Chapter 69

[English text for this chapter is available]

nārada uvāca |
upavāsāsamarthānāṃ sadaivāmarasattama |
ekā yā dvādaśī puṇyā tāṃ vadasva mamānagha || 1 ||
[Analyze grammar]

śiva uvāca |
māsi bhādrapade śukle dvādaśī śravaṇānvitā |
sā vai sarvapradā puṇyā hyupavāse mahāphalā || 2 ||
[Analyze grammar]

saṃgame saritaḥ snātvā dvādaśīṃ tāmupoṣitaḥ |
ayatnātsamavāpnoti dvādaśa dvādaśīphalam || 3 ||
[Analyze grammar]

budhaśravaṇasaṃyuktā yā ca vai dvādaśī bhavet |
atīva mahatī tasyāṃ kṛtaṃ sarvamathākṣayam || 4 ||
[Analyze grammar]

dvādaśī śravaṇopetā yadā bhavati nārada |
saṃgame saritāṃ snātvā labhedgodānajaṃ phalam || 5 ||
[Analyze grammar]

jalapūrṇaṃ tadā kuṃbhaṃ sthāpayitvā vicakṣaṇaḥ |
tasyopari nyasetpātraṃ sthāpayitvā janārdanam || 6 ||
[Analyze grammar]

tatastasyāgrato deyaṃ naivedyaṃ ghṛtapācitam |
sodakāṃśca navānkuṃbhāndadyācchaktyā vicakṣaṇaḥ || 7 ||
[Analyze grammar]

evaṃ saṃpūjya goviṃdaṃ jāgaraṃ tatra kārayet |
prabhāte vimale snātvā saṃpūjya garuḍadhvajam || 8 ||
[Analyze grammar]

puṣpadhūpādi naivedyaiḥ phalairvastraiḥ suśobhanaiḥ |
puṣpāṃjaliṃ tato dadyānmaṃtramenamudīrayet || 9 ||
[Analyze grammar]

namo namaste goviṃda budhaśravaṇasaṃyuta |
aghaughasaṃkṣayaṃ kṛtvā sarvasaukhyaprado bhava || 10 ||
[Analyze grammar]

annaṃ tu brāhmaṇe pūtaṃ vedavedāṃgapārage |
purāṇajñe viśeṣeṇa vidhivatsaṃpradāpayet || 11 ||
[Analyze grammar]

anena vidhinā caiva nadyāstīre narottamaḥ |
sarvaṃ nirvarttayetsamyagekacittarato'pi san || 12 ||
[Analyze grammar]

atrāpyudāharaṃtīmamitihāsaṃ purātanam |
mahatyaraṇye yadvṛtaṃ bhūmideva śṛṇuṣva tat || 13 ||
[Analyze grammar]

yaṃ śrutvā mānavo loke mahāduḥkhātpramucyate |
deśo dāsarako nāma tasya bhāge ca paścime || 14 ||
[Analyze grammar]

tatra vidvanmarurdeśaḥ sarvasatvabhayaṃkaraḥ |
sutaptasikatā bhūmiryatra duṣṭā mahoragāḥ || 15 ||
[Analyze grammar]

alpacchāyādrumākīrṇā mṛtaprāṇisamākulā |
śamīkhadirapālāśakarīraiḥ pīlubhiḥ saha || 16 ||
[Analyze grammar]

tatra bhīmā drumagaṇāḥ kaṃṭakairacitā dṛḍhaiḥ |
jagdhaprāṇajanākīrṇā yatra bhūrdṛśyate kvacit || 17 ||
[Analyze grammar]

tathāpi jīvā jīvaṃti sarve karmanibaṃdhanāt |
nodakaṃ nodakādhārā vidvaṃstatra balāhakāḥ || 18 ||
[Analyze grammar]

pakṣāṃtaragataiḥ kaiścicchiśubhistṛṣitaiḥ samam |
utkrāṃtajīvino vipra dṛśyaṃte nu khagottamāḥ || 19 ||
[Analyze grammar]

