Chapter 96

[English text for this chapter is available]

ṛṣaya ūcuḥ |
sūtasūtamahāprājña jīvajīva śataṃsamāḥ |
yadvayaṃ puṇyasamayaṃ śrāvitā jagato hitam || 1 ||
[Analyze grammar]

vada bhūyo'pi bhūyiṣṭhaṃ pibāmastāvakaṃ vacaḥ |
pāyaṃpāyaṃ na tṛpyāmo vayaṃ sūta taduttamam || 2 ||
[Analyze grammar]

sūta uvāca |
atrāpyudāharaṃtīmamitihāsaṃ purātanam |
saṃvādamādilokasya jagatāṃ jagadīśituḥ || 3 ||
[Analyze grammar]

ṣaṭsahasrāṇicocchrāyo vistāreṇa punastrayam |
evaṃ navasahasrāṇi yojanānāṃ vidhāya ca || 4 ||
[Analyze grammar]

vāmayā daṃṣṭrayā gṛhya uddhṛtādau vasuṃdharā |
divyavarṣasahasraṃ vai daṃṣṭrayā dhāritā mahī || 5 ||
[Analyze grammar]

dharmākhyānaprasaṃgena sovāca vinayādvibhum |
pṛthivyuvāca |
ete dvādaśa māsā vai ṣaṣṭirdinaśatatrayam || 6 ||
[Analyze grammar]

eṣāṃ kimuttamaṃ puṇyaṃ priyaṃ ca tava keśava |
pavitraḥ kārtiko māsastulāsaṃsthe divākare || 7 ||
[Analyze grammar]

makarasthe ravau māsaḥ purāṇe pāvanaḥ smṛtaḥ |
meṣasthe mādhavo māso bhāskare paṭhyate budhaiḥ || 8 ||
[Analyze grammar]

mārgaśīrṣo'pi māsānāṃ pāvanaḥ parikīrtitaḥ |
evaṃ māsāḥ pavitrāste vāsarāḥ kepi kīrtitāḥ || 9 ||
[Analyze grammar]

yugādayo yugāṃtāśca tathā kalpādayo'pi ca |
sarvebhyo'pyadhikaṃ māsametebhyo vada pāvanam || 10 ||
[Analyze grammar]

sarvayajñamaya śrīmannekaṃ niścitya me vada |
varāha uvāca |
vidhināvidhinācaiva ye yajaṃti narādhamāḥ || 11 ||
[Analyze grammar]

mādhave māsi māṃ bhaktyā taiśca pūjyo'smyahaṃ sadā |
hiraṇyākṣo varārohe mādhave tu madhurhata || 12 ||
[Analyze grammar]

ādidaityāvubhāvetau hatvā tvaṃ tu samuddhṛtā |
tretāyuge trayī dharmo jñānavarṇavyavasthitiḥ || 13 ||
[Analyze grammar]

mādhave māsi saṃbhūtā tena me mādhavaḥpriyaḥ |
tretāyugaṃ tṛtīyāyāṃ śuklāyāṃ māsi mādhave || 14 ||
[Analyze grammar]

pravṛttaṃ ca trayī dharmāḥ pravṛttāste pravarddhitāḥ |
akṣayā socyate loke tṛtīyā harivallabhā || 15 ||
[Analyze grammar]

snāne dānārcane śrāddhe jape pūrvajatarppaṇe |
ye'rcayaṃti yavairviṣṇuṃ śrāddhaṃ kurvaṃti yatnataḥ || 16 ||
[Analyze grammar]

teṣāṃ dadāmyahaṃ sarvaṃ yanmano'bhīṣṭamuttamam |
ye dadaṃtyapi dānāni dhanyāste dhārmikā narāḥ || 17 ||
[Analyze grammar]

ye yajaṃti harernityamadhvarairvividhairapi |
mādhave yajate yo māṃ tebhyastadadhikaṃ phalam || 18 ||
[Analyze grammar]

snānaṃ dānaṃ japo homastapo yajña vratādikam |
vaiśākhe yatkṛtaṃ devi tasya puṇyaphalaṃ śṛṇu || 19 ||
[Analyze grammar]

manvaṃtarāṇāṃ koṭyastu daśapaṃca ca sapta ca |
matsānnidhyagatāstepi tiṣṭhaṃti bhayavarjitāḥ || 20 ||
[Analyze grammar]

