Chapter 64

[English text for this chapter is available]

śeṣa uvāca |
śatrughnaṃ patitaṃ vīkṣya surathaḥ pravaro nṛpaḥ |
prayayau maṇinā sṛṣṭe rathe tiṣṭhanmahādbhute || 1 ||
[Analyze grammar]

puṣkalastu raṇe pūrvaṃ pātitaḥ sa vicārayan |
lavaṃ yayau tadā yoddhuṃ mahāvīrabalonnatam || 2 ||
[Analyze grammar]

surathaḥ kuśamāsādya bāṇānmuṃcannanekadhā |
vyathayāmāsa samare mahāvīraśiromaṇiḥ || 3 ||
[Analyze grammar]

surathaṃ virathaṃ cakre bāṇairdaśabhirucchikhaiḥ |
dhanuściccheda tarasā sudṛḍhaṃ guṇapūritam || 4 ||
[Analyze grammar]

astrapratyastrasaṃhāraiḥ kṣaipaṇaiḥ pratikṣepaṇaiḥ |
abhavattumulaṃ yuddhaṃ vīrāṇāṃ romaharṣaṇam || 5 ||
[Analyze grammar]

atyaṃtaṃ samarodyukte surathe durjaye nṛpe |
kuśaḥ saṃciṃtayāmāsa kiṃkartavyaṃ raṇe mayā || 6 ||
[Analyze grammar]

vicārya niśitaṃ ghoraṃ sāyakaṃ samupādade |
hananāya nṛpasyāsya mahābalasamanvitaḥ || 7 ||
[Analyze grammar]

tamāgataṃ śaraṃ dṛṣṭvā kālānalasamaprabham |
chettuṃ matiṃ cakārāśu tāvallagno mahāśaraḥ || 8 ||
[Analyze grammar]

mumūrccha samare vīro mahāvīrabalastataḥ |
papāta syaṃdanopasthe sārathistamupāharat || 9 ||
[Analyze grammar]

surathe patite dṛṣṭvā kuśaṃ jayasamanvitam |
trāsayaṃtaṃ vīragaṇāniyāya pavanātmajaḥ || 10 ||
[Analyze grammar]

samīrasūnuṃ prabalamāyāṃtaṃ vīkṣya vānaram |
jahāsa darśayandaṃtānkopayanniva taṃ krudhā || 11 ||
[Analyze grammar]

uvāca ca hanūmaṃtamehi tvaṃ mama saṃmukham |
bhetsye bāṇasahasreṇa mṛto yāsyasi yāminīm || 12 ||
[Analyze grammar]

ityukto hanumāñjñātvā rāmasūnuṃ mahābalam |
svāmikāryaṃ prakartavyamiti kṛtvā pradhāvitaḥ || 13 ||
[Analyze grammar]

śālamutpāṭya tarasā viśālaṃ śataśākhinam |
kuśaṃ vakṣasi saṃlakṣya yayau yoddhuṃ mahābalaḥ || 14 ||
[Analyze grammar]

śālahastaṃ samāyāṃtaṃ hanūmaṃtaṃ mahābalam |
tribhiḥ kṣuraprairvivyādha hṛdi caṃdropamairbalī || 15 ||
[Analyze grammar]

sa bāṇaviddhastarasā kuśena balaśālinā |
śālena hṛdi saṃjaghne daṃtānniṣpiṣya mārutiḥ || 16 ||
[Analyze grammar]

śālāhatastadā bālaḥ kiṃcinnākaṃpata smayāt |
tadā vīrāḥ praśaṃsāṃ tu pracakrustasya bālyataḥ || 17 ||
[Analyze grammar]

sa śālena hato vīraḥ saṃhārāstraṃ samādade |
saṃhantuṃ vairiṇaṃ kopātkuśaḥ sa paramāstravit || 18 ||
[Analyze grammar]

saṃhārāstraṃ samālokya durjayaṃ kuśamocitam |
dadhyau rāmaṃ svamanasā bhaktavighnavināśakam || 19 ||
[Analyze grammar]

tadā muktaṃ kuśenāśu tadastraṃ hṛdi māruteḥ |
lagnaṃ mahāvyathākāri tena mūrcchāmitaḥ punaḥ || 20 ||
[Analyze grammar]

