yuge bhūtvā kalayā mānuṣādiṣu || 106 ||
[Analyze grammar]

svāgamaiḥ kalpitaistvaṃ ca janānmadvimukhānkuru |
māṃ ca gopaya yena syātsṛṣṭireṣottarottarā || 107 ||
[Analyze grammar]

eṣa mohaṃ sṛjāmyāśu yojanānmohayiṣyati |
tvaṃ ca rudra mahābāho mohaśāstrāṇi kāraya || 108 ||
[Analyze grammar]

atathyāni vitathyāni darśayasva mahābhuja |
prakāśaṃ kuru cātmānamaprakāśaṃ ca māṃ kuru || 109 ||
[Analyze grammar]

tatastaṃ praṇipatyāhamavocaṃ parameśvaram |
brahmahatyā sahasrasya pāpaṃ śāmyetkathaṃcana || 110 ||
[Analyze grammar]

na punastvadavijñānaṃ kalpakoṭiśatairapi |
tasmānmayā kṛtā sparddhā pavitraḥ syāṃ kathaṃ hare || 111 ||
[Analyze grammar]

tanme kathaya goviṃda pāyaścittaṃ yadicchasi |
tataḥ prasanno bhagavānavocattattvamātmanaḥ || 112 ||
[Analyze grammar]

yenāhamadhikastasmādabhavaṃ naganaṃdini |
tameva tapasā nityaṃ bhajāmi staumi ciṃtaye || 113 ||
[Analyze grammar]

paramo viṣṇurevaikastajjñānaṃ muktisādhanam |
śāstrāṇāṃ nirṇayastveṣastadanyanmohanāya ca || 114 ||
[Analyze grammar]

dānaṃ vinā ca yā muktiḥ sāmyaṃ ca mama viṣṇunā |
tīrthādimātrato jñānaṃ mamādhikyaṃ ca viṣṇutaḥ || 115 ||
[Analyze grammar]

abhedaścāsmadādīnāṃ muktānāṃ hariṇā tathā |
ityādi sarvamohāya kathyate sati nānyathā |
tenādvitīya mahimo jagatpūjyo'smi pārvati || 116 ||
[Analyze grammar]

pārvatyuvāca |
tanme kathaya deveśa yathāhamapi śaṃkara |
sarveśvarī nirupamā tava syāṃ sadṛśī prabho || 117 ||
[Analyze grammar]

mahādeva uvāca |
sādhusādhu tvayā pṛṣṭaṃ viṣṇorbhagavataḥ priye |
nāmnāṃ sahasraṃ vakṣyāmi mukhyaṃ trailokyamuktidam || 118 ||
[Analyze grammar]

asya śrīviṣṇornāmasahasrastotrasya śrīmahādeva ṛṣiranuṣṭupacchaṃdaḥ |
hrīṃ bījaṃ śrīṃ śaktiḥ klīṃ kīlakaṃ caturvargadharmakāmārthamokṣārthe jape viniyogaḥ |
oṃvāsudevāya vidmahe mahāhaṃsāya dhīmahi |
tanno viṣṇuḥ pracodayāt aṃganyāsakaranyāsau vidhipūrvaṃ yadā paṭhet |
tatphalaṃ koṭiguṇitaṃ bhavatyeva na saṃśayaḥ || 119 ||
[Analyze grammar]

śrīvāsudevaḥ paraṃbrahma iti hṛdaye |
mūlaprakṛtiriti śiraḥ |
mahāvarāha iti śikhā |
sūryavaṃśadhvaja iti kavacam |
brahmādikāmyalalita jagadāścarya śaiśava iti netram |
yathārthakhaṃḍitāśeṣa ityastram |
namonārāyaṇāyeti nyāsaṃ sarvatra kārayet |
oṃnamonārāyaṇāya puruṣāya mahātmane |
viśuddhasatvadhiṣṇyāya mahāhaṃsāya dhīmahi |
oṃhrāṃ hrīṃ hrūṃ hraiṃ hrauṃ hraḥ |
klīṃ kṛṣṇāya viṣṇave hrīṃ rāmāya dhīmahi tanno devaḥ pracodayāt |
kṣrauṃ nṛsiṃhāya vidmahe śrīṃ śrīkaṃṭhāya dhīmahi tanno viṣṇuḥ pracodayāt |
oṃvāsudevāya vidmahe devakīsutāya dhīmahi tannaḥ kṛṣṇaḥ pracodayāt |
oṃ hrāṃ hrīṃ hrūṃ hraiṃ hrauṃ hraḥ |
klīṃ kṛṣṇāya goviṃdāya gopījanavallabhāya svāhā |
iti maṃtram samuccārya japedvā viṣṇumavyayam |
śrīnivāsaṃ jagannāthaṃ tasya stotraṃ paṭhetsudhīḥ || 120 ||
[Analyze grammar]

oṃvāsudevaḥ paraṃ brahma paramātmā parātparaḥ |
paraṃdhāma paraṃjyotiḥ paraṃtatvaṃ paraṃ padam || 121 ||
[Analyze grammar]

paraḥ śivaḥ parodhyeyaḥ paraṃ jñānaṃ parāgatiḥ |
paramārthaḥ paraṃśreyaḥ parānaṃdaḥ parodayaḥ || 122 ||
[Analyze grammar]

paro vyaktātparaṃ vyoma paramarddhiḥ pareśvaraḥ |
nirāmayo nirvikāro nirvikalpo nirāśrayaḥ || 123 ||
[Analyze grammar]

niraṃjano nirātaṃko nirlepo niravagrahaḥ |
nirguṇo niṣkalo'naṃto'bhayo'ciṃtyo'balocitaḥ || 124 ||
[Analyze grammar]

atīndriyo mito pāro'nīśo'nīho'vyayo'kṣayaḥ |
sarvajñaḥ sarvagaḥ sarvaḥ sarvadaḥ sarvabhāvanaḥ || 125 ||
[Analyze grammar]

sarvaśāstā sarvasākṣī pūjyaḥ sarvasya sarvadṛk |
sarvaśaktiḥ sarvasāraḥ sarvātmā sarvatomukhaḥ || 126 ||
[Analyze grammar]

sarvāvāsaḥ sarvarūpaḥ sarvādiḥ sarvaduḥkhahā |
sarvārthaḥ sarvatobhadraḥ sarvakāraṇakāraṇam || 127 ||
[Analyze grammar]

