Chapter 94

[English text for this chapter is available]

aṃbarīṣa uvāca |
pāpapraśamanaṃ stotraṃ śrotumicchāmi tadvibho |
yasya śravaṇamātreṇa pāparāśirvilīyate || 1 ||
[Analyze grammar]

dhanyo'smyanugṛhīto'smi śrāvito'smi śubhaṃ vidhim |
vikarmopārjitaṃ yasya śravaṇādeva hīyate || 2 ||
[Analyze grammar]

citraṃ kimatra madhusūdana daivatasya māsasya puṇyasavanairiha mādhavasya |
snānairavaśyavihitairagharāśināśaḥ syādyasya nāmapaṭhanādapi tasya lokaḥ || 3 ||
[Analyze grammar]

tadeva puṇyaṃ paramaṃ pavitraṃ hṛdyaṃ ca loke sukṛtaikalabhyam |
yaducyate keśavanāmadheyaṃ manye mune mādhavamāsi bhavyam || 4 ||
[Analyze grammar]

dhanyāstu te mādhavamāsi nāma smaraṃti ye'ho madhusūdanasya |
tasyaiva me kiṃcidaho caritraṃ punaḥ pavitraṃ vada viśvajanyam || 5 ||
[Analyze grammar]

sūta uvāca |
vacaḥ samākarṇya haripriyasya prīto munistasya nṛpottamasya |
sa mādhavasnānasamutsuko'pi kathārasenāha sa mādhavasya || 6 ||
[Analyze grammar]

nārada uvāca |
satyaṃ mahīpāla mitho mukuṃdakathārasālāpavidhirviśuddhaḥ |
tvayā samaṃ mādhavamāsadharmasnānādhiko'yaṃ haridaivatena || 7 ||
[Analyze grammar]

jīvitaṃ yasya dharmārthaṃ dharmo haryarthameva ca |
ahorātrāṇi puṇyārthaṃ taṃ manye vaiṣṇavaṃ bhuvi || 8 ||
[Analyze grammar]

kiṃcidvakṣyāmi te rājanvaiśākhasnānajaṃ phalam |
asmatpitāpi no vaktumalaṃ vistarato'khilam || 9 ||
[Analyze grammar]

yatra majjanamātreṇa pretā muktimupāgatāḥ |
mādhave māsi te pāpā narmadāsalile pare || 10 ||
[Analyze grammar]

purātīrthaprasaṃgena bhramankopi mahīsuraḥ |
muniśarmeti vikhyāto dharmātmā satyavāñchuciḥ || 11 ||
[Analyze grammar]

yuktaḥ śamadamābhyāṃ ca kṣāṃtisaṃtoṣasaṃyutaḥ |
yuktaḥ sa pitṛkāryeṣu śrutismṛtividhānavān || 12 ||
[Analyze grammar]

yukto madhuravākyeṣu saṃyukto haripūjane |
yukto vaiṣṇavasaṃsarge trikālajñānavānmuniḥ || 13 ||
[Analyze grammar]

svakarmaṇi rato dhīro hṛdayāluḥ priyāpriyaḥ |
dayāluratimedhāvī tattvavidbrāhmaṇapriyaḥ || 14 ||
[Analyze grammar]

mādhave māsi revāyāṃ snānārthaṃ pratisaṃcaran |
agrataḥ paṃcapuruṣāndadarśātīva duḥkhitān || 15 ||
[Analyze grammar]

parasparamasaṃsargakāriṇaḥ kṛṣṇavigrahān |
vaṭacchāyāmupāśritya samāsīnānavasthitān || 16 ||
[Analyze grammar]

paśyaṃto dikṣu sarvāsu duritodvignacetasaḥ |
tānālokya dvijaśreṣṭhaściṃtayāmāsa vismitaḥ || 17 ||
[Analyze grammar]

atraite ke narā bhītā vipine dīnaceṣṭitāḥ |
caurā vā vikṛtākārā dṛśyaṃte saṃgabhāginaḥ || 18 ||
[Analyze grammar]

parasparaṃ ca bhāṣaṃtaḥ kṛśāḥ kṛṣṇavapuḥ śriyaḥ |
yāvadevaṃ sa viprāgryo vicārayati dhīradhīḥ || 19 ||
[Analyze grammar]

