Chapter 11

[English text for this chapter is available]

nārada uvāca |
atha jālaṃdharo dūtavacaḥ śrutvā pratāpavān |
sarvasainyaṃ samāhūya prayāṇamakarottadā |
tatastataḥ sametānāṃ sainyānāṃ śrūyate dhvaniḥ || 1 ||
[Analyze grammar]

sastrīnmandarakaṃdareṣu śayitānutthāpayankinnarān |
merormaṃdarakaṃdare pratiravānutthāpayanvāraṇān |
sihānāṃ ca tatīrvyamuṃcata puraḥpaṃthānamevaṃvidhastrai |
lokyaṃ badhirīcakāra mahataḥ sainyasya kolāhalaḥ || 2 ||
[Analyze grammar]

tato duṃdubhinādo'bhūtpīṭhe jālaṃdhare nṛpa |
tanninādena śūrāṇāṃ priyeṇa mahatā tadā || 3 ||
[Analyze grammar]

kaṃpaṃti girayastuṃgāḥ prāsādā vicalaṃti ca |
saptasāgaragarbhebhyo niḥsṛtā daityadānavāḥ || 4 ||
[Analyze grammar]

sannaddhāścātigarjaṃti nānāvāhanasaṃyutāḥ |
heṣā yayau mahānādā vājināṃ bāhyataḥ puraḥ || 5 ||
[Analyze grammar]

rathāṃgenātha saṃhṛṣṭā dharāṃ saṃcalate'thavā |
cālitairgajayūthaiśca pṛthvī ruddhā sakānanā || 6 ||
[Analyze grammar]

jālaṃdhareritairbhīmairayutaiḥ syaṃdanasthitaiḥ |
aśvārbudasahasre dve arbudaṃ daṃtināmapi || 7 ||
[Analyze grammar]

rarāja sainyalakṣaikaṃ rathināṃ sapatākinām |
parārddhanavatiḥ koṭyaḥ dṛśyaṃte mukhyanāyakāḥ |
nirjagāma mahāsainyaṃ chatraiḥ saṃchādya bhāskaram || 8 ||
[Analyze grammar]

āsītpiṃjarapāṃḍupaṃkajavanaṃ śvetātapatraiḥ kvacit |
māyūrātapavāraṇaiḥ kvacidabhūtadunnīlanīlotpalam |
unmeghaṃ kvacidūrdhvadhūlipaṭalairyasya prayāṇe'bhavat |
sadvīci kvacidaṃbaraṃ sara ivotsarpatpatākāpaṭaiḥ || 9 ||
[Analyze grammar]

gajavājīmayī bhūmirdhvajacchatramayaṃ nabhaḥ |
dikcakraṃ cāmaramayaṃ daityasainye prasarpati || 10 ||
[Analyze grammar]

tato jālaṃdharo daityaḥ prayāṇāya samutsukaḥ |
skaṃdhe cāropayanśaktiṃ nānāratnavibhūṣitām || 11 ||
[Analyze grammar]

ājagāma mahāviṣṇuṃ praṣṭuṃ sāgaravāsinam |
abhivādya jagādātha hariṃ jālaṃdharastvidam || 12 ||
[Analyze grammar]

bhogārthāṃ kiṃ prayacchāmi tubhyaṃ bhāvuka kathyatām |
śrutvā nārāyaṇo vākyamabdhijasya mudānvitaḥ || 13 ||
[Analyze grammar]

uvāca kiṃ karomīti priyaṃ siṃdhusutepsitam |
ityuktaḥ sa prahṛṣṭo'tha hariṃ provāca satvaraḥ || 14 ||
[Analyze grammar]

yāmi yoddhuṃ raṇe'haṃ tvaṃ sukhī tiṣṭheha sāgare |
lakṣmyā dattākṣatastatra keśavenātha pūjitaḥ || 15 ||
[Analyze grammar]

sa nirgatya hareḥ sthānātsamudraṃ praṣṭumāgataḥ |
so'rṇavaṃ praṇipatyāha tāta yāsyāmi dūrataḥ || 16 ||
[Analyze grammar]