sarvātiśayitaḥ sarvādhyakṣaḥ sarvasureśvaraḥ |
ṣaḍviṃśako mahāviṣṇurmahāguhyo mahāvibhuḥ || 128 ||
[Analyze grammar]

nityodito nityayukto nityānaṃdaḥ sanātanaḥ |
māyāpatiryogapatiḥ kaivalyapatirātmabhūḥ || 129 ||
[Analyze grammar]

janmamṛtyujarātītaḥ kālātīto bhavātigaḥ |
pūrṇaḥ satyaḥ śuddhabuddhasvarūpo nityacinmayaḥ || 130 ||
[Analyze grammar]

yogapriyo yogagamyo bhavabaṃdhaikamocakaḥ |
purāṇapuruṣaḥ pratyakcaitanyaḥ puruṣottamaḥ || 131 ||
[Analyze grammar]

vedāṃtavedyo durjñeyastapatrayavivarjitaḥ |
brahmavidyāśrayo nādyaḥ svaprakāśaḥ svayaṃprabhuḥ || 132 ||
[Analyze grammar]

sarvopeya udāsīnaḥ praṇavaḥ sarvataḥ samaḥ |
sarvānavadyo duṣprāpyasturīyastamasaḥ paraḥ || 133 ||
[Analyze grammar]

kūṭasthaḥ sarvasaṃśliṣṭo vāṅmanogocarātigaḥ |
saṃkarṣaṇaḥ sarvaharaḥ kālaḥ sarvabhayaṃkaraḥ || 134 ||
[Analyze grammar]

anullaṃghyaścitragatirmahārudro durāsadaḥ |
mūlaprakṛtirānaṃdaḥ pradyumno viśvamohanaḥ || 135 ||
[Analyze grammar]

mahāmāyo viśvabījaṃ paraśaktiḥ sukhaikabhūḥ |
sarvakāmyo'natalīlaḥ sarvabhūtavaśaṃkaraḥ || 136 ||
[Analyze grammar]

aniruddhaḥ sarvajīvo hṛṣīkeśo manaḥpatiḥ |
nirupādhipriyo haṃsokṣaraḥ sarvaniyojakaḥ || 137 ||
[Analyze grammar]

brahmaprāṇeśvaraḥ sarvabhūtabhṛddehanāyakaḥ |
kṣetrajñaḥ prakṛtiḥ svāmī puruṣo viśvasūtradhṛk || 138 ||
[Analyze grammar]

aṃtaryāmī tridhāmāṃtaḥ sākṣī triguṇa īśvaraḥ |
yogigamyaḥ padmanābhaḥ śeṣaśāyī śriyaḥpatiḥ || 139 ||
[Analyze grammar]

śrīsadopāsyapādābjo nityaśrīḥ śrīniketanaḥ |
nityaṃ vakṣaḥsthalasthaśrīḥ śrīnidhiḥ śrīdharo hariḥ || 140 ||
[Analyze grammar]

vaśyaśrīrniścalaḥ śrīdo viṣṇuḥ kṣīrābdhimaṃdiraḥ |
kaustubhodbhāsitorasko mādhavo jagadārtihā || 141 ||
[Analyze grammar]

śrīvatsavakṣā niḥsīma kalyāṇaguṇabhājanaḥ |
pītāṃbaro jagannātho jagattrātā jagatpitā || 142 ||
[Analyze grammar]

jagadbaṃdhurjargatsraṣṭā jagaddhātā jagannidhiḥ |
jagadekasphuradvīryo'nahaṃvādī jaganmayaḥ || 143 ||
[Analyze grammar]

sarvāścaryamayaḥ sarvasiddhārthaḥ sarvaraṃjitaḥ |
sarvāmoghodyamo brahmarudrādyutkṛṣṭacetanāḥ || 144 ||
[Analyze grammar]

śaṃbhoḥ pitāmaho brahmapitā śakrādyadhīśvaraḥ |
sarvadevapriyaḥ sarvadevamūrtiranuttamaḥ || 145 ||
[Analyze grammar]

sarvadevaikaśaraṇaṃ sarvadevaikadaivatam |
yajñabhugyajñaphalado yajñeśo yajñabhāvanaḥ || 146 ||
[Analyze grammar]

yajñatrātā yajñapumānvanamālī dvijapriyaḥ |
dvijaikamānado vipra kuladevo surāṃtakaḥ || 147 ||
[Analyze grammar]

sarvaduṣṭāṃtakṛtsarvasajjanānanyapālakaḥ |
saptalokaikajaṭharaḥ saptalokaikamaṃḍanaḥ || 148 ||
[Analyze grammar]

sṛṣṭisthityaṃtakṛccakrī śārṅgadhanvā gadādharaḥ |
śaṃkhabhṛnnaṃdakī padmapāṇirgaruḍavāhanaḥ || 149 ||
[Analyze grammar]

anirdeśyavapuḥ sarvapūjyastrailokyapāvanaḥ |
anaṃtakīrtirniḥsīma pauruṣaḥ sarvamaṃgalaḥ || 150 ||
[Analyze grammar]

sūryakoṭipratīkāśo yamakoṭidurāsadaḥ |
mayakoṭijagatsraṣṭā vāyukoṭimahābalaḥ || 151 ||
[Analyze grammar]

koṭīṃdu jagadānaṃdī śaṃbhukoṭimaheśvaraḥ |
kaṃdarpakoṭilāvaṇyo durgakoṭyarimardanaḥ || 152 ||
[Analyze grammar]

samudrakoṭigaṃbhīrastīrthakoṭi samāhvayaḥ |
kuberakoṭi lakṣmīvāñchakrakoṭi vilāsavān || 153 ||
[Analyze grammar]

himavatkoṭiniṣkaṃpaḥ koṭibrahmāṃḍavigrahaḥ |
koṭyaśvamedhapāpaghno yajñakoṭisamārcanaḥ || 154 ||
[Analyze grammar]

sudhākoṭisvāsthyahetuḥ kāmadhukkoṭikāmadaḥ |
brahmavidyākoṭirūpaḥ śipiviṣṭaḥ śuciśravāḥ || 155 ||
[Analyze grammar]

viśvaṃbharastīrthapādaḥ puṇyaśravaṇakīrtanaḥ |
ādidevo jagajjaitro mukuṃdaḥ kālanemihā || 156 ||
[Analyze grammar]

vaikuṃṭho'naṃtamāhātmyo mahāyogeśvarotsavaḥ |
nityatṛptolasadbhāvo niḥśaṃko narakāṃtakaḥ || 157 ||
[Analyze grammar]

dīnānāthaikaśaraṇaṃ viśvaikavyasanāpahaḥ |
jagatkṛpākṣamo nityaṃ kṛpāluḥ sajjanāśrayaḥ || 158 ||
[Analyze grammar]

yogeśvaraḥ sadodīrṇo vṛddhikṣayavivarjitaḥ |
adhokṣajo viśvaretāḥ prajāpati śatādhipaḥ || 159 ||
[Analyze grammar]

