Chapter 79

[English text for this chapter is available]

īśvara uvāca |
śālagrāme maṇauyaṃtre maṃḍale pratimāsu ca |
nityaṃ tu śrīhareḥ pūjā kevale bhavanena tu || 1 ||
[Analyze grammar]

gaṃḍakyāmekadeśe tu śālagrāmasthalaṃ mahat |
pāṣāṇaṃ tadbhavaṃ pātu śālagrāmamiti sthitam || 2 ||
[Analyze grammar]

śālagrāmaśilāsparśātkoṭijanmāghanāśanam |
kiṃ punaḥ pūjanaṃ tatra hareḥ sāṃnidhyakāraṇam || 3 ||
[Analyze grammar]

śālagrāmaikayajanācchataliṃgīphalaṃ labhet |
bahubhirjanmabhiḥ puṇyairyadikṛṣṇaśilāṃ labhet || 4 ||
[Analyze grammar]

goṣpadena ca cihnena janustena samāpyate |
ādau śilāṃ parīkṣeta snigdhāṃ śreṣṭhāṃ ca mecakām || 5 ||
[Analyze grammar]

ākṛṣṇā madhyamā proktā miśrā miśraphalapradā |
sadā kāṣṭhe sthito vahnirmathanena prakāśyate || 6 ||
[Analyze grammar]

yathā tathā harirvyāpī śālagrāme pratīyate |
pratyahaṃ dvādaśaśilāḥ śālagrāmasya yo'rcayet || 7 ||
[Analyze grammar]

dvāravatyāḥ śilāyuktāḥ sa vaikuṃṭhe mahīyate |
śālagrāmaśilāyāṃ tu gahvaraṃ lakṣate naraḥ || 8 ||
[Analyze grammar]

pitarastasya tiṣṭhaṃti tṛptāḥ kalpāṃtakaṃ divi |
vaikuṃṭhabhavanaṃ tatra yatra dvārāvatī śilā || 9 ||
[Analyze grammar]

mṛto viṣṇupuraṃ yāti tattīrthaṃ yojanatrayam |
japaḥ pūjā ca homaśca sarvaṃ koṭiguṇaṃ bhavet || 10 ||
[Analyze grammar]

manaskāmasamābhīṣṭaṃ krośamātraṃ na saṃśayaḥ |
kīṭako'pi mṛtiṃ yāti vaikuṃṭhabhavanaṃ yataḥ || 11 ||
[Analyze grammar]

śālagrāmaśilāyāṃ yo mūlyamudghāṭayennaraḥ |
vikretā cānumaṃtā ca yaḥ parīkṣānumodakaḥ || 12 ||
[Analyze grammar]

sarve te narakaṃ yāṃti yāvatsūryaśca saṃplavaḥ |
atastadvarjayeddevi cakrakrayaṇavikrayam || 13 ||
[Analyze grammar]

śālagrāmodbhavo devo yo devo dvārakodbhavaḥ |
ubhayoḥ saṃgamo yatra muktistatra na saṃśayaḥ || 14 ||
[Analyze grammar]

dvārakodbhavacakrāḍhyo bahucakreṇa cihnitaḥ |
cakrāsanaśilākāracitsvarūpo niraṃjanaḥ || 15 ||
[Analyze grammar]

namo'stvoṃkārarūpāya sadānaṃdasvarūpiṇe |
śālagrāmamahābhāga bhaktasyānugrahaṃ kuru || 16 ||
[Analyze grammar]

tavānugrahakāmasya ṛṇagrastasya me prabho |
ataḥ paraṃ pravakṣyāmi tilakasya vidhiṃ mudā || 17 ||
[Analyze grammar]

yacchrutvā mānavāḥ sarve viṣṇusārūpyamāpnuyuḥ |
lalāṭe keśavaṃ vidyātkaṃṭhe śrīpuruṣottamam || 18 ||
[Analyze grammar]

nābhau nārāyaṇaṃ devaṃ vaikuṃṭhaṃ hṛdaye tathā |
dāmodaraṃ vāmapārśve dakṣiṇe ca trivikramam || 19 ||
[Analyze grammar]

mūrdhni caiva hṛṣīkeśaṃ padmanābhaṃ ca pṛṣṭhataḥ |
karṇayoryamunāṃ gaṃgāṃ bāhvoḥ kṛṣṇaṃ hariṃ tathā || 20 ||
[Analyze grammar]

yathāsthāneṣu tuṣyaṃti devatā dvādaśa smṛtāḥ |
dvādaśaitāni nāmāni kartavye tilake paṭhet || 21 ||
[Analyze grammar]

sarvapāpaviśuddhātmā viṣṇulokaṃ sa gacchati |
ūrddhvapuṃḍramūrddhvarekhaṃ lalāṭe yasya dṛśyate || 22 ||
[Analyze grammar]

cāṃḍālo'pi sa śuddhātmā pūjya eva na saṃśayaḥ |
yasyorddhvapuṃḍraṃ dṛśyeta na lalāṭe narasya hi || 23 ||
[Analyze grammar]

