Chapter 71

[English text for this chapter is available]

śrīdevyuvāca |
bhagavansarvabhūteśa sarvātmansarvasaṃbhava |
deveśvara mahādeva sarvajña karuṇākara || 1 ||
[Analyze grammar]

tvayānukaṃpitaivāhaṃ bhūyo'pyāhānukaṃpayā |
trailokyamohanā maṃtrāstvayā me kathitāḥ prabho || 2 ||
[Analyze grammar]

tena devena gopībhirmahāmohanarūpiṇā |
kena kena viśeṣaṇa cikrīḍe tadvadasva me || 3 ||
[Analyze grammar]

mahādeva uvāca |
ekadā vādayanvīṇāṃ nārado munipuṃgavaḥ |
kṛṣṇāvatāramājñāya prayayau naṃdagokulam || 4 ||
[Analyze grammar]

gatvā tatra mahāyogamayeśaṃ vibhumacyutam |
bālanāṭyadharaṃ devadarśanaṃ naṃdaveśmani || 5 ||
[Analyze grammar]

sukomalapaṭāstīrṇahemaparyaṃkikopari |
śayānaṃ gopakanyābhiḥ prekṣamāṇaṃ sadā mudam || 6 ||
[Analyze grammar]

atīva sukumārāṃgaṃ mugdhaṃ mugdhavilokanam |
visrastanīlakuṭilakuṃtalāvanimaṃḍalam || 7 ||
[Analyze grammar]

kiṃcitsmitāṃkuravyaṃjadekadviradakuḍmalam |
svaprabhābhirbhāsayaṃtaṃ samaṃtādbhavanodaram || 8 ||
[Analyze grammar]

digvāsasaṃ samālokya so'tiharṣamavāpa ha |
saṃbhāṣya gopatiṃ naṃdamāha sarvaprabhupriyaḥ || 9 ||
[Analyze grammar]

nārāyaṇaparāṇāṃ tu jīvanaṃ hyatidurlabham |
asya prabhāvamatulaṃ na jānaṃtīha kecana || 10 ||
[Analyze grammar]

bhava brahmādayo'pyasminratiṃ vāṃcchanti śāśvatīm |
caritaṃ cāsya bālasya sarveṣāmeva harṣaṇam || 11 ||
[Analyze grammar]

mudā gāyaṃti śṛṇvaṃti cābhinaṃdaṃti tādṛśāḥ |
asmiṃstava sute'ciṃtyaprabhāve snigdhamānasāḥ || 12 ||
[Analyze grammar]

narāḥ saṃti na teṣāṃ vai bhavabādhā bhaviṣyati |
muṃceha paralokecchāḥ sarvā ballavasattama || 13 ||
[Analyze grammar]

ekāṃtenaikabhāvena bāle'sminprītimācara |
ityuktvā naṃdabhavanānniṣkrāṃto munipuṃgavaḥ || 14 ||
[Analyze grammar]

tenārcito viṣṇubuddhyā praṇamya ca visarjitaḥ |
athāsau ciṃtayāmāsa mahābhāgavato muniḥ || 15 ||
[Analyze grammar]

asya kāṃtā bhagavatī lakṣmīrnārāyaṇe harau |
vidhāya gopikārūpaṃ krīḍārthaṃ śārṅgadhanvanaḥ || 16 ||
[Analyze grammar]

avaśyamavatīrṇā sā bhaviṣyati na saṃśayaḥ |
tāmahaṃ vicinomyadya gehegehe vrajaukasām || 17 ||
[Analyze grammar]

vimṛśyaivaṃ munivaro gehāni vrajavāsinām |
praviveśātithirbhūtvā viṣṇubuddhyā supūjitaḥ || 18 ||
[Analyze grammar]

sarveṣāṃ ballavādīnāṃ ratiṃ naṃdasute parām |
dṛṣṭvā munivaraḥ sarvānmanasā praṇanāma ha || 19 ||
[Analyze grammar]

gopālānāṃ gṛhe bālāṃ dadarśa śvetarūpiṇīm |
sa dṛṣṭvā tarkayāmāsa ramā hyeṣā na saṃśayaḥ || 20 ||
[Analyze grammar]

praviveśa tato dhīmānnaṃdasakhyurmahātmanaḥ |
kasyacidgopavaryyasya bhānunāmno gṛhaṃ mahat || 21 ||
[Analyze grammar]