tāvadāgamyate sarve dūrasthā munimādarāt |
baddhāṃjalipuṭā bhūtvā praṇamyocuriti sphuṭam || 20 ||
[Analyze grammar]

paṃcapuruṣā ūcuḥ |
bhavyaṃ bhavaṃtaṃ puruṣottamaṃ vai vibhrājamānaṃ caritena mānyam |
manyāmahe vipra dayālumukhyaṃ vācaṃ samākarṇaya nosi maitraḥ || 21 ||
[Analyze grammar]

saṃtaḥ pratiṣṭhā dīnānāṃ daivādudbhūtapāpinām |
ārtānāmārtihaṃtāro darśanādeva sādhavaḥ || 22 ||
[Analyze grammar]

ahaṃ pāṃcāladeśīyaḥ kṣatriyo vīravāhanaḥ |
brāhmaṇaṃ hatavānmohācchareṇa śabdavedhinā || 23 ||
[Analyze grammar]

śikhāsūtravihīnastu tilakena vivarjitaḥ |
aṭāmi jagatīmenāṃ brahmaghno'hamiti bruvan || 24 ||
[Analyze grammar]

brahmaghnāyātipāpāya bhikṣā mahyaṃ pradīyatām |
evaṃ sarveṣu tīrtheṣu bhramannatrāsmi cāgataḥ || 25 ||
[Analyze grammar]

brahmahatyā na medyāpi prayāti munisattama |
evaṃ me varṣamekaṃ hi vyatītaṃ kurvato vibho || 26 ||
[Analyze grammar]

dahyamānasya pāpena śokākulitacetasaḥ |
caṃdraśarmāparo vipro yoyaṃ saṃlakṣyate dvija || 27 ||
[Analyze grammar]

gurughātī sa tu brahmanmohākulitamānasaḥ |
mohākulitacittatvādgurughātaka ucyate || 28 ||
[Analyze grammar]

nivasanmāgadhedeśe saṃtyaktaḥ svajanaistataḥ |
daivādasāvapi mune bhramanniha samāgataḥ || 29 ||
[Analyze grammar]

śikhāsūtravihīnastu vipraliṃgavivarjitaḥ |
mayā pṛṣṭastu vṛttāṃtaṃ satyamevāvadaddvijaḥ || 30 ||
[Analyze grammar]

vasatā yadgurorgehe krodhākulitacetasā |
mahāmohagatenāpi yathā vai ghātito guruḥ || 31 ||
[Analyze grammar]

tena pāpena dagdho'sau vartate śokapīḍitaḥ |
tṛtīyo'yaṃ punaḥ svāminvedaśarmāsamāhitaḥ || 32 ||
[Analyze grammar]

surāpo brāhmaṇo jāto mohādveśyāprasaṃgataḥ |
pṛṣṭo mayāyamapi me yathāvṛttaṃ tathābravīt || 33 ||
[Analyze grammar]

ātmanaśceṣṭitaṃ sarvaṃ manastāpena pīḍitaḥ |
nirastaḥ sarvalokaiśca bhāryābaṃdhujanairapi || 34 ||
[Analyze grammar]

tena pāpena saṃlipto bhramannatrāyamāgataḥ |
caturtho vidhuro nāma vaiśyo'yaṃ gurutalpagaḥ || 35 ||
[Analyze grammar]

mohānmāsatrayaṃ yāvadveśyābhūtāṃ ca mātaram |
bubhuje sa videhasthāṃ jñātatattvastataścaran || 36 ||
[Analyze grammar]

duḥkhito'bhyāgamadbhūmiṃ bhramanniha mune punaḥ |
paṃcamo'yaṃ mahāpāpī pāpisaṃsargakārakaḥ || 37 ||
[Analyze grammar]

pratyahaṃ dhanalobhena steyādikṛtavānagham |
vaiśyotipātakaiḥ krāṃtastatastyakto janaiḥ svayam || 38 ||
[Analyze grammar]

nirviṇṇamānaso daivānnaṃdanāmeha saṃgataḥ |
evaṃ paṃcāpi pāpiṣṭhāḥ sthānamekamupāgatāḥ || 39 ||
[Analyze grammar]

