Chapter 9

[English text for this chapter is available]

yudhiṣṭhira uvāca |
iṃdrādibhistadā devaiḥ kiṃ kṛtaṃ dvijasattama |
jālaṃdhareṇa vijitaiḥ svargarājye hṛte sati || 1 ||
[Analyze grammar]

nārada uvāca |
atha tyaktvā divaṃ devāḥ prāpuste durdaśāṃ ciram |
na pīyūṣaṃ naiva yajñāḥ yayuḥ sthānaṃ svayaṃbhuvaḥ || 2 ||
[Analyze grammar]

dadṛśurbrāhmabhuvane brahmāṇaṃ parameṣṭhinam |
prāṇāyāmena yuṃjānaṃ manaḥ svaṃ paramātmani || 3 ||
[Analyze grammar]

te tuṣṭuvuḥ surāḥ sarve vāgbhistathyābhirādṛtāḥ |
tataḥ prasanno bhagavānkiṃkaromīti cābravīt || 4 ||
[Analyze grammar]

tato nivedayāṃcakruḥ brahmaṇe vibudhāḥ punaḥ |
jālaṃdharasya sakalaṃ tathā nijaparābhavam || 5 ||
[Analyze grammar]

kṣaṇaṃ dhyātvā yayau brahmā kailāsaṃ tridaśaiḥ saha |
tasya śailasya pārśve te vaicitryeṇa samākulāḥ |
sthitāḥ saṃtuṣṭuvurdevā brahmaśakrapurogamāḥ || 6 ||
[Analyze grammar]

namo bhavāya śarvāya nīlagrīvāya te namaḥ |
namaḥ sthūlāya sūkṣmāya bahurūpāya te namaḥ || 7 ||
[Analyze grammar]

iti sarvamukho bhūtvā vāṇīmākarṇya śaṃkaraḥ |
provāca naṃdinaṃ devā nānayasveti satvaram || 8 ||
[Analyze grammar]

śrutvā śaṃbhorvaco devā āhūtā naṃdinā drutam |
praviśyāṃtaḥpure devā dadṛśurvismitekṣaṇāḥ || 9 ||
[Analyze grammar]

tatrāsane samāsīnaṃ śaṃkaraṃ lokaśaṃkaram |
gaṇaiḥ koṭisahasraistu sevitaṃ bhaktiśālibhiḥ || 10 ||
[Analyze grammar]

nagnairvirūpaiḥ kuṭilairjaṭilairdhūlidhūsaraiḥ |
praṇipatyāgrataḥ prāha saha devaiḥ pitāmahaḥ || 11 ||
[Analyze grammar]

sukharogo yathā syāsīcchakraḥ so'yaṃ vṛthāgataḥ |
kṛpāṃ kuru mahādeva śaraṇāgatavatsala || 12 ||
[Analyze grammar]

tata uccairvibhorhāsyaṃ śrutvā brahmā pinākinaḥ |
uvāca devadeveśaṃ paśyāvasthāṃ divaukasām || 13 ||
[Analyze grammar]

tataḥ sarveśvaro jñātvā brahmaṇo manasepsitam |
śakrasya mānabhaṃgaṃ ca devārthe parameśvaraḥ || 14 ||
[Analyze grammar]

premṇā bhavānyā vijñapto nṛpa prāha vaco haraḥ |
viṣṇunā na hato yo'ri sa kathaṃ hanyate mayā || 15 ||
[Analyze grammar]

pūrvasṛṣṭānyāyudhāni vajrādīni pitāmaha |
taiḥ śastrairnaiva vadhyo'sau balī jālaṃdharo'suraḥ || 16 ||
[Analyze grammar]

hetibhiḥ pūrvasaṃsṛṣṭaiḥ samayāpi na hanyate |
devāḥ kurvaṃtu śastraṃ hi mama prāṇasahaṃ dṛḍham || 17 ||
[Analyze grammar]

