Chapter 70

[English text for this chapter is available]

pārvatyuvāca |
yadākarṇanametasya ye vā pāriṣadāḥ prabhoḥ |
tadahaṃ śrotumicchāmi kathayasva dayānidhe || 1 ||
[Analyze grammar]

īśvara uvāca |
rādhayā saha goviṃdaṃ svarṇasiṃhāsanesthitam |
pūrvoktarūpalāvaṇyaṃ divyabhūṣāṃbarasrajam || 2 ||
[Analyze grammar]

tribhaṃgī maṃju susnigdhaṃ gopīlocanatārakam |
tadbāhye yogapīṭhe ca svarṇasiṃhāsanāvṛte || 3 ||
[Analyze grammar]

pratyaṃgarabhasāveśāḥ pradhānāḥ kṛṣṇavallabhāḥ |
lalitādyāḥ prakṛtyaṃśā mūlaprakṛtirādhikā || 4 ||
[Analyze grammar]

saṃmukhe lalitā devī śyāmalā vāyukoṇake |
uttare śrīmatī dhanyā eśānyāṃ śrīharipriyā || 5 ||
[Analyze grammar]

viśākhā ca tathā pūrve śaibyā cāgnau tataḥ param |
padmā ca dakṣiṇe paścānnairṛte kramaśaḥ sthitāḥ || 6 ||
[Analyze grammar]

yogapīṭhe kesarāgre cāru caṃdrāvatī priyā |
aṣṭau prakṛtayaḥ puṇyāḥ pradhānāḥ kṛṣṇavallabhāḥ || 7 ||
[Analyze grammar]

pradhānaprakṛtistvādyā rādhā caṃdrāvatī samā |
caṃdrāvalī citrarekhā caṃdrā madanasuṃdarī || 8 ||
[Analyze grammar]

priyā ca śrīmadhumatī caṃdrarekhā haripriyā |
ṣoḍaśādyāḥ prakṛtayaḥ pradhānāḥ kṛṣṇavallabhāḥ || 9 ||
[Analyze grammar]

vṛṃdāvaneśvarī rādhā tathā caṃdrāvalī priyā |
abhinnaguṇalāvaṇya sauṃdaryāścārulocanāḥ || 10 ||
[Analyze grammar]

manoharā mugdhaveṣāḥ kiśorīvayasojjvalāḥ |
agretanāstathā cānyā gopakanyāḥ sahasraśaḥ || 11 ||
[Analyze grammar]

śuddhakāṃcanapuṃjābhāḥ suprasannāḥ sulocanāḥ |
tadrūpahṛdayārūḍhāstadāśleṣa samutsukāḥ || 12 ||
[Analyze grammar]

śyāmāmṛtarase magnāḥ sphurattadbhāvamānasāḥ |
netrotpalārcite kṛṣṇapādābje'pitacetasaḥ || 13 ||
[Analyze grammar]

śrutikanyāstato dakṣe sahasrāyutasaṃyutāḥ |
jaganmugdhīkṛtākārā hṛdvartikṛṣṇalālasāḥ || 14 ||
[Analyze grammar]

nānāsatvasvarālāpamugdhīkṛtajagattrayāḥ |
tatra gūḍharahasyāni gāyaṃtyaḥ premavihvalāḥ || 15 ||
[Analyze grammar]

devakanyāstataḥ savye divyaveṣārasojjvalāḥ |
nānāvaidigdhyanipuṇā divyabhāvabharānvitāḥ || 16 ||
[Analyze grammar]

sauṃdaryātiśayenāḍhyāḥ kaṭākṣātimanoharāḥ |
nirlajjāstatra goviṃde tadaṃgasparśanodyatāḥ || 17 ||
[Analyze grammar]

tadbhāvamagnamanasaḥ smitasāci nirīkṣaṇāḥ |
maṃdirasya tato bāhye priyayā viśadāvṛte || 18 ||
[Analyze grammar]

samānaveṣavayasaḥ samānabalapauruṣāḥ |
samānaguṇakarmāṇaḥ samānābharaṇapriyāḥ || 19 ||
[Analyze grammar]

samānasvarasaṃgīta veṇuvādanatatparāḥ |
śrīdāmā paścime dvāre vasudāmā tathottare || 20 ||
[Analyze grammar]

sudāmā ca tathā pūrve kiṃkiṇī cāpi dakṣiṇe |
tadbāhye svarṇapīṭhe ca suvarṇamaṃdirāvṛte || 21 ||
[Analyze grammar]

svarṇavedyaṃtarasthe tu svarṇābharaṇabhūṣite |
stokakṛṣṇaṃ subhadrādyairgopālairayutāyutaiḥ || 22 ||
[Analyze grammar]

