Chapter 75

[English text for this chapter is available]

pārvatyuvāca |
vṛṃdāvanarahasyaṃ ca bahudhā kathitaṃ vibho |
kena puṇyaviśeṣeṇa nāradaḥ prakṛtiṃ gataḥ || 1 ||
[Analyze grammar]

īśvara uvāca |
ekadāścaryavṛttāṃtaṃ mayā jijñāsitaṃ purā |
brahmaṇā kathitaṃ guhyaṃ śrutaṃ kṛṣṇamukhāṃbujāt || 2 ||
[Analyze grammar]

nāradaḥ pṛṣṭavānmahyaṃ tadāhaṃ prāptavānidam |
ahaṃ vaktuṃ na śaknomi tanmāhātmyaṃ kathaṃcana || 3 ||
[Analyze grammar]

kiṃ kurve śapanaṃ tasya smṛtvā sīdāmi mānase |
iti śrutvā mama vaco durmanāḥ so'bhavadyadā || 4 ||
[Analyze grammar]

tadā brahmāṇamāhūya ahamādiṣṭavānpriye |
tvayā yatkathitaṃ mahyaṃ nāradāya vadasva tat || 5 ||
[Analyze grammar]

brahmā tadā mamavaco niśamya saha nāradaḥ |
jagāma kṛṣṇasavidhaṃ natvā pṛcchattadeva tu || 6 ||
[Analyze grammar]

brahmovāca |
kimidaṃ dvātriṃśadvanaṃ vṛṃdāraṇyaṃ viśāṃpate |
śrotumicchāmi bhagavanyadiyogyo'smi me vada || 7 ||
[Analyze grammar]

śrībhagavānuvāca |
idaṃ vṛṃdāvanaṃ ramyaṃ mama dhāmaiva kevalam |
yatreme paśavaḥ sākṣādvṛkṣāḥ kīṭā narāmarāḥ || 8 ||
[Analyze grammar]

ye vasaṃti mamāṃtye te mṛtā yāṃti mamāṃtikam |
atra yā gopapatnyaśca nivasaṃti mamālaye || 9 ||
[Analyze grammar]

yoginyastāstu evaṃ hi mama devāḥ parāyaṇāḥ |
paṃcayojanamevaṃ hi vanaṃ me devarūpakam || 10 ||
[Analyze grammar]

kāliṃdīyaṃ suṣumnākhyā paramāmṛtavāhinī |
yatra devāśca bhūtāni varttaṃte sūkṣmarūpataḥ || 11 ||
[Analyze grammar]

sarvato vyāpakaścāhaṃ na tyakṣyāmi vanaṃ kvacit |
āvirbhāvastirobhāvo bhavedatra yugeyuge || 12 ||
[Analyze grammar]

tejomayamidaṃ sthānamadṛśyaṃ carmacakṣuṣām |
rahasyaṃ me prabhāvaṃ ca paśya vṛṃdāvanaṃ yuge || 13 ||
[Analyze grammar]

brahmādīnāṃ devatānāṃ na dṛśyaṃ tatkathaṃcana |
īśvara uvāca |
tacchrutvā nārado natvā kṛṣṇaṃ brahmāṇameva ca || 14 ||
[Analyze grammar]

ājagāma ha bhūrloke miśrakaṃ naimiṣaṃ vanam |
tatrāsau satkṛtaścāpi śaunakādyairmunīśvaraiḥ || 15 ||
[Analyze grammar]

pṛṣṭaścāpyāgato brahmankutastvamadhunā vada |
tacchrutvā nāradaḥ prāha golokādāgato'smyaham || 16 ||
[Analyze grammar]

śrutvā kṛṣṇamukhāṃbhojādvṛṃdāvanarahasyakam |
nārada uvāca |
tatra nānāvidhāḥ praśnāḥ kṛtāścaiva punaḥ punaḥ || 17 ||
[Analyze grammar]

samastā manavastatra yogāścaiva mayā śrutāḥ |
tāneva kathayiṣyāmi yathāpraśnaṃ ca tattvataḥ || 18 ||
[Analyze grammar]

