Chapter 54

[English text for this chapter is available]

yudhiṣṭhira uvāca |
śrāvaṇasya site pakṣe kiṃnāmaikādaśībhavet |
tannaḥ kathaya goviṃda vāsudeva namo'stu te || 1 ||
[Analyze grammar]

śrīkṛṣṇa uvāca |
śṛṇu rājanpravakṣyāmi ākhyānaṃ pāpanāśanam |
yatproktaṃ brahmaṇā pūrvaṃ pṛcchate nāradāya vai || 2 ||
[Analyze grammar]

nārada uvāca |
bhagavanśrotumicchāmi tvatto'haṃ kamalāsana |
śrāvaṇasyāsite pakṣe kiṃ nāmaikādaśī bhavet || 3 ||
[Analyze grammar]

ko devaḥ ko vidhistasyāḥ kiṃ puṇyaṃ kathaya prabho |
iti tasya vacaḥ śrutvā brahmā vacanamabravīt || 4 ||
[Analyze grammar]

brahmovāca |
śṛṇu nārada te vacmi lokānāṃ hitakāmyayā |
śrāvaṇaikādaśī kṛṣṇā kāmikā nāma nāmataḥ || 5 ||
[Analyze grammar]

asyāḥ śravaṇamātreṇa vājapeyaphalaṃ labhet |
asyāṃ yajati deveśaṃ śaṃkhacakragadādharam || 6 ||
[Analyze grammar]

śrīdharākhyaṃ hariṃ viṣṇuṃ mādhavaṃ madhusūdanam |
pūjayeddhyāyate yo vai tasya puṇyaṃphalaṃ śṛṇu || 7 ||
[Analyze grammar]

na gaṃgāyāṃ na kāśyāṃ ca naimiṣe na ca puṣkare |
tatphalaṃ samavāpnoti yatphalaṃ kṛṣṇapūjanāt || 8 ||
[Analyze grammar]

godāvaryāṃ gurau siṃhe vyatīpāte ca daṃḍake |
yatphalaṃ samavāpnoti tatphalaṃ kṛṣṇapūjanāt || 9 ||
[Analyze grammar]

sasāgaravanopetāṃ yo dadāti vasuṃdharām |
kāmikāvratakārī ca hyubhau samaphalau smṛtau || 10 ||
[Analyze grammar]

prasūyamānāṃ yo dhenuṃ dadyātsopaskarāṃ naraḥ |
tatphalaṃ samavāpnoti kāmikāvratakārakaḥ || 11 ||
[Analyze grammar]

śrāvaṇe śrīdharaṃ devaṃ pūjayedyo narottamaḥ |
tenaiva pūjitā devā gaṃdharvoragapannagāḥ || 12 ||
[Analyze grammar]

tasmātsarvaprayatnena kāmikādivase hariḥ |
pūjanīyo yathāśakti mānuṣaiḥ pāpabhīrubhiḥ || 13 ||
[Analyze grammar]

ye saṃsārārṇave magnāḥ pāpapaṃkasamākule |
teṣāmuddharaṇārthāya kāmikāvratamuttamam || 14 ||
[Analyze grammar]

nātaḥ paratarā kācitpavitrā pāpahāriṇī |
evaṃ nārada jānīhi svayamāha paro hariḥ || 15 ||
[Analyze grammar]

adhyātmavidyā niratairyatphalaṃ prāpyate naraiḥ |
tato bahutaraṃ viddhi kāmikāvratasevinām || 16 ||
[Analyze grammar]

rātrau jāgaraṇaṃ kṛtvā kāmikāvratakṛnnaraḥ |
na paśyati yamaṃ raudraṃ naiva gacchati durgatim || 17 ||
[Analyze grammar]

na paśyati kuyoniṃ ca kāmikāvratasevanāt |
kāmikāyā vrate cīrṇe kaivalyaṃ yogino gatāḥ || 18 ||
[Analyze grammar]

tasmātsarvaprayatnena kartavyā niyatātmabhiḥ |
tulasīprabhavaiḥ patraiḥ yo naraḥ pūjayeddharim || 19 ||
[Analyze grammar]

na lipyate sa pāpena padmapatramivāṃbhasā |
suvarṇabhāramekaṃ tu rajataṃ ca caturguṇam || 20 ||
[Analyze grammar]

tatphalaṃ samavāpnoti tulasīdalapūjanāt |
ratna mauktika vaiḍūrya pravālādibhirarcitaḥ || 21 ||
[Analyze grammar]

na tuṣyati tathā viṣṇustulasīdalato yathā |
tulasīmaṃjarībhiśca pūjito yena keśavaḥ || 22 ||
[Analyze grammar]

yā dṛṣṭā nikhilāghasaṃghaśamanī spṛṣṭā vapuḥ pāvanī |
rogāṇāmabhivaṃditāni rasinī siktāṃtakatrāsinī |
pratyāsattividhāyinī bhagavataḥ kṛṣṇasya saṃropitā |
nyastā taccaraṇe vimuktiphaladā tasyai tulasyai namaḥ || 23 ||
[Analyze grammar]

dīpaṃ dadāti yo martyo divārātraṃ harerdine |
tasya puṇyasya saṃkhyātuṃ citragupto na vettyalam || 24 ||
[Analyze grammar]

kṛṣṇāgre dīpako yasya jvalatyekādaśīdine |
pitarastasya tṛpyaṃti amṛtena divi sthitāḥ || 25 ||
[Analyze grammar]

ghṛtena dīpaṃ prajvālya tilatailena vā punaḥ |
prayāti sūryalokaṃ ca dīpakoṭiśatārcitaḥ || 26 ||
[Analyze grammar]

ayaṃ tavāgre kathitaḥ kāmikāmahimā mayā |
ato naraiḥ prakarttavyā sarvapātakahāriṇī || 27 ||
[Analyze grammar]

brahmahatyāpaharaṇī bhrūṇahatyāvināśinī |
vaiṣṇavasthānadātrī ca mahāpuṇyaphalapradā || 28 ||
[Analyze grammar]

śrutvā māhātmyametasyā naraḥ śraddhāsamanvitaḥ |
viṣṇulokamavāpnoti sarvapāpaiḥ pramucyate || 29 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde śrāvaṇakṛṣṇaikādaśīnāma catuṣpaṃcāśattamo'dhyāyaḥ || 54 ||
[Analyze grammar]