tasmiṃstathāvidhe deśe kaściddaivavaśādvaṇik |
nijasārthaparibhraṣṭaḥ praviṣṭo marujāṃgale || 20 ||
[Analyze grammar]

babhrāmodbhrāṃtahṛdayaḥ kṣuttṛṭbhyāṃ śramapīḍitaḥ |
kva grāmaḥ kva jalaṃ kvāhaṃ yāsyāmi na bubodha ha || 21 ||
[Analyze grammar]

atha pretāndadarśāsau kṣuttṛṣāvyākuleṃdriyān |
utkaṭānkhalino bhīmānnirmāṃsānraudradarśanān || 22 ||
[Analyze grammar]

pretaskaṃdhasamārūḍhamekaṃ vikṛtadarśanam |
dadarśa bahubhiḥ pretaiḥ samaṃtātparivāritam || 23 ||
[Analyze grammar]

agacchamānamatyugraṃ pretaśabdapuraḥsaram |
preto'pi dṛṣṭvā tāṃ ghorāmaṭavīmāgataṃ naram || 24 ||
[Analyze grammar]

pretaskaṃdhānmahīṃ gatvā tasyāṃtikamupāgamat |
praṇipatya vaṇikśreṣṭhamidaṃ vacanamabravīt || 25 ||
[Analyze grammar]

asminghoratare deśe praveśo bhavataḥ katham |
tamuvāca vaṇikdhīmānsārthabhraṣṭasya me vane || 26 ||
[Analyze grammar]

praveśo daivayogena pūrvakarmakṛtena ca |
tṛṣā me bādhate'tyarthaṃ kṣudhā caiva bhṛśaṃ tathā || 27 ||
[Analyze grammar]

prāṇāṃtikamanuprāptaṃ vacanaṃ bhramatīva me |
atropāyaṃ na paśyāmi jīveyaṃ yena kenacit || 28 ||
[Analyze grammar]

ityevamukte pretastaṃ vaṇijaṃ vākyamabravīt |
phullāṃ śamīṃ samāśritya pratīkṣa tvaṃ muhūrttakam || 29 ||
[Analyze grammar]

kṛtātithyo mayā paścādgamiṣyasi yathāsukham |
evamuktastathā cakre sa vaṇiktṛṣṇayārditaḥ || 30 ||
[Analyze grammar]

madhyāhnasamaye prāpte pretastaṃ deśamāgataḥ |
phullāṃ savṛkṣāṃ śītodāṃ vāridhānīṃ manoramām || 31 ||
[Analyze grammar]

dadhyodanasamāyuktāṃ varddhamānena saṃyutām |
avatīrya tataḥ svannaṃ prādādatithaye tadā || 32 ||
[Analyze grammar]

sa tatrāśanamātreṇa paraṃ tṛptitvamāgataḥ |
vitṛṣṇo vijvaraścaiva kṣaṇena samapadyata || 33 ||
[Analyze grammar]

tataśca pretāḥ saṃprāptāḥ so'smādbhāgaṃ kramāddadau |
dadhyodanātsapānīyātpretāstṛptiṃ parāṃ gatāḥ || 34 ||
[Analyze grammar]

atithiṃ tarpayitvā tu pretalokaṃ ca sarvataḥ |
tataḥ svayaṃ sa bubhuje bhuktaśeṣaṃ yathāsukham || 35 ||
[Analyze grammar]

tasya bhuktavataḥ svannaṃ pānīyaṃ ca kṣayaṃ yayau |
pretādhipaṃ tatastaṃ vai vaṇigvacanamabravīt || 36 ||
[Analyze grammar]

