Chapter 49

[English text for this chapter is available]

yudhiṣṭhira uvāca |
vaiśākha śuklapakṣe tu kinnāmaikādaśī bhavet |
kiṃ phalaṃ ko vidhistatra kathayasva janārdana || 1 ||
[Analyze grammar]

śrīkṛṣṇa uvāca |
idameva purā pṛṣṭaṃ rāmacaṃdreṇa dhīmatā |
vasiṣṭhaṃ prati rājeṃdra yattvaṃ māmanupṛcchasi || 2 ||
[Analyze grammar]

rāma uvāca |
bhagavañchrotumicchāmi vratānāmuttamaṃ vratam |
sarvapāpakṣayakaraṃ sarvaduḥkhanikṛṃtanam || 3 ||
[Analyze grammar]

mayā duḥkhāni bhuktāni sītāvirahajāni tu |
tato'haṃ bhayabhīto'smi pṛcchāmi tvāṃ mahāmune || 4 ||
[Analyze grammar]

vasiṣṭha uvāca |
sādhu pṛṣṭaṃ tvayā rāma tavaiṣā naiṣṭhikī matiḥ |
tvannāmagrahaṇenaiva pūto bhavati mānavaḥ || 5 ||
[Analyze grammar]

tathāpi kathayiṣyāmi lokānāṃ hitakāmyayā |
pavitraṃ pāvanānāṃ ca vratānāmuttamaṃ vratam || 6 ||
[Analyze grammar]

vaiśākhasya site pakṣe rāma caikādaśī bhavet |
mohinī nāma sā proktā sarvapāpaharāparāḥ || 7 ||
[Analyze grammar]

mohajālātpramucyaṃte pātakānāṃ samūhataḥ |
asyā vrata prabhāvena satyaṃ satyaṃ vadāmyaham || 8 ||
[Analyze grammar]

ataḥ kāraṇato rāma kartavyaiṣā bhavādṛśaiḥ |
pātakānāṃ kṣayakarī mahāduḥkhavināśinī || 9 ||
[Analyze grammar]

śṛṇuṣvaikamanā rāma kathāṃ pāpaharāṃ parām |
yasyāḥ śravaṇamātreṇa mahāpāpaṃ praṇaśyati || 10 ||
[Analyze grammar]

sarasvatyāstaṭe ramye purī bhadrāvatī śubhā |
dyutimānnāma nṛpatistatra rājyaṃ karoti vai || 11 ||
[Analyze grammar]

caṃdravaṃśodbhavo nāma dhṛtimānsatyasaṃgaraḥ |
tatra vaiśyo nivasati dhanadhānyasamṛddhimān || 12 ||
[Analyze grammar]

dhanapāla iti khyātaḥ puṇyakarmapravarttakaḥ |
prapā kūpa maṭhārāma taḍāga gṛhakārakaḥ || 13 ||
[Analyze grammar]

viṣṇubhaktirataḥ śāṃtastasyāsanpaṃcaputrakāḥ |
sumanā dyutimāṃścaiva medhāvī sukṛtastathā || 14 ||
[Analyze grammar]

paṃcamo dhṛṣṭabuddhiśca mahāpāparataḥ sadā |
parastrīsaṃganirato viṭagoṣṭhī viśāradaḥ || 15 ||
[Analyze grammar]

dyūtādi vyasanāsaktaḥ parastrī ratilālasaḥ |
na ca devārcane buddhirnapitṝnna dvijānprati || 16 ||
[Analyze grammar]

anyāyavartī duṣṭātmā piturdravyakṣayaṃkaraḥ |
abhakṣyabhakṣakaḥ pāpī surāpāne rataḥ sadā || 17 ||
[Analyze grammar]

veśyākaṃṭhe kṣiptabāhurbhramanduṣṭaścatuṣpathe |
pitrā niṣkāsito gehātparityaktaśca bāṃdhavaiḥ || 18 ||
[Analyze grammar]

svadehabhūṣaṇānyeva kṣayaṃ nītāni tena vai |
gaṇikābhiḥ parityakto niṃditaśca dhanakṣayāt || 19 ||
[Analyze grammar]

tataściṃtāparo jāto vastrahīnaḥ kṣudhārditaḥ |
kiṃ karomi kvagacchāmi kenopāyena jīvyate || 20 ||
[Analyze grammar]