taddarśanaṃ na karttavyaṃ dṛṣṭvā sūryaṃ nirīkṣayet |
tripuṃḍraṃ yasya viprasya ūrddhvapuṃḍraṃ na dṛśyate || 24 ||
[Analyze grammar]

taṃ dṛṣṭvāpyathavā spṛṣṭvā sacailaṃ snānamācaret |
sāṃtarālaṃ prakarttavyaṃ puṃḍraṃ haripadākṛti || 25 ||
[Analyze grammar]

niraṃtarālaṃ yaḥ kuryādūrddhvapuṃḍraṃ dvijādhamaḥ |
lalāṭe tasya satataṃ śunaḥpādo na saṃśayaḥ || 26 ||
[Analyze grammar]

nāsādikeśaparyaṃtamūrddhvapuṃḍraṃ suśobhanam |
madhye chidrasamāyuktaṃ taṃ vidyāddharimaṃdiram || 27 ||
[Analyze grammar]

vāmabhāge sthito brahmā dakṣiṇe tu sadāśivaḥ |
madhye viṣṇuṃ vijānīyāttasmānmadhyaṃ na lepayet || 28 ||
[Analyze grammar]

vīkṣyādarśe jale vāpi yo vidadhyātprayatnataḥ |
ūrddhvapuṃḍraṃ mahābhāgaḥ sayāti paramāṃ gatim || 29 ||
[Analyze grammar]

agnirāpaśca vedāśca caṃdrādityau tathānilaḥ |
viprāṇāṃ nityamete hi karṇe tiṣṭhaṃti dakṣiṇe || 30 ||
[Analyze grammar]

gaṃgā ca dakṣiṇe śrotre nāsikāyāṃ hutāśanaḥ |
ubhayorapi saṃsparśāttatkṣaṇādeva śudhyati || 31 ||
[Analyze grammar]

kṛtvā caivodakaṃ śaṃkhe vaiṣṇavānāṃ mahātmanām |
tulasīmiśritaṃ dadyātpibenmūrdhnābhivaṃdayet || 32 ||
[Analyze grammar]

prāśnīyātprokṣayeddehaṃ putramitraparigraham |
viṣṇoḥ pādodakaṃ pītaṃ koṭijanmāghanāśanam || 33 ||
[Analyze grammar]

tadevāṣṭaguṇaṃ pāpaṃ bhūmau biṃdunipātanāt |
jalaśaṃkhaṃ kare kṛtvā stutvā natvā pradakṣiṇam || 34 ||
[Analyze grammar]

satataṃ dhāryate vāri tenāptaṃ janmanaḥ phalam |
śaṃkho yasya gṛhe nāsti ghaṃṭā vā garuḍānvitā || 35 ||
[Analyze grammar]

purato vāsudevasya na sa bhāgavataḥ kalau |
yānairvā pādukābhirvā yānaṃ bhagavato gṛhe || 36 ||
[Analyze grammar]

devotsaveṣvasevā ca apraṇāmastadagrataḥ |
ucchiṣṭe caiva cāśauce bhagavadvaṃdanādikam || 37 ||
[Analyze grammar]

ekahastapraṇāmaśca tatpurastātpradakṣiṇam |
pādaprasāraṇaṃ cāgre tathā paryaṃkasevanam || 38 ||
[Analyze grammar]

śayanaṃ bhakṣaṇaṃ cāpi mithyābhāṣaṇameva ca |
uccairbhāṣāmitho jalpo rodanāni ca vigrahaḥ || 39 ||
[Analyze grammar]

nigrahānugrahau caiva strīṣu ca krūrabhāṣaṇam |
kevalāvaraṇaṃ caiva paraniṃdāparastutiḥ || 40 ||
[Analyze grammar]

aślīlabhāṣaṇaṃ caiva adhovāyuvimokṣaṇam |
śaktau gauṇopacāraśca aniveditabhakṣaṇam || 41 ||
[Analyze grammar]

tattatkālodbhavānāṃ ca phalādīnāmanarpaṇam |
viniyuktāvaśiṣṭasya pradānaṃ vyaṃjanasya yat || 42 ||
[Analyze grammar]

spaṣṭīkṛtyāśanaṃ caiva paraniṃdā parastutiḥ |
gurau maunaṃ nijastotraṃ devatāniṃdanaṃ tathā || 43 ||
[Analyze grammar]

aparādhāstathā viṣṇordvātriṃśatparikīrtitāḥ || 44 ||
[Analyze grammar]

aparādhasahasrāṇi kriyaṃte'harniśaṃ mayā |
tavāhamiti māṃ matvā kṣamasva madhusūdana || 45 ||
[Analyze grammar]

iti maṃtraṃ samuccārya praṇameddaṃḍavadbhuvi |
aparādhasahasrāṇi kṣamate sarvadā hariḥ || 46 ||
[Analyze grammar]

sāyaṃprātardvijātīnāṃ śrutyuktamaśanaṃ tathā |
viṣṇubhaktāvaśiṣṭasya dinapāpātpramucyate || 47 ||
[Analyze grammar]

annaṃ brahmā raso viṣṇuḥ khādayenmāṃsamuccaran |
evaṃ jñātvā tu yo bhuṃkte so'nnadoṣairna lipyate || 48 ||
[Analyze grammar]

alābuṃ varttulākāraṃ masūraṃ ca savalkalam |
tālaṃ śuklaṃ ca vṛṃtākaṃ na khādedvaiṣṇavo naraḥ || 49 ||
[Analyze grammar]

vaṭāśvatthārkapatreṣu kuṃbhī tiṃdukapatrayoḥ |
kovidāre kadaṃbe ca na khādedvaiṣṇavo naraḥ || 50 ||
[Analyze grammar]

