Chapter 46

[English text for this chapter is available]

yudhiṣṭhira uvāca |
phālgunasya site pakṣe śrutā cāmalakī tathā |
caitrasya kṛṣṇapakṣe tu kiṃ nāmaikādaśī bhavet || 1 ||
[Analyze grammar]

śrīkṛṣṇa uvāca |
śṛṇu rājeṃdra vakṣyāmi ākhyānaṃ pāpanāśanam |
yallomaśo'bravītpṛṣṭo māṃdhātrā cakravartinā || 2 ||
[Analyze grammar]

māṃdhātovāca |
bhagavanśrotumicchāmi lokānāṃ hitakāmyayā |
caitrasya prathame pakṣe kā nāmaikādaśī bhavet |
ko vidhiḥ kiṃ phalaṃ tasyāḥ kathayasva prasādataḥ || 3 ||
[Analyze grammar]

lomaśa uvāca |
caitramāsyasite pakṣe nāmnā vai pāpamocanī |
ekādaśī samākhyātā piśācatvavināśinī || 4 ||
[Analyze grammar]

śṛṇu tasyāḥ pravakṣyāmi kāmadāṃ siddhidāṃ nṛpa |
kathāṃ vicitrāṃ śubhadāṃ pāpaghnīṃ dharmadāyinīm || 5 ||
[Analyze grammar]

purā caitrarathoddeśe apsarogaṇasevite |
vasaṃtasamaye prāpte ṣaṭpadākulite vane || 6 ||
[Analyze grammar]

gaṃdharvakanyāvāditrai ramaṃti saha kiṃnaraiḥ |
pākaśāsanamukhyāśca krīḍāṃte tridivaukasaḥ || 7 ||
[Analyze grammar]

nāparaṃ sukhadaṃ kiṃcidvinā caitrarathādvanam |
tasminvane tu munayastapaṃti bahulaṃ tapaḥ || 8 ||
[Analyze grammar]

medhāvi nāmānamṛṣiṃ tatrasthaṃ brahmacāriṇam |
apsarāstaṃ munivaraṃ mohanāyopacakrame || 9 ||
[Analyze grammar]

maṃjughoṣeti vikhyātā bhāvaṃ tasya vitanvatī |
krośamātraṃ sthitā tasya bhayādāśramasannidhau || 10 ||
[Analyze grammar]

gāyaṃtī madhuraṃ sādhu pīḍayaṃtī vipaṃcikām |
gāyaṃtīṃ tāmathālokya puṣpacaṃdanasevitām || 11 ||
[Analyze grammar]

kāmo'pi vijayākāṃkṣī śivabhaktānmunīśvarān |
tasyāḥ śarīre saṃvāsamakaronmanasaḥ sutaḥ || 12 ||
[Analyze grammar]

kṛtvā bhruvau dhanuṣkoṭiṃ guṇaṃ kṛtvā kaṭākṣakam |
mārgaṇau nayane kṛtvā pakṣmayukte yathākramam || 13 ||
[Analyze grammar]

kucau kṛtvā paṭakuṭīṃ vijayāyopacakrame |
maṃjughoṣābhavattasya kāmasyaiva varūthinī || 14 ||
[Analyze grammar]

medhāvinaṃ muniṃ dṛṣṭvā sāpi kāmena pīḍitā |
yauvanodbhinnadeho'sau medhāvyapi virājate || 15 ||
[Analyze grammar]

sitopavītasahito dṛṣṭaḥ smara ivāparaḥ |
medhāvī vasate cāsau cyavanasyāśrame śubhe || 16 ||
[Analyze grammar]

maṃjughoṣā sthitaṃ tatra dṛṣṭvā sā munipuṃgavam |
madanasya vaśaṃ prāptā maṃdaṃ maṃdamagāyata || 17 ||
[Analyze grammar]

raṇadvalayasaṃyuktāṃ śiṃjannūpuramekhalām |
gāyaṃtīṃ tāṃ tathābhūtāṃ vilokya munipuṃgavaḥ || 18 ||
[Analyze grammar]

madanena sasainyena nīto mohavaśaṃ balāt |
maṃjughoṣā samāgamya muniṃ dṛṣṭvā tathāvidham || 19 ||
[Analyze grammar]

hāvabhāvakaṭākṣaistaṃ mohayāmāsa cāṃganā |
adhaḥ saṃsthāpya vīṇāṃ sā sasvaje taṃ munīśvaram || 20 ||
[Analyze grammar]

valiteva latā vṛkṣaṃ vātavegena kaṃpitam |
so'pi reme tayā sārddhaṃ medhāvī munipuṃgavaḥ || 21 ||
[Analyze grammar]

tasminneva tato dṛṣṭvā tasyāstaṃ dehamuttamam |
śivatatvaṃ gataṃ tasya kāmatattvavaśaṃ gataḥ || 22 ||
[Analyze grammar]

na niśāṃ na dinaṃ so'pi ramanjānāti kāmukaḥ |
bahuvarṣaṃ gataḥ kālo munerācāralopataḥ || 23 ||
[Analyze grammar]

maṃjughoṣā devalokagamanāyopacakrame |
gacchaṃtī taṃ pratyuvāca ramaṃtaṃ munisattamam |
ādeśo dīyatāṃ brahmansvadeśagamanāya me || 24 ||
[Analyze grammar]

medhāvyuvāca |
adyaiva tvaṃ samāyātā pradoṣādau varānane |
yāvatprabhātasaṃdhyā syāttāvattiṣṭha mamāṃtike |
iti śrutvā munervākyaṃ bhayabhītā babhūva sā || 25 ||
[Analyze grammar]