mūrcchāṃ prāptaṃ tu taṃ dṛṣṭvā plavaṃgaṃ balasaṃyutaḥ |
vivyādha sāyakaistīkṣṇaiḥ sainyaṃ tatsakalaṃ mahat || 21 ||
[Analyze grammar]

tasya bāṇāyutairbhagnaṃ balaṃ sarvaṃ raṇāṃgaṇe |
palāyanaparaṃ jātaṃ caturaṃgasamanvitam || 22 ||
[Analyze grammar]

tadā kapipatiḥ kopātsugrīvo rakṣako mahān |
abhyadhāvannagānnaikānutpāṭya kuśamudbhaṭam || 23 ||
[Analyze grammar]

kuśaḥ sarvānpraciccheda līlayā prahasannagān |
punarapyāgatānvṛkṣāṃściccheda tarasā balī || 24 ||
[Analyze grammar]

anekabāṇavyathitaḥ sugrīvaḥ samarāṃgaṇe |
jagrāha parvataṃ ghoraṃ kuśamastakamadhyataḥ || 25 ||
[Analyze grammar]

kuśastaṃ nagamāyāṃtaṃ vīkṣya bāṇairanekadhā |
niṣpipeṣa cakārāśu mahārudrāṃgayogyatām || 26 ||
[Analyze grammar]

sugrīvastanmahatkarma dṛṣṭvā bālena nirmitam |
jayāśāpratinirvṛtto babhūva samarāṃgaṇe || 27 ||
[Analyze grammar]

raṇamadhye durākrāṃtaṃ kuśaṃ lāṃgūlatāḍakam |
atyamarṣīruṣākrāṃtastaṃ haṃtuṃ nagamādade || 28 ||
[Analyze grammar]

ātmānaṃ haṃtumudyuktaṃ vīkṣya sugrīvamādarāt |
tāḍayāmāsa bahubhiḥ sāyakaiḥ śitaparvabhiḥ || 29 ||
[Analyze grammar]

sa tāḍito bahuvidhaiḥ śaraiḥ pīḍāsamanvitaḥ |
kuśaṃ haṃtuṃ samārabdho yayau śālaṃ samādade || 30 ||
[Analyze grammar]

tadāpi ca kuśo vīro vāruṇāstraṃ samādade |
babaṃdha taṃ ca pāśena dṛḍhena sa lavāgrajaḥ || 31 ||
[Analyze grammar]

sa baddhaḥ pāśakaiḥ snigdhaiḥ kuśena balaśālinā |
papāta raṇamadhye vai mahāvīrairalaṃkṛte || 32 ||
[Analyze grammar]

sugrīvaṃ patitaṃ dṛṣṭvā vīrāḥ sarvatra dudruvuḥ |
jayamāpa lavabhrātā mahāvīraśiromaṇiḥ || 33 ||
[Analyze grammar]

tāvallavo bhaṭāñjitvā puṣkalaṃ cāṃgadaṃ tathā |
pratāpāgryaṃ vīramaṇiṃ tathānyānapi bhūbhujaḥ || 34 ||
[Analyze grammar]

jayaṃ prāpya raṇe vīro lavo bhrātaramāgamat |
saṃgrāme jayakartāraṃ vairikoṭinipātakam || 35 ||
[Analyze grammar]

parasparaṃ prahṛṣitau pariraṃbhaṃ prakurvataḥ |
jayaṃ prāptau tadā vārtāṃ mune cakraturunmadau || 36 ||
[Analyze grammar]

lava uvāca |
bhrātastava prasādena nistīrṇo raṇatoyadhiḥ |
idānīṃ vīraraṇakaṃ śodhayāvaḥ suśobhitam || 37 ||
[Analyze grammar]

ityuktvā tvaritaṃ vīro jagmatustau kuśīlavau |
rājño maulimaṇiṃ citraṃ jagrāha kanakācitam || 38 ||
[Analyze grammar]

puṣkalasya lavo vīro jagrāha mukuṭaṃ śubham |
aṃgade ca mahānarghye śatrughnasyāparasya ca || 39 ||
[Analyze grammar]

gṛhītvā śastrasaṃghātaṃ hanūmaṃtaṃ kapīśvaram |
sugrīvaṃ savidhe gatvā ubhāvapi babaṃdhatuḥ || 40 ||
[Analyze grammar]

pucche vāyusutasyāyaṃ gṛhītvā tu kuśānujaḥ |
bhrātaraṃ pratyuvācedaṃ neṣyāmi svakamaṃdiram || 41 ||
[Analyze grammar]

