Chapter 98

[English text for this chapter is available]

sūta uvāca |
etacchrutvā vacastasya dharmarājasya bhūsuraḥ |
punaḥ papraccha māsasya mādhavasya vidhiṃ śubham || 1 ||
[Analyze grammar]

brāhmaṇa uvāca |
dharmarāja mahābhāga samyagguhyaṃ prakāśitam |
mādhavasnānajaṃpuṇyaṃ narāṇāṃ muktidaṃ param || 2 ||
[Analyze grammar]

mādhavaṃ mādhave māsi snātvā prātaḥ samāhitaḥ |
kathaṃ saṃpūjayeddevaṃ kaiḥ puṣpaistadvidhiṃ vada || 3 ||
[Analyze grammar]

dharmarāja uvāca |
sarveṣāṃ patrajātīnāṃ tulasī keśavapriyā |
puṣkarādīni tīrthāni gaṃgādyāḥ saritastathā || 4 ||
[Analyze grammar]

vāsudevādayo devā vasaṃti tulasīdale |
sarvadā sarvakāleṣu tulasī viṣṇuvallabhā || 5 ||
[Analyze grammar]

tyaktvā tu mālatī puṣpaṃ muktvā ca sarasīruham |
gṛhītvā tulasīpatraṃ bhaktyā mādhavamarcayet || 6 ||
[Analyze grammar]

tasya puṇyaphalaṃ vaktumalaṃ śeṣo'pi no bhavet |
asnātvā tulasīṃ chittvā devārthaṃpi tṛkarmaṇi || 7 ||
[Analyze grammar]

tatsarvaṃ niṣphalaṃ yāti paṃcagavyena śudhyati |
dāridryaduḥkhabhogādi pāpāni subahūnyapi || 8 ||
[Analyze grammar]

tulasī harate kṣipraṃ rogāniva harītakī |
tulasī kṛṣṇagaurākhyā tayābhyarcya madhudviṣam || 9 ||
[Analyze grammar]

viśeṣeṇa harerbhakto naro nārāyaṇo bhavet |
mādhavaṃ sakalaṃ māsaṃ tulasyā yo'rcayedyataḥ || 10 ||
[Analyze grammar]

trisaṃdhyaṃ madhuhaṃtāraṃ nāsti tasya punarbhavaḥ |
alābhe puṣpapatrāṇāmannādyenāpi pūjayet || 11 ||
[Analyze grammar]

śālitaṃḍula godhūmairyavairvāpi hariṃ sadā |
prātaḥ snātvā vidhānena mādhave mādhavapriye || 12 ||
[Analyze grammar]

pitṛdevamanuṣyāṃśca tarppayetsacarācaram |
yo'śvatthamūlaṃ vai siṃcettoyena bahunā sadā || 13 ||
[Analyze grammar]

kuryātpradakṣiṇāṃ taṃ tu sarvadevamayaṃ tataḥ |
yo'śvatthamarcayeddevamudakena samaṃtataḥ |
kulānāmayutaṃ tena tāritaṃ syānnasaṃśayaḥ || 14 ||
[Analyze grammar]

alakṣmīḥ kālakarṇī ca duḥsvapno durviciṃtitam |
aśvattha tarppaṇāttāta sarvaduḥkhaṃ vilīyate || 15 ||
[Analyze grammar]

tarpitāḥ pitarastena tena viṣṇuḥ samarcitaḥ |
yo'śvatthamarcayedvīro grahāstenaiva pūjitāḥ || 16 ||
[Analyze grammar]

