Chapter 80

[English text for this chapter is available]

pārvatyuvāca |
ghore kaliyuge prāpte viṣayagrāhasaṃkule |
putradāradhanādyārtaistatkathaṃ dhāryate vibho || 1 ||
[Analyze grammar]

tadupāyaṃ mahādeva kathayasva kṛpānidhe |
īśvara uvāca |
harernāma harernāma harernāmaiva kevalam || 2 ||
[Analyze grammar]

harerāma harekṛṣṇa kṛṣṇakṛṣṇeti maṃgalam |
evaṃ vadaṃti ye nityaṃ na hi tānbādhate kali || 3 ||
[Analyze grammar]

aṃtarāṃtarakarmāṇi kṛtvā nāmāni ca smaret |
kṛṣṇakṛṣṇeti kṛṣṇeti kṛṣṇetyāha punaḥ punaḥ || 4 ||
[Analyze grammar]

mannāma caiva tvannāma yojayitvā vyatikramāt |
so'pi pāpātpramucyeta tūlarāśerivānalaḥ || 5 ||
[Analyze grammar]

jayādyetattvayā vāpyathavā śrīśabdapūrvakam |
tacca me maṃgalaṃ nāma japanpāpātpramucyate || 6 ||
[Analyze grammar]

divāniśi ca saṃdhyāyāṃ sarvakāleṣu saṃsmaret |
aharniśaṃ smaranrāmaṃ kṛṣṇaṃ paśyati cakṣuṣā || 7 ||
[Analyze grammar]

aśucirvā śucirvāpi sarvakāleṣu sarvadā |
nāmasaṃsmaraṇādeva saṃsārānmucyate kṣaṇāt || 8 ||
[Analyze grammar]

nānāparādhayuktasya nāmāpi ca haratyagham |
yajñavratatapodānaṃ sāṃgaṃ naiva kalau yuge || 9 ||
[Analyze grammar]

gaṃgāsnānaṃ harernāma nirapāyamidaṃ dvayam || 10 ||
[Analyze grammar]

hatyāyutaṃ pāpasahasramugraṃ gurvaṃganākoṭiniṣevaṇaṃ ca |
steyānyathānyāni hareḥ priyeṇa goviṃdanāmnā na ca saṃti bhadre || 11 ||
[Analyze grammar]

apavitraḥ pavitro vā sarvāvasthāṃ gato'pi vā |
yaḥ smaretpuṃḍīkākṣaṃ sa bāhyābhyaṃtaraḥ śuciḥ || 12 ||
[Analyze grammar]

nāmasaṃsmaraṇādeva tathā tasyārthaciṃtanāt |
sauvarṇīṃ rājatīṃ vāpi tathā paiṣṭīṃ sragākṛtim || 13 ||
[Analyze grammar]

pādayościhnitāṃ kṛtvā pūjāṃ caiva samārabhet |
dakṣiṇasya padoṃguṣṭhamūle cakraṃ bibharti yaḥ || 14 ||
[Analyze grammar]

tatra namrajanasyāpi saṃsāracchedanāya ca |
madhyamāṃgulimūle tu dhatte kamalamacyutaḥ || 15 ||
[Analyze grammar]

dhyātṛcittadvirephāṇāṃ lobhanāyātiśobhanam |
padmasyādhodhvajaṃ dhatte sarvānarthajayadhvajam || 16 ||
[Analyze grammar]

kaniṣṭhāmūlato vajraṃ bhaktapāpaughabhedanam |
pārśvamadhyeṃ'kuśaṃ bhaktacitte rabhasakāraṇam || 17 ||
[Analyze grammar]

bhogasaṃpanmayaṃ dhatte yavamaṃguṣṭhaparvaṇi |
mūle gadāṃ ca pāpādribhedanīṃ sarvadehinām || 18 ||
[Analyze grammar]

sarvavidyāprakāśāya dhatte sa bhagavānajaḥ |
padmādīnyapi cihnāni tatra dakṣeṇa yatpunaḥ || 19 ||
[Analyze grammar]

vāmapāde vasetso'yaṃ bibhartti karuṇānidhiḥ |
tasmādgoviṃdamāhātmyamānaṃdarasasuṃdaram || 20 ||
[Analyze grammar]

śṛṇuyātkīrttayennityaṃ sa nirmukto na saṃśayaḥ |
māsakṛtyaṃ pravakṣyāmi viṣṇoḥ prītikaraṃ param || 21 ||
[Analyze grammar]

jyeṣṭhe tu snāpanaṃ kuryācchrīviṣṇoryatnataḥ śuciḥ |
dainaṃdinaṃ tu duritaṃ pakṣamāsarttuvarṣajam || 22 ||
[Analyze grammar]

brahmahatyāsahasrāṇi jñātā jñātakṛtāni ca |
svarṇasteyasurāpāna gurutalpāyutāni ca || 23 ||
[Analyze grammar]

koṭikoṭisahasrāṇi hyupapāpāni yāni ca |
sarvāṇyatha praṇaśyaṃti paurṇamāsyāṃ tu vāsare || 24 ||
[Analyze grammar]