śakrabrahmārcitapadaḥ śaṃbhubrahmordhvadhāmagaḥ |
sūryasomekṣaṇo viśvabhoktā sarvasya pāragaḥ || 160 ||
[Analyze grammar]

jagatseturdharmasetudharo viśvadhuraṃdharaḥ |
nirmamo'khilalokeśo niḥsaṃgo'dbhutabhogavān || 161 ||
[Analyze grammar]

vaśyamāyo vaśyaviśvo viṣvaksenaḥ surottamaḥ |
sarvaśreyaḥ patirdivyānarghyabhūṣaṇabhūṣitaḥ || 162 ||
[Analyze grammar]

sarvalakṣaṇalakṣaṇyaḥ sarvadaityeṃdradarpahā |
samastadevasarvasvaṃ sarvadaivata nāyakaḥ || 163 ||
[Analyze grammar]

samastadevakavacaṃ sarvadevaśiromaṇiḥ |
samastadevatādurgaḥ prapannāśanipaṃjaraḥ || 164 ||
[Analyze grammar]

samastabhayahṛnnāmā bhagavānviṣṭaraśravāḥ |
vibhuḥ sarvahitodarko hatāriḥ svargatipradaḥ || 165 ||
[Analyze grammar]

sarvadaivatajīveśo brāhmaṇādiniyojakaḥ |
brahmaśaṃbhuḥ parārdhāyurbrahmajyeṣṭhaḥ śiśuḥ svarāṭ || 166 ||
[Analyze grammar]

virāḍbhaktaparādhīnaḥ stutyaḥ stotrārthasādhakaḥ |
parārthakarttākṛtyajñaḥ svārthakṛtya sadojjhitaḥ || 167 ||
[Analyze grammar]

sadānaṃdaḥ sadābhadraḥ sadāśāṃtaḥ sadāśivaḥ |
sadāpriyaḥ sadātuṣṭaḥ sadāpuṣṭaḥ sadārcitaḥ || 168 ||
[Analyze grammar]

sadāpūto pāvanāgryo vedaguhyo vṛṣākapiḥ |
sahasranāmā triyugaścaturmūrtiścaturbhujaḥ || 169 ||
[Analyze grammar]

bhūtabhavyabhavannātho mahāpuruṣapūrvajaḥ |
nārāyaṇo muṃjakeśaḥ sarvayogaviniḥsṛtaḥ || 170 ||
[Analyze grammar]

vedasāro yajñasāraḥ sāmasārastaponidhiḥ |
sādhyaḥ śreṣṭhaḥ purāṇarṣiḥ niṣṭhā śāṃtiḥ parāyaṇaḥ || 171 ||
[Analyze grammar]

śivatriśūlavidhvaṃsī śrīkaṃṭhaikavarapradaḥ |
naraḥ kṛṣṇo harirdharmanaṃdano dharmajīvanaḥ || 172 ||
[Analyze grammar]

ādikarttā sarvasatyaḥ sarvastrīratnadarpahā |
trikālajita kaṃdarppa urvaśīsṛṅmunīśvaraḥ || 173 ||
[Analyze grammar]

ādyaḥ kavirhayagrīvaḥ sarvavāgīśvareśvaraḥ |
sarvadevamayo brahmā gururvāgīśvarīpatiḥ || 174 ||
[Analyze grammar]

anaṃtavidyāprabhavo mūlāvidyāvināśakaḥ |
sarvajñado jagajjāḍyanāśako madhusūdanaḥ || 175 ||
[Analyze grammar]

anekamaṃtrakoṭīśaḥ śabdabrahmaikapāragaḥ |
ādividvānvedakarttā vedātmā śrutisāgaraḥ || 176 ||
[Analyze grammar]

brahmārthavedaharaṇaḥ sarvavijñānajanmabhūḥ |
vidyārājo jñānamūrttirjñānasiṃdhurakhaṃḍadhīḥ || 177 ||
[Analyze grammar]

matsyadevo mahāśṛṃgo jagadbījabahitradṛk |
līlāvyāptākhilāṃbhodhiścaturvedapravarttakaḥ || 178 ||
[Analyze grammar]

ādikūrmo'khilādhārastṛṇīkṛtajagadbharaḥ |
amarīkṛtadevaughaḥ pīyūṣotpattikāraṇam || 179 ||
[Analyze grammar]

ātmādhāro dharādhāro yajñāṃgo dharaṇīdharaḥ |
hiraṇyākṣaharaḥ pṛthvīpatiḥ śrāddhādikalpakaḥ || 180 ||
[Analyze grammar]

samastapitṛbhītighnaḥ samastapitṛjīvanam |
havyakavyaikabhukhavyakavyaikaphaladāyakaḥ || 181 ||
[Analyze grammar]

romāṃtarlīnajaladhiḥ kṣobhitāśeṣasāgaraḥ |
mahāvarāho yajñaghnadhvaṃsako yajñikāśrayaḥ || 182 ||
[Analyze grammar]