āścaryametatparamaṃ vane'sminpratibhāti me |
annaṃ pānaṃ ca paramaṃ saṃprāptaṃ ca kutastava || 37 ||
[Analyze grammar]

svalpenaiva tathānnena tvametāṃstu bahūnapi |
atarpayaḥ kathaṃ tvete nirmāṃsā bhinnakukṣayaḥ || 38 ||
[Analyze grammar]

kathamasyāṃ sughorāyāmaṭavyāṃ ca kṛtālayāḥ |
tadetatsaṃśayaṃ chiṃdhi paraṃ kautūhalaṃ mama || 39 ||
[Analyze grammar]

evamuktaḥ sa vaṇijā preto vacanamabravīt |
vāṇijyasaktasya purā janmātīte mamānagha || 40 ||
[Analyze grammar]

sakale nagare nāsti mamānyo hi durātmakaḥ |
dhanalobhānna kasyāpi dattā bhikṣā mayā tadā || 41 ||
[Analyze grammar]

sakhā caiva tataścāsīdbrāhmaṇo guṇavānmama |
śrāvaṇadvādaśīyoge māsi bhādrapade tataḥ || 42 ||
[Analyze grammar]

sa kadācinmayā sārddhaṃ tāpīṃ nāma nadīṃ yayau |
tasyāśca saṃgamaḥ puṇyo yatrāsīccaṃdrabhāgayā || 43 ||
[Analyze grammar]

caṃdrabhāgā caṃdrasutā tāpī caivārkanaṃdinī |
tayoḥ śītoṣṇasalile praviveśa sa ha dvijaḥ || 44 ||
[Analyze grammar]

śravaṇadvādaśīyoge narāśca samupoṣitāḥ |
caṃdrabhāgā suto yena vāridhānīṃ dadurdvije || 45 ||
[Analyze grammar]

dadhyodanayutāṃ sārddhaṃ saṃpūrṇairvarddhamānakaiḥ |
chatropānadyugaṃ vastraṃ pratimāṃ ca tathā hareḥ || 46 ||
[Analyze grammar]

pradadau vipramukhyebhyo harasyāgre mahāmate |
vittasaṃrakṣaṇārthāya tasyāstīre vrate mayā || 47 ||
[Analyze grammar]

sopavāsena dattaikā vāridhānī manoramā |
tatkṛtvāhaṃ gṛhaṃ prāptaḥ tataḥ kālena kenacit || 48 ||
[Analyze grammar]

paṃcattvamahamāsādya nāstikyātpretatāṃ gataḥ |
asyāmaṭavyāṃ ghorāyāṃ yathā hyahikulaṃ tathā || 49 ||
[Analyze grammar]

śravaṇadvādaśīyoge vāridhānyarpitā mayā |
seyaṃ madhyāhnasamaye labhyate ca dinedine || 50 ||
[Analyze grammar]

brahmasvarūpiṇaḥ sarve pāpāḥ pretatvamāgatāḥ |
paradāragatāḥ kecitsvāmidroharatāśca ye || 51 ||
[Analyze grammar]

bhūtapretajarūpeṇa te jātā hyatra mānavāḥ |
deśe marusthale tvasminmamaite mitratāṃ gatāḥ || 52 ||
[Analyze grammar]

akṣayo bhagavānviṣṇuḥ paramātmā sanātanaḥ |
dīyate yatsamuddiśya hyakṣayaṃ tatprakīrtanam || 53 ||
[Analyze grammar]

akṣayenāpi cānnena tṛptā ete punaḥ punaḥ |
pretatvabhāvaṃ daurbalyaṃ na vimuṃcati karhicit || 54 ||
[Analyze grammar]

pūjayitvāhamannaistvāmatithiṃ samupasthitam |
pretabhāvādvinirmukto yāsyāmi paramāṃ gatim || 55 ||
[Analyze grammar]

mayā vihīnāḥ kiṃtvete vane'sminbhṛśadāruṇe |
pīḍāmanubhaviṣyaṃti dāruṇāṃ karmayonijām || 56 ||
[Analyze grammar]

eteṣāṃ tu mahābhāga mamānugrahakāmyayā |
pratyekaṃ nāmagotrāṇi gṛhṇīṣva likhitāni ca || 57 ||
[Analyze grammar]

