Chapter 90

[English text for this chapter is available]

devaśarmovāca |
pūrvajanmakṛtaṃ pāpaṃ tvayākhyātaṃ mamaiva tat |
śūdratvena hi vipreṃdra mayaivaṃ dhanamarjitam || 1 ||
[Analyze grammar]

vipratvaṃ hi mayā prāptaṃ tatkathaṃ dvijasattama |
tatsarvaṃ kāraṇaṃ brūhi jñānavijñānapaṃḍita || 2 ||
[Analyze grammar]

durllabhaṃ bhārate varṣe janma tasmānmanuṣyatā |
mānuṣye brāhmaṇatvaṃ ca sutarāṃ satkuloditam || 3 ||
[Analyze grammar]

tatrāpīdṛgvidhā bhāryā sarvajñā priyavādinī |
satī sarvaguṇopetā durlabhā sā kuto'bhavat || 4 ||
[Analyze grammar]

vasiṣṭha uvāca |
yattvayā ceṣṭitaṃ pūrvaṃ dharmakarmakṛtaṃ dvija |
tadahaṃ saṃpravakṣyāmi śrūyatāṃ yadi manyase || 5 ||
[Analyze grammar]

brāhmaṇaikaḥ sudharmātmā sadācāraḥ supaṃḍitaḥ |
viṣṇubhaktastu dharmātmā nityaṃ viṣṇuparāyaṇaḥ || 6 ||
[Analyze grammar]

snānārthamapi tīrthānāṃ bhramatyekaḥ sa medinīm |
aṭamānaḥ samāyātastava gehe mahāmatiḥ || 7 ||
[Analyze grammar]

tasya darśanamātreṇa samutpanna sudhīstava |
yato dharmagate gehe satāmāgamanaṃ bhavet || 8 ||
[Analyze grammar]

kiṃkiṃ na labhyate vipra vipravaiṣṇavasevayā |
durllabhaṃ yacca loke syānmokṣasthānamapi sthiram || 9 ||
[Analyze grammar]

yācitaṃ sthānamekaṃ vai vāsārthaṃ tena sattama |
tavaiva bhāryayā dattaṃ tvayā ca saha putrakaiḥ || 10 ||
[Analyze grammar]

eyatāmeyatāṃ brahmansukhena ca gṛhe mama |
vaiṣṇavaṃ brāhmaṇaṃ puṇyamityuvāca punaḥ punaḥ || 11 ||
[Analyze grammar]

sukhena sthīyatāmatra gṛho'yaṃ tava suvrata |
adya dhanyo'smyahaṃ puṇyo adya tīrthamahaṃ gataḥ || 12 ||
[Analyze grammar]

adyatīrthaphalaṃ prāptaṃ mayā te vipra darśanāt |
gavāṃ sthānaṃ paraṃ puṇyaṃ vāsasthānaṃ pradarśitam || 13 ||
[Analyze grammar]

aṃgasaṃvāhanaṃ samyakpādau caiva pramarditau |
kṣālitau ca punastoyaiḥ snātaḥ pādodakena hi || 14 ||
[Analyze grammar]

sadyo ghṛtaṃ dadhikṣīramanyamanyaṃ pradattavān |
brāhmaṇāya tadā tasmai tvaṃ tathā'dṛṣṭanoditaḥ || 15 ||
[Analyze grammar]

evaṃ saṃtoṣito viprastvayaiva saha bhāryayā |
putraiḥ sārdhaṃ mahābhāgo vaiṣṇavo jñānapaṃḍitaḥ || 16 ||
[Analyze grammar]

atha prabhāte vimale snānārthaṃ māsi mādhave |
gaṃgāyāṃ gacchatā tena tuṣṭena dayayādhipam || 17 ||
[Analyze grammar]

vaiśākhasnānamāhātmyamupadiṣṭaṃ tavāgrataḥ |
kāritastu yathānyāyaṃ sabhāryā tanayo bhavān || 18 ||
[Analyze grammar]

yathā na vāridhi samo loke kopi jalāśayaḥ |
tathā māso na vaiśākhasadṛśo mādhavapriyaḥ || 19 ||
[Analyze grammar]

