Chapter 84

[English text for this chapter is available]

ṛṣaya ūcuḥ |
sūtasūta mahābhāga romaharṣaṇanaṃdana |
kathā ramyā tvayā proktā lokasyānaṃdadāyinī || 1 ||
[Analyze grammar]

śrīkṛṣṇasya mahābhāga caritaṃ mahadadbhutam |
śrutaṃ sarvaṃ tvayā proktaṃ nirvṛtistena cābhavat || 2 ||
[Analyze grammar]

aho śrīkṛṣṇamāhātmyaṃ bhaktānāṃ gatidāyakam |
yatastena mahābhāga nirvṛtiṃ ko na cāpnuyāt || 3 ||
[Analyze grammar]

ataḥ punarapi śrīmatkṛṣṇasya caritaṃ mahat |
śrotumicchāmahe cānyadvratadānārhaṇādikam || 4 ||
[Analyze grammar]

snānaṃ vāpi mahābhāga yathā yena kṛtaṃ purā |
tatsarvaṃ vistarādbrūhi yathā no nirvṛtirbhavet || 5 ||
[Analyze grammar]

sūta uvāca |
sādhu pṛṣṭaṃ dvijaśreṣṭhā lokānāṃ tāraṇaṃ param |
yūyaṃ kṛtārthāḥ kṛṣṇasya bhaktyā saṃpūrṇamānasāḥ || 6 ||
[Analyze grammar]

śrīkṛṣṇacaritaṃ puṇyaṃ sādhūnāṃ harṣadaṃ param |
pravakṣyāmi dvijaśreṣṭhā mahadākhyānamuttamam || 7 ||
[Analyze grammar]

ekadā nārado lokānparyaṭanbhagavatpriyaḥ |
mathurāyāmaṃbarīṣaṃ kṛṣṇārādhanatatparam || 8 ||
[Analyze grammar]

mahābhāgaṃ vrataparaṃ dadarśa munisattamaḥ |
sa āgataṃ munivaraṃ satkṛtya munisattamaḥ || 9 ||
[Analyze grammar]

bhavaṃta iva papraccha śraddhayā hṛṣṭamānasaḥ |
aṃbarīṣa uvāca |
yanmune paramaṃ brahma vedavādibhirucyate || 10 ||
[Analyze grammar]

sa devaḥ puṃḍarīkākṣaḥ svayaṃ nārāyaṇaḥ paraḥ |
yo'mūrto mūrtimānīśo vyakto'vyaktaḥ sanātanaḥ || 11 ||
[Analyze grammar]

sarvabhūtamayo'ciṃtyo dhyātavyaḥ sa kathaṃ hariḥ |
yasminsarvamidaṃ viśvamotaṃ protaṃ pratiṣṭhitam || 12 ||
[Analyze grammar]

avyaktamekaṃ paramaṃ paramātmeti viśrutam |
yato janmādi jagato yo nirmāya svayaṃ bhuvam || 13 ||
[Analyze grammar]

dadau tasmai ca nigamānātmanyeva vyavasthitān |
kathamārādhyate so'yaṃ samagrapuruṣārthadaḥ || 14 ||
[Analyze grammar]

yogināmapi durgamyastadetatkṛpayā vada |
anārādhita goviṃdā na vidaṃti hitodayam || 15 ||
[Analyze grammar]

na tapo yajñadānānāṃ labhate phalamuttamam |
anāsvāditagoviṃdapadāṃbujarasaśca yaḥ || 16 ||
[Analyze grammar]

manorathapathātītaṃ sphītaṃ nākalayetphalam |
harerārādhanaṃ hitvā duritaugha nivāraṇam || 17 ||
[Analyze grammar]

nānyatpaśyāmi jaṃtūnāṃ prāyaścittaṃ paraṃ mune |
yadbhrūnartanavartinyaḥ śrūyaṃte siddhayo'khilāḥ || 18 ||
[Analyze grammar]

