Chapter 95

[English text for this chapter is available]

sūta uvāca |
yātuṃ tamudyataṃ natvā muniṃ rājā tato mudā |
vidhiṃ papraccha saṃkṣiptaṃ snānadānakriyocitam || 1 ||
[Analyze grammar]

aṃbarīṣa uvāca |
mune vaiśākhamāse'sminko vidhiḥ kiṃ tapo'dhikam |
kiṃ ca dānaṃ kathaṃ snānaṃ kathaṃ keśavapūjanam || 2 ||
[Analyze grammar]

kṛpayā vada viprarṣe sarvajñastvaṃ haripriyaḥ |
viśeṣato'pi pūjāyā vidhiṃ tīrthapade vada || 3 ||
[Analyze grammar]

nārada uvāca |
meṣasaṃkramaṇe bhānormādhave māsi sattama |
mahānadyāṃ nadītīre nade sarasi nirjhare || 4 ||
[Analyze grammar]

devakhāte'thavā snāyādyathāprāpte jalāśaye |
dīrghikā kūpa vāpīṣu niyatātmā hariṃ smaran || 5 ||
[Analyze grammar]

madhumāsasya śuklāyāmekādaśyāmupoṣitaḥ |
paṃcadaśyāṃ ca vā vīra meṣasaṃkramaṇe'pi vā || 6 ||
[Analyze grammar]

vaiśākhasnānaniyamaṃ brāhmaṇānāmanujñayā |
madhusūdanamabhyarcya kuryātsusnānapūrvakam || 7 ||
[Analyze grammar]

vaiśākhaṃ sakalaṃ māsaṃ meṣasaṃkramaṇe raveḥ |
prātaḥ saniyamaḥ snāsye prīyatāṃ madhusūdanaḥ || 8 ||
[Analyze grammar]

madhuhaṃtuḥ prasādena brāhmaṇānāmanugrahāt |
nirvighnamastu me puṇyaṃvaiśākhasnānamanvaham || 9 ||
[Analyze grammar]

mādhave meṣage bhānau murāre madhusūdana |
prātaḥsnānena me nātha yathoktaphalado bhava || 10 ||
[Analyze grammar]

yathā te mādhavo māso vallabho madhusūdana |
prātaḥsnānena me tasminphaladaḥ pāpahā bhava || 11 ||
[Analyze grammar]

evamuccārya tattīrthe pādau prakṣālya vāgyataḥ |
smarannārāyaṇaṃ devaṃ snānaṃ kuryādvidhānataḥ || 12 ||
[Analyze grammar]

tīrthaṃ prakalpayeddhīmānmūlamaṃtramimaṃ paṭhan |
oṃnamonārāyaṇāyamūlamaṃtra udāhṛtaḥ || 13 ||
[Analyze grammar]

darbhapāṇistu vidhivadācāṃtaḥ praṇato bhuvi |
caturhastasamāyuktaṃ caturasraṃ samaṃtataḥ || 14 ||
[Analyze grammar]

prakalpyāvāhayedgaṃgāṃ maṃtreṇānena mānavaḥ |
viṣṇupādaprasūtāsi vaiṣṇavī viṣṇudevatā || 15 ||
[Analyze grammar]

trāhi nastvenasastasmādājanmamaraṇāṃtikāt |
tisraḥkoṭyorddhakoṭī ca tīrthānāṃ vāyurabravīt || 16 ||
[Analyze grammar]

divi bhuvyaṃtarikṣe ca tāni te saṃti jāhnavi |
naṃdinītyeva te nāma vedeṣu nalinīti ca || 17 ||
[Analyze grammar]

dakṣā pṛthvī ca vihagā viśvagāthā śivapriyā |
vidyādharī mahādevī tathā lokaprasādinī || 18 ||
[Analyze grammar]

kṣemaṃkarī jāhnavī ca śāṃtā śāṃtipradāyinī |
etāni puṇyanāmāni snānakāle prakīrtayet || 19 ||
[Analyze grammar]