kaḥ kasyāpi na saṃparkaṃ bhojanācchādanādibhiḥ |
na karoti mahābhāga vinā vārtāṃ dvijottama || 40 ||
[Analyze grammar]

viśaṃtyekāsane naiva na svapaṃtyekasaṃstare |
evaṃ duḥkhasamākrāṃtā nānātīrtheṣu vai gatāḥ || 41 ||
[Analyze grammar]

nāsmākaṃ pātakaṃ ghoraṃ prayāti munisattama |
dṛṣṭvā bhavaṃtaṃ dīpyaṃtaṃ prasannāni manāṃsi naḥ || 42 ||
[Analyze grammar]

vadaṃti duritaprāṃtaṃ sādhoste puṇyadarśanāt |
upāyaṃ vada naḥ svāminyathā pāpakṣayo hi naḥ || 43 ||
[Analyze grammar]

jñāyate karuṇo'smābhirvipra vedārthavitprabho |
ārtānāṃ mārgamāṇānāṃ paścāttāpamupeyuṣām || 44 ||
[Analyze grammar]

mohādavāptapāpānāṃ tvamuddhartāsi niścitam |
nārada uvāca |
teṣāmiti vacaḥ śrutvā muniśarmā munistataḥ || 45 ||
[Analyze grammar]

idamāha vicāryeti karuṇāvaruṇālayaḥ |
muniśarmovāca |
yūyamajñānataḥ prāptapātakāḥ satyabhāṣiṇaḥ || 46 ||
[Analyze grammar]

anutāpayutāstasmādanugrāhyā mayādhunā |
śṛṇudhvaṃ me vacaḥ satyamūrdhvabāhurvadāmyaham || 47 ||
[Analyze grammar]

yanmayāṃgirasaḥ pūrvaṃ śrutaṃ munisamāgame |
dṛṣṭaṃ vedeṣu śāstreṣu śrutaṃ gurumukhāttathā || 48 ||
[Analyze grammar]

viṣṇunārādhitenādau svayamuktaṃ ca tattvataḥ |
na tṛptiraśanādanyā na gururjanakādapi || 49 ||
[Analyze grammar]

na pātramanyadviprebhyo na devaḥ keśavātparaḥ |
na gaṃgayā samaṃ tīrthaṃ na dānaṃ surabhīsamam || 50 ||
[Analyze grammar]

na gāyatryā samaṃ jāpyaṃ na dvādaśyāsamaṃ vratam |
na bhāryayā samaṃ mitraṃ na dharmo dayayā samaḥ || 51 ||
[Analyze grammar]

na svātaṃtryasamaṃ saukhyaṃ gārhasthyānnāśramo varaḥ |
na satyātparaācāro na saṃtoṣātparaṃ sukham || 52 ||
[Analyze grammar]

na mādhavasamo māso mahāpāpaharaḥ paraḥ |
vidhinānuṣṭhito bhaktyā madhusūdanavallabhaḥ || 53 ||
[Analyze grammar]

gaṃgādiṣu ca tīrtheṣu viśeṣeṇa sudurlabhaḥ |
prāyaścittāni sarvāṇi dvādaśābdamukhāni ca || 54 ||
[Analyze grammar]

tāvadgarjaṃti pāpāni yāvannāyāti mādhavaḥ |
vaiśākhamakhilaṃ māsaṃ yaḥ snāti haritatparaḥ || 55 ||
[Analyze grammar]

haripādasamudbhūte salile vimalāśayaḥ |
sa eva sarvapāpānāṃ haṃtā dṛṣṭastu pāpibhiḥ || 56 ||
[Analyze grammar]

nijapāpaughaniṣkṛtyai vaktavyaṃ tasya kinnaraiḥ || 57 ||
[Analyze grammar]

māse tu vai mādhavasaṃjñake'sminyaḥ snāti pāpaiḥ sa vimucyate hi |
meṣasthite saṃprati narmadāyāḥ śarmaprade vāriṇi vāritāghe || 58 ||
[Analyze grammar]

durlabhā hi mahānadyo mādhave māsi sarvaśaḥ |
tato'pi durlabhā gaṃgā revā ca yamunā tathā || 59 ||
[Analyze grammar]