nīlakaṃṭhaṃ raṇe jetumanujñāṃ dātumarhasi |
putrasya vacanaṃ śrutvā yiyāsoḥ śaṃkaraṃ prati || 17 ||
[Analyze grammar]

siṃdhurājena so'pyuktaḥ putra taṃ tāpasaṃ tyaja |
bhuṃkṣva rājyaṃ mayā dattaṃ tāpasaṃ tyaja dūrataḥ || 18 ||
[Analyze grammar]

atyadbhutaḥ pratāpaste tvattulyo nāsti bhūmipaḥ |
svargādādhikyatāṃ nītaṃ tvayā vatsa dharātalam || 19 ||
[Analyze grammar]

tava rājyeva sumatī vaikuṃṭha iva rājate |
yo devo durjayo daityairānītaḥ saha saśriyā || 20 ||
[Analyze grammar]

mamāṃtikaṃ vatsa vasa śaṃkaraṃ bhikṣukaṃ tyaja |
evamukto hyarṇavena girijāṃ prati rāgavān || 21 ||
[Analyze grammar]

pitṛvākyamavijñāya āgatya svabhaṭānsvakān |
sajjībhūtaṃ tu yuddhāya vṛṃdā jālaṃdharaṃ jagau || 22 ||
[Analyze grammar]

vṛṃdovāca |
nātha yuddhaṃ na kartavyaṃ rājeṃdra kutsayoginā |
mano nivartyatāṃ paśya pravṛttaṃ pārvatīṃ prati || 23 ||
[Analyze grammar]

gaurīṃ tvaṃ vāṃchasi kasmātpārvatī kiṃ mamādhikā |
tapasvinī nirālaṃbā saṃsaktā sthāṇave sadā || 24 ||
[Analyze grammar]

sutānurāgiṇī vaṃdhyā tataḥ kṛtrimaputrikā |
vṛthāstutā nāradena tāṃ tyajasva bhajasva mām || 25 ||
[Analyze grammar]

iti vṛṃdāvacaḥ śrutvā pratyuvācārṇavātmajaḥ |
adṛṣṭvā pārvatīrūpaṃ macceto na nivartate || 26 ||
[Analyze grammar]

vṛṃde tvayā janapado rājadhānī prapālyatām |
smartavyo'haṃ sadā caṃḍi yadi māṃ haṃti śaṃkaraḥ || 27 ||
[Analyze grammar]

iti bhartṛvacaḥ śrutvā vṛṃdā hāsasamanvitā |
jagāma śibikārūḍhā pīṭhaṃ jālaṃdharaṃ tadā || 28 ||
[Analyze grammar]

nārada uvāca |
atha pratasthe kailāsaṃ siṃdhusūnurmahābalaḥ |
mahāpadmasahasrāṇāṃ ṣaṣṭyā sainyena saṃvṛtaḥ || 29 ||
[Analyze grammar]

atrāṃtare parityajya kailāṃsaṃ śaṃkaro gataḥ |
gaṇaputrapriyāyuktaḥ kailāsaṃ mānasottaram || 30 ||
[Analyze grammar]

jālaṃdharastataḥ prāptaḥ kailāsaṃ prathame'hani |
senāḥ saṃsthāpya kailāsa ālokanakutūhalī || 31 ||
[Analyze grammar]

divyakesaramaṃdārarajaḥpuṃja pariśritāḥ |
śītāṃbuśīkarāsāraiḥ prabhugnā vāṃti vāyavaḥ || 32 ||
[Analyze grammar]

yatra siddhāṃganā pīnastanottuṃgataraṃgiṇaḥ |
maṃdāramakaraṃdāḍhyāḥ suṃdarā vāṃti vāyavaḥ || 33 ||
[Analyze grammar]

yatrāśokarucisnigdhapādanyāsaṃ ca yoṣitām |
vilokya dānaveṃdrobhūnmanorathasamākulaḥ || 34 ||
[Analyze grammar]

