Chapter 92

[English text for this chapter is available]

sūta uvāca |
iti tasya vacaḥ śrutvā nāradasya sa bhūpatiḥ |
praṇamya vismitaḥ prāhaciṃtayanmanasā harim || 1 ||
[Analyze grammar]

aṃbarīṣa uvāca |
kathametadvimuhyāmaḥ svalpāyāsena yanmune |
śūdraḥ pāpasamācāro lebhe brāhmaṇyamuttamam || 2 ||
[Analyze grammar]

brāhmaṇyaṃ durllabhaṃ tāta sukṛtairvividhairapi |
kathaṃ mādhavamāsasya snānenaivāpa so'dhamaḥ || 3 ||
[Analyze grammar]

na yajñadānairna tapobhirugrairna puṇyasaṃjñairaparairapīśa |
asmādṛśo bhūpatayo'rthavaṃto na te labhaṃte'vanidaivatatvam || 4 ||
[Analyze grammar]

sa gādhisūnurvividhaṃ tapo'pi ciraṃvidhāyāniśameva ghoram |
kṛcchreṇa lebhe śatavarṣapūrṇairaho kathaṃcidbahubhiḥ prayatnaiḥ || 5 ||
[Analyze grammar]

kathaṃ sa varṇādhama eṣa pāpaḥ svadharmahīno dhanavāna dātā |
puṇyādanāyāsakṛtādamuṣmādalpādihāvāpa sa rāmatattvam || 6 ||
[Analyze grammar]

nārada uvāca |
satyamuktaṃ tvayā rājanbrāhmaṇyamatidurllabham |
tathāpi gatayaḥ sūkṣmā durjñeyā dharmatattvataḥ || 7 ||
[Analyze grammar]

vicitrāṇi ca karmāṇi vicitrā bhūtabhāvanā |
vicitrāṇi ca bhūtāni vicitrāḥ karmaśaktayaḥ || 8 ||
[Analyze grammar]

kadācitsukṛtaṃ karma kūṭasthaṃ yadavāpi tam |
kenacitkarmaṇā bhūpa śubhena parivardhate || 9 ||
[Analyze grammar]

phalaṃ dadāti sumahattasminnapi ca janmani |
dharmo gahanasūkṣmo'yaṃ nīyate na yathā tathā || 10 ||
[Analyze grammar]

na tasya phaladānasya śrūyate kālaniścayaḥ |
yatkiṃcitsukṛtaṃ karmacchannaṃ pāpāṃtarairapi || 11 ||
[Analyze grammar]

tadāgatya kutaḥ kvāpi suphalaṃ ca prayacchati |
kṛtasya neha nāśosti puṇyasya duritasya ca || 12 ||
[Analyze grammar]

tathāpi bahubhiḥ puṇyairduritaṃ yāti dāruṇam |
yaduktaṃ bhavatā rājannāyāsādhikyato bhavet || 13 ||
[Analyze grammar]

tatphalaṃ tatra tatrāpi śṛṇu satyaṃ mayoditam |
anāyāsamahāyāsau yadyalpatva mahattvayoḥ || 14 ||
[Analyze grammar]

mahāvratāstataste syuḥ satataṃ karmakādayaḥ |
siṃhavyāghrādimūtrādau prayāsā bahulāstataḥ || 15 ||
[Analyze grammar]

paṃcagavyapraśastatvaṃ vratamadhye tato bhavet |
iti kartavyabāhulyaṃ mahattvaṃ cettadalpatā || 16 ||
[Analyze grammar]

jalāgnyādipraveśasya prasajyeta vratāṃtarāt |
idamalpaṃ mahattvaṃ taditi naiva niyāmakaḥ || 17 ||
[Analyze grammar]

phalaṃ yathoditaṃ śāstre tadeva syānmahodayam |
yathālpanāśo mahatā mahannāśastathālpataḥ || 18 ||
[Analyze grammar]

kiṃtvalpavisphuliṃgena tṛṇanāśaḥ pradṛśyate |
ajāmilo'pi bhūpāla dāsyāḥ patiriti smṛtaḥ || 19 ||
[Analyze grammar]

dharmapatnīparityāgī nityaṃ pāpapathisthitaḥ |
mriyamāṇaḥ sutāhvānaṃ cakre nārāyaṇeti ca || 20 ||
[Analyze grammar]