etāsu tisṛṣu prāyaḥ prāpyaikāmapi sādaram |
yaḥ snāti mādhave māsi vipāpaḥ sa hariṃ vrajet || 60 ||
[Analyze grammar]

tasmādaho saha mayā sukṛtaikasāre vaiśākhamāsi ca bhavaṃta upetya revām |
majjaṃtu pātakakṛto munivṛṃdajuṣṭe revājale nikhilapāpabhayāpahatyai || 61 ||
[Analyze grammar]

evamuktāstataḥ sarve muditā muninā saha |
jagmuste pāpino revāṃ śaṃsaṃto'dbhutakāriṇīm || 62 ||
[Analyze grammar]

muniśarmā tato gacchaṃstaistathānugato naraiḥ |
dadarśa pathisaṃtrastānpiśācānaṣṭa bhīṣaṇān || 63 ||
[Analyze grammar]

kurvaṃto vividhāñchabdānbhramaṃto'pi tatastataḥ |
ūrddhvakeśorddhvaraktāṃśca kṛṣṇadaṃtakṛśodarān || 64 ||
[Analyze grammar]

araṇye kaṃṭakākrāṃte vṛkṣapānīyavarjite |
sammukhaṃ dhāvato dṛṣṭvā bhayasaṃvignamānasaḥ || 65 ||
[Analyze grammar]

namonārāyaṇāyeti rakṣarakṣeti cābravīt || 66 ||
[Analyze grammar]

nārāyaṇāyeti namobhidhānamākarṇya dharmaikanidhānamuccaiḥ |
bhavāṃtare te manasā piśācā yayurnijādṛṣṭavaśena labdhāḥ || 67 ||
[Analyze grammar]

vinayānvitamanaso muniśarmā vilokya tān |
uvāca madhurābhāṣī ke yūyaṃ vikṛtā narāḥ || 68 ||
[Analyze grammar]

kiṃ vā kena kṛtaṃ karma yena prāptā ca vaikṛtiḥ |
kathamevaṃ vidhāḥ sarve duḥkhino'tīva bhīṣaṇāḥ || 69 ||
[Analyze grammar]

pretā ūcuḥ |
kṣutpipāsārditā nityaṃ nānāduḥkhacayākulāḥ |
kṛtabuddhe hṛdi krūrā naṣṭasaṃjñā vicetasaḥ || 70 ||
[Analyze grammar]

na jānīmo diśaḥ kvāpi mūḍhā mānavaghātinaḥ |
tadetadduḥkhamākhyātametadevāsukhaṃ punaḥ || 71 ||
[Analyze grammar]

prabhātamiva saṃbhāti bhāskarodayadarśanāt |
śrutvā nārāyaṇetyuccairbhāṣitaṃ tava komalam || 72 ||
[Analyze grammar]

dṛṣṭvā ca darśanaṃ vipra śuddhabhāvaṃ gatā vayam |
darśanenaiva te vipra nāmaśravaṇato hareḥ || 73 ||
[Analyze grammar]

bhavāṃtaramanuprāptā vayaṃ prāptā dayālavaḥ |
vināśayatyapayaśo buddhiṃ viśadayatyapi || 74 ||
[Analyze grammar]

pratiṣṭhāpayati prāyo nṛṇāṃ vaiṣṇavadarśanam |
ahaṃ paryuṣito nāma sūcako'yaṃ dvitīyakaḥ || 75 ||
[Analyze grammar]

śīghrago rodhakaścānyaḥ paṃcamoyaṃ ca lekhakaḥ |
ṣaṣṭhoyamiti vāgduṣṭaḥ saptamoyaṃ vidaivataḥ || 76 ||
[Analyze grammar]

nityaṃyājanakaścāyamaṣṭamaḥ kaṣṭadāyakaḥ |
muniśarmovāca |
pretānāṃ karmajātānāṃ nāmāni bhavatāṃ kutaḥ || 77 ||
[Analyze grammar]

kiṃ tatkāraṇamuddiśya yena yūyaṃ sanāmakāḥ |
pretā ūcuḥ |
mayā svādu sadā bhuktaṃ dattaṃ paryuṣitaṃ dvije || 78 ||
[Analyze grammar]

