Chapter 69

[English text for this chapter is available]

ṛṣaya ūcuḥ |
samyakchruto mahābhāga tvatto rāmāśvamedhakaḥ |
idānīṃ vada māhātmyaṃ śrīkṛṣṇasya mahātmanaḥ || 1 ||
[Analyze grammar]

sūta uvāca |
śṛṇvaṃtu muniśārdūlāḥ śrīkṛṣṇacaritāmṛtam |
śivā papraccha bhūteśaṃ yattadvaḥ kīrtayāmyaham || 2 ||
[Analyze grammar]

ekadā pārvatī devī śivaṃ saṃsnigdhamānasā |
praṇayena namaskṛtya provāca vacanaṃ tvidam || 3 ||
[Analyze grammar]

pārvatyuvāca |
anaṃtakoṭibrahmāṃḍa tadbāhyābhyaṃtarasthiteḥ |
viṣṇoḥ sthānaṃ paraṃ teṣāṃ pradhānaṃ varamuttamam || 4 ||
[Analyze grammar]

yatparaṃ nāsti kṛṣṇasya priyaṃ sthānaṃ manoramam |
tatsarvaṃ śrotumicchāmi kathayasva mahāprabho || 5 ||
[Analyze grammar]

īśvara uvāca |
guhyādguhyataraṃ guhyaṃ paramānaṃdakārakam |
atyadbhutaṃ rahaḥsthānamānaṃdaṃ paramaṃ param || 6 ||
[Analyze grammar]

durlabhānāṃ ca paramaṃ durlabhaṃ mohanaṃ param |
sarvaśaktimayaṃ devi sarvasthāneṣu gopitam || 7 ||
[Analyze grammar]

sātvatāṃ sthānamūrddhanyaṃ viṣṇoratyaṃtadurlabham |
nityaṃ vṛṃdāvanaṃ nāma brahmāṃḍopari saṃsthitam || 8 ||
[Analyze grammar]

pūrṇabrahmasukhaiśvaryaṃ nityamānaṃdamavyayam |
vaikuṃṭhādi tadaṃśāṃśaṃ svayaṃ vṛṃdāvanaṃ bhuvi || 9 ||
[Analyze grammar]

golokaiśvaryaṃ yatkiṃcidgokule tatpratiṣṭhitam |
vaikuṃṭhavaibhavaṃ yadvai dvārikāyāṃ pratiṣṭhitam || 10 ||
[Analyze grammar]

yadbrahmaparamaiśvaryaṃ nityaṃ vṛṃdāvanāśrayam |
kṛṣṇadhāmaparaṃ teṣāṃ vanamadhye viśeṣataḥ || 11 ||
[Analyze grammar]

tasmāttrailokyamadhye tu pṛthvī dhanyeti viśrutā |
yasmānmāthurakaṃ nāma viṣṇorekāṃtavallabham || 12 ||
[Analyze grammar]

svasthānamadhikaṃ nāmadheyaṃ māthuramaṃḍalam |
nigūḍhaṃ vividhaṃ sthānaṃ puryabhyaṃtarasaṃsthitam || 13 ||
[Analyze grammar]

sahasrapatrakamalākāraṃ māthuramaṃḍalam |
viṣṇucakraparibhrāmāddhāma vaiṣṇavamadbhutam || 14 ||
[Analyze grammar]

karṇikāparṇavistāraṃ rahasyadrumamīritam |
pradhānaṃ dvādaśāraṇyaṃ māhātmyaṃ kathitaṃ kramāt || 15 ||
[Analyze grammar]

bhadra śrī loha bhāṃḍīra mahātāla khadīrakāḥ |
bakulaṃ kumudaṃ kāmyaṃ madhu vṛṃdāvanaṃ tathā || 16 ||
[Analyze grammar]

dvādaśaitāvatī saṃkhyā kāliṃdyāḥ sapta paścime |
pūrve paṃcavanaṃ proktaṃ tatrāsti guhyamuttamam || 17 ||
[Analyze grammar]

mahāraṇyaṃ gokulākhyaṃ madhu vṛṃdāvanaṃ tathā |
anyaccopavanaṃ proktaṃ kṛṣṇakrīḍārasasthalam || 18 ||
[Analyze grammar]

kadaṃbakhaṃḍanaṃ naṃdavanaṃ naṃdīśvaraṃ tathā |
naṃdanaṃdanakhaṃḍaṃ ca palāśāśokaketakī || 19 ||
[Analyze grammar]

sugaṃdhamānasaṃ kailamamṛtaṃ bhojanasthalam |
sukhaprasādhanaṃ vatsaharaṇaṃ śeṣaśāyikam || 20 ||
[Analyze grammar]