śrīnṛsiṃho divyasiṃhaḥ sarvāniṣṭārthaduḥkhahā |
ekavīro'dbhutabalo yaṃtramaṃtraikabhaṃjanaḥ || 183 ||
[Analyze grammar]

brahmādiduḥsahajyotiryugāṃtāgryatibhīṣaṇaḥ |
koṭivajrādhikanakho jagadduṣprekṣyamūrtidhṛk || 184 ||
[Analyze grammar]

mātṛcakrapramathano mahāmātṛgaṇeśvaraḥ |
aciṃtyāmoghavīryāḍhyaḥ samastāsuraghasmaraḥ || 185 ||
[Analyze grammar]

hiraṇyakaśipuchedī kālaḥ saṃkarṣaṇīpatiḥ |
kṛtāṃtavāhanāsahyaḥ samastabhayanāśanaḥ || 186 ||
[Analyze grammar]

sarvavighnāṃtakaḥ sarvasiddhidaḥ sarvapūrakaḥ |
samastapātakadhvaṃsī siddhamaṃtrādhikāhvayaḥ || 187 ||
[Analyze grammar]

bhairaveśo harārtighnaḥ kālakoṭidurāsadaḥ |
daityagarbhaśrāvināmāsphuṭadr brahmāṃḍagarjitaḥ || 188 ||
[Analyze grammar]

smṛtamātrākhilatrātā'dbhutarūpo mahāhariḥ |
brahmacaryaśiraḥ piṃḍī dikpālo'rddhāṃgabhūṣaṇaḥ || 189 ||
[Analyze grammar]

dvādaśārkaśirodāmā rudraśīrṣaikanūpuraḥ |
yoginīgrastagirajā trātābhairavatarjakaḥ || 190 ||
[Analyze grammar]

vīracakreśvaro'tyugro'pamāriḥ kālaśaṃbaraḥ |
krodheśvaro rudracaṃḍī parivārādiduṣṭabhuk || 191 ||
[Analyze grammar]

sarvākṣobhyo mṛtyumṛtyuḥ kālamṛtyunivarttakaḥ |
asādhyasarvarogaghnaḥ sarvadurgrahasaumyakṛt || 192 ||
[Analyze grammar]

gaṇeśakoṭidarpaghno duḥsahāśeṣagotrahā |
devadānavadurdarśo jagadbhayadabhīṣaṇaḥ || 193 ||
[Analyze grammar]

samastadurgatitrātā jagadbhakṣakabhakṣakaḥ |
ugraśoṃbaramārjāraḥ kālamūṣakabhakṣakaḥ |
anaṃtāyudhadordaṃḍī nṛsiṃho vīrabhadrajit || 194 ||
[Analyze grammar]

yoginīcakraguhyeśaḥ śakrāri paśumāṃsabhuk |
rudro nārāyaṇo meṣarūpa śaṃkaravāhanaḥ || 195 ||
[Analyze grammar]

meṣarūpaśivatrātā duṣṭaśaktisahasrabhuk |
tulasīvallabho vīro vāmācāro'khileṣṭadaḥ || 196 ||
[Analyze grammar]

mahāśivaḥ śivārūḍho bhairavaikakapāladhṛk |
killīcakreśvaraḥ śakra divyamohanarūpadaḥ || 197 ||
[Analyze grammar]

gaurīsaubhāgyado māyānidhīrmāyābhayāpahaḥ |
brahmatejomayo brahmaśrīmayaśca trayīmayaḥ || 198 ||
[Analyze grammar]

subrahmaṇyo balidhvaṃsī vāmano'ditiduḥkhahā |
upeṃdro nṛpatirviṣṇuḥ kaśyapānvayamaṃḍanaḥ || 199 ||
[Analyze grammar]

balisvarājyadaḥ sarvadevaviprānnado'cyutaḥ |
urukramastīrthapādastripadasthastrivikramaḥ || 200 ||
[Analyze grammar]

vyomapādaḥ svapādāṃbhaḥ pavitritajagattrayaḥ |
brahmeśādyabhivaṃdyāṃghrirdrutadharmāṃghridhāvanaḥ || 201 ||
[Analyze grammar]

aciṃtyādbhutavistāro viśvavṛkṣo mahābalaḥ |
rāhumūrdhāparāṃgacchidbhṛgupatnīśiroharaḥ || 202 ||
[Analyze grammar]

pāpatrastaḥ sadāpuṇyo daityāśānityakhaṃḍanaḥ |
pūritākhiladevāśo viśvārthaikāvatārakṛt || 203 ||
[Analyze grammar]

svamāyānityaguptātmā bhaktacintāmaṇiḥ sadā |
varadaḥ kārttavīryādi rājarājyaprado'naghaḥ || 204 ||
[Analyze grammar]

viśvaślāghyāmitācāro dattātreyo munīśvaraḥ |
parāśaktisadāśliṣṭo yogānaṃdaḥ sadonmadaḥ || 205 ||
[Analyze grammar]

samasteṃdrāritejohṛtparamāmṛtapadmapaḥ |
anusūyāgarbharatnaṃ bhogamokṣasukhapradaḥ || 206 ||
[Analyze grammar]

jamadagnikulādityo reṇukādbhutaśaktikṛt |
mātṛhatyādinirlepaḥ skaṃdajidviprarājyadaḥ || 207 ||
[Analyze grammar]

sarvakṣatrāṃtakṛdvīradarpahā kārttavīryajit |
saptadvīpāvatīdātā śivārcaka yaśapradaḥ || 208 ||
[Analyze grammar]

bhīmaḥ paraśurāmaśca śivācāryaikaviśvabhuk |
śivākhilajñānakośo bhīṣmācāryo'gnidaivataḥ || 209 ||
[Analyze grammar]

droṇācāryagururviśvajaitradhanvākṛtāṃtajit |
advitīyatapomūrttirbrahmacaryaikadakṣiṇaḥ || 210 ||
[Analyze grammar]

manuḥśreṣṭhaḥ satāṃseturmahīyānvṛṣabho virāṭ |
ādirājaḥ kṣitipitā sarvaratnaikadohakṛt || 211 ||
[Analyze grammar]

pṛthurjanmādyekadakṣo gīḥ śrīḥ kīrtiḥ svayaṃvṛtaḥ |
jagadvṛttipradaścakravarttiśreṣṭhodvayāstradhṛk || 212 ||
[Analyze grammar]

sanakādimuniprāpya bhagavadbhaktivarddhanaḥ |
varṇāśramādidharmāṇāṃ karttā vaktā pravarttakaḥ || 213 ||
[Analyze grammar]

sūryavaṃśadhvajo rāmo rāghavaḥ sadguṇārṇavaḥ |
kākutstho vīrarāḍrājā rājadharmadhuraṃdharaḥ || 214 ||
[Analyze grammar]