yadyapi syurgrahāḥ sarve krūrā janmavyayāṣṭakāḥ |
prātaḥsnānena vaiśākhe sarve saumyā bhavaṃti te || 21 ||
[Analyze grammar]

vaiśākhe māsi yo viprānbhojayedbhaktitatparaḥ |
sikthesikthe bhavettṛptiḥ pitṝṇāṃ yugasaṃkhyayā || 22 ||
[Analyze grammar]

yacchaṃti tatra madhurādhikabhojanāni ye vāyavāśana tilodaka bhojanāni |
chatrāṃbarāṇi caraṇocitarakṣaṇāni dhanyāsta eva paritoṣakarāhi viṣṇoḥ || 23 ||
[Analyze grammar]

viśeṣādiha dātavyāstilā madhusamanvitāḥ |
dharmāya bṛhate dīrgha duritakṣaya hetave || 24 ||
[Analyze grammar]

evaṃkṛte tu yatpuṇyaṃ prāpyate manujaiśca taiḥ |
tatkairgaṇayituṃ śakyaṃ varṣakoṭiśatairapi || 25 ||
[Analyze grammar]

putrapautrādisaṃpatti dīrghāyūṃṣi yathepsitam |
ihāpnoti paratrāpi māmeva pratipadyate || 26 ||
[Analyze grammar]

anekajanmārjita pātakāvalī vilīyate mādhava majjanena |
janasya tatroṣasi puṇyatīrthe yathāvidhānaṃ śrayate tathā vā || 27 ||
[Analyze grammar]

yaḥ parityajya vaiśākhaṃ vratamanyadupācaret |
sa karasthaṃ mahāratnaṃ hitvā loṣṭaṃ hi yācate || 28 ||
[Analyze grammar]

sūtauvāca |
evaṃ sa bhagavānpūrvamādidevo vadadvibhuḥ |
mādhavaṃ māsamuddiśya jagatyāṃ jagatīdharaḥ || 29 ||
[Analyze grammar]

kimatra bahunoktena na tadasti mahīsurāḥ |
yadaprāpyaṃ bhavenmāsi mādhave mādhavārcanāt || 30 ||
[Analyze grammar]

śṛṇudhvaṃ ca purāvṛttamihārthe paramādbhutam |
brāhmaṇasya ca saṃvādaṃ yamasya ca mahātmanaḥ || 31 ||
[Analyze grammar]

madhyadeśe mahāgrāmo brāhmaṇānāṃ babhūva ha |
gaṃgāyamunayormadhye yāmunasya gireradhaḥ || 32 ||
[Analyze grammar]

vidvāṃsastatra bhūyiṣṭhā brāhmaṇāścāvasaṃstadā |
atha prāha yamaḥ kaṃcitpuruṣaṃ kṛṣṇapiṃgalam || 33 ||
[Analyze grammar]

raktākṣamūrddhvaromāṇaṃ kākajaṃghākṣināsikam |
gaccha tvaṃ bho mahāgrāmaṃ gatvā brāhmaṇamānaya || 34 ||
[Analyze grammar]

vasiṣṭhagotrasaṃbhūtaṃ nāmato yajñadattakam |
śame niviṣṭaṃ vidvāṃsaṃ yajñakarmaviśāradam || 35 ||
[Analyze grammar]

nacānyamānayethāstvaṃ sagotraṃ tasya pārśvataḥ |
sahitādṛgguṇastena tulyo'dhyayana janmanā || 36 ||
[Analyze grammar]

ākṛtyā ca tathā cihnaiḥ samastenaiva sattamaḥ |
tamānaya yathoddiṣṭā pūjā kāryā hi tasya me || 37 ||
[Analyze grammar]

sa gatvā pratikūlaṃ tu cakāra yamaśāsanam |
tameva mānayāmāsa pratiṣiddho yamena yaḥ || 38 ||
[Analyze grammar]

tasmai yamaḥ samutthāya pūjāṃ kṛtvā ca dharmavit |
provāca nīyatāmeṣa so'nya ānīyatāmiti || 39 ||
[Analyze grammar]

sūta uvāca |
evamukte tu vacane dharmarājena sa dvijaḥ |
uvāca dharmarājaṃ taṃ nirviṇṇo gamanāya vai || 40 ||
[Analyze grammar]