bhavetsaṃnihitā tatra gaṃgā tripathagāminī |
saptavārābhi japtena karasaṃpuṭayojite || 20 ||
[Analyze grammar]

mūrdhni kṛtvā jalaṃ bhūpaścaturvā paṃca sapta vā |
snānaṃ kṛtvā mṛdā tadvadāmaṃtrya tu vidhānataḥ || 21 ||
[Analyze grammar]

aśvakrāṃte rathakrāṃte viṣṇukrāṃte vasuṃdhare |
mṛttike hara me pāpaṃ yanmayā duṣkṛtaṃ kṛtam || 22 ||
[Analyze grammar]

uddhṛtāsi varāheṇa viṣṇunā śatabāhunā |
namaste sarvalokānāṃ prabhavāraṇi suvrate || 23 ||
[Analyze grammar]

evaṃ snātvā tataḥ paścādācamya tu vidhānataḥ |
utthāya vāsasī śukle śuddhe tu paridhāpayet || 24 ||
[Analyze grammar]

tatastu tarppaṇaṃ kuryyāttrailokyāpyāyanāya vai |
brahmāṇaṃ tarppayetpūrvaṃ viṣṇuṃ rudraṃ prajāpatim || 25 ||
[Analyze grammar]

devānyakṣāṃstathā nāgāngaṃdharvāpsarasosurān |
krūrānsarpānsuparṇāṃśca tarūnvai jaṃtukānkhagān || 26 ||
[Analyze grammar]

vidyādharāñjaladharāṃstathaivākāśagāminaḥ |
nirādhārāśca ye jīvāḥ pāpakarmaratāśca ye || 27 ||
[Analyze grammar]

teṣāmāpyāyanārthāya dīyate salilaṃ mayā |
kṛtopavītī deveṣu nivītī ca bhavennaraḥ || 28 ||
[Analyze grammar]

manuṣyāṃstarppayedbhaktyā brahmaputrānṛṣīṃstathā |
sanakaḥ sanaṃdanaścaiva tṛtīyaśca sanātanaḥ || 29 ||
[Analyze grammar]

kapilaścāsuriścaiva voḍhuḥ paṃcaśikhastathā |
te sarve tṛptimāyāṃtu maddattenāṃbunā sadā || 30 ||
[Analyze grammar]

marīcimatryaṃgirasau pulastyaṃ pulahaṃ kratum |
pracetasaṃ vasiṣṭhaṃ ca bhṛguṃ nāradameva ca || 31 ||
[Analyze grammar]

devabrahmaṛṣīnsarvāṃstarpayedakṣatodakaiḥ |
apasavyaṃ tataḥ kuryātsavyaṃ jānvācya bhūtale || 32 ||
[Analyze grammar]

agniṣvāttāstathā saumyā haviṣmaṃtastathoṣmapāḥ |
kavyānalānbarhiṣadastathā vai cājyapāḥ punaḥ || 33 ||
[Analyze grammar]

saṃtarpayetpitṝnbhaktyā satilodakacaṃdanaiḥ |
yamāya dharmarājāya mṛtyave cāṃtakāya ca || 34 ||
[Analyze grammar]

vaivasvatāya kālāya sarvabhūtakṣayāya ca |
uduṃbarāya dadhnāya nīlāya parameṣṭhine || 35 ||
[Analyze grammar]

vṛkodarāya citrāya citraguptāya vai namaḥ |
darbhapāṇistu vidhivatpitṝnsaṃtarpayettataḥ || 36 ||
[Analyze grammar]

pitrādīnnāmagotreṇa tathā mātāmahānapi |
saṃtarpya vidhinā sarvānimaṃ maṃtramudīrayet || 37 ||
[Analyze grammar]

ye bāṃdhavā bāṃdhavā ye ye'nyajanmani bāṃdhavāḥ |
te tṛptimakhilāṃ yāṃtu ye'smattastoyakāṃkṣiṇaḥ || 38 ||
[Analyze grammar]

