Chapter 57

[English text for this chapter is available]

yudhiṣṭhira uvāca |
nabhasyasya site pakṣe kiṃnāmaikādaśī bhavet |
ko devaḥ ko vidhistasya etadākhyāhi keśava || 1 ||
[Analyze grammar]

śrīkṛṣṇa uvāca |
kathayāmi mahīpāla kathāmāścaryakāriṇīm |
kathayāmāsa yāṃ brahmā nāradāya mahātmane || 2 ||
[Analyze grammar]

nārada uvāca |
kathayasva prasādena caturmukha namo'stu te |
nabhasya śuklapakṣe tu kiṃ nāmaikādaśī bhavet |
etadicchāmyahaṃ śrotuṃ viṣṇorārādhanāya vai || 3 ||
[Analyze grammar]

brahmovāca |
vaiṣṇavo'si muniśreṣṭha sādhupṛṣṭaṃ kila tvayā |
nātaḥ paratarā loke pavitrā harivāsarāt || 4 ||
[Analyze grammar]

padmā nāmeti vikhyātā nabhasyaikādaśī sitā |
hṛṣīkeśaḥ pūjyate'syāṃ karttavyaṃ vratamuttamam || 5 ||
[Analyze grammar]

kathayāmi tavāgre'haṃ kathāṃ paurāṇikīṃ śubhām |
yasyāḥ śravaṇamātreṇa mahāpāpaṃ praṇaśyati || 6 ||
[Analyze grammar]

māṃdhātā nāma rājarṣirvivasvadvaṃśasaṃbhavaḥ |
babhūva cakravartī sa satyasaṃdhaḥ pratāpavān || 7 ||
[Analyze grammar]

dharmataḥ pālayāmāsa prajāḥ putrānivaurasān |
na tasya rājye durbhikṣaṃ nādhayo vyādhayastathā || 8 ||
[Analyze grammar]

nirātaṃkāḥ prajāstasya dhanadhānyasamedhitāḥ |
nyāyenopārjitaṃ vittaṃ tasya kośe mahīpate || 9 ||
[Analyze grammar]

svasvadharme pravarttaṃte sarve varṇāśramāstathā |
kāmadhenusamābhūmistasya rājye mahīpateḥ || 10 ||
[Analyze grammar]

tasyaivaṃ kurvato rājyaṃ bahuvarṣagaṇā gatāḥ |
athaikasmiṃśca saṃprāpte vipākaḥ karmaṇaḥ khalu || 11 ||
[Analyze grammar]

varṣatrayaṃ tadviṣaye na vavarṣa balāhakaḥ |
tena bhagnāḥ prajāstasya babhūvuḥ kṣudhayārditāḥ || 12 ||
[Analyze grammar]

svāhā svadhā vaṣaṭkāra vedādhyayanavarjitāḥ |
babhūva viṣayastasyā bhāgyena daivapīḍitaḥ |
atha prajāḥ samāgamya rājānamidamabruvan || 13 ||
[Analyze grammar]

prajā ūcuḥ |
śrotavyaṃ nṛpaśārdūla prajānāṃ vacanaṃ tvayā |
āpo nārā iti proktāḥ purāṇeṣu manīṣibhiḥ || 14 ||
[Analyze grammar]

ayanaṃ bhagavatastasmānnārāyaṇa iti smṛtaḥ |
parjanyarūpo bhagavānviṣṇuḥ sarvagataḥ sthitaḥ || 15 ||
[Analyze grammar]

sa evaṃ kurute vṛṣṭiṃ vṛṣṭerannaṃ tataḥ prajāḥ |
tadabhāve nṛpaśreṣṭha kṣayaṃ gacchaṃti vai prajāḥ |
tathā kuru nṛpaśreṣṭha yogaḥ kṣemo yathā bhavet || 16 ||
[Analyze grammar]

rājovāca |
satyamuktaṃ bhavadbhiśca na mithyābhihitaṃ kvacit |
annaṃ brahma yataḥ proktamanne sarvaṃ pratiṣṭhitam || 17 ||
[Analyze grammar]

annādbhavaṃti bhūtāni jagadannena vartate |
ityevaṃ śrūyate loke purāṇe bahuvistare || 18 ||
[Analyze grammar]

nṛpāṇāmapacāreṇa prajānāṃ pīḍanaṃ bhavet |
nāhaṃ paśyāmyātmakṛtamevaṃ buddhyā vicārayan || 19 ||
[Analyze grammar]