brāhmaṇa uvāca |
kasmādahamihānītaḥ kasmātprerayase punaḥ |
gaṃtuṃ naivotsahe tatra martyalokaṃ punaḥ prabho || 41 ||
[Analyze grammar]

yama uvāca |
iha kṣīṇāyuṣāṃ puṃsāṃ vāsaḥ puṇyavatāṃ bhavet |
ayaṃ vai dharmarājasya loko dharmaḥ prakīrtitaḥ || 42 ||
[Analyze grammar]

saukhyabhūmiriyaṃ sarvā dharmarājo'hamīśvaraḥ |
puṇyāpuṇyānusāreṇa jaṃtūnāṃ sukhaduḥkhadaḥ || 43 ||
[Analyze grammar]

pāpināṃ yamarūpo'smi nṛṇāṃ nirayadāyakaḥ |
tathā puṇyavatāṃ saukhya svargado dharma mūrtimān || 44 ||
[Analyze grammar]

gaccha vipra tvamadyaiva nilayaṃ svaṃ yathāgataḥ |
adyāpi daśavarṣāṇāmāyuste parivartate || 45 ||
[Analyze grammar]

kṣaye tavāyuṣaḥ prāptirlokasyāsya bhaviṣyati |
praṣṭavyaṃ ca tvayā hyanyatpṛcchasva prabravīmi te || 46 ||
[Analyze grammar]

brāhmaṇa uvāca |
yatkṛtvā sumahatpuṇyaṃ svargaḥ syādbrūhi tanmama |
sarvasya hi pramāṇaṃtvaṃ dharmādharmaviniścaye || 47 ||
[Analyze grammar]

yadi deva mayā samyaggaṃtavyaṃ nijamaṃdire |
tadbrūhi karmaṇā kena pataṃti narake narāḥ || 48 ||
[Analyze grammar]

vrajaṃti kena vai svargaṃ tatsarvaṃ kṛpayā vada |
yama uvāca |
karmaṇā manasā vācā ye dharmavimukhā narāḥ || 49 ||
[Analyze grammar]

viṣṇubhaktivihīnā ye te vai nirayagāminaḥ |
paśyaṃti bhedabuddhyā ye brahmāṇaṃ śaṃkaraṃ harim || 50 ||
[Analyze grammar]

viraktā viṣṇuvidyāsu narā nirayagāminaḥ |
kuladeśocitaṃ karma yastyaktvānyatsamācaret || 51 ||
[Analyze grammar]

kāmādvā yadi vā mohātsa yāti narakaṃ naraḥ |
ayājyayājakaścaiva yājyānāṃ ca vivarjakaḥ || 52 ||
[Analyze grammar]

virato viṣṇuvidyāsu sa bhuṃkte narakānbahūn |
adatvā pitṛdevebhyo viprebhyo martyabaṃdhuṣu || 53 ||
[Analyze grammar]

sadhano mriyate pāpaḥ sa yāti narakānbahūn |
sarvāṇyannāni siddhāni pākabhedaṃ karoti yaḥ || 54 ||
[Analyze grammar]

avaiśvadevaṃ bhuṃjīta sa yāti narakaṃ ciram |
bahudroheṇa bhūtānāṃ ye'jayaṃti dhanaṃ dvija || 55 ||
[Analyze grammar]

dhanavaṃto nirayagā dāṃbhikā duḥkhabhāginaḥ |
nāstikyādatha vā lobhānmohātkāle yathodite || 56 ||
[Analyze grammar]

bhaktyā na śrāddhadā ye syuḥ pacyaṃte narakeṣu te |
dīyamānasya vittasya brāhmaṇebhyastu pāpakṛt || 57 ||
[Analyze grammar]

vighnamācarate yo'sau naro nirayago bhavet |
sāmānya dakṣiṇāṃ labdhvā gṛhṇātyeko vimohataḥ || 58 ||
[Analyze grammar]

nāstikyabhāvanirato naraḥ syānnarakālaye |
asahiṣṇutayā tasya guṇānāṃ kāraṇaṃ bhavet || 59 ||
[Analyze grammar]

mahatpāpaṃ samutpannaṃ kāraṇaṃ narakasya tat |
nirdoṣāṃ suhṛdāṃ bhāryāṃ tyajankālena yāti yaḥ || 60 ||
[Analyze grammar]