śyāmapūrvo dadhigrāmaścakrabhānupuraṃ tathā |
saṃketaṃ dvipadaṃ caiva bālakrīḍanadhūsaram || 21 ||
[Analyze grammar]

kāmadrumaṃ sulalitamutsukaṃ cāpi kānanam |
nānāvidharasakrīḍā nānālīlārasasthalam || 22 ||
[Analyze grammar]

nāgavistāraviṣṭaṃbhaṃ rahasyadrumamīritam |
sahasrapatrakamalaṃ gokulākhyaṃ mahatpadam || 23 ||
[Analyze grammar]

karṇikātanmahaddhāma goviṃdasthānamuttamam |
tatropari svarṇapīṭhe maṇimaṃḍapamaṃḍitam || 24 ||
[Analyze grammar]

karṇikāyāṃ kramāddikṣu vidikṣu dalamīritam |
yaddalaṃ dakṣiṇe proktaṃ paraṃ guhyottamottamam || 25 ||
[Analyze grammar]

tasmindale mahāpīṭhaṃ nigamāgamadurgamam |
yogīṃdrairapi duṣprāpaṃ sarvātmā yacca gokulam || 26 ||
[Analyze grammar]

dvitīyaṃ dalamāgneyyāṃ tadrahasyadalaṃ tathā |
saṃketaṃ dvipadaṃ caiva kuṭīdvau tatkule sthitau || 27 ||
[Analyze grammar]

pūrvaṃ dalaṃ tṛtīyaṃ ca pradhānasthānamuttamam |
gaṃgādisarvatīrthānāṃ sparśācchataguṇaṃ smṛtam || 28 ||
[Analyze grammar]

caturthaṃ dalamaiśānyāṃ siddhapīṭhe'pi tatpadam |
vyāyāmanūtanāgopī tatra kṛṣṇaṃ patiṃ labhet || 29 ||
[Analyze grammar]

vastrālaṃkāraharaṇaṃ taddale samudāhṛtam |
uttare paṃcamaṃ proktaṃ dalaṃ sarvadalottamam || 30 ||
[Analyze grammar]

dvādaśādityamatraiva dalaṃ ca karṇikāsamam |
vāyavyāṃ tu dalaṃ ṣaṣṭhaṃ tatra kālīhradaḥ smṛtaḥ || 31 ||
[Analyze grammar]

dalottamottamaṃ caiva pradhānaṃ sthānamucyate |
sarvottamadalaṃ caiva paścime saptamaṃ smṛtam || 32 ||
[Analyze grammar]

yajñapatnīgaṇānāṃ ca tadīpsitavarapradam |
atrāsuro'pi nirvāṇaṃ prāpa tridaśadurlabham || 33 ||
[Analyze grammar]

brahmamohanamatraiva dalaṃ brahmahradāvaham |
nairṛtyāṃ tu dalaṃ proktamaṣṭamaṃ vyomaghātanam || 34 ||
[Analyze grammar]

śaṃkhacūḍavadhastatra nānākelirasasthalam |
śrutamaṣṭadalaṃ proktaṃ vṛṃdāraṇyāṃtarasthitam || 35 ||
[Analyze grammar]

śrīmadvṛṃdāvanaṃ ramyaṃ yamunāyāḥ pradakṣiṇam |
śivaliṃgamadhiṣṭhānaṃ dṛṣṭaṃ gopīśvarābhidham || 36 ||
[Analyze grammar]

tadbāhye ṣoḍaśadalaṃ śriyāpūrṇaṃ tamīśvaram |
sarvāsu dikṣu yatproktaṃ prādakṣiṇyādyathākramam || 37 ||
[Analyze grammar]

mahatpadaṃ mahaddhāma svadhāmādhāvasaṃjñakam |
prathamaikadalaṃ śreṣṭhaṃ māhātmyaṃ karṇikāsamam || 38 ||
[Analyze grammar]

tatra govarddhanagirau ramye nityarasāśraye |
karṇikāyāṃ mahālīlā tallīlā rasagahvarau || 39 ||
[Analyze grammar]