ācamya vidhivatsamyagālikhetpadmamagrataḥ |
sākṣataiśca sapuṣpaiśca salilāruṇacaṃdanaiḥ || 39 ||
[Analyze grammar]

arghaṃ dadyātprayatnena sūryyanāmānukīrttanaiḥ |
namaste viṣṇurūpāya namaste brahmarūpiṇe || 40 ||
[Analyze grammar]

sahasraraśmaye sūrya namaste sarvatejase |
namaste rudravapuṣe namaste bhaktavatsala || 41 ||
[Analyze grammar]

padmanābha namaste'stu kuṃḍalāṃgadabhūṣita |
namaste sarvalokeśa suptānāmupabodhana || 42 ||
[Analyze grammar]

sukṛtaṃ duṣkṛtaṃ caiva sarvaṃ paśyasi sarvadā |
satyadeva namaste'stu prasīda mama bhāskara || 43 ||
[Analyze grammar]

divākara namastestu prabhākara namostu te |
evaṃ sūryaṃ namaskṛtya sapta kṛtvā pradakṣiṇam || 44 ||
[Analyze grammar]

dvijaṃ gāṃ kāṃcanaṃ spṛṣṭvā paścācca svagṛhaṃ vrajet |
āśramasthāṃstataḥ pūjya pratimāṃ cāpi pūjayet || 45 ||
[Analyze grammar]

pūrvaṃ bhaktyaiva goviṃdaṃ gṛhī ca niyatātmavān |
pūjayedbhaktito rājannubhayatra yathāvidhi || 46 ||
[Analyze grammar]

viśeṣādapi vaiśākhe yo'rcayenmadhusūdanam |
sarvaṃ saṃvatsaraṃ yāvadarcitastena mādhavaḥ || 47 ||
[Analyze grammar]

mādhave māsi saṃprāpte meṣasthe karmasākṣiṇi |
keśavaprītaye kuryātkeśavavratasaṃcayam || 48 ||
[Analyze grammar]

dadyādanekadānāni tilājyaprabhṛtīnyapi |
janmakoṭisamudbhūta pātakāṃtakarāṇi ca || 49 ||
[Analyze grammar]

jalānnaśarkarādhenutiladhenumukhāni ca |
vittamānena deyāni dānānīpsitasiddhaye || 50 ||
[Analyze grammar]

vaiśākhaṃ sakalaṃ māsaṃ nityasnāyī jiteṃdriyaḥ |
japanhaviṣyaṃ bhuṃjānaḥ sarvapāpaiḥ pramucyate || 51 ||
[Analyze grammar]

ekabhuktamatho naktamayācitamataṃdritaḥ |
mādhave māsi yaḥ kuryāllabhate sarvamīpsitam || 52 ||
[Analyze grammar]

vaiśākhe vidhinā snānadvayaṃ nadyādike bahiḥ |
haviṣyaṃ brahmacaryaṃ ca bhūśayyā niyamasthitiḥ || 53 ||
[Analyze grammar]

vrataṃ dānaṃ japo homo madhusūdanapūjanam |
api janmasahasrotthaṃ pāpaṃ dahati dāruṇam || 54 ||
[Analyze grammar]

yathaiva mādhavo dhyāto vināśayati kilbiṣam |
tathaiva mādhave snānaṃ niyamena vinirmitam || 55 ||
[Analyze grammar]

tīrthe cānudinaṃ snānaṃ tilaiśca pitṛtarpaṇam |
dānaṃ dharmaghaṭādīnāṃ madhusūdanapūjanam || 56 ||
[Analyze grammar]

mādhave māsi kurvīta madhusūdanatuṣṭidam |
tilodakasuvarṇānna śarkarāṃbarabhūṣaṇam || 57 ||
[Analyze grammar]

pādatrāṇātapatrāṃbu kuṃbhāndadyāddvijātiṣu |
trisaṃdhyaṃ pūjayedīśaṃ bhaktito madhusūdanam || 58 ||
[Analyze grammar]

sākṣādvimalayā lakṣmyā samupetaṃ samāhitaḥ |
suvarṇatilapātraiśca brāhmaṇāñchaktito bahūn || 59 ||
[Analyze grammar]