tathāpi prayatiṣyāmi prajānāṃ hitakāmyayā |
iti kṛtvā matiṃ rājā parimeyaparicchadaḥ || 20 ||
[Analyze grammar]

namaskṛtya vidhātāraṃ jagāma gahanaṃ vanam |
cacāra munimukhyāṃśca āśramāntāpasaiḥ śritān || 21 ||
[Analyze grammar]

dadarśātha brahmasutamṛṣimāṃgirasaṃ nṛpaḥ |
tejasā dyotitadiśaṃ dvitīyamiva padmajam || 22 ||
[Analyze grammar]

taṃ dṛṣṭvā harṣito rājā avatīrya svavāhanāt |
namaścakre'sya caraṇau kṛtāṃjalipuṭo vaśī || 23 ||
[Analyze grammar]

munistamabhinaṃdyātha svastivācanapūrvakam |
papraccha kuśalaṃ rājye saptasvaṃgeṣu bhūpateḥ || 24 ||
[Analyze grammar]

nivedayitvā kuśalaṃ papracchānāmayaṃ nṛpaḥ |
dattāsano gṛhītārghya upaviṣṭo'sya saṃnidhau || 25 ||
[Analyze grammar]

pratyuvāca muniṃ rājā pṛṣṭo hyāgamakāraṇam || 26 ||
[Analyze grammar]

rājovāca |
bhagavandharmavidhinā mama pālayato mahīm |
anāvṛṣṭiśca saṃvṛttā nāhaṃ vedmyatra kāraṇam || 27 ||
[Analyze grammar]

saṃśayacchedanāyātra āgato'haṃ tavāṃtike |
yogakṣemavidhānena prajānāṃ kuru nirvṛtim || 28 ||
[Analyze grammar]

ṛṣiruvāca |
etatkṛtayugaṃ rājanyugānāmuttamaṃ matam |
atra brahmaparā lokā dharmaścātra catuṣpadaḥ || 29 ||
[Analyze grammar]

asminyuge tapoyuktā brāhmaṇā netarā janāḥ |
viṣaye tava rājeṃdra vṛṣalo'yaṃ tapasyati || 30 ||
[Analyze grammar]

etasmātkāraṇāccaiva na varṣati balāhakaḥ |
kuru tasya vadhe yatnaṃ yena doṣaḥ praśāmyati || 31 ||
[Analyze grammar]

rājovāca |
nāhamenaṃ vadhiṣyāmi tapasyaṃtamanāgasam |
dharmopadeśaṃ kathaya upasargavināśanam || 32 ||
[Analyze grammar]

ṛṣiruvāca |
yadyevaṃ tarhi nṛpate kuruṣvaikādaśīvratam |
nabhasyasya site pakṣe padmā nāmeti viśrutā || 33 ||
[Analyze grammar]

tasyā vrataprabhāvena suvṛṣṭirbhavitā dhruvam |
sarvasiddhipradā hyeṣā sarvopadravanāśinī || 34 ||
[Analyze grammar]

asyā vrataṃ kuru nṛpa saprajaḥ saparicchadaḥ |
iti vākyamṛṣeḥ śrutvā rājā svagṛhamāgataḥ || 35 ||
[Analyze grammar]

bhādramāse site pakṣe padmāvratamathākarot |
prajābhiḥ saha sarvābhiścāturvarṇyasamanvitaḥ || 36 ||
[Analyze grammar]

evaṃ vrate kṛte rājanpravavarṣa balāhakaḥ |
jalena plāvitā bhūmirabhavatsasyaśālinī || 37 ||
[Analyze grammar]

ṛṣīśvaraprabhāvena lokāḥ saukhyaṃ prapedire |
etasmātkāraṇādevaṃ karttavyaṃ vratamuttamam || 38 ||
[Analyze grammar]

dadhyodanayutaṃ tasyāṃ jalapūrṇaṃ ghaṭaṃ dvije |
vastrasaṃveṣṭitaṃ dattvā chatropānahameva ca || 39 ||
[Analyze grammar]

namo namaste goviṃda budhaśravaṇasaṃjñaka |
aghaughasaṃkṣayaṃ kṛtvā sarvasaukhyaprado bhava || 40 ||
[Analyze grammar]

bhuktimuktipradaścaiva lokānāṃ sukhadāyakaḥ |
paṭhanācchravaṇādrājansarvapāpaiḥ pramucyate || 41 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde bhādrapadaśuklā padmaikādaśīnāma saptapaṃcāśattamo'dhyāyaḥ || 57 ||
[Analyze grammar]