yatra kṛṣṇo nityavṛṃdākānanasya patirbhavet |
kṛṣṇo goviṃdatāṃ prāptaḥ kimanyairbahubhāṣitaiḥ || 40 ||
[Analyze grammar]

dalaṃ tṛtīyamākhyātaṃ sarvaśreṣṭhottamottamam |
caturthaṃ dalamākhyātaṃ mahādbhutarasasthalam || 41 ||
[Analyze grammar]

naṃdīśvaravanaṃ ramyaṃ tatra naṃdālayaḥ smṛtaḥ |
karṇikādalamāhātmyaṃ paṃcamaṃ dalamucyate || 42 ||
[Analyze grammar]

adhiṣṭhātā'tra gopālo dhenupālanatatparaḥ |
ṣaṣṭhaṃ dalaṃ yadākhyātaṃ tatra naṃdavanaṃ smṛtam || 43 ||
[Analyze grammar]

saptamaṃ bakulāraṇyaṃ dalaṃ ramyaṃ prakīrtitam |
tatrāṣṭamaṃ tālavanaṃ tatra dhenuvadhaḥ smṛtaḥ || 44 ||
[Analyze grammar]

navamaṃ kumudāraṇyaṃ dalaṃ ramyaṃ prakīrtitam |
kāmāraṇyaṃ ca daśamaṃ pradhānaṃ sarvakāraṇam || 45 ||
[Analyze grammar]

brahmaprasādhanaṃ tatra viṣṇucchadmapradarśanam |
kṛṣṇakrīḍārasasthānaṃ pradhānaṃ dalamucyate || 46 ||
[Analyze grammar]

dalamekādaśaṃ proktaṃ bhaktānugrahakāraṇam |
nirmāṇaṃ setubaṃdhasya nānāvanamayasthalam || 47 ||
[Analyze grammar]

bhāṃḍīraṃ dvādaśadalaṃ vanaṃ ramyaṃ manoharam |
kṛṣṇaḥ krīḍāratastatra śrīdāmādibhirāvṛtaḥ || 48 ||
[Analyze grammar]

trayodaśaṃ dalaṃ śreṣṭhaṃ tatra bhadravanaṃ smṛtam |
caturdaśadalaṃ proktaṃ sarvasiddhipradasthalam || 49 ||
[Analyze grammar]

śrīvanaṃ tatra ruciraṃ sarvaiśvaryasya kāraṇam |
kṛṣṇakrīḍādalamayaṃ śrīkāṃtikīrtivarddhanam || 50 ||
[Analyze grammar]

dalaṃ paṃcadaśaṃ śreṣṭhaṃ tatra lohavanaṃ smṛtam |
kathitaṃ ṣoḍaśadalaṃ māhātmyaṃ karṇikāsamam || 51 ||
[Analyze grammar]

mahāvanaṃ tatra gītaṃ tatrāsti guhyamuttamam |
bālakrīḍāratastatra vatsapālaiḥ samāvṛtaḥ || 52 ||
[Analyze grammar]

pūtanādivadhastatra yamalārjunabhaṃjanam |
adhiṣṭhātā tatra bālagopālaḥ paṃcamābdikaḥ || 53 ||
[Analyze grammar]

nāmnā dāmodaraḥ proktaḥ premānaṃdarasārṇavaḥ |
dalaṃ prasiddhamākhyātaṃ sarvaśreṣṭhadalottamam || 54 ||
[Analyze grammar]

kṛṣṇakrīḍā ca kiṃjalkī vihāradalamucyate |
siddhapradhānakiṃjalka dalaṃ ca samudāhṛtam || 55 ||
[Analyze grammar]

pārvatyuvāca |
vṛṃdāraṇyasya māhātmyaṃ rahasyaṃ vā kimadbhutam |
tadahaṃ śrotumicchāmi kathayasva mahāprabho || 56 ||
[Analyze grammar]

īśvara uvāca |
kathitaṃ te priyatame guhyādguhyottamottamam |
rahasyānāṃ rahasyaṃ yaddurlabhānāṃ ca durlabham || 57 ||
[Analyze grammar]

trailokyagopitaṃ devi deveśvarasupūjitam |
brahmādivāṃchitaṃ sthānaṃ surasiddhādisevitam || 58 ||
[Analyze grammar]

yogīṃdrā hi sadā bhaktyā tasya dhyānaikatatparāḥ |
apsarobhiśca gaṃdharvairnṛtyagītaniraṃtaram || 59 ||
[Analyze grammar]

