Chapter 51

[English text for this chapter is available]

yudhiṣṭhira uvāca |
aparāyāśca māhātmyaṃ śrutaṃ sarvaṃ janārdana |
jyeṣṭhasya śuklapakṣe tu syādyā tāṃ vada mānada || 1 ||
[Analyze grammar]

śrīkṛṣṇa uvāca |
enāṃ vakṣyati dharmātmā vyāsaḥ satyavatīsutaḥ |
sarvaśāstrārthatattvajño vedavedāṃgapāragaḥ || 2 ||
[Analyze grammar]

yudhiṣṭhira uvāca |
śrutā me mānavā dharmā vāsiṣṭhāśca śrutā mayā |
dvaipāyana yathāvattvaṃ vaiṣṇavānvaktumarhasi || 3 ||
[Analyze grammar]

śrīvedavyāsa uvāca |
śrutāstu mānavā dharmā vaidikāśca śrutāstvayā |
kalau yuge na śakyaṃte te vai kartuṃ narādhipa || 4 ||
[Analyze grammar]

sukhopāyamalpadhanamalpakleśaṃ mahāphalam |
purāṇānāṃ ca sarveṣāṃ sārabhūtaṃ mahāmate || 5 ||
[Analyze grammar]

ekādaśyāṃ na bhuṃjīta pakṣayorubhayorapi |
dvādaśyāṃ tu śucirbhūtvā puṣpaiḥ saṃpūjya keśavam || 6 ||
[Analyze grammar]

annaṃ bhuṃjīta satkṛtya paścādviprapuraḥsaram |
sūtake'pi na bhoktavyaṃ nāśauce ca janādhipa || 7 ||
[Analyze grammar]

yāvajjīvaṃ vratamidaṃ karttavyaṃ puruṣarṣabha |
svargatiṃ prāptumicchadbhiratra naivāsti saṃśayaḥ || 8 ||
[Analyze grammar]

āpapāpā durācārāḥ pāpiṣṭhā dharmavarjitāḥ |
ekādaśyāṃ na bhuṃjānā na te yāṃti yamāṃtikam || 9 ||
[Analyze grammar]

iti tadvacanaṃ śrutvā kaṃpito'śvatthapatravat |
bhīmaseno mahābāhurnatvovāca guruṃ prati || 10 ||
[Analyze grammar]

bhīmasena uvāca |
pitāmaha mahābuddhe śṛṇu me paramaṃ vacaḥ |
yudhiṣṭhiraśca kuṃtī ca tathā drupadanaṃdinī || 11 ||
[Analyze grammar]

arjuno nakulaścaiva sahadevastathaiva ca |
ekādaśyāṃ na bhuṃjaṃti kadācidapi suvratāḥ || 12 ||
[Analyze grammar]

te māṃ bruvaṃti vai nityaṃ mā bhuṃkṣva tvaṃ vṛkodara |
ahaṃ tānabruvaṃ tāta bubhukṣā duḥsahā mama || 13 ||
[Analyze grammar]

dānaṃ dāsyāmi vidhivatpūjayiṣyāmi keśavam |
bhīmasenavacaḥ śrutvā vyāso vacanamabravīt || 14 ||
[Analyze grammar]

vyāsa uvāca |
yadi svargamabhīṣṭaṃ te narakaṃ duṣṭameva ca |
ekādaśyāṃ na bhoktavyaṃ pakṣayorubhayorapi || 15 ||
[Analyze grammar]

bhīmasena uvāca |
pitāmaha mahābuddhe kathayāmi tavāgrataḥ |
ekabhakte na śaknomi upavāse kutaḥ prabho || 16 ||
[Analyze grammar]

vṛko'pināma yo vahniḥ sa sadā jaṭhare mama |
ativelaṃ yadāśnāmi tadā samupaśāmyati || 17 ||
[Analyze grammar]

naikaṃ śaknomyahaṃ kartumupavāsaṃ mahāmune |
yenaiva prāpyate svargastatkarttāsmi yathātatham |
tadekaṃ vada niścitya yena śreyo'hamāpnuyām || 18 ||
[Analyze grammar]

vyāsa uvāca |
vṛṣasthe mithunasthe vā yadā caikādaśī bhavet |
jyeṣṭhamāse prayatnena sopoṣyodakavarjitā || 19 ||
[Analyze grammar]

gaṃḍūṣācamanaṃ vāri varjayitvodakaṃ budhaḥ |
upabhuṃjīta naiveha vratabhaṃgo'nyathā bhavet || 20 ||
[Analyze grammar]

udayādudayaṃ yāvadvarjayitvodakaṃ naraḥ |
śrūyatāṃ samavāpnoti dvādaśadvādaśī phalam || 21 ||
[Analyze grammar]