ājye sati nirājyaṃ ca tena paryyuṣito'smyaham |
mithyāmithyāparacchidra marmmānveṣī svabhāvataḥ || 79 ||
[Analyze grammar]

sūcayāmāsa tenāsau sūcako'śucirāturaḥ |
śīghraṃ naśyati vipreṇa yācitaḥ kṣubhitena vai || 80 ||
[Analyze grammar]

etatkāraṇamuddiśya śīghrago dvijasattama |
gṛhopari sadā svādubhuktametena pāpinā || 81 ||
[Analyze grammar]

ekākinā kumanasā tenāsau rodhakaḥ smṛtaḥ |
maunenāpi sthito nityaṃ pādena likhate mahīm || 82 ||
[Analyze grammar]

asmākamapi pāpiṣṭho lekhako lokasaṃgataḥ |
guṇinoyaṃ guṇāndveṣṭi nirguṇe ca guṇajñatām || 83 ||
[Analyze grammar]

asaṃjñe jñānayogī ca vāgduṣṭosau tataḥ smṛtaḥ |
nāstikyabhāvādaniśaṃ pitṛdaivata mānavān || 84 ||
[Analyze grammar]

na manyate ca satkarma pāpastena vidaivataḥ |
sadā yācanako mithyā mithyādaurgatyadarśakaḥ || 85 ||
[Analyze grammar]

sabhūtodvejako lubdhastena yācanakastvayam |
ebhiḥ pūrvakṛtaiḥ pāpairbhuktvā narakayātanām || 86 ||
[Analyze grammar]

pretāste darśanādadya punarjātāḥ sma susthitāḥ |
etatte sarvamākhyātamātmavṛttāṃtasaṃbhavam || 87 ||
[Analyze grammar]

praśnaṃ ca yadi te śraddhā pṛcchānyatkathayāmi te |
brāhmaṇa uvāca |
ye jīvā bhuvi tiṣṭhaṃti sarvaāhāramūlakāḥ || 88 ||
[Analyze grammar]

yuṣmākamapi āhāraṃ śrotumicchāmi tattvataḥ |
pretā ūcuḥ |
śṛṇuṣvāhāramasmākaṃ sarvasatvavigarhitam || 89 ||
[Analyze grammar]

yaṃ śrutvā niṃdase brahmanbhūyobhūyaśca nityaśaḥ |
śleṣmamūtrapurīṣeṇa yoṣidaṃgamalena ca || 90 ||
[Analyze grammar]

gṛhāṇityaktaśaucāni tāni bhuṃjaṃti tatra vai |
strīdagdhāni prakīrṇāni prakīrṇāyaskarāṇi ca || 91 ||
[Analyze grammar]

kutsitāni malenāpi pretā vai tatra bhuṃjate |
mādhavaṃ yatra nārcaṃti strījitāni gṛhāṇi ca || 92 ||
[Analyze grammar]

dayā kṣāṃtivihīnāni pretāstatraiva bhuṃjate |
yatrābhadrā gṛhe vācaḥ śaucahīnāśca yoṣitaḥ || 93 ||
[Analyze grammar]

kalaho yatra satataṃ pretāste tatra bhuṃjate |
na yatra jāmayo gehe pūjyaṃte na varāḥ striyaḥ || 94 ||
[Analyze grammar]

yatra durjanasaṃsargastatra bhokṣyāmahe vayam |
na yatra harisevā vā na kathā yatra vaiṣṇavī || 95 ||
[Analyze grammar]

na yatra vaiṣṇavī prītiḥ pretā vai tatra bhuṃjate |
yeṣāmevaṃ gṛhe prītā bhuṃjate te'pi satvaram || 96 ||
[Analyze grammar]

pretā bhavaṃti pāpena nijavaṃśavināśakāḥ |
tasya me jāyate brahmanvadato bhojanaṃ nijam || 97 ||
[Analyze grammar]

asmātpāpataraṃ cānyatkiṃcidvaktuṃ na śakyate |
nirviṇṇaḥ pretabhāvena pṛcchāmi tvāṃ dṛḍhavratam || 98 ||
[Analyze grammar]

yathā na jāyate preto muktiḥ pretatvato yathā |
brāhmaṇa uvāca |
ekādaśyādibhiḥ puṇyairvratairacyutakīrtanaiḥ || 99 ||
[Analyze grammar]