āsiṃcedacyutaṃ mūrdhni tadaitatkalaśodakam |
puruṣasūktena maṃtreṇa pāvamānībhireva ca || 25 ||
[Analyze grammar]

nālikerodakenātha tathā tālaphalāṃbunā |
ratnodakena gaṃdhena tathā puṣpodakena ca || 26 ||
[Analyze grammar]

paṃcopacārairārādhya yathāvibhavavistaraiḥ |
ghaṃ ghaṃṭāyai nama iti ghaṃṭāvādyaṃ pradāpayet || 27 ||
[Analyze grammar]

patitasya mahādhvānanyastapātakasaṃcaye |
pāhi māṃ pāpinaṃ ghorasaṃsārārṇavapātinam || 28 ||
[Analyze grammar]

ya evaṃ kurute vidvānbrāhmaṇaḥ śrotriyaḥ śuciḥ |
sarvapāpaiḥ pramucyeta viṣṇulokaṃ sa gacchati || 29 ||
[Analyze grammar]

āṣāḍhaśuklaikādaśyāṃ kuryātsvāpamahotsavam |
āṣāḍhe ca rathaṃ kuryācchrāvaṇe śravaṇāvidhim || 30 ||
[Analyze grammar]

bhādre ca janmadivasa upavāsaparo bhavet |
prasuptasya parīvartamāśvine māsi kārayet || 31 ||
[Analyze grammar]

utthānaṃ śrīhareḥ kuryādanyathā viṣṇudrohakṛt |
śubhe caivāśvine māsi mahāmāyāṃ ca pūjayet || 32 ||
[Analyze grammar]

sauvarṇīṃ rājatīṃ vāpi viṣṇurūpāṃ baliṃ vinā |
hiṃsādveṣau na kartavyau dharmātmā viṣṇupūjakaḥ || 33 ||
[Analyze grammar]

kārtike puṣyamāse ca kāmataḥ puṇyamācaret |
dāmodarāya dīpaṃ ca prāṃśusthāne pradāpayet || 34 ||
[Analyze grammar]

saptavartipramāṇena dīpaḥ syāccaturaṃgulaḥ |
pakṣāṃte ca prakartavyā dīpamālāvali śubhā || 35 ||
[Analyze grammar]

mārgaśīrṣe site pakṣe ṣaṣṭhyāṃ ca sitavastrakaiḥ |
pūjayejjagadīśaṃ ca brahmāṇaṃ ca viśeṣataḥ || 36 ||
[Analyze grammar]

pauṣe puṣpābhiṣekaṃ ca varjayeccaṃdanaṃ ślatham |
saṃkrāṃtyāṃ māghamāse ca sādhivāsita taṃḍulāt || 37 ||
[Analyze grammar]

naivedyaṃ viṣṇave dadyādimaṃ maṃtramudīrayet |
brāhmaṇānbhojayedbhaktyā devadevapuraḥ sthitān || 38 ||
[Analyze grammar]

abhyarcya bhagavadbhaktāndvijāṃśca bhagavaddhiyā |
ekasminbhojite bhakte koṭirbhavati bhojitā || 39 ||
[Analyze grammar]

viprabhojanamātreṇa vyaṃgaṃ sāṃgaṃ dhruvaṃ bhavet |
paṃcamyāṃ śuklapakṣe tu snāpayitvā ca keśavam || 40 ||
[Analyze grammar]

pūjayitvā vidhānena cūtapallavasaṃyutaiḥ |
phalacūrṇaiśca vividhairvāsitaiḥ paṭasādhitaiḥ || 41 ||
[Analyze grammar]

kānanaṃ ramaṇīyaṃ ca pradīptaṃ dīpadīpitam |
drākṣekṣu raṃbhā jaṃbīra nāgaraṃgaṃ ca pūgakam || 42 ||
[Analyze grammar]

nālikeraṃ ca dhātrīṃ ca panasaṃ ca harītakīm |
anyaiśca vṛkṣakhaṃḍaiśca sarvartukusumānvitaiḥ || 43 ||
[Analyze grammar]

anyaiśca vividhaiścaiva phalapuṣpasamanvitaiḥ |
vitānaiḥ kusumoddāmairvāripūrṇaghaṭaistathā || 44 ||
[Analyze grammar]

cūtaśākhopaśākhābhiḥ śobhitaṃ chatracāmaraiḥ |
jayakṛṣṇeti saṃsmṛtya pradakṣiṇapurassaram || 45 ||
[Analyze grammar]

viśeṣataḥ kaliyuge dolotsavo vidhīyate |
phālgune ca caturdaśyāmaṣṭame yāmasaṃjñake || 46 ||
[Analyze grammar]

athavā paurṇamāsyāṃ tu pratipatsaṃdhisaṃjñake |
pūjayedvidhivadbhaktyā phalgucūrṇaiścaturvidhaiḥ || 47 ||
[Analyze grammar]