tarpayedudapātrairyo brahmahatyāṃ vyapohati |
vaiśākhe māsi yaḥ snātvā prātarnadyāṃ samāhitaḥ || 60 ||
[Analyze grammar]

pūjayitvā hariṃ bhaktyā puṣpaiḥ kālodbhavaiḥ phalaiḥ |
pūjayedbrāhmaṇaṃ śaktyā pākhaṃḍālāpavarjitaḥ || 61 ||
[Analyze grammar]

tarpayedvastragodānai ratnādyairdhanasaṃcayaiḥ |
anyadvittaṃ yathāśakti stokaṃ stokaṃ samācaret || 62 ||
[Analyze grammar]

paścādviniḥsvaḥ puruṣo mādhave māsi mādhavam |
puṣpārcanavidhānena pūjayenmadhusūdanam || 63 ||
[Analyze grammar]

sarvapāpavinirmuktaḥ pitṝṇāṃ tārayecchatam |
sajanmaśatasāhasraṃ na śokaphalabhāgbhavet || 64 ||
[Analyze grammar]

na ca vyādhibhayaṃ tasya na dāridryaṃ na baṃdhanam |
sa viṣṇubhakto jāyeta dhanyo janmanijanmani || 65 ||
[Analyze grammar]

yāvadyugasahasrāṇi śatamaṣṭottaraṃ bhavet |
tāvatsvarge vasedvīra bhūpatiśca punarbhavet || 66 ||
[Analyze grammar]

bhūpatervividhānbhogānbhuktvā caiva yathāsukham |
mādhavasya prasādena mādhave līyate tataḥ || 67 ||
[Analyze grammar]

śṛṇu rājanpravakṣyāmi samāsānmādhavārcanam |
vaidikaṃ tāṃtrikaṃ vāpi miśrakaṃ pāpanāśanam || 68 ||
[Analyze grammar]

nahyaṃto'naṃtapārasya nāṃtaḥ pūjāvidhernṛpa |
atha saṃkṣipya cocyeta yathāvadanupūrvaśaḥ || 69 ||
[Analyze grammar]

vaidikastāṃtriko miśraḥ śrīviṣṇostrividho makhaḥ |
trayāṇāmīpsitenaiva vidhinā harimarcayet || 70 ||
[Analyze grammar]

vaidiko miśrako vāpi viprādīnāṃ vidhīyate |
tāṃtriko viṣṇubhaktasya śūdrasyāpi prakīrtitaḥ || 71 ||
[Analyze grammar]

yathā svanigamenoktaṃ dvijatvaṃ prāpya pūruṣaḥ |
yajecca vidhivadviṣṇuṃ brahmacārī samāhitaḥ || 72 ||
[Analyze grammar]

arcayetsthaṃḍile'gnau vā sūrye'psu hṛdi vā dvije |
dravyeṇa bhaktiyuktena svaguruṃ tadanujñayā || 73 ||
[Analyze grammar]

pūrvaṃ snānaṃ prakurvīta dhautadaṃtoṃ'gaśuddhaye |
ubhayorapi ca snānaṃ maṃtrairmṛdgrahaṇādinā || 74 ||
[Analyze grammar]

saṃdhyopāstyādikarmāṇi vedataṃtroditāni vai |
pūjāṃte kalpayetsamyaksaṃkalpaṃ karmapāvanam || 75 ||
[Analyze grammar]

śailī dārumayī lauhī lepyā lekhyā ca saikatī |
manomayī maṇimayī pratimāṣṭavidhā smṛtā || 76 ||
[Analyze grammar]

calācaleti dvividhā pratiṣṭhā jīvamaṃdiram |
udvāsā vāhanena staḥ sthirāyāṃ mādhavārcane || 77 ||
[Analyze grammar]

asthirāyāṃ vikalpaḥ syātsthaṃḍile tu bhaveddvayam |
snāpanaṃ tvavilepyāyāmanyatra parimārjanam || 78 ||
[Analyze grammar]