śvetāśvapuṣpāṇi tathā śamīṃ ca hutāśanaṃ caṃdanamarkabiṃbam |
aśvatthavṛkṣaṃ ca samālabheta tataśca kuryānnija jātidharmān || 17 ||
[Analyze grammar]

kaṃḍūyanaṃ ca gogrāsaṃ snātvā pippalatarppaṇam |
kṛtvā goviṃdapūjāṃ ca na sa durgatimāpnuyāt || 18 ||
[Analyze grammar]

trayodaśyāṃ caturdaśyāṃ vaiśākhyāṃ ca dinatrayam |
sarvāśaktopi vidhinā nārī vā puruṣopi vā || 19 ||
[Analyze grammar]

pūrvoktaniyamairyuktaḥ prātaḥ snātvā ca śaktitaḥ |
vimuktaḥ pātakaiḥ sarvaiḥ svargamakṣayamaśnute || 20 ||
[Analyze grammar]

vaiśākhyāmapi śaktyā vā bhojayedbrāhmaṇāndaśa |
trirātramutthitaḥ snātvā sakṛcca prayataḥ śuciḥ || 21 ||
[Analyze grammar]

gaurānvā yadi vā kṛṣṇāṃstilānkṣaudreṇa saṃyutān |
datvā dvādaśaviprebhyastenaiva svasti vācayet || 22 ||
[Analyze grammar]

prīyatāṃ dharmarājo me pitṝndevāṃśca tarppayet |
yāvajjīvakṛtaṃ pāpaṃ tatkṣaṇādeva naśyati || 23 ||
[Analyze grammar]

ayutāyutaṃ ca tiṣṭhetsa svargaloke yathāsukham |
māmeva tu na paśyetsa pūjito'khila daivataiḥ || 24 ||
[Analyze grammar]

pākānnodaka kuṃbhādi pitṛdaivata tuṣṭaye |
trayodaśyāṃ caturdaśyāṃ pūrṇāyāṃ ca dinatrayam || 25 ||
[Analyze grammar]

yo dadyādbhaktito vipra mahāpāpaiḥ pramucyate |
suvarṇatilapātraistu brāhmaṇāñchaktito'nvaham || 26 ||
[Analyze grammar]

tarppayedudapātraistu brahmahatyāṃ vyapohati |
vaiśākhyāṃ paurṇamāsyāṃ ca sṛṣṭāḥ kamalayoninā || 27 ||
[Analyze grammar]

tilā deyāśca bhaktyā ca śreyaḥ saṃtati hetave |
ihārthe ca purāvṛttaṃ tadākarṇaya suvrata || 28 ||
[Analyze grammar]

phalaṃ mādhavamāsasya pūrṇāyāṃ paramādbhutam |
meṣasaṃkramamārabhya tithayastriṃśaduttamāḥ || 29 ||
[Analyze grammar]

sarvayajñādhikāḥ puṇyāḥ purāṇeṣu prakīrtitāḥ |
viśeṣato'pi tāstisraḥ pavitrāḥ pāpidurlabhāḥ || 30 ||
[Analyze grammar]

tatopi pūrṇimā puṇyā mādhavī mādhavapriyā |
eṣā vārāhakalpādi tithirādyā mahāphalā || 31 ||
[Analyze grammar]

purā nārāyaṇenāsyāmādidaityau vimohitau |
hiraṇyākṣa madhū vipra pṛthivī ca samuddhṛtā || 32 ||
[Analyze grammar]

trayodaśyāṃ caturdaśyāṃ paurṇamāsyāmayaṃ vibhuḥ |
kramādetattrayaṃ cakre śukle'sminmāsi mādhave || 33 ||
[Analyze grammar]

tataḥ prabhṛti vipreṃdra viśeṣādeva pūrṇimā |
kalpādiḥ pāvanā khyātā karmaṇaḥ kalpasākṣiṇī || 34 ||
[Analyze grammar]

yena snānaṃ na vaiśākhe prātarniyamaśālinā |
kiṃ tasya janmanā vipra nūnamātmāpakāriṇā || 35 ||
[Analyze grammar]

trayodaśyāṃ caturdaśyāṃ paurṇamāsyāṃ viśeṣataḥ |
apisamyagvidhānena nārī vā puruṣo'pi ca || 36 ||
[Analyze grammar]