kathamārādhyateso'yaṃ keśavaḥ kleśanāśanaḥ |
upāsyate sa bhagavānkathaṃ nārāyaṇo naraiḥ || 19 ||
[Analyze grammar]

prītaśca sarvametanme hitāya jagato vada |
bhaktipriyo'sau bhagavānkayā bhaktyā prasīdati || 20 ||
[Analyze grammar]

kathaṃ tasminbhavedbhaktiḥ sarvairārādhyate katham |
vaiṣṇavosi harestasya priyo'si paramārthavit || 21 ||
[Analyze grammar]

tena tvāmeva pṛcchāmi brahmanbrahmaviduttama |
śrotāramatha vaktāraṃ praṣṭāraṃ puruṣaṃ hareḥ || 22 ||
[Analyze grammar]

praśnaḥ punāti kṛṣṇasya tadaṃghrisalilaṃ yathā |
durllabho mānuṣo deho dehināṃ kṣaṇabhaṃguraḥ || 23 ||
[Analyze grammar]

tatrāpi durllabhaṃ manye vaikuṃṭhapriyadarśanam |
saṃsāresminkṣaṇārdho'pi satsaṃgaḥ śevadhirnṛṇām || 24 ||
[Analyze grammar]

yasmādavāpyate sarvaṃ puruṣārthacatuṣṭayam |
bhagavanbhavato yātrā svastaye sarvadehinām || 25 ||
[Analyze grammar]

bālānāṃ tu yathā pitroruttamaślokavartmanām |
bhūtānāṃ devacaritaṃ duḥkhāya ca sukhāya ca || 26 ||
[Analyze grammar]

sukhāyaiva hi sādhūnāṃ tvādṛśāmacyutātmanām |
bhajaṃti ye yathā devāndevā api tathaiva tān || 27 ||
[Analyze grammar]

chāyeva karmasacivāḥ sādhavo dīnavatsalāḥ |
tasmāttvaṃ bhagavanmahyaṃ vaiṣṇavaṃ dharmamādiśa || 28 ||
[Analyze grammar]

yasyopadeśadānena labhate vedajaṃ phalam |
nārada uvāca |
sādhu pṛṣṭaṃ mahīpāla viṣṇubhaktimatā tvayā || 29 ||
[Analyze grammar]

jānatā paramaṃ dharmamekaṃ mādhavasevanam |
yasminnārādhite viṣṇau viśvamārādhitaṃ bhavet || 30 ||
[Analyze grammar]

tuṣṭe carācaraṃ tuṣṭaṃ sarvadevamaye harau |
yasya smaraṇamātreṇa mahāpātakasaṃhatiḥ || 31 ||
[Analyze grammar]

tatkṣaṇānnāśamāyāti sa sevyo harireva hi |
ko'nu rājanniṃdriyavānmukuṃdacaraṇāṃbujam || 32 ||
[Analyze grammar]

na bhajetsarvato mṛtyurupāsyamṛṣidaivataiḥ |
śruto'nu paṭhito dhyāta ādṛtaścānumoditaḥ || 33 ||
[Analyze grammar]

sadyaḥ punāti saddharmo vīro viśvadruho'pi hi |
yoyaṃ kāraṇakāryādi kāraṇasyāpi kāraṇam || 34 ||
[Analyze grammar]

ananyakāraṇaṃ yogī jagajjīvo jaganmayaḥ |
aṇurbṛhatkṛśaḥ sthūlo nirguṇo guṇabhṛnmahān || 35 ||
[Analyze grammar]

ajo janmalayātīto dhyātavyaḥ sa hariḥ sadā |
samyagetadvyavasitaṃ bhavatā puruṣarṣabha || 36 ||
[Analyze grammar]

yatpṛcchase bhāgavatāndharmāṃstvaṃ viśvabhāvanān |
prasaṃgena satāmātmamanaḥ śruti rasāyanāḥ || 37 ||
[Analyze grammar]