tathā yannāmagrahaṇātpadaṃ lebhe sudurllabham |
anicchayāpi dahati spṛṣṭo hutavaho yathā || 21 ||
[Analyze grammar]

tathā dahati goviṃdanāmavyājādapīritam || 22 ||
[Analyze grammar]

hatyāyutaṃ śapanahā sahasramugraṃ gurvaṃganākoṭiniṣevaṇaṃ ca |
steyānyaśeṣāṇi hareḥ priyeṇa goviṃdanāmnā nihatāni sadyaḥ || 23 ||
[Analyze grammar]

viṣṇubhaktimayaṃ vīra yatkiṃcitkriyate'lpakam |
sukṛtaṃ sādhu viduṣā tadakṣayaphalaṃ bhavet || 24 ||
[Analyze grammar]

saṃdeho na ca kartavyo mādhave māsi mādhavam |
samārādhya jano bhaktyā tattadvāṃchitamāpnuyāt || 25 ||
[Analyze grammar]

apatyaṃ draviṇaṃ dārā dharā harmyaṃ hayā gajāḥ |
sukhāni svargamokṣau ca na dūre haribhaktitaḥ || 26 ||
[Analyze grammar]

evaṃ śāstroktavidhinā svalpenāpi na saṃśayaḥ |
pāpasya mahato'pi syātkṣayaḥ samyagvidhānataḥ || 27 ||
[Analyze grammar]

phalādhikyaṃ bhavedvidvannādhikyādbhāvakarmaṇoḥ |
sūkṣmā dharmasya gatayo durjñeyā vibudhairapi || 28 ||
[Analyze grammar]

priyo mādhavamāso'yaṃ mādhavasya mahātmanaḥ |
eko'pi triṣu lokeṣu samagrepsitadāyakaḥ || 29 ||
[Analyze grammar]

puṇyena gāṃgena jalena kāle deśe budhaḥ snānaparaḥ kathaṃcit |
ājanmano bhāvahato'pi dātā na śudhyatītyeva mataṃ mamaitat || 30 ||
[Analyze grammar]

prajvālya vahniṃ ghṛtatailasiktaṃ pradakṣiṇāvartaśikhaṃ svakāle |
praviśya dagdhaḥ kila bhāvaduṣṭo na svargamāpnoti phalaṃ na cānyat || 31 ||
[Analyze grammar]

gaṃgāditīrtheṣu vasaṃti devā devālaye yakṣagaṇāśca nityam |
vināśanaṃ yāṃti kṛtopavāsā bhāvojjhitāstena phalaṃ labhaṃte || 32 ||
[Analyze grammar]

bhāvaṃ tato hṛtkamale nidhāya śrīmādhavaṃ mādhavamāsi bhaktyā |
yajeta yaḥ snānaparo viśuddhaḥ puṇyaṃ na śaktā vayamasya vaktum || 33 ||
[Analyze grammar]

ihārthe'pi purāvṛttamākarṇaya mahīpate |
vicitraṃ kathayiṣyāmi phalaṃ kimapi karmaṇām || 34 ||
[Analyze grammar]

tasya mādhavamāsasya prasādānmādhavasya ca |
yathāpi brāhmaṇī kācitsvairiṇyāpa śubhaṃ phalam || 35 ||
[Analyze grammar]

divodāseti vikhyātaḥ purā kāṃtīśvaro'bhavat |
tasyāpatyaṃ mahāratnaṃ nārīṇāmuttamaṃ sadā || 36 ||
[Analyze grammar]

guṇarūpasamāyuktā suśīlā cārumaṃgalā |
divyādevīti vikhyātā rūpeṇāpratimā bhuvi || 37 ||
[Analyze grammar]

pitrā tvālokitā sā tu rūpalāvaṇyasaṃyutā |
sa tāṃ dṛṣṭvā divodāso divyāṃ devīṃ sutāṃ tadā || 38 ||
[Analyze grammar]

kasmai ca dīyate kanyā suvarāya mahātmane |
iti ciṃtāparo bhūtvā samālokya narottamaḥ || 39 ||
[Analyze grammar]

rūpadeśasya rājānaṃ samyagjñātvā mahīpatiḥ |
citrasenaṃ mahātmānaṃ samāhūya tato nṛpaḥ || 40 ||
[Analyze grammar]

kanyāṃ dadau divodāsaścitrasenāya dhīmate |
tasyā vivāhakālasya saṃprāpte samaye nṛpa || 41 ||
[Analyze grammar]

