Chapter 28

[English text for this chapter is available]

mahādeva uvāca |
atrāpyudāharaṃtīmamitihāsaṃ purātanam |
purāṇaṃ paramaṃ puṇyaṃ sarvapāpaharaṃ śubham || 1 ||
[Analyze grammar]

kumāreṇa ca lokānāṃ namaskṛtya pitāmaham |
proktaṃ cedaṃ mamākhyānaṃ devarṣe brahmasūnunā || 2 ||
[Analyze grammar]

sanatkumāra uvāca |
gato'haṃ dharmarājānaṃ draṣṭuṃ saṃpūjito mudā |
śrutibhiḥ parayā bhaktyā tenokto'smi sukhāsane || 3 ||
[Analyze grammar]

mayā tatropaviṣṭena dṛṣṭaṃ kiṃcinmahādbhutam |
kāṃcanena vimānena vaiḍūryakṛtavedinā || 4 ||
[Analyze grammar]

maṇimuktavicitreṇa kiṃkiṇījālaśobhinā |
āgataṃ puruṣaṃ tatra āsanāddevasattama || 5 ||
[Analyze grammar]

sasaṃbhramaṃ samutthāya dṛṣṭvā dharmaḥ svayaṃ vibhuḥ |
gṛhītvā dakṣiṇe pāṇau pūjito'rgheṇa vai tataḥ || 6 ||
[Analyze grammar]

śirasyāghrāya deveśaḥ puraḥ sthāpya tataḥ param |
pūjayitvā tu taṃ dharma idaṃ vākyamuvāca ha || 7 ||
[Analyze grammar]

susvāgataṃ dharmadarśinprīto'smi darśanāttava |
samīpe mama tiṣṭhasva kiṃcijjñānaṃ vadasva me || 8 ||
[Analyze grammar]

punaryāsyasi tatsthānaṃ yatra brahmā vyavasthitaḥ |
ityukte ca tataścānyo vimānavaramāsthitaḥ || 9 ||
[Analyze grammar]

āgataḥ puruṣo devo yatra tiṣṭhati dharmarāṭ |
sa pūjito vimānasthaḥ praśrayāvanatena ca || 10 ||
[Analyze grammar]

sāmapūrvaṃ tathoktvā tu yathāpūrvaṃ naraḥ svayam |
kimanena kṛtaṃ karma yasya tuṣṭo bhavānbhṛśam || 11 ||
[Analyze grammar]

atra me kautukaṃ jātaṃ kṛtā hi svayameva tu |
yadasya bhavatā pūjā savismayamanaṃtaram || 12 ||
[Analyze grammar]

tathaivāsya kṛtā pūjā dvitīyasya narasya tu |
mene'haṃ śubhakarmāṇau vimānaṃ varasattamau || 13 ||
[Analyze grammar]

yastvamābhyāṃ svayaṃ pūjāṃ kuruṣe dharmakāraṇāt |
brahmāviṣṇuśivādyaistu pūjyase tvaṃ sadāniśam || 14 ||
[Analyze grammar]

yasyedṛkparamaṃ puṇyaṃ kimetau karma cakratuḥ |
kathyatāṃ mama sarvajña phalaṃ divyamavāpatuḥ || 15 ||
[Analyze grammar]

tacchrutvā sa tu māṃ prāha śṛṇu karmānayoḥ kṛtam |
yatkṛtvārhamihāyātau tacchṛṇuṣva mahāmate || 16 ||
[Analyze grammar]

dharma uvāca |
vaidiśaṃ nāma nagaraṃ pṛthivyāmasti viśrutam |
tatrābhūtpṛthivīpālo dharāpāla iti śrutaḥ || 17 ||
[Analyze grammar]

kasminkāle purā devī śaśāpa svagaṇaṃ krudhā |
madṛtena parā nārī bhartturyanme niveśitā || 18 ||
[Analyze grammar]

tasmāddvādaśavarṣāṇi jaṃbukastvaṃ bhaviṣyasi |
ityuktaḥ sa ca babhrāma jaṃbuko medinītalam || 19 ||
[Analyze grammar]

vetasī vetravatyostu saṃgame lokaviśrute |
śāpāṃto bhavitā putra ityuktaṃ girikanyayā || 20 ||
[Analyze grammar]

tatra cānaśanaṃ kṛtvā kṣetre prāṇāṃstato'tyajat |
divyarūpavapurbhūtvā jagāma viṣṇusannidhau || 21 ||
[Analyze grammar]

tatrāścaryaṃ mahaddṛṣṭvā dharāpālo mahīpatiḥ |
viṣṇorāyatanaṃ kṛtvā kṣetre prāṇaṃstato'tyajat || 22 ||
[Analyze grammar]

divyarūpavapurbhūtvā sthāpayāmāsa taṃ prabhum |
tasminpure narānsarvā sanniyojyāsya vīkṣaṇe || 23 ||
[Analyze grammar]