na vaheta yaśasteṣāṃ sa naro narake patet |
adharmaṃ dharmamiti yo vadanmohavaśaṃ gataḥ || 61 ||
[Analyze grammar]

haituko nāstiko yastu sa naro nirayālayaḥ |
manasā yo'nyabhāvena vacasā cānyathā vadet || 62 ||
[Analyze grammar]

hṛdayaṃ kaluṣaṃ kuryātsa naro narake vaset |
avamanya ca ye yāṃti bhagavatkīrtanaṃ narāḥ || 63 ||
[Analyze grammar]

te yāṃti narakaṃ ghoraṃ tena pāpena karmaṇā |
paśyaṃto bhagavaddvāraṃ nāmaśāstra paricchadam || 64 ||
[Analyze grammar]

akṛtvā tatpraṇāmādi te yāṃti narakaukasaḥ |
vināparādhena narāḥ kṛtvā patnyadhivedanam || 65 ||
[Analyze grammar]

tyajaṃti sukalatraṃ ye te yāṃti narake narāḥ |
na śṛṇoti gurorvākyaṃ dharmaśāstraṃ ca yo naraḥ || 66 ||
[Analyze grammar]

pareṣāṃ cetasaḥ kleśakārī nirayago bhavet |
paśyatāṃ baṃdhu bālānāṃ prakarṣī miṣṭamaśnute || 67 ||
[Analyze grammar]

sa yāti narakaṃ ghoraṃ kevalodarapūrakaḥ |
tulā makara meṣeṣu prātaḥ snānaṃ na yaścaret || 68 ||
[Analyze grammar]

nadyādiṣu ca nāstikyastasya syānnarakālayaḥ |
vaiṣṇavaṃ janamālokya nābhyutthānaṃ karoti yaḥ || 69 ||
[Analyze grammar]

praṇayādarato vipra sa naro narakātithiḥ |
kāṣṭhairvā śaṃkubhirvāpi śūlairaśmabhireva ca || 70 ||
[Analyze grammar]

ye mārgāṃścaiva ruṃdhaṃti te vai nirayagāminaḥ |
ādyaṃ puruṣamīśānaṃ sarvalokamaheśvaram || 71 ||
[Analyze grammar]

na cintayaṃti ye viṣṇuṃ te vai nirayagāminaḥ |
kṣetravṛtti gṛhacchedaṃ prīticchedaṃ ca ye narāḥ || 72 ||
[Analyze grammar]

āśācchedaṃ ca kurvaṃti te narā narakaukasaḥ |
āgatānbhojanārthaṃ ca brāhmaṇānvṛttikarśitān || 73 ||
[Analyze grammar]

yaḥ parīkṣeta mūḍhātmā sa jñeyo narakātithiḥ |
anāthaṃ vaiṣṇavaṃ dīnaṃ rogārtaṃ vṛddhameva ca || 74 ||
[Analyze grammar]

nānukaṃpaṃti ye mūḍhāste vai nirayagāminaḥ |
niyamāṃstu samādāya ye paścādajiteṃdriyāḥ || 75 ||
[Analyze grammar]

vilopayaṃti tānbhūyaste vai nirayagāminaḥ |
śṛṇu vipra yathā yāṃti narāḥ svargaṃ dayālavaḥ || 76 ||
[Analyze grammar]

samāsenaiva vakṣyāmi kiṃcitte gauravādaham |
ye'rcayaṃti hariṃ devaṃjiṣṇuṃ viṣṇuṃ sanātanam || 77 ||
[Analyze grammar]

nārāyaṇamajaṃ kṛṣṇaṃ viṣvaksenaṃ caturbhujam |
dhyāyaṃti puruṣaṃ divyamacyutaṃ ye smaraṃti ca || 78 ||
[Analyze grammar]

labhaṃte te'cyutasthānaṃ śrutireṣā purātanī |
idamevahi māṃgalyamidameva dhanārjanam || 79 ||
[Analyze grammar]

jīvitasya phalaṃ caitadyaddāmodarakīrtanam |
kīrtanāddevadevasya viṣṇoramitatejasaḥ || 80 ||
[Analyze grammar]