devatātithipūjābhirgurupūjādibhistathā |
ācāraiḥ sādhucaritaiḥ śrutismṛtyuditairdinaiḥ || 100 ||
[Analyze grammar]

evaṃ śrāddhakriyādānairyathāvidhivinirmitaiḥ |
dayādānadamakṣāṃtiśīlaśiṣṭābhivādanaiḥ || 101 ||
[Analyze grammar]

ityevamādibhirdharmaiḥ pretā na syuḥ kule'pi vai |
govipratīrthāmaraparvatāgrya nadīnadāśvatthatarūnanekaśaḥ || 102 ||
[Analyze grammar]

yo vaṃdate baṃdhujane vinītaḥ preto na loke bhavatīha nūnam |
kramādarccayate yukto viśeṣādapi mānavaḥ || 103 ||
[Analyze grammar]

gaṃgādipuṇyatīrtheṣu tasya puṇyamanaṃtakam |
nāhaṃ varṣasahasreṣu vaktuṃ śaktaḥ svayaṃ vibhuḥ || 104 ||
[Analyze grammar]

darśanādeva tasyāpi muktaḥ pretatvato bhavet |
ūrjamūrjasvalaṃ māsamatha dāmodarapriyam || 105 ||
[Analyze grammar]

tapasāmuttamaṃ māsaṃ tapo mādhavavallabham |
vaiśākhaṃ mādhavaṃ māsaṃ madhusūdanadaivatam || 106 ||
[Analyze grammar]

uttamaṃ sarvamāsānāṃ yamekaṃ munayo viduḥ |
yenaiva sādhanena syātsarvaṃ kṛtyaṃ hi sādhitam || 107 ||
[Analyze grammar]

brahmavidyāmatābhyeti sā lakṣmīrviśvakāriṇī |
tasyā vāso yato māso mādhavo'sau tataḥ smṛtaḥ || 108 ||
[Analyze grammar]

na mādhavasamo devo yathā deveṣu niścitam |
tathā māseṣu sarveṣu na māso mādhavapriyaḥ || 109 ||
[Analyze grammar]

tasya mādhavamāsasya māhātmyamapi bhaktitaḥ |
śrutvā vimucyate pretayonitaḥ kiṃ vidhānataḥ || 110 ||
[Analyze grammar]

satāṃ saṃbhāṣaṇādeva puṇyatīrthaniṣevaṇāt |
nārāyaṇeti paṭhanāttannāmaśravaṇādapi || 111 ||
[Analyze grammar]

mucyate pātakaiḥ sarvairjano bhaktiparāyaṇaḥ |
yatiṣye tadahaṃ pretā bhavatāmapi muktaye || 112 ||
[Analyze grammar]

paropakārajaṃ puṇyaṃ yato na syānmakhairapi |
pretā yāmi tataḥ snātuṃ revāvāriṇi mādhave || 113 ||
[Analyze grammar]

māsi meṣasthite bhānāvetairanugato naraiḥ |
paṃcaiva te punarmohājjātapātakasaṃcayāḥ || 114 ||
[Analyze grammar]

snātumāyāṃti vacasā mamaiva karuṇāvataḥ || 115 ||
[Analyze grammar]

tāvadbhavaṃtastu nideśato me tiṣṭhaṃtu tatraiva vane viśokāḥ |
śrīnarmadāvāriṇi yāvadeva gatvā nijasnānavidhiṃ vihāya || 116 ||
[Analyze grammar]

nirmāya puruṣānapi nāma tasmātkuśasvarūpāniha narmadā ke |
vidhānato mādhavamāsi dīnānnimajjayāmīti dayā nibaddhaḥ || 117 ||
[Analyze grammar]

evaṃ dinatrayeṇaiva muktirvaḥ pretayonitaḥ |
na darbhabaṭukasnānamātreṇaiva na saṃśayaḥ || 118 ||
[Analyze grammar]

nārada uvāca |
evamuktastatastaistu pratītairapi pūjitaḥ |
muniśarmā yayāvetairanuyātastu paṃcabhiḥ || 119 ||
[Analyze grammar]