dravyaiḥ prasiddhairdevejyā pratimādiṣvamāyinaḥ |
bhaktasya ca yathālabdhairbhaktibhāvena caiva hi || 79 ||
[Analyze grammar]

snānālaṃkaraṇaṃ śreṣṭhamarcāyāmeva bhūpate |
sthaṃḍileṣvapi vinyāso vahnāvājyahutaṃ haviḥ || 80 ||
[Analyze grammar]

sūrye cābhyarhaṇaṃ śreṣṭhaṃ sthaṃḍile salilādibhiḥ |
śraddhayopahṛtaṃ śreṣṭhaṃ harau bhaktena vāryapi || 81 ||
[Analyze grammar]

gaṃdho dhūpaḥ sumanaso dīpo'nnādyaṃ ca kiṃ punaḥ |
śuciḥ saṃbhṛtasaṃbhāraḥ prāgdarbhaiḥ kalpitāsanaḥ || 82 ||
[Analyze grammar]

āsīnaḥ prāgudagvaktro hyarcāyāmatha sammukhaḥ |
kṛtanyāsaḥ kṛtanyāsāṃ haryarcāṃ pāṇinā spṛśet || 83 ||
[Analyze grammar]

kalaśaṃ prokṣaṇīyaṃ ca yathāvadupasādhayet |
tadadbhirdevayajanaṃ dravyāṇyātmānameva ca || 84 ||
[Analyze grammar]

prokṣya pātrāṇi trīṇyadbhistaistairdravyaistu sādayet |
pādyārghyācamanīyārthaṃ trīṇi pātrāṇi dāpayet || 85 ||
[Analyze grammar]

hṛtaśīrṣṇā ca śikhayā gāyatryā cābhimaṃtrayet |
piṃḍe vāyvagnisaṃsiddhe hṛtpadmasthāṃ parāṃ vibhoḥ || 86 ||
[Analyze grammar]

aṇvīṃ jīvakalāṃ dhyāyennādāṃte siddhibhāvitām |
tayātmabhūtayā piṃḍe vyāpte saṃpūjya tanmayaḥ || 87 ||
[Analyze grammar]

āvāhyārcādiṣu sthāpya nyastāṃ gāṃ tāṃ prapūjayet |
pādyārghyasnānārhaṇādīnupacārānprakalpayet || 88 ||
[Analyze grammar]

dharmādibhiśca navabhiḥ kalpayitvāsanaṃ hareḥ |
padmamaṣṭadalaṃ tatra karṇikākesarojjvalam || 89 ||
[Analyze grammar]

ubhābhyāṃ vedataṃtrābhyāṃ harerubhayasiddhaye |
sudarśanaṃ pāṃcajanyaṃ gadāsīṣu dhanurhalam || 90 ||
[Analyze grammar]

muśalaṃ kaustubhaṃ mālāṃ śrīvatsaṃ cānupūjayet |
naṃdaṃ sunaṃdaṃ garuḍaṃ pracaṃḍaṃ caṃḍameva ca || 91 ||
[Analyze grammar]

mahābalaṃ balaṃ caiva kumudaṃ kumudekṣaṇam |
durgāṃ vināyakaṃ vyāsaṃ viṣvaksenaṃ gurūnsurān || 92 ||
[Analyze grammar]

svesve sthāneṣvabhimukhānpūjayetprokṣaṇādibhiḥ |
caṃdanośīrakarpūra kuṃkumāguruvāsitaiḥ || 93 ||
[Analyze grammar]

salilai snāpayenmaṃtrairnityaṃ vā vibhave sati |
svarṇagharmānuvākena mahāpuruṣavidyayā || 94 ||
[Analyze grammar]

pauruṣeṇāpi sūktena sāmanīrājanādibhiḥ |
vastropavītābharaṇa patrasraggaṃdhalepanaiḥ || 95 ||
[Analyze grammar]

alaṃkurvīta saprema viṣṇubhakto yathocitam |
pādyamācamanīyaṃ ca gaṃdhaṃ sumanasokṣatān || 96 ||
[Analyze grammar]