prāpnuvaṃti surāḥ prītiṃ svabiṃbālokaharṣitāḥ |
yatra kinnarakāṃtānāṃ suratavyaṃjitaprabhāḥ || 35 ||
[Analyze grammar]

vibhāṃti sarvatastatra maṃdārāḥ śīrṇapallavāḥ |
yatra śaṃbhugaṇākrāṃtā nānāvelākuladrumāḥ || 36 ||
[Analyze grammar]

bhāṃti manmathabhūpāla yaśasā sudhṛtā iva |
yatra caṃdanakastūrī gaṃdhonmattālisaṃcayāḥ |
vibhāṃti dagdhakaṃdarppa nirvāṇāṃgārasannibhāḥ || 37 ||
[Analyze grammar]

yatrāṃganānāṃ sakalaṃ vilokya saurabhyamatyuttamakāṃtimitram |
manye pariṣvaktamanovinodā kastūrikā gāhati kālimānam || 38 ||
[Analyze grammar]

kvacitpravaragairikāsamasamullasat paṃkajaṃ lavaṃgadalasannibhāsanacalaccakoraṃ kvacit |
kvacidgirisarittaṭītaraṇivatsphuratkuṃḍalaṃ calanniculamaṃjarīvinayanamrabhṛṃgaṃ kvacit || 39 ||
[Analyze grammar]

kvaciddalitakokilākulitanūtnacūtāṃkuraṃ kuraṃgakulasevitaṃ prabalaśālimūlaṃ kvacit |
kvacitpravarasuṃdaraiḥ suravadhūpadaiḥ pāvanaṃ vanaṃ nayati vikriyāmiha mano munīnāmapi || 40 ||
[Analyze grammar]

evaṃguṇasamāyuktaṃ vilokya haramaṃdiram |
vicitraṃ cāpi kailāsaṃ sarvaratnasamāśrayam || 41 ||
[Analyze grammar]

atyaṃtavismito daityaḥ provāca bhṛgunaṃdanam |
kasmāttaṃ tāpasaṃ tāta pravadaṃti bhavādṛśāḥ || 42 ||
[Analyze grammar]

tādṛśī yasya sā bhāryā gṛhamīdṛṅmanoharam |
tatrādṛṣṭvāvadacchaṃbhuṃ haraḥ kutra gataḥ kave || 43 ||
[Analyze grammar]

kathaṃ mama bhayācceti pṛṣṭaḥ provāca bhārgavaḥ |
devaśaṃbhurmahāśailamagamyaṃ mānasottaram || 44 ||
[Analyze grammar]

yayau tatra mahādevo gaṃtuṃ cānyairna śakyate |
iti kāvyavacaḥ śrutvā prāha daityo mahābalaḥ || 45 ||
[Analyze grammar]

jālaṃdhara uvāca |
ahaṃ yāsyāmi deveśaṃ tvaṃ purā gaccha bhārgava |
ityuktvā prayayau tatra yatrāste śaṃkaraḥ svayam || 46 ||
[Analyze grammar]

apaśyattaṃ girivaraṃ siṃdhujo mānasottaram |
tasya ṣaṣṭisahasrāṇi yojanānāṃ samucchrayaḥ || 47 ||
[Analyze grammar]

sa śailo mānaso rājandaityasainyaiḥ samāvṛtaḥ |
bahavo daityarājānaḥ śailamāruruhurdrutam || 48 ||
[Analyze grammar]

chatrāṃdhakāraṃ paryāsītvādyanādena vepathuḥ |
sainyakolāhalasteṣāṃ pūrayāmāsa rodasī || 49 ||
[Analyze grammar]

nārada uvāca |
athaivamāgataṃ dṛṣṭvā daityasainyaṃ mahattadā |
atyucce sa gireḥ śṛṃge sthāpya gaurīṃ sakhīvṛtām || 50 ||
[Analyze grammar]

bhagavāṃśca gaṇaiḥ sarvaiḥ sannaddhairyuddhadurmadaiḥ |
triṃśanmahābjasāhasraiḥ pramathānāṃ vṛtaḥ śivaḥ || 51 ||
[Analyze grammar]