tataḥ prabhāte vimale dvādaśyāṃ snānamācaret |
jalaṃ suvarṇaṃ dattvā ca dvijātibhyo yathāvidhi || 22 ||
[Analyze grammar]

bhuṃjīta kṛtakṛtyastu brāhmaṇaiḥ sahito vaśī |
evaṃ kṛte ca yatpuṇyaṃ bhīmasena śṛṇuṣva tat || 23 ||
[Analyze grammar]

saṃvatsare tu yāścaiva ekādaśyo bhavaṃti hi |
tāsāṃ phalamavāpnoti hyatra me nāsti saṃśayaḥ || 24 ||
[Analyze grammar]

iti māṃ keśavaḥ prāha śaṃkhacakragadādharaḥ |
sarvānparityajya pumānmāmekaṃ śaraṇaṃ vrajet || 25 ||
[Analyze grammar]

ekādaśyāṃ nirāhārastataḥ pāpātpramucyate |
dravyaśuddhiḥ kalau nāsti saṃskāraḥ smārtta eva ca || 26 ||
[Analyze grammar]

vaidikastu kutaścāpi prāpte duṣṭe kalau yuge |
kiṃ nu te bahunoktena vāyuputra punaḥ punaḥ || 27 ||
[Analyze grammar]

ekādaśyāṃ na bhuṃjīta pakṣayorubhayorapi |
ekādaśyāṃ site pakṣe jyeṣṭhemāsyudakaṃ vinā || 28 ||
[Analyze grammar]

puṇyaṃ phalamavāpnoti tacchṛṇuṣva vṛkodara |
saṃvatsare tu yā proktāḥ śuklaḥ kṛṣṇā vṛkodara || 29 ||
[Analyze grammar]

upoṣitā hi sarvāḥ syurekādaśyo na saṃśayaḥ |
dhanadhānyapradā puṇyā putrārogyaśubhapradā || 30 ||
[Analyze grammar]

upoṣitā naravyāghra iti satyaṃ bravīmi te |
yamadūtā mahākāyāḥ karālāḥ kṛṣṇarūpiṇaḥ || 31 ||
[Analyze grammar]

daṃḍapāśadharā raudrā nopasarpaṃti taṃ naram |
pītāṃbaradharā saumyāścakrahastā manojavāḥ || 32 ||
[Analyze grammar]

aṃtakālena yaṃtyete vaiṣṇavānvaiṣṇavīpurīm |
tasmātsarvaprayatnena upoṣyodakavarjitā || 33 ||
[Analyze grammar]

jaladhenuṃ tadā dattvā sarvapāpaiḥ pramucyate |
tatastvamasyāṃ kauṃteya sopavāso'rcanaṃ hareḥ || 34 ||
[Analyze grammar]

kuru sarvaprayatnena sarvapāpapraśāṃtaye |
svapnena me'parādhosti daṃtarāgatayāpi vā || 35 ||
[Analyze grammar]

bhokṣyepare'hni deveśa hyaśanaṃ vāsarāddhareḥ |
ityuccārya tato maṃtra upavāsaparo bhavet || 36 ||
[Analyze grammar]

sarvapāpavināśāya śraddhā dama samanvitaḥ |
merumaṃdaramātrāghaṃ striyā puṃsā ca yatkṛtam || 37 ||
[Analyze grammar]

sarvaṃ tadbhasmatāṃ yāti ekādaśyāḥ prabhāvataḥ |
na śaknuvaṃti ye dātuṃ jaladhenuṃ narādhipa || 38 ||
[Analyze grammar]

sakāṃcanaḥ pradātavyo ghaṭako vastrasaṃyutaḥ |
toyasya niyamaṃ yo'syā kurute vai sa puṇyabhāk || 39 ||
[Analyze grammar]

phalaṃ koṭisuvarṇasya yāmeyāme śrutaṃ phalam |
snānaṃ dānaṃ japaṃ homaṃ yadasyāṃ kurute naraḥ || 40 ||
[Analyze grammar]

tatsarvaṃ cākṣayaṃ prāptametatkṛṣṇaprabhāṣitam |
kiṃ vāpareṇa dharmeṇa nirjalaikādaśīṃ vinā || 41 ||
[Analyze grammar]

upoṣya samyagvidhivadvaiṣṇavaṃ padamāpnuyāt |
suvarṇamannaṃ vāso vā yadasyāṃ saṃpradīyate || 42 ||
[Analyze grammar]

tadasya kuruśārdūla sarvaṃ cāpyakṣayaṃ bhavet |
ekādaśyāṃ dine yo'nnaṃ bhuṃkte pāpaṃ bhunakti saḥ || 43 ||
[Analyze grammar]