punarvai ramayāmāsa tamṛṣiṃ nṛpasattama |
muneḥ śāpabhayādbhītā bahulānparivatsarān || 26 ||
[Analyze grammar]

varṣāṇāṃ paṃcapaṃcāśannavamāsadinatrayam |
sā reme muninā tasya niśārddhamiva cābhavat || 27 ||
[Analyze grammar]

sā taṃ punaruvācātha tasminkāle gate munim |
ādeśo dīyatāṃ brahmangaṃtavyaṃ svagṛhe mayā || 28 ||
[Analyze grammar]

medhāvyuvāca |
prabhātamadhunā cāste śrūyatāṃ vacanaṃ mama |
saṃdhyā yāvacca kurve'haṃ tāvattvaṃ vai sthirā bhava || 29 ||
[Analyze grammar]

iti vākyaṃ muneḥ śrutvā jātānaṃdasamākulā |
smitaṃ kṛtvā tu sā kiṃcitpratyuvāca śucismitā || 30 ||
[Analyze grammar]

apsarā uvāca |
kiyatpramāṇā vipreṃdra tava saṃdhyā gatānagha |
mayi prasādaṃ kṛtvā tu gatakālo vicāryatām || 31 ||
[Analyze grammar]

iti tasyā vacaḥ śrutvā vismayotphullalocanaḥ |
gatakālasya vipreṃdra pramāṇamakarottadā || 32 ||
[Analyze grammar]

samāśca saptapaṃcāśadgatāstasya tayā saha |
cukrodha satatastasyai jvālāmālī babhūva ha || 33 ||
[Analyze grammar]

netrābhyāṃ visphuliṃgānsa muṃcamāno'tikopanaḥ |
kālarūpāṃ tu tāṃ dṛṣṭvā tapasaḥ kṣayakāriṇīm || 34 ||
[Analyze grammar]

duḥkhārjitaṃ kṣayaṃ nītaṃ tapodṛṣṭvātayāsaha |
sakaṃpoṣṭho munistatrapratyuvācākuleṃdriyaḥ || 35 ||
[Analyze grammar]

tāṃ śaśāpāthamedhāvī tvaṃ piśācī bhaveti ca |
dhiktvāṃ pāpe durācāre kulaṭe pātakapriye || 36 ||
[Analyze grammar]

tasya śāpena sā dagdhā vinayāvanatā sthitā |
uvāca vacanaṃ subhrūḥ prasādaṃ vāṃchatī munim |
prasādaṃ kuru vipreṃdra śāpasyānugrahaṃ kuru || 37 ||
[Analyze grammar]

satāṃ saṃgo hi bhavati vacobhiḥ saptabhiḥ padaiḥ |
tvayā saha mama brahmannītā vai bahuvatsarāḥ |
etasmātkāraṇātsvāminprasādaṃ kuru suvrata || 38 ||
[Analyze grammar]

muniruvāca |
śṛṇu me vacanaṃ bhadre śāpānugrahakārakam |
kiṃ karomi tvayā pāpe kṣayaṃ nītaṃ mahattapaḥ || 39 ||
[Analyze grammar]

caitrasya kṛṣṇapakṣe tu bhavedekādaśī śubhā |
pāpamocanikā nāma sarvapāpakṣayaṃkarī || 40 ||
[Analyze grammar]

tasyā vrate kṛte śubhre piśācatvaṃ prayāsyati |
ityuktvā so'pi medhāvī jagāma piturāśramam || 41 ||
[Analyze grammar]

tamāgataṃ samālokya cyavanaḥ pratyuvācatam |
kimetadvihitaṃ putra tvayā puṇyaṃ kṣayaṃ kṛtam || 42 ||
[Analyze grammar]

medhāvyuvāca |
pātakaṃ vai kṛtaṃ tāta ramitā cāpsarā mayā |
prāyaścittaṃ brūhi tāta yena pāpakṣayo bhavet || 43 ||
[Analyze grammar]

cyavana uvāca |
caitrasya cāsite pakṣe nāmnā vai pāpamocanī |
asyā vrate kṛte putra pāparāśiḥ kṣayaṃ vrajet || 44 ||
[Analyze grammar]

iti śrutvā piturvākyaṃ kṛtaṃ tena vratottamam |
gataṃ pāpaṃ kṣayaṃ tasya tapoyukto babhūva saḥ || 45 ||
[Analyze grammar]

sāpyevaṃ maṃjughoṣā ca kṛtvaitadvratamuttamam |
piśācatvādvinirmuktā pāpamocanikāvratāt |
divyarūpadharā sā vai gatā nāke varāpsarāḥ || 46 ||
[Analyze grammar]

lomaśa uvāca |
pāpamocanikāṃ rājanye kurvaṃti narottamāḥ |
teṣāṃ pāpaṃ ca yatkiṃcittatsarvaṃ ca kṣayaṃ vrajet || 47 ||
[Analyze grammar]

paṭhanācchravaṇādrājangosahasraphalaṃ labhet |
brahmahā hemahārī ca surāpo gurutalpagaḥ || 48 ||
[Analyze grammar]

vratasya cāsya karaṇātpāpamuktā bhavaṃti te |
bahupuṇyapradaṃ hyetatkaraṇādvratamuttamam || 49 ||
[Analyze grammar]

iti śrī pādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde caitrakṛṣṇaikādaśī pāpamocanīnāma ṣaṭcatvāriṃśo'dhyāyaḥ || 46 ||
[Analyze grammar]