śaṃbhorityuttaraṃ śrutvā brahmovācātha śaṃkaram |
svayaṃ kuru mahāśastraṃ tvaṃ vettha svātmano balam || 18 ||
[Analyze grammar]

iti tasya vacaḥ śrutvā pratyuvāca maheśvaraḥ |
brahmanvimuṃca tejastvaṃ krodhayuktaṃ suraiḥ saha || 19 ||
[Analyze grammar]

tatastejo mumocātha brahmā brahmāstrasūcakaḥ |
rudrastrinetrajaṃ tejastato nirmuktavānsvayam || 20 ||
[Analyze grammar]

devāśca mumucuḥ sarve sakrodhaṃ tejasāṃ cayam |
atrāṃtare smṛtaḥ prāpto hareṇa madhusūdanaḥ || 21 ||
[Analyze grammar]

kiṃ karomīti tenoktaḥ śivaḥ prāha janārdanam |
viṣṇo jālaṃdharaḥ kasmānna hataḥ saṃgare tvayā || 22 ||
[Analyze grammar]

kathaṃ surānparityajya kṣīrābdhiṃ śayituṃ gataḥ || 23 ||
[Analyze grammar]

śrīviṣṇuruvāca |
yadi taṃ hanmi deveśa śrīḥ kathaṃ mama vallabhā |
tasmāttvaṃ pārvatīkāṃta jahi jālaṃdharaṃ raṇe || 24 ||
[Analyze grammar]

tejastvaṃ krodhajaṃ muṃcetyuktaḥ śarveṇa keśavaḥ |
mumoca vaiṣṇavaṃ tejaḥ tatsarvaṃ samavarddhata |
tejaḥ pravṛddhaṃ taddṛṣṭvā vyāpakaṃ prāha keśavam || 25 ||
[Analyze grammar]

śaṃkara uvāca |
etena tejasā śīghraṃ mamāstraṃ kartumarhatha |
viśvakarmādayastacca śrutvā śaṃkarabhāṣitam || 26 ||
[Analyze grammar]

nirīkṣya ca tadā'nyo'nyaṃ kiṃ kurma iti śaṃkitāḥ |
dṛṣṭvā tūṣṇīṃ sthitāṃstāṃśca jñātvā tanmanasi sthitam || 27 ||
[Analyze grammar]

tadāha bhagavānbrahmā anālokyaṃ hi daivataiḥ |
soḍhuṃ na śaktāste tejo dhartuṃ kena ca śakyate || 28 ||
[Analyze grammar]

tataḥ prahasya bhagavānutpatyopari tejasaḥ |
vāmāṃghripārṣṇinā śaṃbhurnanarta bhramarīcayam || 29 ||
[Analyze grammar]

tato devā maheṃdrādyāstejasopari śaṃkaram |
nṛtyamānaṃ tadā dṛṣṭvā mudā vādyānyavādayan || 30 ||
[Analyze grammar]

tadāprabhṛti nṛtyeṣu bhrāmyate bhramarīcayam |
atha cakraṃ samutpannaṃ śaṃbhornartanamardanāt || 31 ||
[Analyze grammar]

āralakṣatrayopetaṃ asthikoṭisamākulam |
śarvāṃghrikaṣaṇāttasya tejaso nisṛtāḥ kaṇāḥ || 32 ||
[Analyze grammar]

viśvakarmā ca tenāstraṃ vimānāni ca nirmame |
tataste nirjjarā bhītyā dṛṣṭvā cakraṃ sudarśanam || 33 ||
[Analyze grammar]

trāhitrāhīti deveśaṃ pratyūcuste surānnṛpa |
pṛthvīkāṭhinyamādāya lohānāmapi tejasām || 34 ||
[Analyze grammar]

yadviśvakarmaṇā kośaṃ kṛtaṃ bhasmīkṛtaṃ ca tat |
sṛṣṭena tena cakreṇa dagdhaḥ kālo'patatkṣitau || 35 ||
[Analyze grammar]

tatastadbrahmaṇo haste dadau cakraṃ sa dhūrjaṭiḥ |
cakrārcirnicayaiḥ kūrcaṃ dṛṣṭvā dagdhamumāpatiḥ || 36 ||
[Analyze grammar]

hasitvā brahmaṇo hastādgṛhītvā satvaraṃ śivaḥ |
dadhau kakṣāpuṭe cakraṃ nidhānaṃ nirdhano yathā || 37 ||
[Analyze grammar]

tato na dṛśyate cakraṃ śivakakṣāpuṭesthitam |
mahāmūrkhasya yaddattaṃ dānaṃ tasya phalaṃ yathā || 38 ||
[Analyze grammar]

iti śrīpādme mahāpurāṇe uttarakhaṃḍe paṃcapaṃcāśatsahasra |
saṃhitāyāṃ yudhiṣṭhiranāradasaṃvāde jālaṃdharopākhyāne sarva |
devatejomayacakrotpattirnāma navamo'dhyāyaḥ || 9 ||
[Analyze grammar]