śrīmadvṛṃdāvanaṃ ramyaṃ pūrṇānaṃdarasāśrayam |
bhūriciṃtāmaṇistoyamamṛtaṃ rasapūritam || 60 ||
[Analyze grammar]

vṛkṣaṃ gurudrumaṃ tatra surabhīvṛṃdasevitam |
strīṃ lakṣmīṃ puruṣaṃ viṣṇuṃ taddaśāṃśasamudbhavam || 61 ||
[Analyze grammar]

tatra kaiśoravayasaṃ nityamānaṃdavigraham |
gatināṭyaṃ kalālāpasmitavaktraṃ niraṃtaram || 62 ||
[Analyze grammar]

śuddhasatvaiḥ premapūrṇairvaiṣṇavaistadvanāśritam |
pūrṇabrahmasukhemagnaṃ sphurattanmūrtitanmayam || 63 ||
[Analyze grammar]

mattakokilabhṛṃgādyaiḥ kūjatkalamanoharam |
kapolaśukasaṃgītamunmattāli sahasrakam || 64 ||
[Analyze grammar]

bhujaṃgaśatrunṛtyāḍhyaṃ sakalāmodavibhramam |
nānāvarṇaiśca kusumaistadreṇuparipūritam || 65 ||
[Analyze grammar]

pūrṇeṃdunityābhyudayaṃ sūryamaṃdāṃśusevitam |
aduḥkhaṃ duḥkhavicchedaṃ jarāmaraṇavarjitam || 66 ||
[Analyze grammar]

akrodhaṃ gatamātsaryamabhinnamanahaṃkṛtam |
pūrṇānaṃdāmṛtarasaṃ pūrṇapremasukhārṇavam || 67 ||
[Analyze grammar]

guṇātītaṃ mahaddhāma pūrṇapremasvarūpakam |
vṛkṣādipulakairyatra premānaṃdāśruvarṣitam || 68 ||
[Analyze grammar]

kiṃ punaścetanāyuktairviṣṇubhaktaiḥ kimucyate |
goviṃdāṃghrirajaḥ sparśānnityaṃ vṛṃdāvanaṃ bhuvi || 69 ||
[Analyze grammar]

sahasradalapadmasya vṛṃdāraṇyaṃ varāṭakam |
yasya sparśanamātreṇa pṛthvī dhanyā jagattraye || 70 ||
[Analyze grammar]

guhyādguhyataraṃ ramyaṃ madhye vṛṃdāvanaṃ bhuvi |
akṣaraṃ paramānaṃdaṃ goviṃdasthānamavyayam || 71 ||
[Analyze grammar]

goviṃdadehato'bhinnaṃ pūrṇabrahmasukhāśrayam |
muktistatra rajaḥsparśāttanmāhātmyaṃ kimucyate || 72 ||
[Analyze grammar]

tasmātsarvātmanā devi hṛdisthaṃ tadvanaṃ kuru |
vṛṃdāvanavihāreṣu kṛṣṇaṃ kaiśoravigraham || 73 ||
[Analyze grammar]

kāliṃdī cākarodyasya karṇikāyāṃ pradakṣiṇām |
līlānirvāṇagaṃbhīraṃ jalaṃ saurabhamohanam || 74 ||
[Analyze grammar]

ānaṃdāmṛta tanmiśramakaraṃdaghanālayam |
padmotpalādyaiḥ kusumairnānāvarṇasamujjavalam || 75 ||
[Analyze grammar]

cakravākādivihagairmaṃjunānākalasvanaiḥ |
śobhamānaṃ jalaṃ ramyaṃ taraṃgātimanoramam || 76 ||
[Analyze grammar]

tasyobhayataṭī ramyā śuddhakāṃcananirmitā |
gaṃgākoṭiguṇā proktā yatra sparśavarāṭakaḥ || 77 ||
[Analyze grammar]

karṇikāyāṃ koṭiguṇo yatra krīḍārato hariḥ |
kāliṃdīkarṇikā kṛṣṇamabhinnamekavigraham || 78 ||
[Analyze grammar]

pārvatyuvāca |
goviṃdasya kimāścaryaṃ sauṃdaryākṛtavigraha |
tadahaṃ śrotumicchāmi kathayasva dayānidhe || 79 ||
[Analyze grammar]