arcito vidhivattena so'pyapṛcchanmahāmanāḥ |
sādho tvamasi vikhyāto dharmaniṣṭhatayā bhuvi || 22 ||
[Analyze grammar]

tavāhaṃ dhanadhānyādi samṛddhiṃ saṃvibhāvaye |
kaccitte yogyaḥ putro'sti kanyā vā śubhalakṣaṇā || 23 ||
[Analyze grammar]

yataste kīrtirakhilaṃ lokaṃ vyāpya bhaviṣyati |
ityukto munivaryyeṇa bhānurānīya putrakam || 24 ||
[Analyze grammar]

mahātejasvinaṃ dṛptaṃ nāradāyābhyavādayat |
dṛṣṭvā munivarastaṃ tu rūpeṇāpratimaṃ bhuvi || 25 ||
[Analyze grammar]

padmapatraviśālākṣaṃ sugrīvaṃ suṃdarabhruvam |
cārudaṃtaṃ cārukarṇaṃ sarvāvayavasuṃdaram || 26 ||
[Analyze grammar]

taṃ samāśliṣya bāhubhyāṃ snehāśrūṇi vimucya ca |
tataḥ sa gadgada prāha praṇayena mahāmuniḥ || 27 ||
[Analyze grammar]

nārada uvāca |
ayaṃ śiśuste bhavitā susakhā rāmakṛṣṇayoḥ |
vihariṣyati tābhyāṃ ca rātriṃdivamataṃdritaḥ || 28 ||
[Analyze grammar]

tata ābhāṣya taṃ gopapravaraṃ munipuṃgavaḥ |
yadā gaṃtuṃ manaścakre tatraivaṃ bhānurabravīt || 29 ||
[Analyze grammar]

ekāsti putrikā deva devapatnyupamā mama |
kanīyasī śiśorasya jaḍāṃdhabadhirākṛtiḥ || 30 ||
[Analyze grammar]

utsāhādvṛddhaye yāce tvāṃ varaṃ bhagavattama |
prasannadṛṣṭimātreṇa susthirāṃ kuru bālikām || 31 ||
[Analyze grammar]

śrutvaivaṃ nārado vākyaṃ kautukākṛṣṭamānasaḥ |
atha praviśya bhavanaṃ luṭhaṃtīṃ bhūtale sutām || 32 ||
[Analyze grammar]

utthāpyāṃke nidhāyātisnehavihvalamānasaḥ |
bhānurapyāyayau bhaktinamro munivarāṃtikam || 33 ||
[Analyze grammar]

atha bhāgavataśreṣṭhaḥ kṛṣṇasyātipriyo muniḥ |
dṛṣṭvā tasyāḥ paraṃ rūpamadṛṣṭāśrutamadbhutam || 34 ||
[Analyze grammar]

abhūtpūrvasamaṃ mugdho haripremā mahāmuniḥ |
vigāhya paramānaṃdasiṃdhumekarasāyanam || 35 ||
[Analyze grammar]

muhūrttadvitayaṃ tatra munirāsīcchilopamaḥ |
munīṃdraḥ pratibuddhastu śanairunmīlya locane || 36 ||
[Analyze grammar]

mahāvismayamāpannastūṣṇīmeva sthito'bhavat |
aṃtarhṛdi mahābuddhirevamevaṃ vyaciṃtayat || 37 ||
[Analyze grammar]

bhrāṃtaṃ sarveṣu lokeṣu mayā svacchaṃdacāriṇā |
asyā rūpeṇa sadṛśī dṛṣṭvā naiva ca kutracit || 38 ||
[Analyze grammar]

brahmaloke rudraloka iṃdraloke ca me gatiḥ |
na kopi śobhākoṭyaṃśaḥ kutrāpyasyā vilokitaḥ || 39 ||
[Analyze grammar]

mahāmāyā bhagavatī dṛṣṭā śaileṃdranaṃdinī |
yasyā rūpeṇa sakalaṃ muhyate sacarācaram || 40 ||
[Analyze grammar]

sāpyasyāḥ sukumārāṃgī lakṣmīṃ nāpnoti karhicit |
lakṣmīḥ sarasvatī kāṃti vidyādyāśca varastriyaḥ || 41 ||
[Analyze grammar]