prātaḥ snātaḥ saniyamaḥ sarvapāpaiḥ pramucyate |
snānadānārcanaśrāddhakriyāpuṇyādivarjitā || 37 ||
[Analyze grammar]

yasyātītā ca vaiśākhī sa nūnaṃ nirayālayaḥ |
na vedena samaṃ śāstraṃ na tīrthaṃ gaṃgayā samam || 38 ||
[Analyze grammar]

na dānaṃ jalagotulyaṃ na vaiśākhī samā tithiḥ |
jaladhenuṃ ca yo dadyādvaiśākhyāṃ viṣṇutatparaḥ || 39 ||
[Analyze grammar]

trayāṇāmapi devānāṃ caturtho'yaṃ viśeṣataḥ |
mātṛhā pitṛhā caiva bhrūṇahā gurutalpagaḥ || 40 ||
[Analyze grammar]

jaladhenuṃ samālokya mucyate sarvapātakaiḥ |
daśapūrvānparānvaṃśyānnarakāttārayaṃtite || 41 ||
[Analyze grammar]

jaladhenuṃ prayacchaṃti vaiśākhyāṃ vidhinātra ye |
śarkarā phala tāṃbūlamupānatkarapatrikāḥ || 42 ||
[Analyze grammar]

prayacchaṃti dvijāgryebhyo dhanyāste cātra kīrtitāḥ |
maṇikodakakuṃbhāṃśca pakvānnaṃ haimadakṣiṇām || 43 ||
[Analyze grammar]

yaḥ prayacchati vaiśākhyāṃ so'śvamedhaphalaṃ labhet |
atrāpyudāharaṃtīmamitihāsaṃ purātanam || 44 ||
[Analyze grammar]

brāhmaṇasya ca saṃvādaṃ pretaiḥ sārddhaṃ mahāvane |
brāhmaṇo dhanaśarmāsīnmadhyadeśe purānagha || 45 ||
[Analyze grammar]

kuśādyarthaṃ vanaṃ yāto dadarśedamathādbhutam |
bhīto'paśyadasau pretānduṣṭāṃstrīnati dāruṇān || 46 ||
[Analyze grammar]

ūrdhvakeśānsaraktākṣānkṛṣṇadaṃtānkṛśodarān |
kurvato vividhā rāvāndhāvatopi yatastataḥ || 47 ||
[Analyze grammar]

tāndṛṣṭvā bhayasaṃtrasto brāhmaṇo vidruto javāt |
kraṃdamānāstatastepi tamevānu yayustadā || 48 ||
[Analyze grammar]

sadharṣyamāṇastaiḥ pretairuvāca madhuraṃ vacaḥ |
dhanaśarmovāca |
ke yūyaṃ vaḥ kuto'vasthā jāteti nirayocitā || 49 ||
[Analyze grammar]

bhayārttamanukaṃpyaṃ māṃ duḥkhitaṃ trātumarhatha |
vaiṣṇavaṃ bahubhṛtyaṃ ca niḥsvaṃ vipraṃ vanāgatam || 50 ||
[Analyze grammar]

bhavatāmapi saśreyo nūnaṃ dāsyati keśavaḥ |
brahmaṇyo bhagavānviṣṇustuṣṭomayyanukaṃpayā || 51 ||
[Analyze grammar]

atasīpuṣpasaṃkāśo viṣṇuḥ pītāṃbaro hariḥ |
yasya śravaṇamātreṇa nāmno yāti mahā tamaḥ || 52 ||
[Analyze grammar]

anādinidhano devaḥ śaṃkha cakra gadādharaḥ |
akṣayaḥ puṃḍarīkākṣaḥ pretamokṣapradāyakaḥ || 53 ||
[Analyze grammar]

yama uvāca |
nāmaśravaṇa mātreṇa viṣṇoste paritoṣitāḥ |
piśācāḥ puṇyabhāvasthā dayā dākṣiṇya yaṃtritāḥ || 54 ||
[Analyze grammar]