īśvara uvāca |
madhye vṛṃdāvane ramye maṃjumaṃjīraśobhite |
yojanāśritasadvṛkṣa śākhāpallavamaṃḍite || 80 ||
[Analyze grammar]

tanmadhye maṃjubhavane yogapīṭhaṃ samujjavalam |
tadaṣṭakoṇanirmāṇaṃ nānādīptimanoharam || 81 ||
[Analyze grammar]

tasyopari ca māṇikyaratnasiṃhāsanaṃ śubham |
tasminnaṣṭadalaṃ padmaṃ karṇikāyāṃ sukhāśrayam || 82 ||
[Analyze grammar]

goviṃdasya paraṃ sthānaṃ kimasya mahimocyate |
śrīmadgoviṃdamaṃtrastha ballavīvṛṃdasevitam || 83 ||
[Analyze grammar]

divyavrajavayorūpaṃ kṛṣṇaṃ vṛṃdāvaneśvaram |
vrajeṃdraṃ saṃtataiśvaryaṃ vrajabālaikavallabham || 84 ||
[Analyze grammar]

yauvanodbhinnakaiśoraṃ vayasādbhutavigraham |
anādimādiṃ sarveṣāṃ naṃdagopapriyātmajam || 85 ||
[Analyze grammar]

śrutimṛgyamajaṃ nityaṃ gopījanamanoharam |
paraṃdhāma paraṃ rūpaṃ dvibhujaṃ gokuleśvaram || 86 ||
[Analyze grammar]

ballavīnaṃdanaṃ dhyāyennirguṇasyaikakāraṇam |
suśrīmaṃtaṃ navaṃ svacchaṃ śyāmadhāmamanoharam || 87 ||
[Analyze grammar]

navīnanīradaśreṇī susnigdhaṃ maṃjukuṃḍalam |
phulleṃdīvarasatkāṃti sukhasparśaṃ sukhāvaham || 88 ||
[Analyze grammar]

dalitāṃjanapuṃjābha cikkaṇaṃ śyāmamohanam |
susnigdhanīlakuṭilāśeṣasaurabhakuṃtalam || 89 ||
[Analyze grammar]

tadūrdhvaṃ dakṣiṇe kāle śyāmacūḍāmanoharam |
nānāvarṇojjvalaṃ rājacchikhaṃḍidalamaṃḍitam || 90 ||
[Analyze grammar]

maṃdāramaṃjugopucchācūḍaṃ cāruvibhūṣaṇam |
kvacidbṛhaddalaśreṇī mukuṭenābhimaṃḍitam || 91 ||
[Analyze grammar]

anekamaṇimāṇikyakirīṭabhūṣaṇaṃ kvacit |
lolālakavṛtaṃ rājatkoṭicaṃdrasamānanam || 92 ||
[Analyze grammar]

kastūrītilakaṃ bhrājanmaṃjugorocanānvitam |
nīleṃdīvarasusnigdha sudīrghadalalocanam || 93 ||
[Analyze grammar]

ānṛtyadbhrūlatāśleṣasmitaṃ sāci nirīkṣaṇam |
sucārūnnatasauṃdarya nāsāgrāti manoharam || 94 ||
[Analyze grammar]

nāsāgragajamuktāṃśu mugdhīkṛta jagattrayam |
siṃdūrāruṇasusnigdhādharauṣṭhasumanoharam || 95 ||
[Analyze grammar]

nānāvarṇollasatsvarṇamakarākṛtikuṃḍalam |
tadraśmipuṃjasadgaṃḍa mukurābhalasaddyutim || 96 ||
[Analyze grammar]

karṇotpalasumaṃdāramakarottaṃsa bhūṣitam |
śrīvatsakaustubhoraskaṃ muktāhārasphuradgalam || 97 ||
[Analyze grammar]

vilasaddivyamāṇikyaṃ maṃjukāṃcana miśritam |
kare kaṃkaṇakeyūraṃ kiṃkiṇīkaṭiśobhitam || 98 ||
[Analyze grammar]

maṃjumaṃjīrasauṃdaryyaśrīmadaṃghri virājitam |
karpūrāgurukastūrīvilasaccaṃdanādikam || 99 ||
[Analyze grammar]

gorocanādisaṃmiśra divyāṃgarāgacitritam |
snigdhapītapaṭī rājatprapadāṃdolitāṃjanam || 100 ||
[Analyze grammar]