gaṃdhadhūpopahāryāṇi dadyādvai śraddhayārcakaḥ |
guḍapāyasasarpīṃṣi śaṣkulyāpūpamodakān || 97 ||
[Analyze grammar]

pāyasaṃ dadhisarpiśca naivedyaṃ sa vikalpayet |
abhyaṃgonmardanādarśa daṃtadhāvābhiṣecanam || 98 ||
[Analyze grammar]

annādyaṃ nṛtyagītāni sarvāṇi syurathānvaham |
vidhinā vihite kuṃḍe mekhalāvartavedibhiḥ || 99 ||
[Analyze grammar]

agnimādhāya paritaḥ samūhetpāṇinodakam |
paristīryātha paryukṣya datvā idhmaṃ yathāvidhi || 100 ||
[Analyze grammar]

prokṣaṇyāsādya dravyāṇi prokṣaṇyaivājyasecanam |
taptajāṃbūnadaprakhyaṃ śaṃkhacakragadāṃbujaiḥ || 101 ||
[Analyze grammar]

lasaccaturbhujaṃ śāṃtaṃ padmakiṃjalkavāsasam |
sphuratkirīṭakaṭakakaṭisūtravarāṃgadam || 102 ||
[Analyze grammar]

śrīvatsavakṣasaṃbhrājatkaustubhaṃ vanamālinam |
dhyāyannabhyarcya dārūṇi haviṣā saghṛtāni ca || 103 ||
[Analyze grammar]

prāsyājyabhāgāvāghārau datvā cājyaplutaṃ haviḥ |
abhyarcyātha namaskṛtya pārṣadebhyo baliṃ haret || 104 ||
[Analyze grammar]

mūlamaṃtraṃ japedbrahmansmarannārāyaṇātmakam |
datvācamanamucchiṣṭaṃ viṣvaksenāya kalpayet || 105 ||
[Analyze grammar]

mukhavāsaṃ tu surabhiṃ tāṃbūlādyamupāharet |
upagāyangṛṇannityaṃ karmāṇyabhiravākṣaraiḥ || 106 ||
[Analyze grammar]

satkathāṃ śrāvayañchṛṇvanmuhūrtaṃ kṣaṇiko bhavet |
stavairuccāvacaiḥ stotraiḥ paurāṇaiḥ prākṛtairapi || 107 ||
[Analyze grammar]

stutvā prasīda bhagavanniti vaṃdeta daṃḍavat |
śirastatpādayoḥ kṛtvā bāhubhyāṃ ca parasparam || 108 ||
[Analyze grammar]

prapannaṃ pāhi māmīśa bhītaṃ mṛtyugrahārṇavāt |
iti śeṣānharerdattāñchirasyādhāya sādaram || 109 ||
[Analyze grammar]

udvāsayeccedudvāsyaṃ jyotirjyotiṣi cātmanaḥ |
arcādiṣu padaṃ yatra śraddhāvāṃstatra cārcayet || 110 ||
[Analyze grammar]

sarvabhūteṣvātmani ca sarvātmānamavasthitam |
evaṃ kriyāyogapathaiḥ pumānvaidikatāṃtrikaiḥ || 111 ||
[Analyze grammar]

arccayecca yataḥ siddhiṃ harerviṃdatyabhīpsitām |
tāmarcāṃ saṃpratiṣṭhāpya maṃdiraṃ kārayeddṛḍham || 112 ||
[Analyze grammar]

puṣpodyānāni ramyāṇi pūjāyātrotsavādikam |
pūjādīnāṃ pravāhārthaṃ mahāparvasvathānvaham || 113 ||
[Analyze grammar]

kṣetrāpaṇapuragrāmāndatvā sāyujyatāmiyāt |
pratiṣṭhayā sārvabhaumaṃ sadmanā bhuvanatrayam || 114 ||
[Analyze grammar]

pūjādinā brahmalokaṃ tribhistatsāmyatāmiyāt |
tameva nairapekṣeṇa bhaktiyogena viṃdate || 115 ||
[Analyze grammar]

bhaktiyogaṃ sa labhate evaṃ yaḥ pūjayeddharim || 116 ||
[Analyze grammar]