prīṇitāstasyavacasā tadādiṣṭena noditāḥ |
idamūcurdvijaṃ pretāḥ kṣuttṛṣṇāpūrapīḍitāḥ || 55 ||
[Analyze grammar]

pretā ūcu |
darśanenaiva te vipra nāmaśravaṇato hareḥ |
bhāvamanyamanuprāptā vayaṃ jātā dayālavaḥ || 56 ||
[Analyze grammar]

apākaroti duritaṃ śreyaśca yojayatyapi |
yaśo vistārayatyāśu nūnaṃ vaiṣṇavasaṃgamaḥ || 57 ||
[Analyze grammar]

rasāyanamayī śītā paramānaṃdadāyinī |
nānaṃdayati kaṃ nāma vaiṣṇavāmṛtacaṃdrikā || 58 ||
[Analyze grammar]

ayaṃ kṛtaghna nāmāsti dvitīyo'yaṃ vidaivataḥ |
avaiśākhastṛtīyo'yaṃ trayāṇāmapi pāpakṛt || 59 ||
[Analyze grammar]

sadaivānuṣṭhitānena pāpenāti kṛtaghnatā |
tenāsya karmajaṃ nāma kṛtaghnākhyaṃ vyavasthitam || 60 ||
[Analyze grammar]

sudāsa iti nāmnāyaṃ śūdro 'bhūtpūrvajanmani |
kṛtaghnastena pāpena prāpto'vasthāmimāṃ dvija || 61 ||
[Analyze grammar]

atipāpini dhūrte ca gurusvāmyahite'pi ca |
niṣkṛtirvidyate vipra kṛtaghne nāsti niṣkṛtiḥ || 62 ||
[Analyze grammar]

nānānirayasaṃghātaṃ śarīrairyātanā kṣamaiḥ |
anubhūyatāṃtvavasthāmaṃtyāmetāṃ gato dvija || 63 ||
[Analyze grammar]

anenānnaṃ sadā bhuktamakṛtvā devatārcanam |
adatvā guruviprebhyastenaivāyaṃ vidaivataḥ || 64 ||
[Analyze grammar]

ayaṃ daśasahasrāṇāṃ grāmāṇāmīśvaro nṛpaḥ |
harivīra iti khyāto nāmnāsītpūrvajanmani || 65 ||
[Analyze grammar]

roṣāhaṃkāranāstikyairgurvājñālaṃghanodyataḥ |
akṛtvaiva mahāyajñānbhuktavānvipra niṃdakaḥ || 66 ||
[Analyze grammar]

karmaṇā tena pāpena mahānarakasaṃkaṭam |
anubhūya tataḥ preto jāto nāmnā vidaivataḥ || 67 ||
[Analyze grammar]

avaiśākhastṛtīyo'haṃ trayāṇāmapi pāpakṛt |
tena me karmajaṃ nāma brāhmaṇo'haṃ vyavasthitaḥ || 68 ||
[Analyze grammar]

madhyadeśe bhavaṃ nāmnā gautamo gotrato'pyaham |
vipro vāsapurevāsī yajvā''saṃ pūrvajanmani || 69 ||
[Analyze grammar]

mayā kevalamevaikaṃ śrautamārgānusāriṇā |
uddiśya mādhavaṃ devaṃ na snātaṃ māsi mādhave || 70 ||
[Analyze grammar]

na dattaṃ na hutaṃ kiṃcidvaiśākhyāṃ cāviśeṣataḥ |
nārcito madhuhā tatra toṣitā na manīṣiṇaḥ || 71 ||
[Analyze grammar]

maṇikodakakuṃbhaiśca na dānaiḥ pitṛdevatāḥ |
tarpitā na tilā dattāḥ sakṣaudrāḥ śrotriyeṣu ca || 72 ||
[Analyze grammar]