śaunakādaya ūcuḥ |
vṛṃdāraṇyarahasyaṃ hi yaduktaṃ brahmaṇā tvayi |
tadasmākaṃ samācakṣva yadyasmāsu kṛpā tava || 19 ||
[Analyze grammar]

nārada uvāca |
kadācitsarayūtīre dṛṣṭo'smābhiśca gautamaḥ |
manasvī ca mahāduḥkhī ciṃtākulitacetanaḥ || 20 ||
[Analyze grammar]

māṃ dṛṣṭvā gautamo devaḥ papāta dharaṇītale |
uttiṣṭha vatsavatseti tamuvācāhameva hi || 21 ||
[Analyze grammar]

kathaṃ bhavānmanasvīti procya tāṃ yadi rocate |
gautama uvāca |
śrutaṃ tava mukhādeva kṛṣṇatattvaṃ ca tādṛśam || 22 ||
[Analyze grammar]

dvārakākhyaṃ māthurākhyaṃ rahasyaṃ bahuśo mayā |
vṛṃdāvanarahasyaṃ tu na śrutaṃ tvanmukhāṃbujāt || 23 ||
[Analyze grammar]

yato me manasaḥ sthairyyaṃ bhaviṣyati ca sadguro |
nārada uvāca |
idaṃ tu paramaṃ guhyaṃ rahasyātirahasyakam || 24 ||
[Analyze grammar]

purā me brahmaṇā proktaṃ tādṛgvṛṃdāvanodbhavam |
rahasyaṃ vada deveśa vṛṃdāraṇyasya me pitaḥ || 25 ||
[Analyze grammar]

itijijñāsitaṃ śrutvā kṣaṇaṃ maunī sa cābhavat |
tato mā'ha mahāviṣṇuṃ gaccha vatsa prabhuṃ mama || 26 ||
[Analyze grammar]

mayāpi tatra gaṃtavyaṃ tvayā saha na saṃśayaḥ |
ityuktvā māṃ gṛhītvā ca gato viṣṇośca dhāmani || 27 ||
[Analyze grammar]

mahāviṣṇau ca kathitaṃ mayoktaṃ yattadeva hi |
tacchrutvā ca mahāviṣṇuḥ svayaṃ bhuvamathādiśat || 28 ||
[Analyze grammar]

tvamevādeśato mahyaṃ nītvā vai nāradaṃ munim |
snānāya viniyuṃkṣvāmuṃ sarasyamṛtasaṃjñake || 29 ||
[Analyze grammar]

mahāviṣṇusamādiṣṭaḥ svayaṃbhūrmāṃ tathākarot |
tatrāmṛtasaraścāhaṃ praviśya snānamācaram || 30 ||
[Analyze grammar]

tatkṣaṇāttatsaraḥ pāre yoṣitāṃ savidhe'bhavam |
sarvalakṣaṇasapannā yoṣidrūpātivismitā || 31 ||
[Analyze grammar]

māṃ dṛṣṭvā tāḥ samāyāṃtīmapṛcchaṃśca muhurmuhuḥ |
striya ūcuḥ |
kā tvaṃ kutaḥ samāyātā kathayātmaviceṣṭitam || 32 ||
[Analyze grammar]

tāsāṃ priyakathāṃ śrutvā mayoktaṃ tanniśāmaya |
kutaḥ ko'haṃ samāyātaḥ kathaṃ vā yoṣidākṛtiḥ || 33 ||
[Analyze grammar]

svapnavaddṛśyate sarvaṃ kiṃ vā mugdho'smi bhūtale |
tacchrutvā madvaco devī provāca madhurasvanaiḥ || 34 ||
[Analyze grammar]

vṛṃdānāmnī purī ceyaṃ kṛṣṇacaṃdrapriyā sadā |
ahaṃ ca lalitādevī turyātītā ca niṣkalā || 35 ||
[Analyze grammar]

ityuktvā ca mahādevī karuṇā sāṃdramānasā |
māṃ pratyāha punardevī samāgaccha mayā saha || 36 ||
[Analyze grammar]

anyāśca yoṣitaḥ sarvāḥ kṛṣṇapādaparāyaṇāḥ |
tāśca māṃ pravadaṃtyevaṃ samāgacchānayā saha || 37 ||
[Analyze grammar]