chāyāmapi spṛśaṃtyasyāḥ kadācinnaiva dṛśyate |
viṣṇoryanmohinīrūpaṃ haro yena vimohitaḥ || 42 ||
[Analyze grammar]

mayā dṛṣṭaṃ ca tadapi kuto'syāsadṛśaṃ bhavet |
tato'syāstattvamājñātuṃ na me śaktiḥ kathaṃcana || 43 ||
[Analyze grammar]

anye cāpi na jānaṃti prāyeṇaināṃ hareḥ priyām |
asyāḥ saṃdarśanādeva goviṃdacaraṇāṃbuje || 44 ||
[Analyze grammar]

yā premarddhirabhūtsā me bhūtapūrvā na karhicit |
ekāṃte naumi bhavatīṃ darśayitvātivaibhavam || 45 ||
[Analyze grammar]

kṛṣṇasya saṃbhavatyasyā rūpaṃ paramatuṣṭaye |
vimṛśyaivaṃ munirgopapravaraṃ preṣya kutracit || 46 ||
[Analyze grammar]

nibhṛte parituṣṭāva bālikāṃ divyarūpiṇīm |
api devi mahāyogamāyeśvari mahāprabhe || 47 ||
[Analyze grammar]

mahāmohanadivyāṃgi mahāmādhuryavarṣiṇi |
mahādbhutarasānaṃdaśithilīkṛtamānase || 48 ||
[Analyze grammar]

mahābhāgyena kenāpi gatāsi mama dṛkpatham |
nityamaṃtarmukhādṛṣṭistava devi vibhāvyate || 49 ||
[Analyze grammar]

aṃtareva mahānaṃdaparitṛptaiva lakṣyase |
prasannaṃ madhuraṃ saumyamidaṃ sumukhamaṃḍanam || 50 ||
[Analyze grammar]

vyanaktiparamāścaryaṃ kamapyaṃtaḥ sukhodayam |
rajaḥ saṃbaṃdhikalikā śaktistatvātiśobhane || 51 ||
[Analyze grammar]

sṛṣṭisthitisamāhārarūpiṇī tvamadhiṣṭhitā |
tattvaṃ viśuddhasatvāśu śaktirvidyātmikā parā || 52 ||
[Analyze grammar]

paramānaṃdasaṃdohaṃ dadhatī vaiṣṇavaṃ param |
kā tvayāścaryavibhave brahmarudrādidurgame || 53 ||
[Analyze grammar]

yogīṃdrāṇāṃ dhyānapathaṃ na tvaṃ spṛśasi karhicit |
icchāśaktirjñānaśaktiḥ kriyāśaktistaveśituḥ || 54 ||
[Analyze grammar]

tavāṃśamātramityevaṃ manīṣā me pravarttate |
māyāvibhūtayo'ciṃtyāstanmāyārbhakamāyinaḥ || 55 ||
[Analyze grammar]

pareśasya mahāviṣṇostāḥ sarvāste kalākalāḥ |
ānaṃdarūpiṇī śaktistvamīśvari na saṃśayaḥ || 56 ||
[Analyze grammar]

tvayā ca krīḍate kṛṣṇo nūnaṃ vṛṃdāvane vane |
kaumāreṇaiva rūpeṇa tvaṃ viśvasya ca mohinī || 57 ||
[Analyze grammar]

tāruṇyavayasā spṛṣṭaṃ kīdṛkte rūpamadbhutam |
kīdṛśaṃ tava lāvaṇyaṃ līlāhāsekṣaṇānvitam || 58 ||
[Analyze grammar]

hari mānuṣalobhena vapurāścaryamaṃḍitam |
draṣṭuṃ tadahamicchāmi rūpaṃ te harivallabhe || 59 ||
[Analyze grammar]

yena naṃdasutaḥ kṛṣṇo mohaṃ samupayāsyati |
idānīṃ mama kāruṇyānnijaṃ rūpaṃ maheśvari || 60 ||
[Analyze grammar]

praṇatāya prapannāya prakāśayitumarhasi |
ityuktā munivaryyeṇa tadanuvratacetasā || 61 ||
[Analyze grammar]

mahāmāheśvarīṃ natvā mahānaṃdamayīṃ parām |
mahāprematarotkaṃṭhā vyākulāṃgīṃ śubhekṣaṇām || 62 ||
[Analyze grammar]