na puṣpaphalatāṃbūla caṃdana vyajanāṃbaraiḥ |
vidvāṃso nārcitāstatra pitṛdaivatatuṣṭaye || 73 ||
[Analyze grammar]

mayā naikāpi vaiśākhī pūrṇā pūrṇaphala pradā |
snānadānakriyāpūjāsukṛtaiḥparipālitā || 74 ||
[Analyze grammar]

tanemevaidikaṃkarmasarvaṃcaivatuniṣphalam |
tato'vaiśākhanāmāhaṃ preto jāto'smi sarvataḥ || 75 ||
[Analyze grammar]

etatte sarvamākhyātaṃ trayāṇāmapikāraṇam |
tvaṃ no bhava samuddhartā pāpādviprosi vai yataḥ || 76 ||
[Analyze grammar]

vimuktaṃ brahmatīrthaṃ ca sādhavaḥ paramaṃ yataḥ |
tārayaṃti mahāpāpānnirayebhyo'pi saṃśritān || 77 ||
[Analyze grammar]

gaṃgādi puṇyatīrtheṣu yo naraḥ snāti sarvadā |
yaḥ karoti satāṃ saṃgaṃ tayoḥ satsaṃgamo varaḥ || 78 ||
[Analyze grammar]

athavā mama putro'sti dhanaśarmeti viśrutaḥ |
taṃ gatvā bodhaya svāminnasmadarthe kṛtodyamaḥ || 79 ||
[Analyze grammar]

kārye samudyamaṃ kṛtvā pareṣāṃ samupasthite |
puṣkalaṃ phalamāpnoti yajñadānakriyādhikam || 80 ||
[Analyze grammar]

yama uvāca |
pretavākyaṃ tadākarṇya dhanaśarmāti duḥkhitaḥ |
sa taṃ janakamājñāya patitaṃ niraye nijam || 81 ||
[Analyze grammar]

ātmānamabhito niṃdannidaṃ vacanamabravīt |
dhanaśarmovāca |
ahaṃ tava sutaḥ svāmingautamasya nirarthakaḥ || 82 ||
[Analyze grammar]

yastu putro na nistāraṃ pituḥ kuryādataṃdritaḥ |
ātmānaṃ pāvayennāsāvadātā dravyavāniti || 83 ||
[Analyze grammar]

dharmo hi gahano jñeyaḥ prayatnenāpi dhīmatā |
yathā mama pitā ca tvamimāṃ prāptosi durgatim || 84 ||
[Analyze grammar]

yadā ca sukhasaṃtānaṃ na mattaḥ prāptavānasi |
lokayoḥ sukhasaṃtāne tathā sa tanayo mataḥ || 85 ||
[Analyze grammar]

dvau gurū puruṣasyeha pitā mātā ca dharmataḥ |
tayorapi pitā śreyānbījaprādhānyadarśanāt || 86 ||
[Analyze grammar]

kiṃ karomi kva gacchāmi kathaṃ tātagatistava |
dharmatattvaṃ na jānāmi saṃśrayāmi bhavadvacaḥ || 87 ||
[Analyze grammar]

preta uvāca |
śṛṇu putra vacaḥ satyaṃ bhāvino'rthasya me balāt |
atha puṇyena kenāpi bhavitrī sugatirmama || 88 ||
[Analyze grammar]

mayā śrautāni karmāṇi kurvatā kila garvataḥ |
anādṛtaṃ guruvaco gurustatrāvamānitaḥ || 89 ||
[Analyze grammar]

gurūṇāmapamānena praharṣakrodhavismayaiḥ |
puṇyāni kṣayamāyāṃti yaśāṃsīva hi durnayaiḥ || 90 ||
[Analyze grammar]

paurāṇika vidhānena karma śrautāvirodhi yat |
kevalaṃ vaidikaṃ karma kṛtamajñānato mayā || 91 ||
[Analyze grammar]

pāpeṃdhana davajvālā pāpadrumakuṭhārikā |
kṛtā naikāpi vaiśākhī vidhinā putra pūrṇimā || 92 ||
[Analyze grammar]