nityasvasthāśrayaḥ sarvabhadra grāhī śubhaikadṛk |
nararatnaṃ ratnagarbho dharmādhyakṣo mahānidhiḥ |
sarvaśreṣṭhāśrayaḥ sarvaśāstrārthagrāmavīryavān || 215 ||
[Analyze grammar]

jagadvaśo dāśarathiḥ sarvaratnāśrayo nṛpaḥ |
samastadharmasūḥ sarvadharmadraṣṭā'khilāghahā || 216 ||
[Analyze grammar]

atīṃdro jñānavijñānapāradaśca kṣamāṃbudhiḥ |
sarvaprakṛṣṭaśiṣṭeṣṭo harṣaśokādyanākulaḥ |
pitrājñātyaktasāmrājyaḥ sapannodayanirbhayaḥ || 217 ||
[Analyze grammar]

guhadeśārpitaiśvaryaḥ śivasparddhājaṭādharaḥ |
citrakūṭāptaratnādrirjagadīśo vanecaraḥ || 218 ||
[Analyze grammar]

yatheṣṭāmoghasarvāstro deveṃdratanayākṣihā |
brahmeṃdradinataiṣīko mārīcaghno virādhahā || 219 ||
[Analyze grammar]

brahmaśāpahatāśeṣa daṃḍakāraṇyapāvanaḥ |
caturdaśasahasrogra rakṣoghnaikaśaraikadhṛk || 220 ||
[Analyze grammar]

kharāristriśirohaṃtā dūṣaṇaghno janārdanaḥ |
jaṭāyuṣo'gnigatido'gastyasarvasva maṃtrarāṭ || 221 ||
[Analyze grammar]

līlādhanuḥ koṭyapāstaduṃdubhyasthimahācayaḥ |
saptatālavyadhākṛṣṭa dhvastapātāladānavaḥ || 222 ||
[Analyze grammar]

sugrīvarājyado hīnamanasaivābhayapradaḥ |
hanumadrudramukhyeśa samastakapidehabhṛt || 223 ||
[Analyze grammar]

sanāgadaityabāṇaikavyākulīkṛtasāgaraḥ |
samlecchakoṭibāṇaikaśuṣkanirdagdhasāgaraḥ || 224 ||
[Analyze grammar]

samudrādbhutapūrvaika baṃdhaseturyaśonidhiḥ |
asādhyasādhako laṃkāsamūlotkarṣadakṣiṇaḥ || 225 ||
[Analyze grammar]

varadṛptajagacchalya paulastyakulakṛṃtanaḥ |
rāvaṇighnaḥ prahastacchitkuṃbhakarṇabhidugrahā || 226 ||
[Analyze grammar]

rāvaṇaikaśiraścchettā niḥśaṃkeṃdraikarājyadaḥ |
svargāsvargatvavicchedī deveṃdrāniṃdratāharaḥ || 227 ||
[Analyze grammar]

rakṣo devatvahṛddharmā dharmatvaghnaḥ puruṣṭutaḥ |
natimātradaśāsyārirdattarājyavibhīṣaṇaḥ || 228 ||
[Analyze grammar]

sudhāvṛṣṭimṛtāśeṣa svasainyojjīvanaikakṛt |
devabrāhmaṇanāmaika dhātā sarvāmarārcitaḥ || 229 ||
[Analyze grammar]

brahmasūryeṃdrarudrādi vṛṃdārpitasatīpriyaḥ |
ayodhyākhilarājanyaḥ sarvabhūtamanoharaḥ || 230 ||
[Analyze grammar]

svāmitulyakṛpādaṃḍo hīnotkṛṣṭaikasatpriyaḥ |
svapakṣādinyāyadarśī hīnārthādhikasādhakaḥ || 231 ||
[Analyze grammar]

vyādhavyājānucitakṛttārakokhilatulyakṛt |
pārvatyādhikyamuktātmā priyātyaktaḥ smarārijit || 232 ||
[Analyze grammar]

sākṣātkuśalavacchadmeṃdrāditāto'parājitaḥ |
kośaleṃdro vīrabāhuḥ satyārtha tyaktasodaraḥ || 233 ||
[Analyze grammar]

śarasaṃdhānanirdhūta dharaṇīmaṃḍalodayaḥ |
brahmādikāmyasāṃnidhyasanāthīkṛtadaivataḥ || 234 ||
[Analyze grammar]

brahmalokāptacāṃḍālādyaśeṣaprāṇisārthakaḥ |
svanītagardabhāśvādiścirāyodhyāvanaikakṛt || 235 ||
[Analyze grammar]

rāmadvitīyaḥ saumitrirlakṣmaṇaḥ prahateṃdrajit |
viṣṇubhaktāptarāmāṃghripādukārājyanirvṛtaḥ || 236 ||
[Analyze grammar]

bharato'sahyagaṃdharvakoṭighno lavaṇāṃtakaḥ |
śatrughno vaidyarājāyurvedagarbhauṣadhīpatiḥ || 237 ||
[Analyze grammar]

nityāmṛtakaro dhanvaṃtariryajño jagaddharaḥ |
sūryārighnaḥ surājīvo dakṣiṇeśo dvijapriyaḥ || 238 ||
[Analyze grammar]

chinnamūrdhāyadeśārkaḥ śeṣāṃgasthāpitāmaraḥ |
viśvārthāśeṣakadrāstra śiracchedākṣatākṛtiḥ || 239 ||
[Analyze grammar]

vājapeyādināmāgnirvedadharmaparāyaṇaḥ |
śvetadvīpapatiḥ sāṃkhyapraṇetā sarvasiddhirāṭ || 240 ||
[Analyze grammar]

viśvaprakāśitajñānayogamohatamisrahā |
devahūtyātmajaḥ siddhaḥ kapilaḥ kardamātmajaḥ || 241 ||
[Analyze grammar]

yogasvāmī dhyānabhaṃga sagarātmajabhasmakṛt |
dharmo vṛṣendraḥ surabhīpatiḥ śuddhātmabhāvitaḥ || 242 ||
[Analyze grammar]