yatkṛṣṇapraṇipātadhūlidhavalaṃ tadvarṣma tadvacchubhaṃ |
te netre tapasārjite surucire yābhyāṃ harirdṛśyate |
sā buddhirvimaleṃdu śaṃkhadhavalā yā mādhavavyāpinī |
sā jihvā mṛdubhāṣiṇī nṛpa muhuryā stauti nārāyaṇam || 117 ||
[Analyze grammar]

mūlamaṃtreṇa kartavyaṃ strīśūdrairapi pūjanam |
śraddhayā svagurūddiṣṭamārgeṇānyaiśca vaiṣṇavaḥ || 118 ||
[Analyze grammar]

idaṃ te sarvamākhyātaṃ pāvanaṃ mādhavārcanam |
viśeṣānmādhave māsi tvametatkuru bhūpate || 119 ||
[Analyze grammar]

sūta uvāca |
ityevamākarṇya vaco vicitraṃ puṇyaṃ pavitraṃ vidhinaṃdanasya |
praṇamya baddhāṃjalirāha rājā sakautukī bhāgavatapradhānaḥ || 120 ||
[Analyze grammar]

aṃbarīṣa uvāca |
samastabhūmīvalayeśvaro'hamavyāhatājño vibudhaprasevī |
goviṃdapādāṃbujadattacittaḥ svacittasaṃtoṣitabhūmidevaḥ || 121 ||
[Analyze grammar]

vikhyātarājocitavaṃśaratnaṃ niraṃtaraṃ dharmaruciryaśasvī |
sauṃdaryaśauryodayadānaśīlaḥ suputravānasmi jitārivargaḥ || 122 ||
[Analyze grammar]

kenāpi puṇyena pavitrabuddhirjātohamīdṛgguṇasaṃtaśrīḥ |
iyaṃ punaḥ śrīriva puṇyamūrtirlabdhā kutaḥ kāṃtimatī ca kāṃtā || 123 ||
[Analyze grammar]

idaṃ me sukṛtaṃ sarvaṃ purājanmani ceṣṭitam |
samādiśa mune samyaksarvajñosi dayānidhe || 124 ||
[Analyze grammar]

nārada uvāca |
iyaṃ rūpavatī nāma veśyāsīdanyajanmani |
sāṃprataṃ tava bhāryā yā satyācārātisuṃdarī || 125 ||
[Analyze grammar]

veśyādharmeṇa varteta yathoddiṣṭena bhāvinī |
kurvatī kila karmāṇi śubhāni dvijaśāsanāt || 126 ||
[Analyze grammar]

devadāsa iti khyāto hemakāro bhavānabhūt |
pūrvajanmani vai tasyā rucerbhartā bhujaṃgamaḥ || 127 ||
[Analyze grammar]

iyaṃ bhavaṃtaṃ bhajate rucī rūpavatī punaḥ |
vyayārthamayanaṃ dharmaṃ sthitā vijñānamuttamam || 128 ||
[Analyze grammar]

ākarṇya caikadā dharmaṃ vaiśākhasnānasaṃbhavam |
cakre dharmavatī toye snānaṃ meṣagate ravau || 129 ||
[Analyze grammar]

dānaṃ dattavatī dakṣā veśyā rūpavatī sadā |
brāhmaṇāya namaskāraṃ bhaktyādarapuraḥsaram || 130 ||
[Analyze grammar]

sa tayā devadāsastvaṃ bodhitaḥ snehayaṃtritaḥ |
kṛtavānbuddhitaḥ snānaṃ mādhave māsi sādaram || 131 ||
[Analyze grammar]

tatra tretāyugasyādau tṛtīyāmāpyanirmalām |
suvarṇakāraṃ sovāca devadāsaṃ tamādarāt || 132 ||
[Analyze grammar]

veśyovāca |
uttamaṃ kuru sauvarṇaṃ madhusūdanamacyutam |
pūjayitvā yavairdevametaiḥ saṃtarpya cānalam || 133 ||
[Analyze grammar]