bhavaṃti kīrtanīyasya kathāḥ kṛṣṇasya nirmalāḥ |
bhāvasādhyohyayaṃ devaḥ svayaṃ jānāti tadbhavān || 38 ||
[Analyze grammar]

tathāpi vakṣye jagato hitāya tava gauravāt |
yadāhuḥ paramaṃ brahma pradhānapuruṣātparam || 39 ||
[Analyze grammar]

yanmāyayā tataṃ sarvaṃ sarvaṃ yacchati so'cyutaḥ |
putrānkalatraṃ dīrghāyū rājyaṃ svargāpavargakam || 40 ||
[Analyze grammar]

sa dadyādīpsitaṃ sarvaṃ bhaktyā saṃpūjito'jitaḥ |
karmaṇā manasā vācā tatparā ye hi mānavāḥ || 41 ||
[Analyze grammar]

teṣāṃ vratāni vakṣyāmi prītaye bhūpasattama |
ahiṃsāsatyamasteyaṃ brahmacaryamakalpatā || 42 ||
[Analyze grammar]

etāni mānasānyāhurvratāni harituṣṭaye |
ekabhaktaṃ tathā naktamupavāsamayācitam || 43 ||
[Analyze grammar]

ityevaṃ kāyikaṃ puṃsāṃ vratamuktaṃ nareśvara |
vedasyādhyayanaṃ viṣṇoḥ kīrtanaṃ satyabhāṣaṇam || 44 ||
[Analyze grammar]

apaiśunyamidaṃ rājanvācikaṃ vratamuttamam |
cakrāyudhasya nāmāni sadā sarvatra kīrtayet || 45 ||
[Analyze grammar]

nāśaucaṃ kīrtane tasya sa pavitrakaro yataḥ |
varṇāśramācāravatā puruṣeṇa paraḥ pumān || 46 ||
[Analyze grammar]

viṣṇurārādhyate paṃthā nānyaḥ saṃtoṣakāraṇam |
patipriyahitābhiśca manovākkāyasaṃyamaiḥ || 47 ||
[Analyze grammar]

vratairārādhyate strībhirvāsudevo dayānidhiḥ |
āgamoktena mārgeṇa strīśūdrairapipūjanam || 48 ||
[Analyze grammar]

kartavyaṃ kṛṣṇacaṃdrasya dvijātivararūpiṇaḥ |
trayovarṇāstu vedoktamārgārādhanatatparāḥ || 49 ||
[Analyze grammar]

strīśūdrādaya eva syurnāmnā'rādhanatatparāḥ |
na pūjanairna yajanairna vratairapi mādhavaḥ || 50 ||
[Analyze grammar]

tuṣyate kevalaṃ bhaktipriyo'sau samudāhṛtaḥ |
strīṇāṃ pativratānāṃ tu patireva hi daivatam || 51 ||
[Analyze grammar]

sa tu pūjyo viṣṇubhaktyā manovākkāyakarmabhiḥ |
kartavyaṃ śraddhayā viṣṇościṃtayitvā patiṃ hṛdi || 52 ||
[Analyze grammar]

śūdrāṇāṃ caiva bhavati nāmnā vai devatārcanam |
sarve'pyāgamamārgeṇa kuryurvedānukāriṇā || 53 ||
[Analyze grammar]

strīṇāmapyadhikāro'sti viṣṇorārādhanādiṣu |
patipriyaratānāṃ ca śrutireṣā sanātanī || 54 ||
[Analyze grammar]

svakulocitadharmeṇa yadyasya vihitaṃ vratam |
tattadevācaredyastu tena tuṣyati keśavaḥ || 55 ||
[Analyze grammar]

haviṣāgnau jale puṣpairdhyānena hṛdaye harim |
yajaṃti sūrayo nityaṃ japena ravimaṃḍale || 56 ||
[Analyze grammar]

ahiṃsā prathamaṃ puṣpaṃ dvitīyaṃ karaṇagrahaḥ |
tṛtīyakaṃ bhūtadayā caturthaṃ kṣāṃtireva ca || 57 ||
[Analyze grammar]