taskaratvaṃ samārabdhaṃ tatraiva nagare pituḥ |
gṛhīto rājapuruṣairmuktaśca pitṛgauravāt || 21 ||
[Analyze grammar]

punarbaddhaḥ punastyaktaḥ punarbaddhaḥ sasaṃbhramaiḥ |
dhṛṣṭabuddhirdurācāro nibadhya nigaḍai rdṛḍhaiḥ || 22 ||
[Analyze grammar]

kaśāghātaistāḍitaśca pīḍitaśca punaḥ punaḥ |
na sthātavyaṃ hi maṃdātmaṃstvayā maddeśagocare || 23 ||
[Analyze grammar]

evamuktvā tato rājñā mocito dṛḍhabaṃdhanāt |
nirjagāma bhayāttasya gato'sau gahanaṃ vanam || 24 ||
[Analyze grammar]

kṣuttṛṣāpīḍitaścāyamitaścetaśca dhāvati |
siṃhavannijaghānāsau mṛga śūkara citralān || 25 ||
[Analyze grammar]

āmiṣāhāra nirato vane tiṣṭhati sarvadā |
kare śarāsanaṃ kṛtvā niṣaṃgaṃ pṛṣṭha saṃgatam || 26 ||
[Analyze grammar]

araṇyacāriṇo haṃti pakṣiṇaśca padācaran |
cakorāṃśca mayūrāṃśca kaṃka tittira mūṣikān || 27 ||
[Analyze grammar]

etānanyānhinastyaṃdho dhṛṣṭabuddhistu nirghṛṇaḥ |
pūrvajanmakṛtaiḥ pāpairnimagnaḥ pāpakardame || 28 ||
[Analyze grammar]

duḥkhaśokasamāviṣṭaḥ pīḍyamāno divāniśam |
kauṃḍinyasyāśramapadaṃ prāptaḥ puṇyāgamātkvacit || 29 ||
[Analyze grammar]

mādhave māsi jāhnavyāḥ kṛtasnānaṃ tapodhanam |
āsasāda dhṛṣṭabuddhiḥ śokabhāreṇa pīḍitaḥ || 30 ||
[Analyze grammar]

tadvastrabiṃdusparśena gatapāpo hatāśubhaḥ |
kauṃḍinyasyāgrataḥ sthitvā pratyuvāca kṛtāṃjali || 31 ||
[Analyze grammar]

dhṛṣṭabuddhiruvāca |
bho bho brahmandvijaśreṣṭha dayāṃ kṛtvā mamopari |
yena puṇyaprabhāvena muktirbhavati tadvada || 32 ||
[Analyze grammar]

kauṃḍinya uvāca |
śṛṇuṣvaikamanābhūtvā yena pāpakṣayastava |
vaiśākhasya site pakṣe mohinī nāma viśrutā || 33 ||
[Analyze grammar]

ekādaśīvrataṃ tasyāḥ kuru madvākyanoditaḥ |
merutulyāni pāpāni kṣayaṃ gacchaṃti dehinām || 34 ||
[Analyze grammar]

bahujanmārjitānyeṣā mohinī samupoṣitā |
iti vākyaṃ muneḥ śrutvā dhṛṣṭabuddhiḥ prasannadhīḥ || 35 ||
[Analyze grammar]

vrataṃ cakāra vidhivatkauṃḍinyasyopadeśataḥ |
kṛte vrate nṛpaśreṣṭha gatapāpo babhūva saḥ || 36 ||
[Analyze grammar]

divyadehastato bhūtvā garuḍoparisaṃsthitaḥ |
jagāma vaiṣṇavaṃ lokaṃ sarvopadrava varjitam || 37 ||
[Analyze grammar]

itīdṛśaṃ rāmacaṃdra uttamaṃ mohinī vratam |
nātaḥ parataraṃ kiṃcittrailokye sacarācare || 38 ||
[Analyze grammar]

yajñāditīrthadānāni kalāṃ nārhaṃti ṣoḍaśīm |
paṭhanācchravaṇādrājangosahasra phalaṃ labhet || 39 ||
[Analyze grammar]

iti śrīpādmemahāpurāṇe paṃcapaṃcāśatsāhasryāṃ sahitāyāmuttarakhaṃḍe umāpatināradasaṃvāde vaiśākhaśukle mohanyekādaśīnāma ekonapaṃcāśattamo'dhyāyaḥ || 49 ||
[Analyze grammar]