tatra gatvā tataḥ prātaḥ snātvā kṛtvā tathāvidhim |
snāpayāmāsa tānpretānnāmato darbhanirmitān || 120 ||
[Analyze grammar]

smṛtāśca muninā tīrthe snāpitā nāmatastathā |
pretāḥ puṇyavatā tena sadyo muktā divaṃ yayuḥ || 121 ||
[Analyze grammar]

te pāpinaḥ paṃca yadaiva revājale nimagnā vacasaiva tasya |
śrīmādhave māsi vivarṇadehāḥ sadyaḥ suvarṇaikaruco babhūvuḥ || 122 ||
[Analyze grammar]

pāpapraśamanaṃ stotraṃ śrāvitā muniśarmaṇā |
samakṣaṃ sarvalokānāṃ jātāste varakāṃtayaḥ || 123 ||
[Analyze grammar]

tatrasthā mānavāstāṃstu virajānsnānamātrataḥ |
na spṛśaṃti ca rājeṃdra pāpisaṃsargaśaṃkathā || 124 ||
[Analyze grammar]

muniśarmānurodhena tato dharmapramāṇataḥ |
sadyo divyābhavadvāṇī yadete vigatainasaḥ || 125 ||
[Analyze grammar]

snātānāṃ mādhavemāsi mukuṃdahṛdayātmanām |
pāpapraśamanaṃ stotraṃ śṛṇvatāmiha sādaram || 126 ||
[Analyze grammar]

citraṃ kimatra yā śuddhirjāyate pāpasaṃcayāt |
sarveṣāmeva pāpānāṃ prāyaścittamidaṃ param || 127 ||
[Analyze grammar]

yatprātarmādhave māsi bhaktyā tīrthe'vagāhanam |
yataḥ pretāstu te pāpāḥ snāpitā nāmamātrataḥ || 128 ||
[Analyze grammar]

smṛtāḥ puṇyavatā tena mocitā muniśarmaṇā || 129 ||
[Analyze grammar]

ityevamākarṇya giraṃ nabhaḥsthāmatyadbhutāmāśu tato manuṣyāḥ |
śaśaṃsuretānapi paṃcapuṇyānvaiśākhamāsaṃ ca muniṃ ca revām || 130 ||
[Analyze grammar]

atha cākarṇya bhūpālaḥ stavaṃ duritanāśanam |
yadākarṇya naro bhaktyā mucyate pāparāśibhiḥ || 131 ||
[Analyze grammar]

yasya śravaṇamātreṇa pāpinaḥ śuddhimāgatāḥ |
anye'pi bahavo muktāḥ pāpādajñānasaṃbhavāt || 132 ||
[Analyze grammar]

paradāra paradravya jīvahiṃsādike yadā |
pravartate nṛṇāṃ cittaṃ prāyaścittaṃ stutistadā || 133 ||
[Analyze grammar]

viṣṇave viṣṇave nityaṃ viṣṇave viṣṇave namaḥ |
namāmi viṣṇuṃ cittasthamahaṃkāragataṃ harim || 134 ||
[Analyze grammar]

cittasthamīśamavyaktamanaṃtamaparājitam |
viṣṇumīḍyamaśeṣāṇāmanādinidhanaṃ vibhum || 135 ||
[Analyze grammar]

viṣṇuścittagato yanme viṣṇurbuddhigataśca yat |
yaccāhaṃkārako viṣṇuryo viṣṇurmayi saṃsthitaḥ || 136 ||
[Analyze grammar]

karoti kartṛbhūto'sau sthāvarasya carasya ca |
tatpāpaṃ nāśamāyāti tasminneva hi ciṃtite || 137 ||
[Analyze grammar]

dhyāto harati yatpāpaṃ svapne dṛṣṭastu bhāvanāt |
tamupeṃdraṃmahaṃ viṣṇuṃ praṇamāmi natipriyam || 138 ||
[Analyze grammar]

jagatyasminnirālaṃbe madhusūdanamacyutam |
hastāvalaṃbanaṃ stotraṃ viṣṇuṃ vaṃde parātparam || 139 ||
[Analyze grammar]

sarveśvareśvaravibho paramātmannadhokṣaja |
hṛṣīkeśa hṛṣīkeśa hṛṣīkeśa namostu te || 140 ||
[Analyze grammar]