śrāvaṇe varjayecchākaṃ dadhi bhādrapade tyajet |
āśvine māsi dugdhaṃ ca kārttike cāmiṣaṃ tyajet || 51 ||
[Analyze grammar]

dagdhamannaṃ tu jaṃbīraṃ yadviṣṇoraniveditam |
bījapūraṃ ca śākaṃ capratyakṣalavaṇaṃ tathā || 52 ||
[Analyze grammar]

yadi daivācca bhuṃjīta tadā tannāma saṃsmaret |
haimaṃtikaṃ sitā svinnaṃ dhānyaṃ mudgāstilā yavāḥ || 53 ||
[Analyze grammar]

kalāpa kaṃgu nīvārāḥ śākaṃ ca hilamocikā |
kālaśākaṃ ca vāstūkaṃ mūlakaṃ raktaketarat || 54 ||
[Analyze grammar]

lavaṇe siṃdhusāmudre gavye ca dadhisarpiṣī |
payonuddhṛtasāraṃ ca panasāmraharītakī || 55 ||
[Analyze grammar]

pippalī jīrakaṃ caiva nāgaraṃgaka tiṃtiḍī |
kadalīlavalī dhātrī phalānyaguḍamaikṣavam || 56 ||
[Analyze grammar]

atailapakvaṃ munayo haviṣyānnaṃ pracakṣate |
tulasīpatrapuṣpādyairmālyaṃ vahati yo naraḥ || 57 ||
[Analyze grammar]

viṣṇuṃ tamapi jānīyātsatyaṃ satyaṃ na saṃśayaḥ |
dhātrīvṛkṣaṃ samāropya viṣṇutulyo bhavennaraḥ || 58 ||
[Analyze grammar]

kurukṣetraṃ vijānīyātsārddhaṃ hastaśatatrayam |
tulasīkāṣṭhaghaṭitai rudrākṣākārakāritaiḥ || 59 ||
[Analyze grammar]

nirmitāṃ mālikāṃ kaṃṭhe nidhāyārcanamārabhet |
tathāmalakamālāṃ ca samyakpuṣkaramālikām || 60 ||
[Analyze grammar]

kaṃṭhe mālāṃ ca yatnena dhārayedviṣṇupūjakaḥ |
nirmālyaṃ tulasīmālāṃ śirasyapi ca dhārayet || 61 ||
[Analyze grammar]

nirmālyacaṃdanenāṃgamaṃkayettasya nāmabhiḥ |
lalāṭe ca gadā dhāryā mūrdhni cāpaṃ śarastathā || 62 ||
[Analyze grammar]

naṃdakaṃ caiva hṛnmadhye śaṃkhaṃ cakraṃ bhujadvaye |
śaṃkhacakrānvito vipraḥ śmaśāne mriyate yadi || 63 ||
[Analyze grammar]

prayāge yā gatiḥ proktā sā gatistasya niścitā |
yo dhṛtvā tulasīpatraṃ śirasā viṣṇutatparaḥ || 64 ||
[Analyze grammar]

karoti sarvakāryāṇi phalamāpnoti cākṣayam |
tulasīkāṣṭhamālābhirbhūṣitaḥ karma ācaran || 65 ||
[Analyze grammar]

pitṝṇāṃ devatānāṃ ca kṛtaṃ koṭiguṇaṃ bhavet |
nivedya keśave mālāṃ tulasīkāṣṭhanirmitām || 66 ||
[Analyze grammar]

vahate yo naro bhaktyā tasya naśyati pātakam |
pādyādibhirathābhyarcya imaṃ maṃtramudīrayet || 67 ||
[Analyze grammar]

yā dṛṣṭā nikhilāghasaṃghaśamanī spṛṣṭā vapuḥ pāvanī |
rogāṇāmabhivaṃditā nirasanī siktāṃtakatrāsinī |
pratyāsatti vidhāyinī bhagavataḥ kṛṣṇasya saṃropitā |
nyastā taccaraṇe vimuktiphaladā tasyai tulasyai namaḥ || 68 ||
[Analyze grammar]

iti śrīpadmapurāṇe pātālakhaṃḍe vṛṃdāvanamāhātmye devīśvarasaṃvāde |
tilakādinirṇayonāma navasaptatitamo'dhyāyaḥ || 79 ||
[Analyze grammar]