avratā yasya vaiśākhī so'vaiśākho bhavennaraḥ |
daśajanmāni ca tatastiryagyoniṣu jāyate || 93 ||
[Analyze grammar]

ciraṃ bhuktvā duḥkhamaṃte pretaḥ paryāyato bhavet |
labhate mānuṣaṃ janma kathaṃcidapi durlabham || 94 ||
[Analyze grammar]

upāyaṃ te vadiṣyāmi pretamokṣakaraṃ param |
śrutavānyadahaṃpūrvajanmanisvagurormukhāt || 95 ||
[Analyze grammar]

gaccha putra gṛhaṃ snātvā yamunāyāṃ vidhānataḥ |
adyataḥ sarvagatidā kalpādyā sāpyupāgatā |
paścime'hani vaiśākhī pitṛdevārcane hitā || 96 ||
[Analyze grammar]

pānīyamapyatra tilairvimiśraṃ sahodakuṃbhānnaphalāni bhaktyā |
dadyātpitṛbhyo bhavatīha dattaṃ śrāddhaṃ sadā tena samā sahasram || 97 ||
[Analyze grammar]

vaiśākhyāṃ paurṇamāsyāṃ yo bhojayedbhūmidevatāḥ |
sikthesikthe bhavettṛptiḥ pitṝṇāṃ yugasaṃkhyayā || 98 ||
[Analyze grammar]

vaiśākhyāṃ vidhinā snātvā bhojayedbrāhmaṇāndaśa |
pāyasaṃ sarvapāpebhyo mucyate nātra saṃśayaḥ || 99 ||
[Analyze grammar]

gaurānvā yadi vā kṛṣṇāṃstilānkṣaudreṇa saṃyutān |
datvā daśabhyo viprebhyastenaiva svasti vācayet || 100 ||
[Analyze grammar]

prīyatāṃ dharmarājeti pitṝndevāṃśca tarpayet |
yāvajjīvakṛtaṃ pāpaṃ tatkṣaṇādeva naśyati || 101 ||
[Analyze grammar]

vaiśākhyāṃ paurṇamāsyāṃ ca sṛṣṭāḥ kamalayoninā |
tilā deyāśca bhaktyā ca spṛśyāḥ sarvāṃgato dvija || 102 ||
[Analyze grammar]

yastilairyavasammiśraiḥ snāti sarvāṃgatastadā |
tasya brahmā ca dharmo'tra dadāti varamīpsitam || 103 ||
[Analyze grammar]

prītaye dharmarājasya yo dadyādudakuṃbhakān |
saptasapta kulaṃ tena tāritaṃ syānna saṃśayaḥ || 104 ||
[Analyze grammar]

trayodaśyāṃ caturdaśyāṃ pūrṇāyāṃ bhaktitatparaḥ |
snātvā japtvā tathā hutvā datvā saṃpūjya mādhavam || 105 ||
[Analyze grammar]

yatphalaṃ jāyate putra tadasmākaṃ prayaccha bhoḥ |
naitau paricitau pretau hitvā svargatimāśraye || 106 ||
[Analyze grammar]

etayorapipāpasya hyaṃ toyaṃ samupasthitaḥ |
yama uvāca |
tathetyuktvā gataḥ sarvaṃ tataścakre sa vai dvijaḥ || 107 ||
[Analyze grammar]

prītaḥ paramayā bhaktyā vaiśākhyāṃ snānadānakṛt |
snātaḥ samudito bhaktyā prāpya mādhavapūrṇimām || 108 ||
[Analyze grammar]

datvā bahūni dānāni tebhyaḥ puṇyaṃ dadau pṛthak |
tatkṣaṇādeva te sarve vimānasthā divaṃ yayuḥ || 109 ||
[Analyze grammar]