āvayorjananī prītyai gṛhītvā pucchake tvaham |
krīḍārthamṛṣiputrāṇāṃ kautukārthaṃ mamaiva ca || 42 ||
[Analyze grammar]

etacchrutvā tato vākyamuvāca ca kuśo lavam |
ahamenaṃ grahīṣyāmi vānaraṃ balinaṃ dṛḍham || 43 ||
[Analyze grammar]

ityevaṃ bhāṣamāṇau tau baddhvā tau balināṃ varau |
pucchayorbalinau dhṛtvā jagmatuḥ svāśramaṃ prati || 44 ||
[Analyze grammar]

svāśramāya pragacchaṃtau vīkṣya tau kapisattamau |
kaṃpamānau jagadaturanyonyaṃ bhītayā girā || 45 ||
[Analyze grammar]

hanūmānkapirājānaṃ pratyuvāca bhayārdradhīḥ |
etau rāmasutāvasmānneṣyataḥ svāśramaṃ prati || 46 ||
[Analyze grammar]

mayā pūrvaṃ kṛtaṃ karma jānakīṃ pratigacchatā |
tatra me jānakī devī saṃmukhābhūnmanoharā || 47 ||
[Analyze grammar]

sā māṃ drakṣyati vaidehī baddhaṃ pāśena vairiṇā |
tadā hasiṣyati varā trapā me'tra bhaviṣyati || 48 ||
[Analyze grammar]

mayā kimatra kartavyaṃ prāṇatyāgo bhaviṣyati |
mahadduḥkhaṃ cāpatitaṃ sa rāmaḥ kiṃ kariṣyati || 49 ||
[Analyze grammar]

sugrīvastadvacaḥ śrutvā mamāpyevaṃ mahākape |
neṣyate yadi māmevaṃ nidhanaṃ tu bhaviṣyati || 50 ||
[Analyze grammar]

evaṃ kathayatoreva hyanyonyaṃ bhayabhītayoḥ |
kuśo lavaśca bhavanaṃ mātuḥ prāpaturojasā || 51 ||
[Analyze grammar]

tāvāyātau samīkṣyaiva jaharṣa jananī tayoḥ |
anyonyaṃ paramaprītyā parirebhe nijau sutau || 52 ||
[Analyze grammar]

tābhyāṃ pucchagṛhītau tau vānarau vīkṣya jānakī |
hanūmaṃtaṃ ca sugrīvaṃ sarvavīraṃ kapīśvaram || 53 ||
[Analyze grammar]

jahāsa pāśabaddhau tau vīkṣamāṇā varāṃganā |
uvāca ca vimokṣārthaṃ vadaṃtī vacanaṃ varam || 54 ||
[Analyze grammar]

putrau pramuṃcataṃ kīśau mahāvīrau mahābalau |
īkṣaṃtau māṃ yadi sphītau prāṇatyāgaṃ kariṣyataḥ || 55 ||
[Analyze grammar]

ayaṃ vai hanumānvīro yo dadāha danoḥ purīm |
ayamapyṛkṣarājo hi sarvavānarabhūmipaḥ || 56 ||
[Analyze grammar]

kimarthaṃ vidhṛtau kutra kiṃ vā kṛtamanādarāt |
pucche yuvābhyāṃ vidhṛtau sa mahānvismayo'sti me || 57 ||
[Analyze grammar]

iti māturvacaḥ ślakṣṇaṃ vīkṣyatāṃ putrakau tadā |
ūcaturvinayaśreṣṭhau mahābalasamanvitau || 58 ||
[Analyze grammar]

mātaḥ kaścana bhūpālo rāmo dāśarathirbalī |
tena mukto hayaḥ svarṇabhālapatraḥ suśobhitaḥ || 59 ||
[Analyze grammar]