śamastu paṃcamaṃ puṣpaṃ damaḥ ṣaṣṭhaṃ ca saptamam |
dhyānaṃ satyaṃ cāṣṭamaṃ ca hyetaistuṣyati keśavaḥ || 58 ||
[Analyze grammar]

etairevāṣṭabhiḥ puṣpaistuṣyatyevārcito hariḥ |
puṣpāṃtarāṇi saṃtyeva bāhyāni manujottama || 59 ||
[Analyze grammar]

bhaktyā kṛtāni yairviṣṇuḥ pūjitaḥ parituṣyati |
vāruṇaṃ salilaṃ puṣpaṃ saumyaṃ ghṛtapayodadhi || 60 ||
[Analyze grammar]

prājāpatyaṃ tathānnādi āgneyaṃ dhūpadīpakam |
phalapuṣpādikaṃ caiva vānaspatyaṃ tu paṃcamam || 61 ||
[Analyze grammar]

pārthivaṃ kuśamūlādyaṃ vāyavyaṃ gaṃdhacaṃdanam |
śraddhākhyaṃ viṣṇupuṣpaṃ ca vādyaṃ viṣṇupadaṃ smṛtam || 62 ||
[Analyze grammar]

ebhistupūjitaḥ puṣpairapi viṣṇuḥ prasīdati |
sūryo'gnirbrāhmaṇogāvo vaiṣṇavaḥ khaṃ marujjalam || 63 ||
[Analyze grammar]

bhūrātmā sarvabhūtāni pūjāsthānāni vā hareḥ |
sūryye tu maṃtrajāpyena haviṣāgnau yajettataḥ || 64 ||
[Analyze grammar]

ātithyena tu viprāgrye goṣu grāsarasādinā |
vaiṣṇave baṃdhusatkṛtyā hṛdaye dhyānaniṣṭhayā || 65 ||
[Analyze grammar]

vāyau mukhyadhiyā toye dravyaistoyapuraskṛtaiḥ |
sthaṃḍile maṃtrahṛdayairbhogairātmānamātmani || 66 ||
[Analyze grammar]

kṣetrajñaṃ sarvabhūteṣu samatvenārcayedvibhum |
dhiṣṇyeṣveteṣu tadrūpaṃ śaṃkhacakragadāṃbujaiḥ || 67 ||
[Analyze grammar]

yuktaṃ caturbhujaṃ śāṃtaṃ dhyāyannarccetsamāhitaḥ |
brāhmaṇaiḥ pūjitaireva pūjito'yaṃ na saṃśayaḥ || 68 ||
[Analyze grammar]

nirbhartsitaiśca tairbhūpa bhavennirbhartsito vibhuḥ |
nigamo dharmaśāstraṃ ca yadādhāre pravartate || 69 ||
[Analyze grammar]

viprāste vaiṣṇavīmūrtiḥ pāvanī paramā matā || 70 ||
[Analyze grammar]

sarvaṃ śubhaṃ jagati dharmata eva labhyaṃ dharmo gatirnigamato nṛpadharmaśāstrāt |
nūnaṃ tayorapi gatirbhuvi bhūmidevāstairarcitairiha jagatpatirarcitaḥ syāt || 71 ||
[Analyze grammar]

na yajñayogairna tapobhiranyairna yogayuktyā na samarcanena |
tathā vibhustuṣyati devadevo yathā mahī daivatatoṣaṇena || 72 ||
[Analyze grammar]

brahmaṇyo brahmavidbrahmā brahmavedapravartakaḥ |
brāhmaṇaireva tuṣyeta toṣitaṃ brahmadaivatam || 73 ||
[Analyze grammar]