śubhamāyatanaṃ viṣṇostasmingrāme sadā janaiḥ |
pūrṇaṃ tu brāhmaṇādīnāṃ pūjayitvā kadaṃbakam || 24 ||
[Analyze grammar]

itihāsapurāṇajñaṃ vācakaṃ tu viśeṣataḥ |
pūjayitvā dvijaśreṣṭhaṃ vidyāśreṣṭhaṃ mahāmatiḥ || 25 ||
[Analyze grammar]

pustakaṃ cāpi saṃpūjya gaṃdhapuṣpādibhiḥ kramāt |
tatastamāha rājāsau vācakaṃ vinayānvitaḥ || 26 ||
[Analyze grammar]

etadāyatanaṃ viṣṇoḥ kāritaṃ ca tavāgrataḥ |
cāturvarṇyamidaṃ cāpi śrotukāmaṃ kadaṃbakam || 27 ||
[Analyze grammar]

tiṣṭhatīha dvijaśreṣṭha kuru pustakavācanam |
yāvatsaṃvatsaraṃ vipra gṛhya vṛttiṃ tvanuttamām || 28 ||
[Analyze grammar]

svarṇaniṣkaśataṃ cātra tato dāsye tathāparam |
pūrṇe varṣe dvijaśreṣṭha śreyo'tha mahamātmanaḥ || 29 ||
[Analyze grammar]

evaṃ pravartitaṃ tatra puṇyaṃ pustakavācanam |
varṣasaṃgatamātre tu tathā ca munisattama || 30 ||
[Analyze grammar]

athāyuṣaḥ kṣayāccāyaṃ kāladharmamupeyivān |
mayā cāsya vimānaṃ hi viṣṇunā preritaṃ divaḥ || 31 ||
[Analyze grammar]

ityeṣā karmaṇāṃ vyuṣṭiḥ puṇyamākhyānasaṃjñakam |
śrutaṃ pādmaṃ mahatpuṇyaṃ pavitraṃ pāpanāśanam || 32 ||
[Analyze grammar]

gaṃdhapuṣpopahāraistu na tuṣṭirjāyate tathā |
devānāmiha sarveṣāṃ purāṇaśravaṇādyathā || 33 ||
[Analyze grammar]

svarṇaratnādivastūnāṃ vastrāṇāṃ cāpi kṛtsnaśaḥ |
grāmāṇāṃ nagarāṇāṃ ca dānāttuṣṭirbhavennahi || 34 ||
[Analyze grammar]

yathā syāddharmaśravaṇātprītiḥ sarvadivaukasām |
itihāsapurāṇānāṃ śravaṇe munisattama || 35 ||
[Analyze grammar]

tathā syānme mahāprītiḥ sādhye sarvārthakāmike |
kanyādāne mahāprītirmama syānmunisattama || 36 ||
[Analyze grammar]

na tathā rocate sā ca yathā pustakavācanāt |
atha kiṃ bahunoktena nānyatprītikaraṃ mama || 37 ||
[Analyze grammar]

puṇyākhyānamṛte vipra guhyametatprakīrtitam |
yaścāyamaparo vipra ihāyāto narottamaḥ || 38 ||
[Analyze grammar]

saṃgatyānugataścāyaṃ dharmaśravaṇamuttamam |
śrutvā bhaktirabhūdasya śraddhayā paramātmanaḥ || 39 ||
[Analyze grammar]

kṛtvā pradakṣiṇaṃ tasya vācakasya mahātmanaḥ |
eṣa vipro muniśreṣṭha dadau svarṇasya māṣakam || 40 ||
[Analyze grammar]

nānyaddānaṃ kadā cakre lobhāviṣṭena cetasā |
pātradānātphalaprāptistvasya jātā na saṃśayaḥ || 41 ||
[Analyze grammar]

ityetatkathitaṃ karma ābhyāṃ caiva mahāmune || 42 ||
[Analyze grammar]

mahādeva uvāca |
etatpuṇyasya māhātmyaṃ ye śṛṇvaṃti manīṣiṇaḥ |
na teṣāṃ durgatiḥ kaccijjanmajanmani jāyate || 43 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde śāstravyākhyāmahimānāmā |
ṣṭāviṃśo'dhyāyaḥ || 28 ||
[Analyze grammar]