mṛto'sau citrasenastu kāladharmeṇa vai kila |
divodāsaśca dharmātmā ciṃtayāmāsa bhūpatiḥ || 42 ||
[Analyze grammar]

brāhmaṇāṃśca samāhūya papraccha nṛpanaṃdana |
asyā vivāhakāle tu citraseno divaṃ gataḥ || 43 ||
[Analyze grammar]

asyāstu kīdṛśaṃ karma bhaviṣyati bruvaṃtu me |
brāhmaṇa uvāca |
vivāho jāyate rājankanyāyāstu vidhānataḥ || 44 ||
[Analyze grammar]

patirmṛtyuṃ prayātyeva yo vā tyāgaṃ karoti ca |
mahādhivyādhinā bhītastyāgaṃ kṛtvā prayāti ca || 45 ||
[Analyze grammar]

pravrājito bhavedrājandharmaśāstreṣu dṛśyate |
tasyāṃ rajasvalāyāṃ ca anyaḥ patirvidhīyate || 46 ||
[Analyze grammar]

vivāhaṃ tu pradhānena pitā kuryānna saṃśayaḥ |
evaṃ rājansamādiṣṭaṃ dharmaśāstre śubhairjanaiḥ || 47 ||
[Analyze grammar]

vivāhaḥ kriyatāmasyā ityūcuste dvijottamāḥ |
divodāsaśca dharmātmā brāhmaṇaistu praṇoditaḥ || 48 ||
[Analyze grammar]

vivāhārthaṃ mahārāja mānasaṃ kṛtavānnṛpa |
punardattā pradānena divyādevī nṛpottama || 49 ||
[Analyze grammar]

puṣpasenāya puṇyāya tasmai rājñe mahātmane |
mṛtyudharmaṃ gato rājā vivāhasamaye'pi saḥ || 50 ||
[Analyze grammar]

yadā yadā mahābhāgo divyādevyāśca bhūpatiḥ |
karoti sa pitodyogaṃ vivāhasyātiduḥkhitaḥ || 51 ||
[Analyze grammar]

bhartāpi mriyate kāle prāptalagnastadā tadā |
ekaviṃśatibhartāraḥ kālekāle mṛtāstataḥ || 52 ||
[Analyze grammar]

tato rājā mahāduḥkhī saṃjātaḥ khyātavikramaḥ |
samālokya tamāhūya maṃtribhiḥ saha niścalaḥ || 53 ||
[Analyze grammar]

svayaṃvare mahābuddhiṃ cakāra pṛthivīpatiḥ |
atha tena samāhūtā rājāno vividhā nṛpāḥ || 54 ||
[Analyze grammar]

svayaṃvarārthaṃ vai tasyā bahavo dharmatatparāḥ |
tasyāstu rūpasaṃkṣubdhā mṛtyunā preṣitā nṛpāḥ || 55 ||
[Analyze grammar]

saṃgrāmaṃ cakrire mūḍhā mṛtāste'tha parasparam |
evaṃ teṣāṃ kṣayo jātaḥ kṣattriyāṇāṃ nareśvara || 56 ||
[Analyze grammar]

divyādevī ca duḥkhārtā ruroda karuṇaṃ tataḥ |
bālāmālokya tāṃ rājā rudaṃtīṃ cātiduḥkhitām || 57 ||
[Analyze grammar]

purodhasaṃ ca dharmajñaṃ jñānavaṃtaṃ tapasvinam |
jātūkarṇaṃ praṇamyādau vinayānvitakaṃdharaḥ || 58 ||
[Analyze grammar]

divodāsa uvāca |
kathayasva prasādena kimetasyāhi pātakam |
divyādevyāstu me putryā yadetacceṣṭitaṃ kṛtam || 59 ||
[Analyze grammar]

jātūkarṇa uvāca |
tasyāstu ceṣṭitaṃ vīra divyādevyā vadāmyaham |
pūrvajanmakṛtaṃ sarvaṃ tanme nigadataḥ śṛṇu || 60 ||
[Analyze grammar]