gaṃbhīranābhikamalaṃ romarājīnatasrajam |
suvṛttajānuyugalaṃ pādapadmamanoharam || 101 ||
[Analyze grammar]

dhvajavajrāṃkuśāṃbhoja karāṃghri talaśobhitam |
nakheṃdu kiraṇaśreṇī pūrṇabrahmaikakāraṇam || 102 ||
[Analyze grammar]

kecidvadaṃti tasyāṃśaṃ brahmacidrūpamadvayam |
taddaśāṃśaṃ mahāviṣṇuṃ pravadaṃti manīṣiṇaḥ || 103 ||
[Analyze grammar]

yogīṃdraiḥ sanakādyaiśca tadeva hṛdi ciṃtyate |
tribhaṃgaṃ lalitāśeṣa nirmāṇasāranirmitam || 104 ||
[Analyze grammar]

tiryaggrīvajitānaṃtakoṭikaṃdarpasuṃdaram |
vāmāṃsārpita sadgaṇḍasphuratkāṃcanakuṃḍalam || 105 ||
[Analyze grammar]

sahāpāṃgekṣaṇasmeraṃ koṭimanmathasuṃdaram |
kuṃcitādharavinyasta vaṃśīmaṃjukalasvanaiḥ || 106 ||
[Analyze grammar]

jagattrayaṃ mohayaṃtaṃ magnaṃ premasudhārṇave |
śrīpārvatyuvāca |
paramaṃ kāraṇaṃ kṛṣṇaṃ goviṃdākhyaṃ mahatpadam || 107 ||
[Analyze grammar]

vṛṃdāvaneśvaraṃ nityaṃ nirguṇasyaikakāraṇam |
tattadrahasyamāhātmyaṃ kimāścaryaṃ ca suṃdaram || 108 ||
[Analyze grammar]

tadbrūhi devadeveśa śrotumicchāmyahaṃ prabho |
īśvara uvāca |
yadaṃghrinakhacaṃdrāṃśu mahimāṃto na gamyate || 109 ||
[Analyze grammar]

tanmāhātmyaṃ kiyaddevi procyate tvaṃ mudā śṛṇu |
anaṃtakoṭibrahmāṃḍe anaṃtatriguṇocchraye || 110 ||
[Analyze grammar]

tatkalākoṭikoṭyaṃśā brahmaviṣṇumaheśvarāḥ |
sṛṣṭisthityādinā yuktāstiṣṭhaṃti tasya vaibhavāḥ || 111 ||
[Analyze grammar]

tadrūpakoṭikoṭyaṃśāḥ kalāḥ kaṃdarpavigrahāḥ |
jaganmohaṃ prakurvaṃti tadaṃḍāṃtarasaṃsthitāḥ || 112 ||
[Analyze grammar]

taddehavilasatkāṃtikoṭikoṭyaṃśako vibhuḥ |
tatprakāśasya koṭyaṃśa raśmayo ravivigrahāḥ || 113 ||
[Analyze grammar]

tasya svadehakiraṇaiḥ parānaṃda rasāmṛtaiḥ |
paramāmodacidrūpairnirguṇasyaikakāraṇaiḥ || 114 ||
[Analyze grammar]

tadaṃśakoṭikoṭyaṃśā jīvaṃti kiraṇātmakāḥ |
tadaṃghripaṃkajadvaṃdva nakhacaṃdra maṇiprabhāḥ || 115 ||
[Analyze grammar]

āhuḥ pūrṇabrahmaṇo'pi kāraṇaṃ vedadurgamam |
tadaṃśasaurabhānaṃtakoṭyaṃśo viśvamohanaḥ || 116 ||
[Analyze grammar]

tatsparśapuṣpagaṃdhādi nānāsaurabhasaṃbhavaḥ |
tatpriyā prakṛtistvādyā rādhikā kṛṣṇavallabhā || 117 ||
[Analyze grammar]

tatkalākoṭikoṭyaṃśā durgādyāstriguṇātmikāḥ |
tasyā aṃghrirajaḥ sparśātkoṭiviṣṇuḥ prajāyate || 118 ||
[Analyze grammar]

iti śrīpadmapurāṇe pātālakhaṃḍe vṛṃdāvanamāhātmye kṛṣṇacaritre |
ekonasaptatitamo'dhyāyaḥ || 69 ||
[Analyze grammar]