narake'pi ciraṃ magnāḥ pūrvajā ye kuladvaye |
tadaiva yāṃti te svargaṃ yadārccati suto harim || 74 ||
[Analyze grammar]

kiṃ teṣāṃ jīviteneha paśuvacceṣṭitena kim |
yeṣāṃ na pravaṇaṃ cittaṃ vāsudeve jaganmaye || 75 ||
[Analyze grammar]

dhyānaṃ tasya pravakṣyāmi yanna dṛṣṭaṃ tu kenacit |
śrūyatāṃ bhūpakaivalyaṃ kevalaṃ malavarjitam || 76 ||
[Analyze grammar]

yathā dīpo nivātastho niścalo vāyuvarjitaḥ |
prajvalannāśayetsarvamaṃdhakāraṃ mahāmate || 77 ||
[Analyze grammar]

tadvaddoṣavihīnātmā bhavatyeva nirāmayaḥ |
nirāśo niścalo vīronamitraṃ na ripustathā || 78 ||
[Analyze grammar]

śokaharṣau viṣādaśca na lobho matsaro bhramaḥ |
saṃbhramālāpamohaiśca sukhaduḥkhairvimucyate || 79 ||
[Analyze grammar]

viṣayaiścāpi sarvaiśca iṃdriyāṇāṃ pramucyate |
tadā sa kevalajñānī kaivalyatvaṃ prajāyate || 80 ||
[Analyze grammar]

jvālākarmaprasaṃgena dīpastailaṃ praśoṣayet |
vartyādhāreṇa rājeṃdra nirdvandvo vāyuvarjitaḥ || 81 ||
[Analyze grammar]

kajjalaṃ vamate paścāttailasyāpi mahāmate |
kṛṣṇā saṃdṛśyate rekhā dīpasyāgre mahāmate || 82 ||
[Analyze grammar]

svayamākṛṣya tattailaṃ tejasā nirmalobhavet |
kāye cāṃtaḥ sthitastadvatkarmatailaṃ praśoṣayet || 83 ||
[Analyze grammar]

viṣayānkajjalaṃ kṛtvā pratyakṣānsaṃpradarśayet |
jvālāvannirmalo bhūtvā svayameva prakāśayet || 84 ||
[Analyze grammar]

krodhalobhādibhiḥ saṃjñairvāyubhiḥ parivarjitaḥ |
niḥspṛho niścalo bhūtvā tejaśca svayamujjvalet || 85 ||
[Analyze grammar]

trailokyaṃ paśyate sarvaṃ svasthānasthaṃ svatejasā |
kevalajñānarūpo'yaṃ mayā te parikīrtitaḥ || 86 ||
[Analyze grammar]

dhyānaṃ caiva pravakṣyāmi dvividhaṃ tasya cakriṇaḥ |
kevalajñānarūpeṇa dṛśyate paracakṣuṣā || 87 ||
[Analyze grammar]

yogayuktā mahātmānaḥ paramārthaparāyaṇāḥ |
yaṃ na paśyaṃti mugdhāstu sarvajñaṃ sarvadarśakam || 88 ||
[Analyze grammar]

hastapādavihīnaśca sarvatra parigacchati |
sarvaṃ gṛhṇāti trailokyaṃ sthāvaraṃ jaṃgamaṃ punaḥ || 89 ||
[Analyze grammar]

nāsāmukhavihīnastu ghrāti bhakṣati bhūpate |
akarṇaḥ śṛṇute sarvaṃ sarvasākṣī jagatpatiḥ || 90 ||
[Analyze grammar]

arūpo rūpasaṃbaddhaḥ paṃcavargavaśaṃ gataḥ |
sarvalokasya yaḥ prāṇaḥ pūjyate sacarācaraiḥ || 91 ||
[Analyze grammar]