duritāni vilīyaṃte tamāṃsīva dinodaye |
gāthāṃ gāyaṃti ye nityaṃ vaiṣṇavīṃ śraddhayānvitāḥ || 81 ||
[Analyze grammar]

svādhyāyaniratā nityaṃ te narāḥ svargagāminaḥ |
sarvānkleśānparityajya viṣṇumeva stuvaṃti ye || 82 ||
[Analyze grammar]

svadharmaniratā dhīrāste narāḥ svargagāminaḥ |
vāsudevajapāsaktānapi pāpakṛto janān || 83 ||
[Analyze grammar]

nopasarpanti tānvipra yamadūtāśca dāruṇāḥ |
nānyatpaśyanti jaṃtūnāṃ vihāya harikīrtanam || 84 ||
[Analyze grammar]

sarvapāpapraśamanaṃ prāyaścittaṃ dvijottama |
ye yācitāḥ prahṛṣyaṃti priyaṃ datvā vadaṃti ca || 85 ||
[Analyze grammar]

tyaktadānaphalā ye ca te narāḥsvargagāminaḥ |
varjayaṃti divāsvāpaṃ narāḥ sarvasahāśca ye || 86 ||
[Analyze grammar]

parvaṇyāśrayabhūtā ye te martyāḥ svargagāminaḥ |
dviṣatāmapi ye doṣānna vadaṃti kadācana || 87 ||
[Analyze grammar]

kīrtayaṃti guṇāṃścaiva te narāḥ svargagāminaḥ |
ye pareṣāṃ śriyaṃ dṛṣṭvā na vitapyaṃti matsarāt || 88 ||
[Analyze grammar]

prahṛṣṭāścābhinaṃdaṃti te narāḥ svargagāminaḥ |
pravṛttau ca nivṛttau ca śrutiśāstroktameva ca || 89 ||
[Analyze grammar]

ādaraṃti pratītā ye te narāḥ svargagāminaḥ |
yasminkasminkule jātā dayāvaṃto yaśasvinaḥ || 90 ||
[Analyze grammar]

sānukrośāḥ sadācārāste narāḥ svargagāminaḥ |
ye pūtāḥ paradārāṃśca karmaṇā manasā girā || 91 ||
[Analyze grammar]

ramayaṃti na satvasthāstenarāḥ svargagāminaḥ |
sadā karmayathoktena kurvaṃti vihitāni ca || 92 ||
[Analyze grammar]

ātmaśaktiṃ ca vijñāya te narāḥ svargagāminaḥ |
mano vākkāyike dharme śraddhāṃ yaḥ kurute sadā || 93 ||
[Analyze grammar]

sādhūnāṃ saṃmato yaśca sa bhaveddevatātithiḥ |
vacovegaṃ manovegaṃ yo vegamudarodbhavam || 94 ||
[Analyze grammar]

upasthavegaṃ sahate sa svargī jāyate naraḥ |
yeṣāṃ guṇeṣu saṃtoṣo vāṇī yeṣāṃ śrutaṃ prati || 95 ||
[Analyze grammar]

paramārthe matiryeṣāṃ te śiṣṭāḥ svargagāminaḥ |
vrataṃ rakṣaṃti ye kopācchriyaṃ rakṣaṃti matsarāt || 96 ||
[Analyze grammar]

vidyāṃ mānāpamānābhyāmātmānaṃ tu pramādataḥ |
matiṃ rakṣaṃti ye lobhānmano rakṣaṃti kāmataḥ || 97 ||
[Analyze grammar]

dharmaṃ rakṣaṃti duḥsaṃgātte narāḥ svargagāminaḥ |
ekādaśyāṃ ca vidhivadupavāsaparāyaṇāḥ || 98 ||
[Analyze grammar]