ihaloke sa cāṃḍālo mṛtaḥ prāpnoti durgatim |
ye ca dāsyaṃti dānāni dvādaśyāṃ samupoṣitāḥ || 44 ||
[Analyze grammar]

jyeṣṭhamāse site pakṣe prāpsyaṃti paramaṃ padam |
brahmahā madyapaḥ steno gurudveṣī sadānṛtī || 45 ||
[Analyze grammar]

mucyaṃte pātakaiḥ sarvairnirjalāyairupoṣitā |
viśeṣaṃ śṛṇu kauṃteya nirjalaikādaśī dine || 46 ||
[Analyze grammar]

yatkarttavyaṃ naraiḥ strībhirdānaṃ śraddhāsamanvitaiḥ |
jalaśāyī ca saṃpūjyo deyā dhenustathāmmayī || 47 ||
[Analyze grammar]

pratyakṣā vā nṛpaśreṣṭha ghṛtadhenurathāpi vā |
dakṣiṇābhiḥ supuṣṭābhirmiṣṭānnaiśca pṛthagvidhaiḥ || 48 ||
[Analyze grammar]

toṣaṇīyāḥ prayatnena dvijā dharmabhṛtāṃ vara |
tuṣṭā bhavaṃti vai viprāstaistuṣṭairmokṣado hariḥ || 49 ||
[Analyze grammar]

ātmadrohaḥ kṛtastairhi yaireṣā na hyupoṣitā |
pāpātmāno durācārā muṣṭāste nātra saṃśayaḥ || 50 ||
[Analyze grammar]

kulānāṃ śatamāgāmi atītānāṃ tathā śatam |
ātmanā saha tairnītaṃ vāsudevasya maṃdiram || 51 ||
[Analyze grammar]

śāṃtairdāṃtairdānaparairarcayadbhistathā harim |
kurvadbhirjāgaraṃ rātrau yaireṣā samupoṣitā || 52 ||
[Analyze grammar]

annaṃ vastraṃ tathā gāvo jalaṃ śayyāsanaṃ śubham |
kamaṃḍaluṃ tathā chatraṃ dātavyaṃ nirjalā dine || 53 ||
[Analyze grammar]

upānahau yo dadāti pātrabhūte dvijottame |
sa sauvarṇena yānena svargaloke mahīyate || 54 ||
[Analyze grammar]

yaścemāṃ śṛṇuyādbhaktyā yaścāpi parikīrtayet |
ubhau tau svargamāpnoti nātra kāryā vicāraṇā || 55 ||
[Analyze grammar]

yatphalaṃ saṃnihatyāyāṃ rāhugraste divākare |
kṛtvā śrāddhaṃ labhenmartyastadasyāḥ śravaṇādapi || 56 ||
[Analyze grammar]

niyamaṃ ca prakarttavyaṃ daṃtadhāvanapūrvakam |
ekādaśyāṃ nirāhāro varjayiṣyāmi vai jalam || 57 ||
[Analyze grammar]

keśavaprīṇanārthāya anyadācamanādṛte |
dvādaśyāṃ devadeveśaḥ pūjanīyastrivikramaḥ || 58 ||
[Analyze grammar]

gaṃdhairdhūpaistathā puṣpairvāsobhiḥ priyadarśanaiḥ |
pūjayitvā vidhānena maṃtrametamudīrayet || 59 ||
[Analyze grammar]

devadeva hṛṣīkeśa saṃsārārṇavatāraka |
udakuṃbhapradānena naya māṃ paramāṃ gatim || 60 ||
[Analyze grammar]

jyeṣṭhe māsi tu vai bhīma yā śuklaikādaśī śubhā |
nirjalā samupoṣyātra jalakuṃbhānsaśarkarān || 61 ||
[Analyze grammar]

pradāya vipramukhyebhyo modate viṣṇusannidhau |
tataḥ kuṃbhāḥ pradātavyā brāhmaṇānāṃ ca bhaktitaḥ || 62 ||
[Analyze grammar]

bhojayitvā tato viprānsvayaṃ bhuṃjīta tatparaḥ |
evaṃ yaḥ kurute pūrṇāṃ dvādaśīṃ pāpanāśinīm || 63 ||
[Analyze grammar]

sarvapāpavinirmukto padaṃ gacchatyanāmayam |
tataḥ prabhṛti bhīmena kṛtā hyekādaśī śubhā |
pāṃḍavadvādaśī nāmnā loke khyātā babhūva ha || 64 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitayāmuttarakhaṃḍe umāpatināradasaṃvāde jyeṣṭhaśuklā nirjalaikādaśīnāmaikapaṃcāśattamo'dhyāyaḥ || 51 ||
[Analyze grammar]