ajihvo vadate sarvaṃ vedaśāstrānugaṃ tathā |
atvacaḥ sparśamevāpi sarveṣāmeva viṃdati || 92 ||
[Analyze grammar]

sadānaṃdo viviktākṣa ekarūpo nirāśrayaḥ |
nirguṇo nirmamo vyāpī saguṇo nirmalo'naghaḥ || 93 ||
[Analyze grammar]

avaśyaḥ sarvavaśyātmā sarvadaḥ sarvavittamaḥ |
tasya mātā na caivāsti sa vai sarvamayo vibhuḥ || 94 ||
[Analyze grammar]

evaṃ sarvamayaṃ dhyānaṃ yaśca paśyatyananyadhīḥ |
sa yāti paramaṃ sthānamamūrttamamṛtopamam || 95 ||
[Analyze grammar]

dvitīyaṃ tu pravakṣyāmi tacchṛṇuṣva mahāmate |
mūrttākāraṃ tu sākāraṃ nirākāraṃ nirāmayam || 96 ||
[Analyze grammar]

brahmāṃḍaṃ sarvamatulaṃ vāsitaṃ yasya vāsanāt |
sa tasmādvāsudevastu procyate nṛpanaṃdana || 97 ||
[Analyze grammar]

varṣamāṇasya meghasya yadbhāsā tasya tadbhavet |
sūryatejaḥpratīkāśaṃ caturbāhuṃ sureśvaram || 98 ||
[Analyze grammar]

dakṣiṇe śobhate śaṃkho hemaratnavibhūṣitaḥ |
kaumodakī gadā tasya mahāsuravināśinī || 99 ||
[Analyze grammar]

vāme ca śobhate vīra haste tasya mahātmanaḥ |
mahāpadmaṃ sugaṃdhāḍhyaṃ tasya dakṣiṇahastagam || 100 ||
[Analyze grammar]

śobhamānaṃ sadaivāste sāyudhaṃ kamalaśriyam |
kaṃbugrīvaṃ suvṛttāsyaṃ padmapatranibhekṣaṇam || 101 ||
[Analyze grammar]

rājamānaṃ hṛṣīkeśaṃ daśanaiḥ kuṃdasaṃnibhaiḥ |
guḍākeśasya yasyāste adharo vidrumākṛtiḥ || 102 ||
[Analyze grammar]

śobhate puṃḍarīkākṣaḥ kirīṭenāpi bhāsvatā |
viśālenāpi rūpeṇa keśavastu suvakṣasā || 103 ||
[Analyze grammar]

kaustubhenāṃkitenaiva rājamāno janārdanaḥ |
sūryatejaḥpratīkāśa kuṃḍalābhyāṃ prabhāti ca || 104 ||
[Analyze grammar]

hariḥ keyūrakaṃkaṇairhārairmauktikairṛkṣasannibhaiḥ || 105 ||
[Analyze grammar]

vapuṣā bhrājamānastu vijayo jayatāṃ varaḥ |
bhrājateso'pi goviṃdo hemavarṇena vāsasā || 106 ||
[Analyze grammar]

mudrikābhistu yuktābhiraṃgulīṣu virājate |
sarvāyudhaiḥ susaṃpūrṇairddivyairābharaṇairhariḥ || 107 ||
[Analyze grammar]

vainateyasamārūḍho lokakarttā jagatpatiḥ |
evaṃ yo dhyāyate nityamananyamanasā naraḥ || 108 ||
[Analyze grammar]

mucyate sarvapāpebhyo viṣṇulokaṃ sa gacchati |
etatte sarvamākhyātaṃ dhyānabhedaṃ jagatpateḥ || 109 ||
[Analyze grammar]

iti śrīpadmapurāṇe pātālakhaṃḍe nāradāṃbarīṣasaṃvāde vaiśākhamāsamāhātmye |
bhagavaddhynāvarṇanaṃ nāma caturaśītitamo'dhyāyaḥ || 84 ||
[Analyze grammar]