śukle'site ca ye vipra te narāḥ svargagāminaḥ |
māteva sarvabālānāmauṣadhaṃ rogiṇā miva || 99 ||
[Analyze grammar]

rakṣārthaṃ sarvalokānāṃ nirmitaikādaśī tithiḥ |
ekādaśī samaṃ kiṃcitpādatrāṇaṃ na vidyate || 100 ||
[Analyze grammar]

tāmupoṣya vidhānena puruṣāḥ svargagāminaḥ |
ekādaśendriyaiḥ pāpaṃ yatkṛtaṃ bhavati dvija || 101 ||
[Analyze grammar]

naro nirddhūya tattūrṇaṃ prītaḥ svargatimānbhavet |
aśvamedhasahasrāṇi rājasūyaśatāni ca || 102 ||
[Analyze grammar]

ekādaśyupavāsasya kalāṃ nārhaṃti ṣoḍaśīm |
ekataḥ kratavaḥ sarve sarvatīrthatapāṃsi ca || 103 ||
[Analyze grammar]

mahādānādidānāni vrataṃ vaiṣṇavamekataḥ |
vaiṣṇavavratajo dharmo dharmo yajñādisaṃbhavaḥ || 104 ||
[Analyze grammar]

ekatra tulitau dhātrā tatra pūrvo bhavedguruḥ |
harivāsara bhaktānāmacyutānaṃtabhāṣiṇām || 105 ||
[Analyze grammar]

nāhaṃ śāstā viśeṣeṇa tebhyo vipra bibhemyaham |
yeṣāṃ putraśca pautraśca ekādaśyāmupoṣitaḥ || 106 ||
[Analyze grammar]

sahātmanā sa puruṣāñchatamuddharate balāt |
upoṣaṇaṃ tataḥ kuryātpakṣayorubhayorapi || 107 ||
[Analyze grammar]

ekādaśyāṃ sa puruṣo bhuktimuktyekabhājanam |
jayā ca vijayā caiva jayaṃtī pāpanāśinī || 108 ||
[Analyze grammar]

trispṛśā vaṃjulī caiva pakṣasaṃvardhinī varā |
tiladugdhā parā jñeyā akhaṃḍadvādaśī tathā || 109 ||
[Analyze grammar]

manorathākhyā ca parā bhīmadvādaśikā tathā |
ityevamādayo bhedā dvādaśyāḥ saṃtyanekaśaḥ || 110 ||
[Analyze grammar]

vrateṣveteṣu ye śaktā jñeyāste brahmaṇi sthitāḥ |
śrotāro dharmaśāstrāṇāṃ dharmapratyaya saṃgatāḥ || 111 ||
[Analyze grammar]

priyaṃkarāśca bālānāṃ svargalokaṃ vrajaṃti te |
māsimāsyekadivase darśe śrāddhavratā narāḥ || 112 ||
[Analyze grammar]

tṛpyaṃti pitaro yeṣāṃ te dhanyāḥ svargagāminaḥ |
bhojaneṣūpapanneṣu bhojyaṃ yacchaṃti sādarāt || 113 ||
[Analyze grammar]

abhinnamukharāgeṇa śiṣṭāste svargagāminaḥ || 114 ||
[Analyze grammar]

ye bhaktimaṃto madhusūdanasya nārāyaṇasyākhilanāyakasya |
satyena hīnā rajasāpi yuktā gacchaṃti te nākamanaṃtapuṇyāḥ || 115 ||
[Analyze grammar]

vitastāṃ yamunāṃ sītāṃ puṇyāṃ godāvarīṃ nadīm |
sevaṃte ye śubhācārāḥ snānadānaparāyaṇāḥ || 116 ||
[Analyze grammar]

na te paśyaṃti paṃthānaṃ narakasya kadācana |
ye narmadāyāmiha śarmadāyāṃ majjaṃti tuṣyaṃtyapi darśanena || 117 ||
[Analyze grammar]

vidhūya pāpāni maheśalokaṃ gacchaṃti te tatra ciraṃ ramaṃte || 118 ||
[Analyze grammar]

snātāścarmanadī tīre trirātraṃ niyatā narāḥ |
vyāsāśrame viśeṣeṇa te narā nākinaḥ smṛtāḥ || 119 ||
[Analyze grammar]

gaṃgājale prayāge ca kedāre puṣkare tathā |
vyāsāśrame prabhāse ca mṛtāste viṣṇugāminaḥ || 120 ||
[Analyze grammar]

dvāravatyāṃ kurukṣetre yogābhyāsena vā mṛtāḥ |
harirityakṣaraṃ vaktre yeṣāṃ te na punarbhavāḥ || 121 ||
[Analyze grammar]

trirātramapi ye vipra dvāravatyāṃ puri sthitāḥ |
majjaṃti gomatī tīre dhanyāste keśavapriyāḥ || 122 ||
[Analyze grammar]

naranārāyaṇāvāse trirātraṃ ye samāśritāḥ |
martyaloke ca naṃdāyāṃ dhanyāste keśavapriyāḥ || 123 ||
[Analyze grammar]