āste vārāṇasī puṇyā nagarī pāpanāśinī |
tasyāmāste mahāprājñaḥ suvīro nāma nāmataḥ || 61 ||
[Analyze grammar]

vaiśyajātyāṃ samutpanno dhanadhānyasamākulaḥ |
tasya bhāryā mahāprājña citrānāma suvismṛtā || 62 ||
[Analyze grammar]

kulācāraṃ parityajya durācāreṇa vartate |
na manyate hi bhartāraṃ raudrakṛtye ca vartate || 63 ||
[Analyze grammar]

puṇyakāryavihīnā tu pāpaṃ carati durmatiḥ |
bhartāraṃ bhartsate nityaṃ svairiṇī kalahapriyā || 64 ||
[Analyze grammar]

nityaṃ paragṛhe vāsa niratā bhramate'dhikam |
paracchidraṃ samāpaśyedduṣṭābhūteṣu sarvadā || 65 ||
[Analyze grammar]

sādhuniṃdāratā pāpā bahuhāsyakarī sadā |
kusaṃgatiratā vācā durācārajanapriyā || 66 ||
[Analyze grammar]

dhūrtādharmajanadveṣakarī cānṛtabhāṣiṇī |
vijñāyaivaṃ suvīro'syā upayeme tato'parām || 67 ||
[Analyze grammar]

tayā navīnayā vīro bhāryayā sahito'niśam |
yathāsukhaṃ sa bubhuje viṣayānmanasaḥ priyān || 68 ||
[Analyze grammar]

dharmācāreṇa puṇyātmā satyapuṇyamatiḥ sadā |
satyayāmitayā satyā sumatyārādhito babhau || 69 ||
[Analyze grammar]

nirastā tena sā citrā vicitrā varavarṇinī |
svairiṇī guṇasaṃsargadharmavidveṣiṇī tataḥ || 70 ||
[Analyze grammar]

bhramate jārasaṃyuktā muktācārā gatatrapā |
sā pāparatasaṃyuktā raktā dūtī vikarmaṇi || 71 ||
[Analyze grammar]

kuśalā kuṭṭinīkarma kalāsu tvanyayoṣitām |
gṛhabhaṃgamasau cakre vakreṇa manasā hitā || 72 ||
[Analyze grammar]

sādhvīṃ nārīṃ samāhūya pāpavākyaiśca nodayet |
narmalobhakathākeli pratyayotpattihetubhiḥ || 73 ||
[Analyze grammar]

manāṃsi cālayetpāpā puruṣāṇāṃ ca yoṣitām |
sādhūnāṃ sā striyo bhavyāḥ parebhyaḥ pratipādayet || 74 ||
[Analyze grammar]

kārayatyeva kapaṭaṃ dharmagrāmavivarjanam |
evaṃ varṣaśataṃ bhuktvā paścādveśyāvidhisthitā || 75 ||
[Analyze grammar]

kālena nidhanaṃ prāptā satataṃ pāpaniścayā |
jātā tava gṛhe putrī divyādevīti sā sutā || 76 ||
[Analyze grammar]

suṃdarī rūpasaṃpannā purā dṛṣṭena noditā |
nārada uvāca |
iti tasya vacaḥ śrutvā divodāso'tivismitaḥ |
uvāca rājā madhuraṃ jātūkarṇaṃ muniṃ vacaḥ || 77 ||
[Analyze grammar]

divodāsa uvāca |
yadīdṛśī sā duritapracārā sadā durācāraratā prayātā |
kathaṃ mamaśrīpatidaivatasya mahākulīnasya sutānurūpā || 78 ||
[Analyze grammar]

sudurllabhaṃ rājakule viśāle lebhe ca sā śrīmatijanmadhanyam |
puṇyena kenāpi mune pavitre citrā vicitreṇa ca karmakartrī || 79 ||
[Analyze grammar]

nārada uvāca |
iti tasya vacaḥ śrutvā bhūmipasya munistataḥ |
kiñcidvihasya tu prājño vacaḥ sūnṛtamabravīt || 80 ||
[Analyze grammar]

jātūkarṇa uvāca |
citrā vicitrasuratairatha vaṃcayaṃtī pracchannakāmukaviṭāndhanadhīvihīnān |
veśyā babhūva viṣapānamitaścaritvā kālena nāganagare mahati prasiddhe || 81 ||
[Analyze grammar]

ko'pi tatra samāyātaḥ sāyaṃ vipraḥ samārditaḥ |
ardamāno viśuddhātmā nagare nāgasaṃjñake || 82 ||
[Analyze grammar]

apaśyannaparaṃ sthānaṃ mūḍhaścitrāgṛhaṃ yayau |
tayā saṃmohito'tyarthaṃ veśyayā dṛṣṭiyogataḥ || 83 ||
[Analyze grammar]