śaṃbhustripuradāhaikasthairthaviśvarathodvahaḥ |
bhaktaśaṃbhujito daityāmṛtavāpīsamastapaḥ || 243 ||
[Analyze grammar]

mahāpralayaviśvaikadvitīyākhilanāgarāṭ |
śeṣadevaḥ sahasrākṣaḥ sahasrāsya śirobhujaḥ || 244 ||
[Analyze grammar]

phaṇāmaṇikaṇākārayojitābdhyaṃbudakṣitiḥ |
kālāgnirudrajanako muśalāstro halāyudhaḥ || 245 ||
[Analyze grammar]

nīlāṃbaro vāruṇīśo manovākkāyadoṣahā |
asaṃtoṣo dṛṣṭimātrapātitaikadaśānanaḥ || 246 ||
[Analyze grammar]

balisaṃyamano ghoro rauhiṇeyaḥ pralaṃbahā |
muṣṭikaghno dvividahā kāliṃdīkarṣaṇo balaḥ || 247 ||
[Analyze grammar]

revatīramaṇaḥ pūrvabhaktikhedācyutāgrajaḥ |
devakīvasudevāhva kaśyapāditinaṃdanaḥ || 248 ||
[Analyze grammar]

vārṣṇeyaḥ sātvatāṃ śreṣṭhaḥ śauriryadukulodvahaḥ |
narākṛtiḥ paraṃbrahma savyasācī varapradaḥ || 249 ||
[Analyze grammar]

brahmādikāmyalālitya jagadāścarya śaiśavaḥ |
pūtanāghnaḥ śakaṭabhidyamalārjunabhaṃjanaḥ || 250 ||
[Analyze grammar]

vātāsurāriḥ keśighno dhenukārirgavīśvaraḥ |
dāmodaro gopadevo yaśodānaṃdadāyakaḥ || 251 ||
[Analyze grammar]

kālīyamardanaḥ sarvagopagopījanapriyaḥ |
līlāgovarddhanadharo goviṃdo gokulotsavaḥ || 252 ||
[Analyze grammar]

ariṣṭamathanaḥ kāmonmattagopīvimuktidaḥ |
sadyaḥ kuvalayāpīḍaghātī cāṇūramardanaḥ || 253 ||
[Analyze grammar]

kaṃsārirugrasenādirājyavyāpāritāparaḥ |
sudharmāṃkitabhūrloko jarāsaṃdhabalāṃtakaḥ || 254 ||
[Analyze grammar]

tyaktabhagnajarāsaṃdho bhīmasenayaśaḥpradaḥ |
sāṃdīpanamṛtāpatyadātā kālāṃtakādijit || 255 ||
[Analyze grammar]

samastanārakitrātā sarvabhūpatikoṭijit |
rukmiṇīramaṇo rukmiśāsano narakāṃtakaḥ || 256 ||
[Analyze grammar]

samastasuṃdarīkāṃto murārirgaruḍadhvajaḥ |
ekākījitarudrārka marudādyakhileśvaraḥ || 257 ||
[Analyze grammar]

deveṃdradarpahā kalpadrumālaṃkṛtabhūtalaḥ |
bāṇabāhusahacchinnaṃ nadyādigaṇakoṭijit || 258 ||
[Analyze grammar]

līlājita mahādevo mahādevaikapūjitaḥ |
iṃdrārthārjunanirbhaṃga jayadaḥ pāṃḍavaikadhṛk || 259 ||
[Analyze grammar]

kāśirājaśiraśchettā rudraśaktyaikamardanaḥ |
viśveśvaraprasādākṣaḥ kāśīrājasutārdanaḥ || 260 ||
[Analyze grammar]

śaṃbhupratijñāvidhvaṃsī kāśīnirdagdhanāyakaḥ |
kāśīśagatakoṭighno lokaśikṣādvijārcakaḥ || 261 ||
[Analyze grammar]

yuvatīvratayovaśyaḥ purāśivavarapradaḥ |
śaṃkaraikapratiṣṭhādhṛksvāṃśa śaṃkarapūjakaḥ || 262 ||
[Analyze grammar]

śivakanyāvratapatiḥ kṛṣṇarūpa śivārihā |
mahālakṣmīvapurgaurītrātā vaidalavṛtrahā || 263 ||
[Analyze grammar]

svadhāmamucukuṃdaikaniṣkālayavaneṣṭakṛt |
yamunāpatirānīta parilīnadvijātmajaḥ || 264 ||
[Analyze grammar]

śrīdāmaraṃkabhaktārthabhūmyānīteṃdravaibhavaḥ |
durvṛttaśiśupālaikamuktido dvārakeśvaraḥ || 265 ||
[Analyze grammar]

ācāṃḍāladikaprāpya dvārakānidhikoṭikṛt |
akrūroddhavamukhyaikabhaktasvacchaṃdamuktidaḥ || 266 ||
[Analyze grammar]

sabālastrījalakrīḍāmṛtavāpīkṛtārṇavaḥ |
brahmāstradagdhagarbhastha parīkṣijjīvanaikakṛt || 267 ||
[Analyze grammar]

parilīnadvijasutānetā'rjunamadāpahaḥ |
gūḍhamudrākṛtigrasta bhīṣmādyakhilakauravaḥ || 268 ||
[Analyze grammar]

yathārthakhaṃḍitāśeṣa divyāstrapārthamohahṛt |
garbhaśāpachaladhvastayādevorvī bhayāpahaḥ || 269 ||
[Analyze grammar]

jarāvyādhārigatidaḥ smṛtimātrākhileṣṭadaḥ |
kāmadevo ratipatirmanmathaḥ śaṃbarāṃtakaḥ || 270 ||
[Analyze grammar]

anaṃgo jitagaurīśo ratikāṃtaḥ sadepsitaḥ |
puṣpeṣurviśvavijayi smaraḥ kāmeśvarīpriyaḥ || 271 ||
[Analyze grammar]

uṣāpatirviśvaketurviśvadṛpto'dhipūruṣaḥ |
caturātmā caturvyūhaścaturyugavidhāyakaḥ || 272 ||
[Analyze grammar]

caturvedaikaviśvātmā sarvotkṛṣṭāṃśakoṭiśaḥ |
āśramātmā purāṇarṣirvyāsaḥ śākhāsahasrakṛt || 273 ||
[Analyze grammar]

mahābhāratanirmātā kavīṃdro bādarāyaṇaḥ |
kṛṣṇadvaipāyanaḥ sarvapuruṣārthaikabodhakaḥ || 274 ||
[Analyze grammar]

vedāṃtakartā brahmaikavyaṃjakaḥ puruvaṃśakṛt |
buddho dhyānajitāśeṣa devadevo jagatpriyaḥ || 275 ||
[Analyze grammar]

nirāyudho jagajjaitraḥ śrīdharo duṣṭamohanaḥ |
daityavedabahiḥkarttā vedārthaśrutigopakaḥ || 276 ||
[Analyze grammar]