tāvatpāpāni tiṣṭhaṃti niṣpratyūhaṃ kalevare |
yāvatkila maladhvaṃsī māso naiti sa mādhavaḥ || 20 ||
[Analyze grammar]

tasya vākyaṃ samākarṇya vaiśākhe sevanaṃ kṛtam |
tuṣṭena manasā vipra pūjito madhusūdanaḥ || 21 ||
[Analyze grammar]

avaśiṣṭadinānyeva paṃcamāsasya tasya vai |
ekādaśīṃ samārabhya snānaṃ ca vidhivatkṛtam || 22 ||
[Analyze grammar]

brāhmaṇasya prasaṃgena revāṃ cānudine tvayā |
prātaḥsnānaṃ kṛtaṃ vipra vaiśākhe māsi tāvatā || 23 ||
[Analyze grammar]

pūjito devadeveśo madhuhā parameśvaraḥ |
naivāptaḥ sakalo māsaḥ snānārthaṃ tava pūrvataḥ || 24 ||
[Analyze grammar]

evaṃ snānaṃ tvayā cīrṇamapi paṃcadinātmakam |
tena puṇyena saṃgatyā brāhmaṇasya viśeṣataḥ || 25 ||
[Analyze grammar]

goviṃdasya prasādena tvaṃ tu brāhmaṇatāṃ gataḥ |
tvayā tanmāsayogena prāptametanmahatkulam || 26 ||
[Analyze grammar]

durllabhaṃ bhūmidevānāṃ satyadharmasamanvitam |
bhāryāpi susatī prāptā sādhvī sarvaguṇānvitā || 27 ||
[Analyze grammar]

cyavanasya gṛhotpannā sarvajñā brahmavādinī |
rūpameva paraṃ strīṇāṃ bhūṣaṇaṃ ca mahāmune || 28 ||
[Analyze grammar]

śīlameva dvitīyaṃ ca tṛtīyaṃ satyameva ca |
sadāryatvaṃ caturthaṃ tu paṃcamaṃ puṇyamuttamam || 29 ||
[Analyze grammar]

madhuratvaṃ tathā ṣaṣṭhaṃ śuddhatvaṃ saptamaṃ mahat |
bāhyāṃtaḥ satataṃ strīṇāṃ sarvābharaṇasaptamam || 30 ||
[Analyze grammar]

aṣṭamaṃ tu patau bhāvaḥ śuśrūṣā navamaṃ kila |
sahiṣṇutā ca daśamaṃ ratirekādaśaṃ tathā || 31 ||
[Analyze grammar]

pativratatvaṃ vipreṃdra dvādaśaṃ yoṣitāṃ smṛtam |
etaiḥ saṃbhūṣitā bhāryā sādhvī te brahmavādinī || 32 ||
[Analyze grammar]

vaiśākhasnānayogena labdhā puṇyena sādaram |
kiṃkiṃ na durllabhataraṃ prāpyate māsi mādhave || 33 ||
[Analyze grammar]

snānena parameśasya pūjanena yathāvidhi |
atha mohapramugdhosi tṛṣṇayā vyāpitaṃ manaḥ || 34 ||
[Analyze grammar]

pūrvajanmani te vipra dravyameva prasaṃcitam |
na dattaṃ brāhmaṇebhyo hi dīneṣvanyeṣu vai tvayā || 35 ||
[Analyze grammar]

na baṃdhuvargo no putradāreṣu ca kathaṃcana |
mriyamāṇena bhavatā lobha eva hi ciṃtitaḥ || 36 ||
[Analyze grammar]

na dattaṃ na hutaṃ japtaṃ na tīrthe maraṇaṃ kṛtam |
na hi nārāyaṇo devo dhyānenākhila pāpahā || 37 ||
[Analyze grammar]

dravyeṣu vidyamāneṣu kṛpaṇo jāyate naraḥ |
adatvā mriyate yastu tato duḥkhataraṃ nukim || 38 ||
[Analyze grammar]

tīrthasnānādi tapasā kule janmaiva labhyate |
no dattena vinā vipra kiṃcidevopatiṣṭhati || 39 ||
[Analyze grammar]

tasya pāpasya bhāvena daridratvamupāgatam |
aputravānbhavāñjātaḥ satataṃ duḥkhapīḍitaḥ || 40 ||
[Analyze grammar]

