Chapter 62

[English text for this chapter is available]

śeṣa uvāca |
mūrcchitaṃ mārutiṃ śrutvā śatrughnaḥ śokamāyayau |
kiṃkartavyaṃ mayā saṃkhye bālako'yaṃ mahābalaḥ || 1 ||
[Analyze grammar]

svayaṃ rathe hemamaye tiṣṭhanvīravaraiḥ saha |
yoddhuṃ prāgāllavo yatra vicitraraṇakovidaḥ || 2 ||
[Analyze grammar]

lavaṃ dadarśa śiśutāṃ prāptaṃ rāmamiva kṣitau |
dhanurbāṇakaraṃ vīrānkṣipaṃtaṃ raṇamūrdhani || 3 ||
[Analyze grammar]

vicārayāmāsa tadā ko'yaṃ rāmasvarūpadhṛk |
nīlotpaladalaśyāmaṃ vapurbibhranmanoharam || 4 ||
[Analyze grammar]

eṣa vai dehatanujā suto bhavati nānyathā |
asmānvijitya samare yāsyate mṛgarāḍiva || 5 ||
[Analyze grammar]

asmākaṃ no jayo bhāvyaḥ śaktyā virahitātmanām |
aśaktāḥ kiṃ kariṣyāmaḥ samare raṇakovidāḥ || 6 ||
[Analyze grammar]

ityevaṃ sa vicāryātha bālakaṃ tu vaco'bravīt |
raṇe kutukakartāraṃ vīrakoṭinipātakam || 7 ||
[Analyze grammar]

kastvaṃ bāla raṇe'smākaṃ vīrānpātayasi kṣitau |
na jānīṣe balaṃ rājño rāmasya danujārdinaḥ || 8 ||
[Analyze grammar]

kā te mātā pitā kaste subhāgyo jayamāptavān |
nāma kiṃ viśrutaṃ loke jānīyāṃ te mahābala || 9 ||
[Analyze grammar]

muñca vāhaḥ kathaṃ baddhaḥ śiśutvāttatkṣamāmi te |
āyāhi rāmaṃ vīkṣasva dāsyate bahulaṃ tava || 10 ||
[Analyze grammar]

ityukto bālako vīro vacaḥ śatrughnamāvadat |
kiṃ te nāmnātha pitrā vā kulena vayasā tathā || 11 ||
[Analyze grammar]

yudhyasva samare vīra cettvaṃ balayuto bhaveḥ |
kuśaṃ vīraṃ namaskṛtya pādayoryāhi nānyathā || 12 ||
[Analyze grammar]

bhrātā rāmasya vīro bhūrnāvayorbalināṃ varaḥ |
vāhaṃ vimocaya balācchaktiste vidyate yadi || 13 ||
[Analyze grammar]

ityuktvā śarasaṃdhānaṃ kṛtvā prāharadudbhaṭaḥ |
hṛdaye mastake caiva bhujayo raṇamaṃḍale || 14 ||
[Analyze grammar]

tadā prakupito rājā dhanuḥ sajyamathākarot |
nādayanmeghagaṃbhīraṃ trāsayanniva bālakam || 15 ||
[Analyze grammar]

bāṇānaparisaṃkhyātānmumoca balināṃ varaḥ |
bālo balena ciccheda sarvāṃstānsāyakavrajān || 16 ||
[Analyze grammar]

lavasyānekadhā muktairbāṇairvyāptaṃ mahītalam |
vyatīpāte pradattasya dānasyevākṣayaṃ gatāḥ || 17 ||
[Analyze grammar]

te bāṇā vyomasakalaṃ vyāpnuvaṃllavasaṃdhitāḥ |
sūryamaṃḍalamāsādya pravartaṃte samaṃtataḥ || 18 ||
[Analyze grammar]

māruto nāviśadyatra bāṇapaṃjaragocare |
manuṣyāṇāṃ tu kā vārtā kṣaṇajīvitaśaṃsinām || 19 ||
[Analyze grammar]

tadbāṇānvistṛtāndṛṣṭvā śatrughno vismayaṃ gataḥ |
acchinacchatasāhasraṃ bāṇamocanakovidaḥ || 20 ||
[Analyze grammar]

tāñchinnānsāyakānsarvānsvīyāndṛṣṭvā kuśānujaḥ |
dhanuściccheda tarasā śatrughnasya mahīpateḥ || 21 ||
[Analyze grammar]

so'nyaddhanurupādāya yāvanmuṃcati sāyakān |
tāvadbabhaṃja sarathaṃ sāyakaiḥ śitaparvabhiḥ || 22 ||
[Analyze grammar]

karasthamacchinaccāpaṃ sudṛḍhaṃ guṇapūritam |
tatkarmāpūjayanvīrā raṇamaṃḍalavartinaḥ || 23 ||
[Analyze grammar]

sacchinnadhanvā viratho hatāśvo hatasārathiḥ |
anyaṃ rathaṃ samāsthāya yayau yoddhuṃ lavaṃ balāt || 24 ||
[Analyze grammar]

anekabāṇanirbhinnaḥ sravadraktakalevaraḥ |
puṣpitaḥ kiṃśuka iva śuśubhe raṇamadhyagaḥ || 25 ||
[Analyze grammar]