pādasaṃvāhanasnānatāṃbūlāsanabhojanaiḥ |
vilāsaistoṣitaḥ so'pi khedahīno'bhavattadā || 84 ||
[Analyze grammar]

tato vicitraiḥ suratopacārairadṛṣṭabuddhyaiva tayā sa vipraḥ |
saṃsevito'yaṃ rajanīmaśeṣāmavāhayadbhāvaviśeṣalubdhaḥ || 85 ||
[Analyze grammar]

prātaḥ prayāṇābhimukhaḥ kathaṃciduvāca citrāmanuraktacittaḥ |
saṃtoṣitaḥ svaiścaritaiḥ svakṛtyairvacastayācaikadhiyā tadānīm || 86 ||
[Analyze grammar]

brāhmaṇa uvāca |
kāryaḥ pratyupakāraste toṣitena mayā priye |
svadṛḍhaṃ ca nijaṃ duḥkhaṃ kathayāmyaviśeṣataḥ || 87 ||
[Analyze grammar]

purā kathāṃ hi vadatāṃ viprāṇāṃ narmadātaṭe |
śubhaṃ yatsarvapāpaghnaṃ tadākarṇaya sādaram || 88 ||
[Analyze grammar]

yo dinatrayamapi prayatnataḥ snāti meṣaupayādi bhāskare |
bhāskare'nudita eva mādhave māsi so'ghanicayairvimucyate || 89 ||
[Analyze grammar]

saṃpūrṇamapi vaiśākhe yo bahiḥ snānamācaret |
vidhinā mādhavaṃ devamarcayetsopi pāpahā || 90 ||
[Analyze grammar]

puṇyatīrthe viśeṣeṇa snānadānakriyādibhiḥ |
mahāpāpairvimucyeta mānavo māsi mādhave || 91 ||
[Analyze grammar]

tāvanmahāpāpacayaḥ śarīre śarīriṇastiṣṭhati nirviśaṃkaḥ |
yāvanmudā coṣasi meṣarāśimupāgate majjati no dineśe || 92 ||
[Analyze grammar]

evamākarṇitasteṣāṃ viprāṇāṃ vadatāṃ mayā |
anekaduritāṃbhodhi taraṇe pota uttamaḥ || 93 ||
[Analyze grammar]

adūre śivadehā ca vartate'sau saridvarā |
tatra snātuṃ gamiṣye'haṃ tadāghaughavadhāya ca || 94 ||
[Analyze grammar]

yadi te rocate kāṃte viraktaṃ vāmano bhavet |
tanmayā tvaṃ samāgaccha vaiśākhasnānahetave || 95 ||
[Analyze grammar]

anityaṃ jīvitamidaṃ yauvanaṃ cātisuṃdaram |
heturnarakavāsasya durvāraśca sa no bhavet || 96 ||
[Analyze grammar]

ārādhitastvayāhaṃ ca pātito duritārṇave |
mahatāmapi yatsatyaṃ duṣṭasthitaśarīriṇām || 97 ||
[Analyze grammar]

kimatra bahunoktena na vilaṃbocitaḥ kṣaṇaḥ |
uddhariṣye'pi bhavatīṃ viraktiryadi te hṛdi || 98 ||
[Analyze grammar]

citrovāca |
svāminna dṛṣṭayogena tava saṃgatidharmataḥ |
dhruvaṃ viraktaṃ macceto niṃdyametadbhavaṃ prati || 99 ||
[Analyze grammar]

nūnamevaṃ mayā śāstre śrutaṃ yatsādhusaṃgamaḥ |
aciṃtyāyai namastasyai tato niyatāyai punaḥ || 100 ||
[Analyze grammar]

jātūkarṇa uvāca |
iti bhāṣyatatastena samaṃ citrā yayau tadā |
vidyamānaṃ dhanaṃ kiṃcidādāya muninoditā || 101 ||
[Analyze grammar]

tataḥ paraṃ so'pi punardvijanmā vaiśākhamāse śivadehadeham |
avāpa sasnau ca dineśamasyai snānāya sadyo'tha dadau dayāluḥ || 102 ||
[Analyze grammar]

hṛdayālurayaṃ vipraḥ snāpayāmāsa tāṃ tadā |
yathocitavidhānena citrāmuccitrabhāṣiṇīm || 103 ||
[Analyze grammar]