nṛsiṃhānaṃta goviṃda bhūtabhāvana keśava |
duruktaṃ duṣkṛtaṃ dhyātaṃ śama pāpaṃ namostu te || 141 ||
[Analyze grammar]

yanmayā ciṃtitaṃ duṣṭaṃ svacittavaśavartinā |
akāryyamaghamatyugraṃ tacchamaṃ naya keśava || 142 ||
[Analyze grammar]

brahmaṇyadeva goviṃda paramārthaparāyaṇa |
jagannātha jagaddhātaḥ pāpaṃ śamaya me'cyuta || 143 ||
[Analyze grammar]

yaccāparāhṇe sāyāhne madhyāhne ca tathā niśi |
kāyena manasā vācā kṛtaṃ pāpamajānatā || 144 ||
[Analyze grammar]

jānatā ca hṛṣīkeśa puṃḍarīkākṣa mādhava |
nāmatrayoccāraṇataḥ sarve yāṃtu mama kṣayam || 145 ||
[Analyze grammar]

śārīraṃ me hṛṣīkeśa puṃḍarīkākṣa mānasam |
pāpaṃ praśamamāyātu vākkṛtaṃ mama mādhava || 146 ||
[Analyze grammar]

yadbhuṃjānaḥ pibaṃstiṣṭhansvapañjāgradyadāsthitaḥ |
akārṣaṃ pāpamarthārthaṃ kāyena manasā girā || 147 ||
[Analyze grammar]

mahadalpamapi prāyo duryoni narakāvaham |
tatpāpaṃ praśamaṃ yātu vāsudevasya kīrtanāt || 148 ||
[Analyze grammar]

paraṃ brahma paraṃ dhāma pavitraṃ paramaṃ ca yat |
tasminprakīrtite viṣṇau yatpāpaṃ tatpraṇaśyatu || 149 ||
[Analyze grammar]

yatprāpya na nivarttaṃte gaṃdhasparśādivarjitāḥ |
sūrayastatpadaṃ viṣṇostatsarvaṃ śamayatvayam || 150 ||
[Analyze grammar]

pāpapraśamanaṃ stotraṃ yaḥ paṭhecchṛṇuyānnaraḥ |
śārīrairmānasairvāgjaiḥ kṛtaiḥ pāpaiḥ sa mucyate || 151 ||
[Analyze grammar]

muktaḥ pāpagrahādibhyo yāti viṣṇoḥ paraṃ padam |
tasmātpāpe kṛtaṃ japyaṃ stotraṃ sarvāghamardanam || 152 ||
[Analyze grammar]

prāyaścittamaghaughānāṃ paṭhitavyaṃ narottamaiḥ |
prāyaścittaiḥ stotravarairvratairnaśyati pātakam || 153 ||
[Analyze grammar]

tataḥ kāryāṇi saṃsiddhyai tāni vai bhuktimuktaye |
pūrvajanmārjitaṃ pāpamaihikaṃ ca nareśvara || 154 ||
[Analyze grammar]

stavasya śravaṇādasya sadya eva vilīyate |
pāpadrumakuṭhāro'yaṃ pāpeṃdhanadavānalaḥ || 155 ||
[Analyze grammar]

pāparāśitamaḥ stoma bhānureṣa stavo nṛpa |
mayā prakāśitastubhyaṃ tathā lokānukaṃpayā || 156 ||
[Analyze grammar]

stavo yo'yaṃ mayā prāpto rahasyaṃ piturādarāt |
itihāsamimaṃ puṇyaṃ yaḥ śṛṇoti narādhipa || 157 ||
[Analyze grammar]

tasyāpi puṇyamāhātmyaṃ vaktuṃ śaktaḥ svayaṃ hariḥ |
svasti testu mahārāja gaṃgāyāmatha satvaram || 158 ||
[Analyze grammar]

snātuṃ yāmi samāyāto māso'yaṃ mādhavo mahān || 159 ||
[Analyze grammar]

iti śrīpadmapurāṇe pātālakhaṃḍe nāradāṃbarīṣasaṃvāde vaiśākhamāhātmye preto |
pākhyāne pāpapraśamanaṃnāma caturnavatitamo'dhyāyaḥ || 94 ||
[Analyze grammar]