asti kakṣāgatā caiva tava saṃpuṭikā śubhā |
himavaṃtamathāsādya tatra tvaṃ lapsyase nidhim || 58 ||
[Analyze grammar]

gayāśīrṣaṃ tato gatvā śrāddhaṃ kuru mahāmate |
ityājñāpya sa vai preto vaṇijaṃ ca yathāsukham || 59 ||
[Analyze grammar]

visarjayāmāsa tadā sa vai prāyātsamutsukaḥ |
samāsādya gṛhaṃ tatra paścātprāyāddhimālayam || 60 ||
[Analyze grammar]

tato dṛṣṭaṃ nidhiṃ tatra gṛhītvā sa samāgataḥ |
ṣaṣṭhāṃśaṃ pratigṛhyātha gayāśīrṣaṃ tato'bhyagāt || 61 ||
[Analyze grammar]

tatra gatvā gayāyāṃ sa śrāddhaṃ kṛtvā mahāmatiḥ |
pretānāṃ tu yathoddiṣṭaṃ śrāddhaṃ samyagvidhānataḥ || 62 ||
[Analyze grammar]

pratyekaṃ nāmagotrāṇi gṛhītvā piṃḍamutsṛjat |
yasya yasya bhavecchrāddhaṃ sa karoti dine vaṇik || 63 ||
[Analyze grammar]

sa sa tasya tadā svapne darśayatyātmanastanum |
bravīti ca mahābhāga prasādādbhavato'nagha || 64 ||
[Analyze grammar]

pretabhāvaṃ mayā tyaktaṃ prāpto'smi paramāṃ gatim |
evaṃ kṛtvā vidhānena gayāśīrṣaṃ mahāmanāḥ || 65 ||
[Analyze grammar]

paścājjagāma svagṛhaṃ viṣṇuṃ dhyāyanpunaḥ punaḥ |
māsi bhādrapade prāpte śuklapakṣe tathā sudhīḥ || 66 ||
[Analyze grammar]

śravaṇadvādaśīyoge saṃgame saritāṃ punaḥ |
jagāma sa mahābuddhiḥ sarvopaskarasaṃyutaḥ || 67 ||
[Analyze grammar]

saṃgame saritāṃ snātvā dvādaśīṃ tāmupoṣitaḥ |
tatra snātvāpi dattvā tu pūjayitvā janārdanam || 68 ||
[Analyze grammar]

anaṃtaraṃ brāhmaṇasya hyupahārāṃstadā dadau |
śāstroktenāpi vidhinā hyekacittarato'pi saḥ || 69 ||
[Analyze grammar]

nivarttayāmāsa tadā vaṇijo buddhimānsa vai |
varṣevarṣe tu saṃprāpte māsi bhādrapade tathā || 70 ||
[Analyze grammar]

śravaṇadvādaśīyoge saṃgame saritāṃ punaḥ |
evaṃ vai kṛtavānsarvaṃ viṣṇumuddiśya satvaram || 71 ||
[Analyze grammar]

kālena cātimahatā paṃcatvaṃ samupāgataḥ |
avāpa paramaṃ sthānaṃ durlabhaṃ sarvamānavaiḥ || 72 ||
[Analyze grammar]

krīḍate'dyāpi vaikuṃṭhe viṣṇudūtaiḥ sa sevitaḥ |
evaṃ kuru tvaṃ bho brahmanśravaṇadvādaśīvratam || 73 ||
[Analyze grammar]

sarvasaubhāgyadaṃ caiva iha loke paratra ca |
subuddhijananaṃ caiva sarvapāpaharaṃ param || 74 ||
[Analyze grammar]

śravaṇadvādaśīyoge yaḥ kuryādvratamīdṛśam |
vratasyāsya prabhāvena viṣṇulokaṃ ca gacchati || 75 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde śravaṇadvādaśīvratanāmaikonasaptatitamo'dhyāyaḥ || 69 ||
[Analyze grammar]