tatonukṛṣṇacaṃdrasya caturdaśākṣaro manuḥ |
kṛpayā kathitastasyā devyāścāpi mahātmanaḥ || 38 ||
[Analyze grammar]

tatkṣaṇādeva tatsāmyamalabhaṃ vividhopamā |
tābhiḥ saha gatāstatra yatra kṛṣṇaḥ sanātanaḥ || 39 ||
[Analyze grammar]

kevalaṃ saccidānaṃdaḥ svayaṃyoṣinmayaḥ prabhuḥ |
yoṣidānaṃdahṛdayo dṛṣṭvā māṃ prābravīnmuhuḥ || 40 ||
[Analyze grammar]

samāgaccha priye kāṃte bhaktyā māṃ pariraṃbhaya |
reme varṣapramāṇena tatra caiva dvijottama || 41 ||
[Analyze grammar]

tadoktaṃ ramaṇeśena tāṃ devīṃ rādhikāṃ prati |
iyaṃ me prakṛtistatra cāsīnnāradarūpadhṛk || 42 ||
[Analyze grammar]

nītvāmṛtasaro ramyaṃ snānārthaṃ saṃniyojaya |
tayā me ramaṇasyāṃte gaditaṃ priyabhāṣitam || 43 ||
[Analyze grammar]

ahaṃ ca lalitādevī rādhikāyā ca gīyate |
ahaṃ ca vāsudevākhyo nityaṃ kāmakalātmakaḥ || 44 ||
[Analyze grammar]

satyaṃ yoṣitsvarūpo'haṃ yoṣiccāhaṃ sanātanī |
ahaṃ ca lalitādevī puṃrūpā kṛṣṇavigrahā || 45 ||
[Analyze grammar]

āvayoraṃtaraṃ nāsti satyaṃsatyaṃ hi nārada |
evaṃ yo vetti me tattvaṃ samayaṃ ca tathā manum || 46 ||
[Analyze grammar]

sa samācārasaṃketaṃ lalitā vatsa me priyaḥ |
idaṃ vṛṃdāvanaṃ nāma rahasyaṃ mama vai gṛham || 47 ||
[Analyze grammar]

na prakāśyaṃ kadā kutra vaktavyaṃ na paśau kvacit |
tato'nurādhikādevī māṃ nītvā tatsarovare || 48 ||
[Analyze grammar]

sthitvā sā kṛṣṇacaṃdrasya caraṇāṃte gatā punaḥ |
tato nimajjanādeva nārado'hamupāgataḥ || 49 ||
[Analyze grammar]

vīṇāhasto gānaparastadrahasyaṃ muhurmudā |
svayaṃbhuvaṃ namaskṛtya tatrāgāṃ viṣṇupārṣadam || 50 ||
[Analyze grammar]

svayaṃbhuvā tathā dṛṣṭaṃ noktaṃ kiṃcittadā punaḥ |
iti te kathitaṃ vatsa sugopyaṃ ca mayā tvayi || 51 ||
[Analyze grammar]

tvayāpi kṛṣṇacaṃdrasya kevalaṃ dhāmacitkalam |
gopanīyaṃ prayatnena māturjāraiva priyam || 52 ||
[Analyze grammar]

yathā proktaṃ mayā śiṣye gautame sarahasyakam |
tathā bhavatsu kārtsnyena kathitaṃ cātigopitam || 53 ||
[Analyze grammar]

yatra kutra kadācittu prakāśyaṃ munipuṃgavāḥ |
tadā śāpo bhavedviprāḥ kṛṣṇacaṃdrasya niścitam || 54 ||
[Analyze grammar]

imaṃ kṛṣṇasya līlābhiryutamadhyāyamuttamam |
yaḥ paṭhecchṛṇuyādvāpi sa yāti paramaṃ padam || 55 ||
[Analyze grammar]

iti śrīpadmapurāṇe pātālakhaṃḍe vṛṃdāvanamāhātmye |
nāradīyānunaye paṃcasaptatitamo'dhyāyaḥ || 75 ||
[Analyze grammar]