tatraivaṃ likhitaṃ mātarekavīrāprasūrmama |
ye kṣatriyāste gṛhṇantu nocetpādatalārcakāḥ || 60 ||
[Analyze grammar]

tadā mayā vicāro vai kṛtaḥ svāṃte pativrate |
bhavatī kṣatriyā kiṃ na vīrasūḥ kiṃ na vā bhavet || 61 ||
[Analyze grammar]

dhārṣṭyaṃ tadvīkṣya bhūpasya gṛhīto'śvo mayā balāt |
jitaṃ kuśena vīreṇa sainyaṃ tatpātitaṃ raṇe || 62 ||
[Analyze grammar]

mukuṭo'yaṃ bhūmipaterjānīhi patidevate |
ayamapyanyavīrasya puṣkalasya mahātmanaḥ || 63 ||
[Analyze grammar]

jānīhi mukuṭaṃ tvanyaṃ maṇimuktāvirājitam |
aśvo'yaṃ me manohārī kāmayāno hi bhūpateḥ || 64 ||
[Analyze grammar]

ārohaṇāya madbhrāturjānīhi balino vare |
imau kīśau mayā raṃtumānītau balināṃ varau || 65 ||
[Analyze grammar]

kautukārthaṃ tavaivaitau saṃgrāme yuddhakārakau |
iti vākyaṃ samākarṇya jānakī patidevatā || 66 ||
[Analyze grammar]

jagāda putrau tau vīrau mocayethāṃ punaḥ punaḥ |
sītovāca |
yuvābhyāmanayaḥ sṛṣṭo hṛto rāmahayo mahān || 67 ||
[Analyze grammar]

aneke pātitā vīrā imau baddhau kapīśvarau |
pitustava hayo vīro yāgārthaṃ mocito'munā || 68 ||
[Analyze grammar]

tasyāpi hṛtavaṃtau kiṃ vājinaṃ makhasattame |
muṃcataṃ plavagāvetau muṃcataṃ vājināṃ varam || 69 ||
[Analyze grammar]

kṣāmyatāṃ bhūpaterbhrātā śatrughnaḥ parakopanaḥ |
jananyāstadvacaḥ śrutvā ūcatustāṃ balānvitau || 70 ||
[Analyze grammar]

kṣātradharmeṇa taṃ bhūpaṃ jitavaṃtau balānvitam |
nāsmākamanayorbhāvi kṣātradharmeṇa yudhyatām || 71 ||
[Analyze grammar]

vālmīkinā purā proktamasmākaṃ paṭhatāṃ puraḥ || 72 ||
[Analyze grammar]

kaṇvasyāśramakevāhaṃ dhṛtvā yāgakriyocitam |
tasmātsutaḥ svapitrāpi yudhyedbhrātrāpi cānujaḥ || 73 ||
[Analyze grammar]

guruṇā śiṣya evāpi tasmānno pāpasaṃbhavaḥ |
tvadājñāto 'dhunā cāvāṃ dāsyāvo hayamuttamam || 74 ||
[Analyze grammar]

mokṣyāvaḥ kīśāvetau hi kariṣyāvo vacastava |
ityuktvā mātaraṃ vīrau gatau raṇe kapīśvarau || 75 ||
[Analyze grammar]

amuṃcatāṃ hayaṃ cāpi hayamedhakriyocitam |
sītādevī svaputrābhyāṃ śrutvā sainyaṃ nipātitam || 76 ||
[Analyze grammar]

śrīrāmaṃ manasā dhyātvā bhānumaikṣata sākṣiṇam |
yadyahaṃ manasā vācā karmaṇā raghunāyakam || 77 ||
[Analyze grammar]

bhajāmi nānyaṃ manasā tarhi jīvedayaṃ nṛpaḥ |
sainyaṃ cāpi mahatsarvaṃ yannāśitamidaṃ balāt || 78 ||
[Analyze grammar]

putrābhyāṃ tattu jīveta matsatyājjagatāṃpate |
iti yāvadvaco brūte jānakīpatidevatā || 79 ||
[Analyze grammar]

tāvadbalaṃ ca tatsarvaṃ jīvitaṃ raṇamūrddhani || 80 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
sainyajīvanaṃnāma catuḥṣaṣṭitamo'dhyāyaḥ || 64 ||
[Analyze grammar]