śṛṃgavīṇāveṇuvetravayoveṣākṛtisvaraiḥ |
tadguṇadhyānasaṃyuktairgāyadbhirapi vihvalaiḥ || 23 ||
[Analyze grammar]

citrārpitaiścitrarūpaiḥ sadānaṃdāśruvarṣibhiḥ |
pulakākulasarvāṃgairyogīṃdrairiva vismitaiḥ || 24 ||
[Analyze grammar]

kṣaratyayobhirgoviṃdairasaṃkhyātairupāvṛtam |
tadbāhye svarṇaprākāre koṭisūryasamujjavale || 25 ||
[Analyze grammar]

caturdikṣumahodyānaṃ maṃjusaurabhamohite |
paścime saṃmukhe śrīmatpārijātadrumāśraye || 26 ||
[Analyze grammar]

tadadhastu svarṇapīṭhe svarṇamaṃḍanamaṃḍite |
tanmadhye maṇimāṇikya divyasiṃhāsanojjvale || 27 ||
[Analyze grammar]

tatropari parānaṃdaṃ vāsudevaṃ jagatprabhum |
triguṇātītacidrūpaṃ sarvakāraṇakāraṇam || 28 ||
[Analyze grammar]

iṃdranīlaghanaśyāmaṃ nīlakuṃcitakuṃtalam |
padmapatraviśālākṣaṃ makarākṛtikuṃḍalam || 29 ||
[Analyze grammar]

caturbhujaṃ tu cakrāsigadāśaṃkhāṃbujāyudham |
ādyaṃtarahitaṃ nityaṃ pradhānaṃ puruṣottamam || 30 ||
[Analyze grammar]

jyotīrūpaṃ mahaddhāma purāṇaṃ vanamālinam |
pītāṃbaradharaṃ snigdhaṃ divyabhūṣaṇabhūṣitam || 31 ||
[Analyze grammar]

divyānulepanaṃ rājaccitritāṃga manoharam |
rukmiṇī satyabhāmā ca nāgnajitī sulakṣaṇā || 32 ||
[Analyze grammar]

mitraviṃdānuviṃdā sunaṃdā jāṃbavatī priyā |
suśīlā cāṣṭamahilā vāsudevapriyāstataḥ || 33 ||
[Analyze grammar]

udbhrājitāḥ pāriṣadā vṛtayorbhaktitatparāḥ |
uttare sumahodyāne haricaṃdanasaṃśraye || 34 ||
[Analyze grammar]

tatrādhastu svarṇapīṭhe maṇimaṃḍapamaṃḍite |
tanmadhye hemanirmāṇadale siṃhāsanojjavale || 35 ||
[Analyze grammar]

tatraiva saha revatyā saṃkarṣaṇa halāyudham |
īśvarasya priyānaṃtamabhinnaguṇarūpiṇam || 36 ||
[Analyze grammar]

śuddhasphaṭikasaṃkāśaṃ raktāṃbuja dalekṣaṇam |
nīlapaṭṭadharaṃ snigdhaṃ divyabhūṣāsragaṃbaram || 37 ||
[Analyze grammar]

madhupāne sadāsaktaṃ madhughūrṇitalocanam |
pravīradakṣiṇebhāge maṃjunābhyaṃtarasthite || 38 ||
[Analyze grammar]

saṃtānavṛkṣamūle tu maṇimaṃdiramaṃḍitam |
tanmadhye maṇimāṇikya divyasiṃhāsanojjvale || 39 ||
[Analyze grammar]

pradyumnaṃ ca ratī devaṃ tatroparisukhasthitam |
jaganmohanasauṃdaryyasāraśreṇīrasātmakam || 40 ||
[Analyze grammar]

asitāṃbhojapuṃjābhamaraviṃdadalekṣaṇam |
divyālaṃkārabhūṣābhirdivyagaṃdhānulepanam || 41 ||
[Analyze grammar]

jaganmugdhīkṛtāśeṣa sauṃdaryāścaryavigraham |
pūrvodyāne mahāraṇye suradruma samāśraye || 42 ||
[Analyze grammar]

tatrādhastu svarṇapīṭhe hemamaṃḍapamaṃḍite |
tasya madhye sthire rājaddivyasiṃhāsanojjvale || 43 ||
[Analyze grammar]

divyoṣayāsamaṃ śrīmadaniruddhaṃ jagatpatim |
sāṃdrānaṃdaghanaśyāmaṃ susnigdhaṃ nīlakuṃtalam || 44 ||
[Analyze grammar]

subhrūnnatalatābhaṃgīṃ sukapolaṃ sunāsikam |
sugrīvaṃ suṃdaraṃ vakṣo manohara manoharam || 45 ||
[Analyze grammar]

