Chapter 6

[English text for this chapter is available]

nāradauvāca |
evaṃ dvaṃdveṣu yuddheṣu saṃpravṛtteṣvanekaśaḥ |
jaghānātha hariḥ kruddho gadayā kālaneminam || 1 ||
[Analyze grammar]

vihāya mūrcchāṃ saṃcitya viṣṇuṃ bāṇairjaghāna saḥ |
tataḥ kruddhena hariṇā sa kṣitau pātito vyasuḥ || 2 ||
[Analyze grammar]

rājanjaghāna saṃciṃtya rāhuṃ khaḍgena caṃdramāḥ |
rāhustu taṃ parityajya tadā sūryamadhāvata || 3 ||
[Analyze grammar]

sahasrāśuṃ raṇe jitvā rāhuścaṃdramadhāvata |
jaghāna taṃ ca khaṅgena samare rajanīpatiḥ || 4 ||
[Analyze grammar]

saiṃhikeyāṃgakāṭhinyātkhaṅgaṃ cūrṇamabhūttadā |
jaghāna muṣṭinā gāḍhaṃ kaṭhinena vidhuṃtudaḥ || 5 ||
[Analyze grammar]

caṃdramutthāpya taṃ kaṃṭhe dhṛtvā vegānmahāmṛdhe |
gilitvā rāhuṇā caṃdropyudgīrṇaśca tataḥ punaḥ || 6 ||
[Analyze grammar]

mṛgaṃ svacihnamurasi nidhāya visasarja ha |
sa uccaiḥśravasaṃ gṛhya hayaratnaṃ vidhuṃtudaḥ || 7 ||
[Analyze grammar]

jālaṃdharāṃtikaṃ nītvā bhaktyā tasmai nyavedayat |
durvāraṇo raṇe kruddhastaṃ yamaṃ gadayā hanat || 8 ||
[Analyze grammar]

niśitairmārgaṇairbhinnaḥ śakraputreṇa cāhave |
dhṛtvā jayaṃtaṃ saṃhrādaḥ parighāghātamūrcchitam || 9 ||
[Analyze grammar]

airāvataṃ samāruhya yayau jālaṃdharaṃ prati |
hatavāṃścaiva gadayā nihrādaṃ dhanado raṇe || 10 ||
[Analyze grammar]

rudrāstriśūlanirghātairniśuṃbhaṃ jaghnurojasā |
niśuṃbho bāṇajālaiśca pīḍayāmāsa tānati || 11 ||
[Analyze grammar]

śuṃbhāsuro devagaṇānpūrayāmāsa mārgaṇaiḥ |
mṛtyuṃ māyāmaya mayo baddhvā pāśairnināyatam || 12 ||
[Analyze grammar]

dadau jālaṃdharāyāsau paulomne so'pi siṃdhave |
abdhinā ca mukhe kṣipto loko jīvatu nirbhayaḥ || 13 ||
[Analyze grammar]

baddhvā ca namuciṃ pāśairvāsavo'pi rasātalam |
ninye viśvasya haṃtāraṃ atha jālaṃdharo yayau || 14 ||
[Analyze grammar]

atheṃdrabalayoryuddhamabhūdrājansudāruṇam |
balāṃgarociṣo bhāṃti diśo daśa raveriva || 15 ||
[Analyze grammar]

sarvāṇyastrāṇi śakrasya śīrṇānyaṃge balasya ca |
balīyasā baleneṃdro mudgareṇa hato hṛdi || 16 ||
[Analyze grammar]

nanādeṃdrastato bhīmaṃ tacchrutvā sa balohasat |
hasatastasya niścerurmukhato mauktikāni ca || 17 ||
[Analyze grammar]

tasyāṃgasyābhilāṣeṇa na yuddhamakarottadā |
tuṣṭāva vāsavo'tyarthaṃ taṃ balaṃ balasāgaram || 18 ||
[Analyze grammar]

varaṃ vṛṇu suraśreṣṭhetyuktaḥ prāha balaṃ prati |
yadi tuṣṭo'si daityeśa svaṃ vapurdātumarhasi || 19 ||
[Analyze grammar]

tadiṃdra vacanaṃ śrutvā bhittvā śastrairgṛhāṇa mām |
ityuvāca balaṃ so'pi kimadeyaṃ mahātmanām || 20 ||
[Analyze grammar]

tathetyuktvā sahasrākṣo mudgareṇāhanadbalam |
na bibheda tadā dehaḥ śakraściṃtāmavāpa ha || 20 ||
[Analyze grammar]

