Chapter 86

[English text for this chapter is available]

sūta uvāca |
iti tasya vacaḥ śrutvā nāradasya mahātmanaḥ |
aṃbarīṣaśca rājarṣirvismito vākyamabravīt || 1 ||
[Analyze grammar]

aṃbarīṣa uvāca |
mārgaśīrṣādikānmāsānhitvā puṇyānmahāmune |
sarvamāsādhikaṃ māsaṃ vaiśākhaṃ kiṃ praśaṃsasi || 2 ||
[Analyze grammar]

sarvebhyo'pyadhikaḥ kasmānmādhavo mādhavapriyaḥ |
ko vidhistatra kiṃ dānaṃ kiṃ tapaḥ kā ca devatā || 3 ||
[Analyze grammar]

tvatpādāṃbhojarajasā pāvitasya ca me mune |
upadeśaprasādena prasādaṃ kartumarhasi || 4 ||
[Analyze grammar]

dharmajño dharmamārgāṇāmuddhartāsi mahāmune |
tvameko'khilatattvārthavettā dharmopadeśakaḥ || 5 ||
[Analyze grammar]

kartopadeṣṭā maṃtā vānumaṃtāpi prayojakaḥ |
śāstravidbhirmunivara smaryaṃte samabhāginaḥ || 6 ||
[Analyze grammar]

vratasatratapodānairyatphalaṃ samavāpyate |
dharmopadeśanenaiva tatsarvamupalabhyate || 7 ||
[Analyze grammar]

tīrthasnānaṃ tapoyajñakarma yatkurute mune |
api tatphalabhāgīsyādyaḥ pravartayitā bhavet || 8 ||
[Analyze grammar]

yadyadācarati śreṣṭhastattadevetaro janaḥ |
sa yatpramāṇaṃ kurute lokastadanuvartate || 9 ||
[Analyze grammar]

tadarhati bhavāndharmamupadeṣṭuṃ tadadbhutam |
durllabho gurusaṃbodho deśakālopapattayaḥ || 10 ||
[Analyze grammar]

na kecana tathā bhāvāścetaḥ śītalayaṃtinaḥ |
rājyalābhādayo'pyete yathā tava samāgamaḥ || 11 ||
[Analyze grammar]

sūta uvāca |
atha maṃdamṛdusmerasphuraddaṃtaprabhānugaḥ |
aṃbarīṣaṃ pratyuvāca nārado munisattamaḥ || 12 ||
[Analyze grammar]

nārada uvāca |
śṛṇu rājanpravakṣyāmi hitāya jagatastava |
vidhirmādhavamāsasya yacchruto brahmaṇaḥ purā || 13 ||
[Analyze grammar]

durllabhaṃ bhārate varṣe janma tasmānmanuṣyatā |
mānuṣye durllabhe loke svasvadharmapravarttanam || 14 ||
[Analyze grammar]

tato'pi bhaktirbhūpāla vāsudeve'tidurllabhā |
tatrāpi durllabho māso mādhavo mādhavapriyaḥ || 15 ||
[Analyze grammar]

tamavāpya tato māsaṃ snānadānajapādikam |
kurvaṃti vidhinā ye tu dhanyāste kṛtino narāḥ || 16 ||
[Analyze grammar]

teṣāṃ darśanamātreṇa pāpino'pi vikilbiṣāḥ |
bhavaṃti bhagavadbhāvabhāvitā dharmakāṃkṣiṇaḥ || 17 ||
[Analyze grammar]

mādhave māsi yaiḥ snātaṃ prātarniyamasaṃyutaiḥ |
te koṭivarṣaparyaṃtaṃ krīḍaṃte naṃdane vane || 18 ||
[Analyze grammar]

yathā na vāridhisamo loke ko'pi jalāśayaḥ |
tathā māso na vaiśākhasadṛśo mādhavapriyaḥ || 19 ||
[Analyze grammar]

tāvatpāpāni tiṣṭhaṃti manuṣyāṇāṃ kalevare |
yāvatkilamaladhvaṃsī māso nāyāti mādhavaḥ || 20 ||
[Analyze grammar]

avaśiṣṭadinānyeva paṃcamāsasya tasya vai |
ekādaśīṃ samārabhya sarvamāsasamāni vai || 21 ||
[Analyze grammar]

vaiśākhe pūjito devo mādhavo madhuhā tu yaiḥ |
nānopacārai rājeṃdra taiḥ prāptaṃ janmanaḥ phalam || 22 ||
[Analyze grammar]

kiṃ kiṃ na durllabhataraṃ prāpyate māsi mādhave |
snānena parameśasya pūjanena yathāvidhi || 23 ||
[Analyze grammar]

na dattaṃ na hutaṃ japtaṃ na tīrthe maraṇaṃ kṛtam |
yairhi nārāyaṇo naiva dhyāto nikhilapāpahā || 24 ||
[Analyze grammar]