īkṣamāṇena goviṃdamevaṃ varṇayatāsthitam |
jayakṛṣṇa manohāriñjaya vṛṃdāvanapriya || 63 ||
[Analyze grammar]

jayabhrūbhaṃgalalita jayaveṇuravākula |
jaya barhakṛtottaṃsa jayagopīvimohana || 64 ||
[Analyze grammar]

jaya kuṃkumaliptāṃga jaya ratnavibhūṣaṇa |
kadāhaṃ tvatprasādena anayā divyarūpayā || 65 ||
[Analyze grammar]

sahitaṃ navatāruṇya manohāri vapuḥśriyā |
vilokayiṣye kaiśore mohanaṃ tvāṃ jagatpate || 66 ||
[Analyze grammar]

evaṃ kīrttayatastasya tatkṣaṇādeva sā punaḥ |
babhūva dadhatī divyaṃ rūpamatyaṃtamohanam || 67 ||
[Analyze grammar]

caturdaśābdavayasā saṃmitaṃ lalitaṃ param |
samānavayasaścānyāstadaiva vrajabālikāḥ || 68 ||
[Analyze grammar]

āgatya veṣṭayāmāsurdivyabhūṣāṃbarasrajaḥ |
munīṃdraḥ sa tu niśceṣṭo babhūvāścaryamohitaḥ || 69 ||
[Analyze grammar]

bālāyāstāstadā sakhyaścaraṇāṃbukaṇairmunim |
niṣicya bodhayāmāsurūcuśca kṛpayānvitāḥ || 70 ||
[Analyze grammar]

munivarya mahābhāga mahāyogeśvareśvara |
tvayaiva parayā bhaktyā bhagavānharirīśvaraḥ || 71 ||
[Analyze grammar]

nūnamārādhito devo bhaktānāṃ kāmapūrakaḥ |
yadiyaṃbrahmarudrādyairdevaiḥ siddhamunīśvaraiḥ || 72 ||
[Analyze grammar]

mahābhāgavataiścānyairdurdarśā durgamāpi ca |
atyadbhutavayorūpamohinī harivallabhā || 73 ||
[Analyze grammar]

kenāpyaciṃtya bhāgyena tavadṛṣṭipathaṃ gatā |
uttiṣṭhottiṣṭha viprarṣe dhairyamālaṃbya satvaram || 74 ||
[Analyze grammar]

enāṃ pradakṣiṇīkṛtya namaskuru punaḥpunaḥ |
kiṃ na paśyasi cārvaṃgīmatyaṃtavyākulāmiva || 75 ||
[Analyze grammar]

asminneva kṣaṇe nūnamaṃtardhānaṃ gamiṣyati |
nānayā saha saṃlāpaḥ kathaṃcitte bhaviṣyati || 76 ||
[Analyze grammar]

darśanaṃ ca punarnāsyāḥ prāpsyasi brahmavittama |
kiṃtu vṛṃdāvane kāpi bhātyaśokalatā śubhā || 77 ||
[Analyze grammar]

sarvakāle'pi puṣpāḍhyā sarvadigvyāpi saurabhā |
govarddhanādadūreṇa kusumākhyasarastaṭe || 78 ||
[Analyze grammar]

tanmūle hyarddharātre ca drakṣyasyasmānaśeṣataḥ |
śrutvaivaṃ vacanaṃ tāsāṃ snehavihvalacetasām || 79 ||
[Analyze grammar]

yāvatpradakṣiṇīkṛtya praṇameddaṃḍavanmuniḥ |
muhūrttadvitayaṃ bālāṃ nānānirmāṇaśobhanām || 80 ||
[Analyze grammar]