śauddhodanirdaṣṭadṛṣṭiḥ sukhadaḥ sadasaspatiḥ |
yathāyogyākhilakṛpaḥ sarvaśūnyo'khileṣṭadaḥ || 277 ||
[Analyze grammar]

catuṣkoṭipṛthaktatvaṃ prajñāpāramiteśvaraḥ |
pākhaṃḍavedamārgeśaḥ pākhaṃḍaśrutigopakaḥ || 278 ||
[Analyze grammar]

kalkī viṣṇuyaśaḥputraḥ kalikālavilopakaḥ |
samastamlecchaduṣṭaghnaḥ sarvaśiṣṭadvijātikṛt || 279 ||
[Analyze grammar]

satyapravarttako deva dvijadīrghakṣudhāpahaḥ |
aśvavārādi revaṃtaḥ pṛthvīdurgatināśanaḥ || 280 ||
[Analyze grammar]

sadyaḥ kṣmā'naṃtalakṣmīkṛnnaṣṭaniḥśeṣadharmavit |
anaṃtasvarṇayogaika hemapūrṇākhiladvijaḥ || 281 ||
[Analyze grammar]

asādhyaikajagacchāstā viśvavaṃdyo jayadhvajaḥ |
ātmatatvādhipaḥ kartṛśreṣṭho vidhirumāpatiḥ || 282 ||
[Analyze grammar]

bhartṛśreṣṭhaḥ prajeśāgryo marīcirjanakāgraṇīḥ |
kaśyapo devarājeṃdraḥ prahlādo daityarāṭśaśī || 283 ||
[Analyze grammar]

nakṣatreśo ravistejaḥ śreṣṭhaḥ śukraḥ kavīśvaraḥ |
maharṣirāṭbhṛgurviṣṇurādityeśo balisvarāṭ || 284 ||
[Analyze grammar]

vāyurvahniḥ śuciḥ śreṣṭhaḥ śaṃkaro rudrarāṭguruḥ |
vidvattamaścitraratho gaṃdharvāgryokṣarottamaḥ || 285 ||
[Analyze grammar]

varṇādiragryastrīgaurīśaktyāgryāśīśca nāradaḥ |
devarṣirāṭpāṃḍavāgryo'rjunovādaḥ pravādarāṭ || 286 ||
[Analyze grammar]

pavanaḥ pavaneśāno varuṇo yādasāṃ patiḥ |
gaṃgātīrthottamodyūtaṃ chalakāgryaṃ varauṣadham || 287 ||
[Analyze grammar]

annaṃ sudarśano'strāgryaṃ vajraṃ praharaṇottamam |
uccaiḥśravāvājirāja airāvataibheśvaraḥ || 288 ||
[Analyze grammar]

aruṃdhatyekapatnīśo hyaśvattho'śeṣavṛkṣarāṭ |
adhyātmavidyāvidyāgryaḥ praṇavacchaṃdasāṃ varaḥ || 289 ||
[Analyze grammar]

merurgiripatirmārgo māsāgryaḥ kālasattamaḥ |
dinādyātmā pūrvasiddhaḥ kapilaḥ sāmavedarāṭ || 290 ||
[Analyze grammar]

tārkṣyaḥ khageṃdra ṛtvagryo vasaṃtaḥ kalpapādapaḥ |
dātṛśreṣṭhaḥ kāmadhenurārtighnāgrya suhṛttamaḥ || 291 ||
[Analyze grammar]

ciṃtāmaṇirguruśreṣṭho mātā hitatamaḥ pitā |
siṃho mṛgeṃdro nāgeṃdro vāsukirnṛvaro nṛpa || 292 ||
[Analyze grammar]

varṇeśo brāhmaṇaścetaḥ karuṇāgryaṃ namonamaḥ |
ityetadvāsudevasya viṣṇornāmasahasrakam || 293 ||
[Analyze grammar]

sarvāparādhaśamanaṃ paraṃ bhaktivivarddhanam |
akṣayaṃ brahmalokādi sarvasvargaikasādhanam || 294 ||
[Analyze grammar]

viṣṇulokaikasopānaṃ sarvaduḥkhavināśanam |
samastasukhadaṃ sadyaḥ paraṃ nirvāṇadāyakam || 295 ||
[Analyze grammar]

kāmakrodhādiniḥśeṣamanomalaviśodhanam |
śāṃtidaṃ pāvanaṃ nṝṇāṃ mahāpātakināmapi || 296 ||
[Analyze grammar]

sarveṣāṃ prāṇināmāśu sarvābhīṣṭaphalapradam |
samastavighnaśamanaṃ sarvāriṣṭavināśanam || 297 ||
[Analyze grammar]

ghoraduḥkhapraśamanaṃ tīvradāridryanāśanam |
ṛṇatrayāpahaṃ guhyaṃ dhanadhānyayaśaskaram || 298 ||
[Analyze grammar]

sarvaiśvaryapradaṃ sarvasiddhidaṃ sarvadharmadam |
tīrthayajñatapodānavratakoṭiphalapradam || 299 ||
[Analyze grammar]

jagajjāḍyapraśamanaṃ sarvavidyāpavarttakam |
rājyadaṃ bhraṣṭarājyānāṃ rogiṇāṃ sarvarogahṛt || 300 ||
[Analyze grammar]

vaṃdhyānāṃ sutadaṃ cāyuḥkṣīṇānāṃ jīvitapradam |
bhūtagrahaviṣadhvaṃsi grahapīḍāvināśanam || 301 ||
[Analyze grammar]

māṃgalyaṃ puṇyamāyuṣyaṃ śravaṇātpaṭhanājjapāt |
sakṛdasyākhilāvedāḥ sāṃgā maṃtrāśca koṭiśaḥ || 302 ||
[Analyze grammar]

purāṇaśāstrasmṛtayaḥ śrutā syuḥ paṭhitāstathā |
japtvā caikākṣaraṃ ślokaṃ pādaṃ vā paṭhati priye || 303 ||
[Analyze grammar]