uvāca naṃdinaṃ śaṃbhurgaṇānāmadhipaṃ tvayā |
prahartavyo mahādaityo vīro jālaṃdharo raṇe || 52 ||
[Analyze grammar]

mahākālādibhiḥ śūrairyāhi tvaṃ parivāritaḥ |
tāvadājau tvayā tasmādyoddhavyamatipauruṣāt || 53 ||
[Analyze grammar]

yāvadyuddhe nārijayo mama vīra bhaviṣyati |
iti śaṃbhorvacaḥ śrutvā sa ca sārathimabravīt || 54 ||
[Analyze grammar]

kākatuṃḍarathaṃ me'dya samānaya mahāmate |
naṃdino vacanaṃ śrutvā sopi syaṃdanamāharat || 55 ||
[Analyze grammar]

dvātriṃśadaśvasaṃyuktaṃ cakraṣoḍaśasaṃyutam |
ṣaṣṭidhvajasamopetaṃ dvātriṃśadyojanāyutam || 56 ||
[Analyze grammar]

sarvaśastraiśca saṃpūrṇaṃ prāptaṃ sāṃgrāmikaṃ ratham |
naṃdinaścakrarakṣārthaṃ putrau skaṃdavināyakau || 57 ||
[Analyze grammar]

samādiṣṭau śaṃkareṇa sannaddhau tau svavāhanau |
gaṇaiḥ parivṛto naṃdī vāgbhiḥ saṃpūjya ceśvaram || 58 ||
[Analyze grammar]

naṃdī rathaṃ samāruhya niryayau dānavānprati |
virājate tasya mūrdhni chatraṃ dvādaśayojanam || 59 ||
[Analyze grammar]

yāvatsa niryayau naṃdī tāvatte dānavāḥ puraḥ |
śailopari samārūḍhā dānavā ghoradarśanāḥ || 60 ||
[Analyze grammar]

gaṇānāmāyudhaistīkṣṇaiḥ nihatāḥ patitā bhuvi |
hanyamānā gaṇairdaityāstatyajurdūrato girim || 61 ||
[Analyze grammar]

tato dhūmasamaṃ tasmādavaruhya śiloccayāt |
jaghnurdaityānśitaiḥ śastrairgaṇā rājanmahābalān || 62 ||
[Analyze grammar]

amarairācitaṃ dṛṣṭvā rurudhurdaityasainikāḥ |
tataḥ samabhavadyuddhaṃ gaṇānāṃ dānavaiḥ saha || 63 ||
[Analyze grammar]

śaravarṣamathātyugraṃ dānavānāṃ divaukasām |
tataḥ samastānmātaṃgāñjaghnuḥ śikhimukhā raṇe || 64 ||
[Analyze grammar]

rathānhayānpadātīṃśca kākatuṃḍā mahābalāḥ |
hatānāṃ daityasaṃghāṃnāṃ saṃgare bhṛśamāyinām || 65 ||
[Analyze grammar]

śirobhirgaganaṃ vyāptaṃ prahasadbhirbhayāvahaiḥ |
muktakeśāruṇamukhairbhīmadaṃṣṭrāvilocanaiḥ || 66 ||
[Analyze grammar]

siṃhaiḥ kabaṃdhajaṃghorukaṭipṛṣṭhanikṛṃtanaiḥ |
citā sarvatra vasudhā kabaṃdhairudhirāruṇaiḥ || 67 ||
[Analyze grammar]

tato virāvaḥ sumahānbabhūva daityeśvarāṇāṃ dhvajinīṣu dhāvatām |
śaṃbhorgaṇaiḥ pātitasainikānāṃ yathārṇavānāṃ nadatāṃ yugakṣaye || 68 ||
[Analyze grammar]

iti śrīpādme mahāpurāṇe paṃcāśatsahasrasaṃhitāyāmuttarakhaṃḍe nāradayudhiṣṭhira |
saṃvāde jālaṃdharopākhyāne daityasainyaparājayonāma ekādaśo'dhyāyaḥ || 11 ||
[Analyze grammar]