vaiśākhasnānamāhātmyaṃ tatra śuśrāva sā mudā |
paṭhamāneṣu vipreṣu purāṇāni pṛthakpṛthak || 104 ||
[Analyze grammar]

yasya śravaṇamātreṇa kṣīyate duritāṃdhakaḥ |
yathā sūryodaye naiva timiraughaḥ praṇaśyati || 105 ||
[Analyze grammar]

sā śive śivatanūjale punaḥ snānato'janikare vidhānataḥ |
snānato vimalamānasodayā sūryakāṃtiriva nirmalā babhau || 106 ||
[Analyze grammar]

tatra majjaṃti revāyāṃ sevāyāṃ niratā hareḥ |
vaiśākhe vividhā lokā lokānaṃtyamabhīpsavaḥ || 107 ||
[Analyze grammar]

ye narmadāyāmiha śarmadāyāmaśuddhakāyānapi śodhayaṃti |
viśeṣato mādhavamāsi martyā bhavaṃti martyādhipalokalīlāḥ || 108 ||
[Analyze grammar]

ājanmano'ghasmaraṇena revā nihaṃti dṛṣṭā daśajanmajaṃ punaḥ |
snātā kathaṃ cicchatayonijātaṃ saṃsevitā yacchati rudralokam || 109 ||
[Analyze grammar]

sakalaṃ mādhavaṃ māsaṃ sā citrā narmadājale |
sasnau kiṃciddadau dānaṃ śaktyā vipreṣu nityaśaḥ || 110 ||
[Analyze grammar]

sarvapāpaharaṃ stotraṃ śṛṇoti śraddhayā hareḥ |
viprāṇāṃ tatra paṭhatāṃ saṃgādasya dvijanmanaḥ || 111 ||
[Analyze grammar]

nimajjya sā mādhavamāsi pūrṇe revājale tatra mahīsurebhyaḥ |
acchidramāsādya yathāvidhānaṃ tatrāpi citrāpi cakāra māsam || 112 ||
[Analyze grammar]

kuṭīrakaṃ taṃ tu navaṃ vidhāya sudevanāmāpi sa bhūmidevaḥ |
uvāsa revāsalile nimajjaṃścitroparodhādaniśaṃ dayātaḥ || 113 ||
[Analyze grammar]

atha kālena kiyatā kāladharmamupeyivān |
viprastadanu sā citrā cireṇaiva mṛtā nṛpa || 114 ||
[Analyze grammar]

tena mādhavamāsasya sukṛtena tadaiva sā |
putrī tavābhavannūnamadṛṣṭvā yamayātanām || 115 ||
[Analyze grammar]

tasya karmavipāko'yaṃ yadāptaṃ bhūpateḥ kulam |
vaiṣṇavaṃ viśadaṃ vīra duṣprāpyaṃ pāpakarmabhiḥ || 116 ||
[Analyze grammar]

divyādevī varaṃ nāma jātaṃ cāsyāṃ narottama |
yacca dattavatī cānnaṃ bhogyasaukhyasukhāni ca || 117 ||
[Analyze grammar]

brāhmaṇāya purā tasmai gaṇikātve'pi saṃgatā |
snātvā ca mādhave māsi kiṃcittatrāpi yaddadau || 118 ||
[Analyze grammar]

tasya dānasya sā bhuṃkte snānasya ca phalodayam |
pibate śītalaṃ toyaṃ miṣṭānnaṃ ca tathāniśam || 119 ||
[Analyze grammar]

divyānbhogānprabhuṃjānā vartate ca prabhorgṛhe |
bhuṃjate vidhidattaṃ ca duḥkhaśokādipīḍitā || 120 ||
[Analyze grammar]

yatpurā naranārīṇāṃ gṛhabhaṃgaratā'bhavat |
tasyakarmavipāko'yamasyāḥ kiṃcidupasthitaḥ || 121 ||
[Analyze grammar]

mādhavasnānamāhātmyādvinaiva yamayātanām |
mahāpāpāpi te vīra suṃdarī sā sutābhavat || 122 ||
[Analyze grammar]

etatte sarvamākhyātaṃ tava putryā viceṣṭitam |
sarvajanmabhavaṃ vīra karma duṣkarmasaṃbhavam || 123 ||
[Analyze grammar]

iti śrīpadmapurāṇe pātālakhaṃḍe vaiśākhamāsamāhātmye citropākhyāne |
dvinavatitamo'dhyāyaḥ || 92 ||
[Analyze grammar]