nityaṃ sidhyati sarveṣṭamacirātkimutākhilam |
nānena sadṛśaṃ sadyaḥ pratyayaṃ sarvakarmasu || 304 ||
[Analyze grammar]

idaṃ bhadre tvayā gopyaṃ pāṭhyaṃ svārthaikasiddhaye |
nāvaiṣṇavāya dātavyaṃ vikalpopahatātmane || 305 ||
[Analyze grammar]

bhaktiśraddhāvihīnāya viṣṇusāmānyadarśine |
deyaṃ putrāya śiṣyāya suhṛde hitakāmyayā || 306 ||
[Analyze grammar]

matprasādādṛtenedaṃ grahīṣyaṃtyalpamedhasaḥ |
kalau sadyaḥ phalaṃ kalpagrāmaṃ neṣyati nāradaḥ || 307 ||
[Analyze grammar]

lokānāṃ bhāgyahīnānāṃ yena duḥkhaṃ vinaśyati |
dvitreṣu vaiṣṇaveṣvetadāryāvarte bhaviṣyati || 308 ||
[Analyze grammar]

nāsti viṣṇoḥ paraṃ dhāma nāsti viṣṇoḥ paraṃ tapaḥ |
nāsti viṣṇoḥ paro dharmo nāsti maṃtro hyavaiṣṇavaḥ || 309 ||
[Analyze grammar]

nāsti viṣṇoḥ paraṃ satyaṃ nāsti viṣṇoḥ paro makhaḥ |
nāsti viṣṇoḥ paraṃ dhyānaṃ nāsti viṣṇoḥ parā gatiḥ || 310 ||
[Analyze grammar]

kiṃ tasya bahubhirmaṃtraiḥ śāstrairvā rbahuvistaraiḥ |
vājapeyasahasrairvā bhaktiryasya janārdane || 311 ||
[Analyze grammar]

sarvatīrthamayo viṣṇuḥ sarvaśāstramayaḥ prabhuḥ |
sarvakratumayo viṣṇuḥ satyaṃ satyaṃ vadāmyaham |
ābrahmasārasarvasvaṃ sarvametanmayoditam || 312 ||
[Analyze grammar]

pārvatyuvāca |
dhanyāsmyanugṛhītāsmi kṛtārthāsmi jagatpate |
yanmayedaṃ śrutaṃ stotraṃ tvadrahasyaṃ sudurlabham || 313 ||
[Analyze grammar]

aho bata mahatkaṣṭaṃ samastaduḥkhahe harau |
vidyamāne'pi deveśe mūḍhāḥ kliśyaṃti saṃsṛtau || 314 ||
[Analyze grammar]

yamuddiśya sadā nāthaṃ maheśo'pi digaṃbaraḥ |
jaṭilo bhasmaliptāṃgo tapasvī vīkṣyate janaiḥ || 315 ||
[Analyze grammar]

tato'dhiko'sti devaḥ ko lakṣmīkāṃtānmadhudviṣaḥ |
yattattvaṃ ciṃtyate nityaṃ tvayā yogeśvareṇa hi || 316 ||
[Analyze grammar]

tataḥ paraṃ kimadhikaṃ padaṃ śrīpuruṣottamāt |
tamavijñāya kaṃ mūḍhāḥ yajaṃte jñānamāninaḥ || 317 ||
[Analyze grammar]

muṣitāsmi tvayā nātha ciraṃ yadayamīśvaraḥ |
prakāśito na me yasmāttvadādyā divyaśaktayaḥ || 318 ||
[Analyze grammar]

aho sarveśvaro viṣṇuḥ sarvadevottamottamaḥ |
bhavadādigururmūḍhaiḥ sāmānya iva vīkṣyate || 319 ||
[Analyze grammar]

mahīyasāṃ hi māhātmyaṃ bhajamānānbhajaṃti te |
dviṣato'pi vṛthā pāpānupekṣyaṃte kṣamānvitāḥ || 320 ||
[Analyze grammar]

mayāpi bālye svapituḥ prajā dṛṣṭā bubhukṣitāḥ |
duḥkhādaśaktayā poṣṭuṃ śriyamārādhya vai bhṛtāḥ || 321 ||
[Analyze grammar]

tayā saṃnihitābhyaśca prajābhyo bhavadādayaḥ |
vilasaṃti sa śakrādyāḥ sasuhṛnmitrabāṃdhavāḥ || 322 ||
[Analyze grammar]

tayā vinā kva devatvaṃ kvaiśvaryaṃ kva parigrahaḥ |
sarve bhavaṃti jīvaṃto yātanāsveva saṃsthitāḥ || 323 ||
[Analyze grammar]

tāmṛtenaiva dharmo'tha kāmo mokṣo'pi dūrataḥ |
kṣudhitānāṃ durgatānāṃ kuto yogasamādhayaḥ || 324 ||
[Analyze grammar]

sa ca saṃsārasāraikaḥ sarvalokaikanāyakaḥ |
vaśagā kamalā yasya tyaktvā tāmapi śaṃkaraḥ || 325 ||
[Analyze grammar]

anauddhatyena śaucena rūpeṇārjavasaṃpadā |
sarvātiśayavīryeṇa saṃpūrṇasya mahātmanaḥ || 326 ||
[Analyze grammar]

kastena tulyatāmeti devadevena viṣṇunā |
yasyāṃśāṃśāvatāreṇa vinā sarvaṃ vilīyate || 327 ||
[Analyze grammar]

jagadetattathāpyāhurdoṣāyaitadvimohitāḥ |
nāsya janma na vā mṛtyurnāprāpyaṃ svārthameva ca || 328 ||
[Analyze grammar]

kāmādyāsaktacittatvātkiṃ tu sarveśvaraprabho |
tvanmayatvātpramādādvā śaknomi paṭhituṃ na cet || 329 ||
[Analyze grammar]

viṣṇoḥ sahasranāmaitatpratyahaṃ vṛṣabhadhvaja |
nāmnaikena tu yena syāttatphalaṃ brūhi me prabho || 330 ||
[Analyze grammar]

mahādeva uvāca |
rāmarāmeti rāmeti rame rāme manorame |
sahasranāmatattulyaṃ rāmanāma varānane || 331 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde viṣṇornāmasahasraṃ saṃpūrṇaṃ nāmaikasaptatitamo'dhyāyaḥ || 71 ||
[Analyze grammar]