sitaraktairgaurapītaiḥ karpūrādi vimiśritaiḥ |
haridrārāgayogācca raṃgarūpairmanoharaiḥ || 48 ||
[Analyze grammar]

anyairvā raṃgarūpaiśca prīṇayetparameśvaram |
ekādaśyāṃ samārabhya paṃcamyāṃ taṃ samāpayet || 49 ||
[Analyze grammar]

paṃcāhāni tryahāni vā dolotsavo vidhīyate |
dakṣiṇābhimukhaṃ kṛṣṇaṃ dolamānaṃ sakṛnnarāḥ || 50 ||
[Analyze grammar]

dṛṣṭvāparādhanicayairmuktāste nātra saṃśayaḥ |
nikṣipya jalapātre ca māsi mādhavasaṃjñake || 51 ||
[Analyze grammar]

sauvarṇapātre raupye vā tāmre vāpyatha mṛṇmaye |
toyasthaṃ yo'rcayeddevaṃ śālagrāmasamudbhavam || 52 ||
[Analyze grammar]

pratimāṃ vā mahābhāge tasya puṇyaṃ na gaṇyate |
damanāropaṇaṃ kṛtvā śrīviṣṇau ca samarpayet || 53 ||
[Analyze grammar]

vaiśākhe śrāvaṇe bhādre kartavyaṃ vā tadarpaṇam |
pūrvepūrve tu vātasthe damanādiṣu karmasu || 54 ||
[Analyze grammar]

prakartavyaṃ vidhānena anyathā niṣphalaṃ bhavet |
vaiśākhe ca tṛtīyāyāṃ jalamadhye viśeṣataḥ || 55 ||
[Analyze grammar]

athavā maṃḍale kuryānmaṃḍape vā bṛhadvane |
sugaṃdhacaṃdanenāṃgaṃ supuṣṭaṃ ca dinedine || 56 ||
[Analyze grammar]

yathāprayatnataḥ kuryātkṛśāṃgasyeva puṣṭidam |
caṃdanāguru hrībera kṛṣṇakuṃkuma rocanā || 57 ||
[Analyze grammar]

jaṭāmāṃsī murā caiva viṣṇorgaṃdhāṣṭakaṃ viduḥ |
taistairgaṃdhayutaiścāpi viṣṇoraṃgāni lepayet || 58 ||
[Analyze grammar]

dhṛṣṭaṃ ca tulasīkāṣṭhaṃ karpūrāguruyogataḥ |
athavā kesarairyojyaṃ haricaṃdanamucyate || 59 ||
[Analyze grammar]

yātrākāle ca ye kṛṣṇaṃ bhaktyā paśyaṃti mānavāḥ |
na teṣāṃ punarāvṛttiḥ kalpakoṭiśatairapi || 60 ||
[Analyze grammar]

sugaṃdhamiśritaistoyairdevadevaṃ galaṃti ye |
athavā puṣpamadhye tu sthāpayejjagadīśvaram || 61 ||
[Analyze grammar]

vṛṃdāvanaṃ tatra gatvā upaskṛtya phalāni ca |
viṣṇubhaktena yogyena bhojayettadaśeṣataḥ || 62 ||
[Analyze grammar]

nārikelaphalaṃ bījakośaṃ coddhṛtya dāpayet |
ghoṃṭāphalaṃ ca panasaṃ kośamuddhṛtya dāpayet || 63 ||
[Analyze grammar]

dadhnā vimiśritaṃ cānnaṃ ghṛtenāplutya dāpayet |
pācitaṃ piṣṭakaṃ pūpamaṣṭādaśaghṛtena ca || 64 ||
[Analyze grammar]

tailaiśca tilasaṃmiśraiḥ phalaṃ pakvaṃ pradāpayet |
yadyadevātmanaḥ prītaṃ tattadīśāya dāpayet || 65 ||
[Analyze grammar]

datvā naivedyavastrādi nādadīta kathaṃcana |
tyaktaṃ ca viṣṇumuddiśya tadbhaktebhyo viśeṣataḥ || 66 ||
[Analyze grammar]

iti te kathitaṃ kiṃcitsamāsena maheśvari |
gopanīyaṃ prayatnena svayoniriva pārvati || 67 ||
[Analyze grammar]

śrīkṛṣṇarūpaguṇavarṇana śāstravargabodhādhikāra iha cedalamanyapāṭhaiḥ |
tatpremabhāvarasabhaktivilāsa nāmahāreṣu cetkhalu manaḥ kimu kāminībhiḥ || 68 ||
[Analyze grammar]

taccetasā prabhajatāṃ vrajabālakeṃdraṃ vṛṃdāvanakṣititalaṃ yamunājalaṃ ca |
tallokanāthapadapaṃkajadhūlimiśraliptaṃ vapuḥ kila vṛthāgarucaṃdanādyaiḥ || 69 ||
[Analyze grammar]

iti śrīpadmapurāṇe pātālakhaṃḍe umāmaheśvarasaṃvāde vṛṃdāvanamāhātmye aśītitamo'dhyāyaḥ || 80 ||
[Analyze grammar]