vaiśākhasnānamāhātmyādapi paṃcadinātmakāt |
tadaiva haripūjāyāḥ saṃgatyā brāhmaṇasya ca || 41 ||
[Analyze grammar]

labdhaṃ janma kule vipra vipratvamapi durllabham |
suputraśca kulaṃ vipraṃ dhanaṃ dhānyaṃ varastriyaḥ || 42 ||
[Analyze grammar]

sujanmamaraṇaṃ caiva subhogaḥ sukhameva ca |
sadā dāne'dhikābuddhiraudāryaṃ dhairyamuttamam || 43 ||
[Analyze grammar]

prasādāttasya devasya viṣṇoścaiva mahātmanaḥ |
nārāyaṇasya jāyaṃte siddhayo vipravāñchitāḥ || 44 ||
[Analyze grammar]

ūrjje māsi tapo māsi mādhave mādhavapriye |
snātvā dāmodaraṃ bhaktyā mādhavaṃ madhusūdanam || 45 ||
[Analyze grammar]

viśeṣeṇa samabhyarcya datvā dānāni bhaktitaḥ |
ehikaṃ sukhamāsādya jano yāti tato harim || 46 ||
[Analyze grammar]

anekajanmārjitapātakāvalī vilīyate mādhavamajjanena |
sūryodaye vipra yathā tamisrā vacaḥ svayaṃbhūridamādideśa || 47 ||
[Analyze grammar]

cakāra viṣṇurvimalaṃ vicāraṃ māsaṃ vidhiṃ mādhavamekamādau |
yamasya guptaṃ manasā viciṃtya manuṣyalokairgamituṃ ca nāke || 48 ||
[Analyze grammar]

tasmādasminsamāyāte mādhave māsi mādhave |
snātvā puṇyajale tīrthe ravāvanudite'dhunā || 49 ||
[Analyze grammar]

pūjayitvā vidhānena mukuṃdaṃ madhusūdanam |
putrapautradhanaṃ śreyo vāṃchitāni sukhāni ca || 50 ||
[Analyze grammar]

anubhūya tatastvaṃte svargamakṣayamāpsyasi |
pūrvajanmakṛtaṃ sarvaṃ yattvayā pariceṣṭitam || 51 ||
[Analyze grammar]

tanmayā kathitaṃ vipra tavāgre pariceṣṭitam |
evaṃ jñātvā mahābhāga vaiśākhe ca viśeṣataḥ || 52 ||
[Analyze grammar]

snātvā samyagvidhānena madhusūdanamarcaya |
devamārādhya goviṃdaṃ nārāyaṇamanāmayam || 53 ||
[Analyze grammar]

prāpsyasi tvaṃ sukhaṃ putraṃ dhanāni harimavyayam || 54 ||
[Analyze grammar]

nārada uvāca |
brahmātmajenāpi mahānubhāvaḥ sa vipravaryaḥ paribodhito hi |
harṣeṇayuktaḥ sa mahānubhāvo bhaktyā vasiṣṭhaṃ praṇipatya tatra || 55 ||
[Analyze grammar]

āmaṃtrya vipraṃ sa jagāma gehaṃ tāṃ prāha bhāryāṃ sumanāṃ maharṣiḥ |
sarvaṃ hivṛttaṃ mamapūrvaceṣṭitaṃ tenaiva vipreṇa tavaprasādāt || 56 ||
[Analyze grammar]

bhadre vasiṣṭhena vikāśanītamadyaiva mohaḥ parināśito me |
ārādhayiṣyemadhusūdanaṃtuśrīmādhavemāsinimajjyabhaktyā || 57 ||
[Analyze grammar]

nārada uvāca |
ākarṇya vākyaṃ paramaṃ pavitraṃ sumaṃgalaṃ maṃgalahetumuccaiḥ |
harṣeṇa yuktā tamuvāca kāṃtaṃ dhanyosi vipreṇa vibodhitastvam || 58 ||
[Analyze grammar]

iti śrīpadmapurāṇe pātālakhaṃḍe vaiśākhamāsamāhātmye devaśarmo |
pākhyāne navatitamo'dhyāyaḥ || 90 ||
[Analyze grammar]