teṣāṃ janma nṛṇāṃ loke jñātavyaṃ niṣphalaṃ nṛpa |
dravyeṣu vidyamāneṣu kṛpaṇo yo bhavennaraḥ || 25 ||
[Analyze grammar]

adatvā mriyate yo hi tasya dravyaṃ nirarthakam |
tīrthasnānādi tapasā satkule janma labhyate || 26 ||
[Analyze grammar]

na dānena vinā bhūpa kiṃcidapyupatiṣṭhati |
vaiśākhasnānamāhātmyādapi paṃcadinātmakāt || 27 ||
[Analyze grammar]

satkule prāpyate janma vaibhavaṃ vividhaṃ tathā |
suputraḥ sukulaṃ bhūpa dhanadhānyaṃ varastriyaḥ || 28 ||
[Analyze grammar]

sujanmamaraṇaṃ cāpi subhogāḥ sukhameva ca |
sadā dāne'dhikā prītiraudāryaṃ dhairyamuttamam || 29 ||
[Analyze grammar]

prasādāttasya devasya viṣṇoścaiva mahātmanaḥ |
nārāyaṇasya jāyaṃte siddhayo bhūpa vāṃcchitāḥ || 30 ||
[Analyze grammar]

ūrje māsi tapo māsi mādhave mādhavapriye |
snātvā dāmodaraṃ bhaktyā mādhavaṃ madhusūdanam || 31 ||
[Analyze grammar]

viśeṣeṇa samabhyarcya datvā dānāni śaktitaḥ |
ehikaṃ sukhamāsādya naro haripadaṃ vrajet || 32 ||
[Analyze grammar]

anekajanmārjitapātakāvalī vilīyate mādhavamajjanena |
sūryodaye bhūpa yathā tamisraṃ vacaḥ svayaṃbhūridamādiśanme || 33 ||
[Analyze grammar]

cakāra viṣṇurvipulapracāraṃ māsasya vai mādhavasaṃjñakasya |
yamasya guptaṃ vacasā viciṃtya manuṣyalokaṃ gamitaṃ cakāra || 34 ||
[Analyze grammar]

tasmādasminsamāyāte mādhave māsi vaiṣṇavaiḥ |
snātvā puṇyajale tīrthe gaṃgāyāḥ pāvane nṛṇām || 35 ||
[Analyze grammar]

revāyā vā mahārāja yāmune śārade'thavā |
prātastvanudite bhānau vidhānena nṛpottama || 36 ||
[Analyze grammar]

pūjayitvā ca deveśaṃ mukuṃdaṃ madhusūdanam |
putrapautradhanaiḥ śreyo vāṃcchitāni sukhāni ca || 37 ||
[Analyze grammar]

anubhūya tapastvaṃte svargamakṣayamāpnuyāt |
evaṃ jñātvā mahābhāga madhusūdanamarcaya || 38 ||
[Analyze grammar]

snātvā samyagvidhānena vaiśākhe tu viśeṣataḥ |
devamārādhya govindaṃ nārāyaṇamanāmayam || 39 ||
[Analyze grammar]

prāpsyasi tvaṃ sukhaṃ putraṃ dhanāni ca hareḥ padam |
devadevaṃ namaskṛtya mādhavaṃ pāpanāśanam || 40 ||
[Analyze grammar]

prārabheta vratamidaṃ paurṇamāsyāṃ madhornṛpa |
yamaiśca niyamairyuktaḥ śaktyā kiṃcitpradāya ca || 41 ||
[Analyze grammar]

haviṣyabhugbhūmiśāyī brahmacaryavrate sthitaḥ |
kṛcchrāditapasā kṣāmo dhyāyannārāyaṇaṃ hṛdi || 42 ||
[Analyze grammar]

evaṃ prāpya ca vaiśākhīṃ dadyānmadhutilādikam |
bhojanaṃ dvijamukhyebhyo bhaktyā dhenuṃ sadakṣiṇām || 43 ||
[Analyze grammar]

acchidraṃ prārthayeccāpi tasya snānasya bhūsurān |
yathā lakṣmīḥ priyā bhūpa mādhavasya jagatpateḥ || 44 ||
[Analyze grammar]

tathaiva mādhavo māso madhusūdanavallabhaḥ |
evaṃ vidhiyuto martyaḥ snātvā dvādaśavatsaram || 45 ||
[Analyze grammar]

udyāpanaṃ carecchaktyā madhusūdanatuṣṭaye |
idaṃ mādhavamāsasya māhātmyaṃ kathitaṃ tava || 46 ||
[Analyze grammar]

yatpurā brahmaṇo vaktrācchrutamāsīnmayā nṛpa || 47 ||
[Analyze grammar]

iti śrīpadmapurāṇe pātālakhaṃḍe vaiśākhamāsamāhātmye |
ṣaḍaśītitamo'dhyāyaḥ || 86 ||
[Analyze grammar]