sasmārito mātalinā vajreṇāṃgaṃ jaghāna tat |
tena vajraprahāreṇa balāṃgaṃ tadvyaśīryata || 21 ||
[Analyze grammar]

balāṃgasyaikabhāgastu papāta kanakācale |
tuhinādrau dvitīyastu tṛtīyo gonage'patat || 22 ||
[Analyze grammar]

caturtho devanadyāṃ ca paṃcamo maṃdare tathā |
vajrākare papātāṃśaḥ ṣaṣṭhaśca vijayāṃgajaḥ || 23 ||
[Analyze grammar]

tasya jātiviśuddhasya pariśuddhena karmaṇā |
kāyasyāvayavāḥ sarve ratnabījatvamāgatāḥ || 24 ||
[Analyze grammar]

vajrādasthikaṇāḥ kīrṇāḥ ṣaṭkoṇā maṇayo'bhavan |
akṣibhyāmindranīlā vai māṇikyaṃ śrutisaṃbhavam || 25 ||
[Analyze grammar]

kṣatajātpadmarāgāḥ syuḥ medaso marakatāstathā |
pravālāni ca jihvāto daṃtā muktāstathābhavan || 26 ||
[Analyze grammar]

majjodbhavaṃ marakataṃ gārutmatamabhūnnasā |
kāṃsyaṃ purīṣaṃ rajataṃ vīryaṃ tāmraṃ ca mūtrajam || 27 ||
[Analyze grammar]

aṃgasyodvartanājjātaṃ pittalaṃ brahmavītikāḥ |
nādādvaidūryamutpannaṃ ratnaṃ cārutaraṃ tathā || 28 ||
[Analyze grammar]

nakhebhyaḥ kanakotpattī rudhirācca rasodbhavaḥ |
medasaḥ sphaṭikaṃ jātaṃ pravālaṃ māṃsasaṃbhavam || 29 ||
[Analyze grammar]

baladehodbhavānyāsanratnāni pṛthivītale |
puṇyopacayasaṃpattyā bhokṣyaṃte vimalairjanaiḥ || 30 ||
[Analyze grammar]

atrāṃtare hataṃ śrutvā balaṃ maghavatā mṛdhe |
prabhāvatī nāma rājñī yayau taccaraṇāṃtikam || 31 ||
[Analyze grammar]

vilalāpa patiṃ dṛṣṭvā vikīrṇāvayavaṃ raṇe |
prabhāvatyaśrupūrṇākṣī muktakeśī ghanastanī || 32 ||
[Analyze grammar]

hā nātha balavikrāṃta kāṃtadeha jagatpriya |
māṃ tvaṃ vihāya kiṃ cātra kaivalyaṃ gatavānasi || 33 ||
[Analyze grammar]

jarākuṣṭhādibhirvyāptaṃ buddhvā dehaṃ tyajaṃti na |
dehino'nye paraṃ kāṃtaṃ tvayā deho vṛthojjhitaḥ || 34 ||
[Analyze grammar]

tava dehena divyena hārakaṃ bhūṣyate priya |
raṇotsukena bhavatā yā veṇī grathitā mama || 35 ||
[Analyze grammar]

tāmudgrathaya vaidhavyaduḥkhārttāyāḥ svayaṃ priya |
evaṃ vilapatīṃ vīkṣya balarājñīṃ samudrajaḥ |
duḥkhitaḥ śukramityāha balaṃ jīvaya bhārgava || 36 ||
[Analyze grammar]

śukra uvāca |
icchayāmaraṇaṃ prāptaṃ taṃ kathaṃ jīvayāmyaham |
tathāpi maṃtrasāmarthyādvācamuccārayiṣyati || 37 ||
[Analyze grammar]

jālaṃdhara uvāca |
balasya rūpa vacanaṃ śrotumicchāmi bhārgava |
jālaṃdhareṇaivamuktaḥ kṣaṇaṃ dhyānaparo'bhavat || 38 ||
[Analyze grammar]

athodatiṣṭhadvadanātsvanaḥ śrotramanoramaḥ |
prabhāvatīṃ prati vyaktaṃ vādyabhāṃḍā divotthitaḥ || 39 ||
[Analyze grammar]

prabhāvati svadehaṃ tvaṃ mamāṃgeṣu layaṃ naya |
iti tasya vacaḥ śrutvā nadī jātā prabhāvatī || 40 ||
[Analyze grammar]

balāṅgeṣveva līnā sā sumeroḥ pūrvavāhinī |
yasyāstoyena saṃjātā ratnānāṃ kāṃtiruttamā || 41 ||
[Analyze grammar]