kirīṭinaṃ kuṃḍalinaṃ kaṃṭhabhūṣāvibhūṣitam |
maṃjumaṃjīramādhuryādatisauṃdarya vigraham || 46 ||
[Analyze grammar]

priyabhṛtyagaṇārādhyaṃ yatra saṃgītakapriyam |
pūrṇabrahmasadānaṃdaṃ śuddhasatvasvarūpakam || 47 ||
[Analyze grammar]

tasyorddhve cāṃtarikṣe ca viṣṇuṃ sarveśvareśvaram |
anādimādicidrūpaṃ cidānaṃdaṃ paraṃ vibhum || 48 ||
[Analyze grammar]

triguṇātītamavyaktaṃ nityamakṣayamavyayam |
sameghapuṃjamādhuryasauṃdaryaśyāmavigraham || 49 ||
[Analyze grammar]

nīlakuṃcitasusnigdha keśapāśātisuṃdaram |
araviṃdadalasnigdha sudīrghacārulocanam || 50 ||
[Analyze grammar]

kirīṭakuṃḍalodgaṃḍa śuddhasatvātmabhirvṛtam |
ātmārāmaiśca cidrūpaistanmūrtidhyānatatparaiḥ || 51 ||
[Analyze grammar]

hṛdayārūḍha taddhynaurnāsāgranyastalocanaiḥ |
kriyate'haitukībhaktiḥ kāyahṛdvṛttibhāṣitaiḥ || 52 ||
[Analyze grammar]

tatsavye yakṣagaṃdharvasiddhavidyādharādibhiḥ |
sukāṃtairapsaraḥsaṃghairnṛtyasaṃgītatatparaiḥ || 53 ||
[Analyze grammar]

tadaṃgabhajanaṃ kāmaṃ vāṃchadbhiḥ kṛṣṇalālasaiḥ |
tadagre vaiṣṇavaiḥ sarvaiścāṃtarikṣe sukhāsane || 54 ||
[Analyze grammar]

prahlādanāradādyaiśca kumāraśukavaiṣṇavaiḥ |
janakādyairlasadbhāvairhṛdbāhya sphūrtitatparaiḥ || 55 ||
[Analyze grammar]

pulakākulasarvāṃgaiḥ sphuratpremasamākulaiḥ |
rahasyāmṛtasaṃsiktairarddhayugmākṣaro manuḥ || 56 ||
[Analyze grammar]

maṃtracūḍāmaṇiḥ proktaḥ sarvamaṃtraikakāraṇam |
sarvadevasya maṃtrāṇāṃ kaiśoraṃ maṃtrahetukam || 57 ||
[Analyze grammar]

sarvakaiśoramaṃtrāṇāṃ hetuścūḍāmaṇirmanuḥ |
japaṃ kurvaṃti manasā pūrṇapremasukhāśrayāḥ || 58 ||
[Analyze grammar]

vāṃchaṃti tatpadāṃbhoje niścalaṃ premasādhanam |
tadbāhye sphaṭikādyucca prāvāre sumanohare || 59 ||
[Analyze grammar]

kuṃkumaiḥ sitaraktādyaiścaturdikṣu samākulaiḥ |
śuklaṃ caturbhujaṃ viṣṇuṃ paścime dvārapālakam || 60 ||
[Analyze grammar]

śaṃkhacakragadāpadmakirīṭādi vibhūṣitam |
raktaṃ caturbhujaṃ padmaśaṃkhacakragadāyudham || 61 ||
[Analyze grammar]

kirīṭakuṃḍaloddīpta dvārapālakamuttare |
gauraṃ caturbhujaṃ viṣṇuṃ śukhacakragadāyudham || 62 ||
[Analyze grammar]

kirīṭakuṃḍalādyaiśca śobhitaṃ vanamālinam |
pūrvadvāre dvārapālaṃ gauraṃ viṣṇuṃ prakīrtitam || 63 ||
[Analyze grammar]

kṛṣṇavarṇaṃ caturbāhuṃ śaṃkhacakrādibhūṣaṇam |
dakṣiṇadvārapālaṃ tu śrīviṣṇuṃkṛṣṇavarṇakam || 64 ||
[Analyze grammar]

śrīkṛṣṇacaritaṃ hyetadyaḥ paṭhetprayataḥ śuciḥ |
śṛṇuyādvāpi yo bhaktyā goviṃde labhate ratim || 65 ||
[Analyze grammar]

iti śrīpadmapurāṇe pātālakhaṃḍe kṛṣṇacarite saptatitamo'dhyāyaḥ || 70 ||
[Analyze grammar]