brāhmaṇāya ca dāsyāmi brāhmaṇānāmanujñayā |
dānametatpurāṇeṣu kathyate tatra cākṣayam || 134 ||
[Analyze grammar]

akṣayeti tṛtīyāsau brāhmaṇebhyaḥ śrutaṃ mayā |
śuklā vaiśākhamāsasya tadakṣayaphalapradam || 135 ||
[Analyze grammar]

asyāṃ dāsyāmi taṃ haimaṃ madhusūdanamavyayam |
nārada uvāca |
iti tasya vacaḥ śrutvā madhuraṃ hemakārakaḥ || 136 ||
[Analyze grammar]

cakre suvarṇapratimāmacyutasyāpi suṃdarīm |
satyabhāvena dharmārthamiti cauryavivarjitaḥ || 137 ||
[Analyze grammar]

yathoddiṣṭasya caṃdrasya pratimāṃ lakṣaṇānvitām |
dadau sā ca vidhānena snātvā viprāya suṃdarīm || 138 ||
[Analyze grammar]

pūjayitvā tatastasyāmakṣayāyāṃ tithau nṛpa || 139 ||
[Analyze grammar]

kālena kiyatā veśyā sā mṛtā dharmaniṣṭhitā |
devadāso'pi sa tato mṛtaḥ svīyāyuṣakṣaye || 140 ||
[Analyze grammar]

tena puṇyena bhūpāla hemakāro'nya janmani |
sa tvaṃ prāpto mahīṃ rājannaśeṣaguṇasaṃyutaḥ || 141 ||
[Analyze grammar]

sāpi rūpavatī veśyā tena dharmeṇa te'bhavat |
nāmnā kāṃtimatī kāṃtā praṇayena pariplutā || 142 ||
[Analyze grammar]

vividhā vāsanā vīra karmaṇāṃ pūrvasaṃbhavāḥ |
vicitrā gatayastāta jñāyaṃte na budhairapi || 143 ||
[Analyze grammar]

tamenaṃ mādhavaṃ māsaṃ pratikāryaṃ na saṃśayaḥ |
gopitaṃ tena devena brahmaṇā mādhavena ca || 144 ||
[Analyze grammar]

asādhusaṃgairanavāptavidyairasaṃyatairāśramadharmahīnaiḥ |
abhūtatīrthairakṛtavrataistairna labhyate mādhavamāsadharmaḥ || 145 ||
[Analyze grammar]

goviṃdakeśavamukuṃdahare murāre lakṣmīnivāsa madhusūdana kṛṣṇa viṣṇo |
vāṇī varā na vadane vasatīti yeṣāṃ vaiśākhamāsaniyamo bhavate na teṣām || 146 ||
[Analyze grammar]

ye sādhusādhu vacanāni hitādhikāni nākarṇayaṃti ca hareścaritāmṛtāni |
paśyaṃti ye na kamalāpatiketanāni vaiśākhamāsaniyamaṃ na hi te labhaṃte || 147 ||
[Analyze grammar]

śuśrūṣitā na guravo na varāya kanyā dattā samāya samaye samalaṃkṛtā yaiḥ |
adhyāpitā na tanayā vinayādi dharmaṃ vaiśākhamāsaniyamaṃ na hi te labhaṃte || 148 ||
[Analyze grammar]

sūta uvāca |
ityevamādiśya munirnareśa māmaṃtrya taṃ maṃtravidagragaṇyaḥ |
snātuṃ yayau mādhavamāsi gaṃgāmabhyarcitastena tadā sa viprāḥ || 149 ||
[Analyze grammar]

vidhiṃ sa rājāpi tataścakāra vaiśākhamāsasya munipraṇītam |
patnyāsamaṃ puṇyadhiyā tameva saṃciṃtayaṃllokapavitrakīrtiḥ || 150 ||
[Analyze grammar]

iti śrīpadmapurāṇe pātālakhaṃḍe vaiśākhamāhātmye nāradāṃbarīṣa |
saṃvāde paṃcanavatitamo'dhyāyaḥ || 95 ||
[Analyze grammar]