ṣaṇmāsamuṣitā vipra puruṣottamasaṃnidhau |
te nūnamacyutātmāno dṛṣṭvā syuraghahāriṇaḥ || 124 ||
[Analyze grammar]

aneka janmārjitapuṇyatoye majjaṃti toye maṇikarṇikāyāḥ |
namaṃti viśveśamavāpyakāśīṃ te vai mayāpīha bhavaṃti vaṃdyāḥ || 125 ||
[Analyze grammar]

pūjayitvā hariṃ ye tu bhūmau darbha tilaiḥ saha |
tilānvikīrya lohaṃ ca datvā dhenuṃ payasvinīm || 126 ||
[Analyze grammar]

ye mṛtā vidhivadvipra te narāḥ svargagāminaḥ |
utpādya putrānsaṃsthāpya pitṛpaitāmahe pade || 127 ||
[Analyze grammar]

nirmamā nirahaṃkārā ye mṛtāste'pi nākinaḥ |
stainyānnivṛttāḥ satataṃ saṃtuṣṭāḥ svadhanena ca || 128 ||
[Analyze grammar]

svabhāgyenopajīvaṃti te narāḥ svargagāminaḥ |
ślakṣṇāṃ vāṇīṃ nirābādhāṃ madhuropāya varjitām || 129 ||
[Analyze grammar]

svāgatenābhibhāṣaṃte te narāḥ svargagāminaḥ |
śubhānāmaśubhānāṃ ca karmaṇāṃ phalasaṃcaye || 130 ||
[Analyze grammar]

vipākajñāśca ye vipra te narāḥ svargagāminaḥ |
dhanadharmapravṛttānāṃ dharmamārgānuyāyinām || 131 ||
[Analyze grammar]

protsāhaṃ vardhayaṃte ye modaṃte divi te narāḥ |
hemaṃte vahnido yaśca tathā grīṣme jalapradaḥ || 132 ||
[Analyze grammar]

varṣā svāśramadātā ca sa svarge modate ciram |
puṇyakāleṣu sarveṣu nitya naimittikādiṣu || 133 ||
[Analyze grammar]

bhaktyā yaḥ kurute śrāddhaṃ sa nūnaṃ suralokabhāk || 134 ||
[Analyze grammar]

dānaṃ daridrasya vibhoḥ kṣamitvaṃ yūnāṃ tapo jñānavatāṃ ca maunam |
icchānivṛttiśca sukhocitānāṃ dayā ca bhūteṣu divaṃ nayaṃti || 135 ||
[Analyze grammar]

dvividhaḥ karmasaṃbaṃdhaḥ pāpapuṇyasamudbhavaḥ |
satyameva samāśritya kriyate hyatra nirṇayaḥ || 136 ||
[Analyze grammar]

tapodhyānasamāyuktaṃ tāraṇāya bhavāṃbudheḥ |
pāpaṃ tu patanāyoktaṃ satyameva na saṃśayaḥ || 137 ||
[Analyze grammar]

balena paricāreṇa śauryeṇābhiyutasya ca |
puṇyahīnasya vai puṃsastadbalādiva līyate || 138 ||
[Analyze grammar]

unnatā giri durgeṣu vṛkṣāḥ saṃti supuṣṭakāḥ |
pataṃti vātavegena samūlāstu ghanā api || 139 ||
[Analyze grammar]

satyadharmavihīnāste tathā yāṃti yamālayam |
sāmānyaṃ sarvajaṃtūṃnāṃ balaṃ dharmastu kevalaḥ || 140 ||
[Analyze grammar]

yena saṃtarate jaṃturihaloke paratra ca |
mayā sarvamidaṃ samyaksvargamārga pradāyakam || 141 ||
[Analyze grammar]

samāsena samākhyātaṃ kiṃ bhūyaḥ śrotumicchasi || 142 ||
[Analyze grammar]

iti śrīpadmapurāṇe pātālakhaṃḍe vaiśākhamāhātmye |
ṣaṇṇavatitamo'dhyāyaḥ || 96 ||
[Analyze grammar]