āhūya bhānuṃ provāca nāradaḥ sarvaśobhanām |
evaṃ prabhāvā bāleyaṃ na sādhyā daivatairapi || 81 ||
[Analyze grammar]

kiṃtu yadgṛhametasyāḥ padacihnavibhūṣitam |
tatra nārāyaṇo devaḥ svayaṃ vasati mādhavaḥ || 82 ||
[Analyze grammar]

lakṣmīśca vasate nityaṃ sarvābhiḥ sarvasiddhibhiḥ |
adya enāṃ varārohāṃ sarvābharaṇabhūṣaṇām || 83 ||
[Analyze grammar]

devīmiva parāṃ gehe rakṣa yatnena sattama |
ityuktvā manasaivaināṃ mahābhāgavatottamaḥ || 84 ||
[Analyze grammar]

tadrūpameva saṃsmṛtya praviṣṭo gahanaṃ vanam |
aśokalatikāmūlamāsādya munisattamaḥ || 85 ||
[Analyze grammar]

pratīkṣamāṇo devīṃ tāṃ tatraivāgamanaṃ niśi |
sthito'tra premavikalaściṃtayankṛṣṇavallabhām || 86 ||
[Analyze grammar]

atha madhyaniśābhāge yuvatyaḥ paramādbhutāḥ |
pūrvaṃ dṛṣṭvāstathānyāśca vicitrābharaṇasrajaḥ || 87 ||
[Analyze grammar]

dṛṣṭvā manasi saṃbhrāṃto daṃḍavatpatito bhuvi |
parivārya muniṃ sarvāstāḥ praviviśuḥ śubhāḥ || 88 ||
[Analyze grammar]

praṣṭukāmo'pi sa muniḥ kiṃcitsvābhimataṃ priyam |
nāśakatpremalāvaṇyapriyabhāṣāpradharṣitaḥ || 89 ||
[Analyze grammar]

athāgatā muniśreṣṭhaṃ kṛtāṃjalimavasthitam |
bhaktibhārānatagrīvaṃ savismayaṃ sasaṃbhramam || 90 ||
[Analyze grammar]

suvinītatamaṃ prāha tatraiva karuṇānvitā |
aśokamālinī nāmnā aśokavanadevatā || 91 ||
[Analyze grammar]

aśokamālinyuvāca |
aśokakalikāyāṃ tu vasāmyasyāṃ mahāmune |
raktāṃbaradharā nityaṃ raktamālānulepanā || 92 ||
[Analyze grammar]

raktasiṃdūrakalikā raktotpalavataṃsinī |
raktamāṇikyakeyūra mukuṭādivibhūṣitā || 93 ||
[Analyze grammar]

ekadā priyayā sārddhaṃ viharaṃtyo madhūtsave |
tatraiva militā gopabālikāścitravāsasaḥ || 94 ||
[Analyze grammar]

ahaṃ cāśokamālābhirgopaveṣadharaṃ harim |
ramārūpāśca tāḥ sarvā bhaktyā samyagapūjayam || 95 ||
[Analyze grammar]

tataḥ prabhṛti caitāsāṃ madhye tiṣṭhāmi sarvadā |
bhūṣābhirvividhābhiśca toṣayitvā ramāpatim || 96 ||
[Analyze grammar]

parātparamahaṃ sarvaṃ vijānāmīha sarvataḥ |
gogopagopikādīnāṃ rahasyaṃ cāpi vedmyaham || 97 ||
[Analyze grammar]

tava jijñāsitaṃ sarvaṃ hṛdi pratyabhibhāṣitam |
tāṃ devīmadbhutākārāmadbhutānaṃdadāyinīm || 98 ||
[Analyze grammar]

hareḥ priyāṃ hiraṇyābhāṃ hīrakojjvalamudrikām |
kathaṃ paśyāmi lolākṣīṃ kathaṃ vā tatpadāṃbujam || 99 ||
[Analyze grammar]

ārādhyate'tibhaktyeti tvayā brahmanvimarśitam |
tatra te kathayiṣyāmi vṛttāṃtaṃ sumahātmanām || 100 ||
[Analyze grammar]

mānase sarasi sthitvā tapastīvramupeyuṣām |
japatāṃ siddhamaṃtrāṃśca dhyāyatāṃ harimīśvaram || 101 ||
[Analyze grammar]

munīnāṃ kāṃkṣatāṃ nityaṃ tasyā eva padāṃbujam |
ekasaptatisāhasraṃ saṃkhyātānāṃ mahaujasām || 102 ||
[Analyze grammar]

tatte'haṃ kathayāmyadya tadrahasyaṃ paraṃ vane || 103 ||
[Analyze grammar]

iti śrīpadmapurāṇe pātālakhaṃḍe śrīrādhākṛṣṇa |
māhātmye ekasaptatitamo'dhyāyaḥ || 71 ||
[Analyze grammar]