śatrughnabāṇaprahataḥ paraṃ kopamupāgamat |
bāṇasaṃdhānacaturaḥ kuṃḍalīkṛta cāpavān || 26 ||
[Analyze grammar]

viśīrṇakavacaṃ dehaṃ śiromukuṭavarjitam |
sravadraktaparipluṣṭaṃ śatrughnasya cakāra saḥ || 27 ||
[Analyze grammar]

tadā rāmānujaḥ kruddho daśabāṇāñchitāgrakān |
mumoca prāṇasaṃhārakārakānkupito bhṛśam || 28 ||
[Analyze grammar]

sa tāṃstāṃstilaśaḥ kṛtvā bāṇairniśitaparvabhiḥ |
tāḍayāmāsa hṛdaye śatrughnasyāṣṭabhiḥ śaraiḥ || 29 ||
[Analyze grammar]

atyaṃtaṃ bāṇapīḍārto lavaṃ balinamutsmaran |
duḥsahaṃ manyamānastaṃ śarānmuṃcannabhūttadā || 30 ||
[Analyze grammar]

tadā lavena tīkṣṇena hṛdi bhinno viśālake |
ardhacaṃdrasamānena tīkṣṇaparvasuśobhinā || 31 ||
[Analyze grammar]

sa viddho hṛdi bāṇena pīḍāṃ prāptaḥ sudāruṇām |
papāta syaṃdanopasthe dhanuḥpāṇiḥ suśobhitaḥ || 32 ||
[Analyze grammar]

śatrughnaṃ mūrchitaṃ dṛṣṭvā nṛpāśca surathādayaḥ |
dudruvurlavamudyuktā jayaprāptyai raṇe tadā || 33 ||
[Analyze grammar]

suratho vimalo vīro rājā vīramaṇistathā |
sumado riputāpādyāḥ parivavruśca saṃyuge || 34 ||
[Analyze grammar]

kecitkṣuraprairmusalaiḥ kecidbāṇaiḥ sudāruṇaiḥ |
prāsaiḥ paraśubhiḥ kecitsarvataḥ prāharannṛpāḥ || 35 ||
[Analyze grammar]

tānadharmeṇa yuddhotkāndṛṣṭvā vīraśiromaṇiḥ |
daśabhirdaśabhirbāṇaistāḍayāmāsa saṃyuge || 36 ||
[Analyze grammar]

te bāṇavarṣavihatā raṇamadhye sukopanāḥ |
kecitpalāyitāḥ kecinmumuhuryuddhamaṃḍale || 37 ||
[Analyze grammar]

tāvatsa rājā śatrughno mūrcchāṃ saṃtyajya saṃgare |
lavaṃ prāyānmahāvīraṃ yoddhuṃ balasamanvitaḥ || 38 ||
[Analyze grammar]

āgatya taṃ lavaṃ prāha dhanyosi śiśusannibhaḥ |
na bālastvaṃ suraḥ kaścicchalituṃ māṃ samāgataḥ || 39 ||
[Analyze grammar]

kenāpi nahi vīreṇa pātito raṇamaṃḍale |
tvayāhaṃ prāpito mūrcchāṃ samakṣaṃ mama paśyataḥ || 40 ||
[Analyze grammar]

idānīṃ paśya me vīryaṃ tvāṃ saṃkhye pātayāmyaham |
sahasva bāṇamekaṃ tvaṃ māpalāyasva bālaka || 41 ||
[Analyze grammar]

ityuktvā samare bālaṃ śaramekaṃ samādade |
yamavaktrasamaṃ ghoraṃ lavaṇo yena ghātitaḥ || 42 ||
[Analyze grammar]

saṃdhāya bāṇaṃ jājvalyaṃ hṛdi bhettuṃ mano dadhat |
lavaṃ vīrasahasrāṇāṃ vahnivatsarvadāhakam || 43 ||
[Analyze grammar]

taṃ bāṇaṃ prajvalaṃtaṃ sa dyotayaṃtaṃ diśo daśa |
dṛṣṭvā sasmāra balinaṃ kuśaṃ vairinipātinam || 44 ||
[Analyze grammar]

yadyasminsamaye vīro bhrātā syādbalavānmama |
tadā śatrughnavaśatā na me syādbhayamulbaṇam || 45 ||
[Analyze grammar]

evaṃ tarkayatastasya lavasya ca mahātmanaḥ |
hṛdi lagno mahābāṇo ghoraḥ kālānalopamaḥ || 46 ||
[Analyze grammar]

mūrcchāṃ prāpa tadā vīro bhūpasāyakasaṃhataḥ |
saṃgare sarvavīrāṇāṃ śirobhiḥ samalaṃkṛte || 47 ||
[Analyze grammar]

iti śrīpadmapurāṇe pātālakhaṇḍe śeṣavātsyāyanasaṃvāde rāmāśvamedhe |
lavamūrcchānāma dviṣaṣṭitamo'dhyāyaḥ || 62 ||
[Analyze grammar]