tatpuṇyadānayogena muditā dvijasattama |
dhanaśarmāpi vipreṃdra śruḥtismṛtipurāṇavit || 110 ||
[Analyze grammar]

bhuktvā bhogāṃściraṃ kālaṃ brahmalokamavāptavān |
eṣā puṇyatamā tasmādvaiśākhī viśvapāvanī || 111 ||
[Analyze grammar]

kathyate tu mayā vipra samāsenātigauravāt || 112 ||
[Analyze grammar]

dhanyāsta eva kṛtinaśca ta eva jātā loke ta eva puruṣāḥ puruṣārthabhājaḥ |
ye mādhave madhuniṣūdanamarcayaṃti prātarnimajjya niyamena viśuddhacittāḥ || 113 ||
[Analyze grammar]

yo mādhave māsi naraḥ prabhāte snātaḥ samārādhayate rameśam |
yamairupeto niyamairaśeṣairvṛto'pi nūnaṃ sa nihaṃti pāpam || 114 ||
[Analyze grammar]

tairevakālo vijitasta eva nareṣu dhanyā vigatainasaste |
ta eva garbhe na viśaṃti bhūyo majjaṃti ye mādhavamāsi yuktāḥ || 115 ||
[Analyze grammar]

sa mādhavo garjati yajñayogāttapaḥ kriyā dānavidhāna yogāt |
yasminkṛtaṃ māsi kathaṃcidalpaṃ puṇyaṃ punaḥ syādiha kalpatulyam || 116 ||
[Analyze grammar]

majjato hi manujasya mādhave mādhavārcanakṛte dinodaye |
tāmasopi jalabiṃdusaṃgamādaṃgamāvahati pāvanaṃ yataḥ || 117 ||
[Analyze grammar]

tāni dehamadhiruhya dehinastāvadeva vicaraṃtyaghāni ca |
yāvadeti na sa mādhavāhvayaḥ śrīramāramaṇavallabho virāṭ || 119 ||
[Analyze grammar]

merumaṃdaratulyāni pāpānyugrāṇyanekaśaḥ |
dahate mādhavo māsaḥ snāto mādhavavallabhaḥ || 120 ||
[Analyze grammar]

idaṃ saṃkṣepataḥ proktaṃ mayā te'nugrahāddvija |
vaiśākhasnānamāhātmyaṃ śrotuḥ pāpakṣayaṃ karam || 121 ||
[Analyze grammar]

yastu śroṣyati bhaktyainamitihāsaṃ mayoditam |
so'pi pāpavinirmukto na māmālokayiṣyati || 122 ||
[Analyze grammar]

brahmahatyādi pāpāni bahuśo'pi kṛtānyapi |
vaiśākhasya vidhānena tāni naśyaṃti niścitam || 123 ||
[Analyze grammar]

triṃśatpūrvānparāṃstriṃśattriṃśaccaiva parāvarān |
vaiśākhe vidhinā snāto narakāduddharetpitṝn || 124 ||
[Analyze grammar]

ekataḥ sarvatīrthāni sarveyajñāḥ sadakṣiṇāḥ |
ekato mādhavo māso niyamādanupālitaḥ || 125 ||
[Analyze grammar]

yato bhagavatastasya harerutkṛṣṭakarmaṇaḥ |
priyo'sau mādhavomāsaḥ sarvebhyaḥ pravaro'dhikaḥ || 126 ||
[Analyze grammar]

saṃśayaṃ no vidhehīti mahīdeva kathaṃcana |
vaiśākhaṃ prati vai māsaṃ samāsādyanmayoditam || 127 ||
[Analyze grammar]

ihārthe yatpurāvṛttaṃ tadākarṇaya cādbhutam |
anākhyeyamapīdaṃ te kathayiṣye kathānakam || 128 ||
[Analyze grammar]

iti śrīpadmapurāṇe pātālakhaṃḍe vaiśākhamāhātmye aṣṭanavatitamo'dhyāyaḥ || 98 ||
[Analyze grammar]