Chapter 16

[English text for this chapter is available]

sumatiruvāca |
evaṃ tayā krīḍamānaḥ sarvatra dharaṇītale |
nābudhyata gatānabdāñchatasaṃkhyā parīmitān || 1 ||
[Analyze grammar]

tato jñātvāthava tadvipraḥ svakālaparivartinīm |
manorathaiśca saṃpūrṇāṃ svasyapriyatamāṃ varām || 2 ||
[Analyze grammar]

nyavartatāśramaṃ śreṣṭhaṃ payoṣṇītīrasaṃsthitam |
nirvairajaṃ tu janatāsaṃkulaṃ mṛgasevitam || 3 ||
[Analyze grammar]

tatrāvasatsa sutapāḥ śiṣyairvedasamanvitaiḥ |
sevitāṃghriyugo nityaṃ tatāpa paramaṃ tapaḥ || 4 ||
[Analyze grammar]

kadācidatha śaryātiryaṣṭumaicchata devatāḥ |
tadā cyavanamānetuṃ preṣayāmāsa sevakān || 5 ||
[Analyze grammar]

tairāhūto dvijavarastatrāgacchanmahātapāḥ |
sukanyayā dharmapatnyā svācāra pariniṣṭhayā || 6 ||
[Analyze grammar]

āgataṃ taṃ munivaraṃ patnyā putryā mahāyaśāḥ |
dadarśa duhituḥ pārśve puruṣaṃ sūryavarcasam || 7 ||
[Analyze grammar]

rājā duhitaraṃ prāha kṛtapādābhivaṃdanām |
āśiṣo na prayuṃjāno nātiprītamanā iva || 8 ||
[Analyze grammar]

cikīrṣitaṃ te kimidaṃ patistvayā |
pralaṃbhito lokanamaskṛto muniḥ |
tvayā jarāgrastamasaṃmataṃ patiṃ |
vihāya jāraṃ bhajase'mumadhvagam || 9 ||
[Analyze grammar]

kathaṃ matiste'vagatānyathāsatāṃ kulaprasūteḥ kuladūṣaṇaṃ tvidam |
bibharṣi jāraṃ yadapatrapākulaṃ pituḥ svabhartuśca nayasyadhastamām || 10 ||
[Analyze grammar]

evaṃ bruvāṇaṃ pitaraṃ smayamānā śucismitā |
uvāca tāta jāmātā tavaiṣa bhṛgunaṃdanaḥ || 11 ||
[Analyze grammar]

śaśaṃsa pitre tatsarvaṃ vayorūpābhilaṃbhanam |
vismitaḥ paramaprītastanayāṃ pariṣasvaje || 12 ||
[Analyze grammar]

somenāyājayadvīraṃ grahaṃ somasya cāgrahīt |
asomaporapyaśvinoścyavanaḥ svena tejasā || 13 ||
[Analyze grammar]

grahaṃ tu grāhayāmāsa tapobalasamanvitaḥ |
vajraṃ gṛhītvā śakrastu haṃtuṃ brāhmaṇasattamam || 14 ||
[Analyze grammar]

apaṃktipāvanau devau kurvāṇaṃ paṃktigocarau |
śakraṃ vajradharaṃ dṛṣṭvā muniḥ svahananodyatam || 15 ||
[Analyze grammar]

huṃkāramakaroddhīmānstaṃbhayāmāsa tadbhujam |
iṃdraḥ stabdhabhujastatra dṛṣṭaḥ sarvaiśca mānavaiḥ || 16 ||
[Analyze grammar]

kopena śvasamāno'hiryathā maṃtraniyaṃtritaḥ |
tuṣṭāva sa muniṃ śakraḥ stabdhabāhustaponidhim || 17 ||
[Analyze grammar]

aśvibhyāṃ bhāgadānaṃ ca kurvaṃtaṃ nirbhayāṃtaram |
kathayāmāsa bhoḥ svāmindīyatāmaśvinorbali || 18 ||
[Analyze grammar]

mayā na vāryate tāta kṣamasvāghaṃ mahatkṛtam |
ityuktaḥ sa muniḥ kopaṃ jahau tūrṇaṃ kṛpānidhiḥ || 19 ||
[Analyze grammar]

iṃdro muktabhujo'pyāsīttadānīṃ puruṣarṣabha |
etadvīkṣya janāḥ sarve kautukāviṣṭamānasāḥ || 20 ||
[Analyze grammar]

śaśaṃsurbrāhmaṇabalaṃ te tu devādidurllabham |
tato rājā bahudhanaṃ brāhmaṇebhyo'dadanmahān || 21 ||
[Analyze grammar]

cakre cāvabhṛthasnānaṃ yāgāṃte śatrutāpanaḥ |
tvayā pṛṣṭaṃ yadācakṣva cyavanasya mahodayam || 22 ||
[Analyze grammar]

sa mayā kathitaḥ sarvastapoyogasamanvitaḥ |
namaskṛtvā tapomūrtimimaṃ prāpya jayāśiṣaḥ || 23 ||
[Analyze grammar]

preṣaya tvaṃ sapatnīkaṃ rāmayajñe manorame |
śeṣa uvāca |
evaṃ tu kurvatorvārtāṃ hayaḥ prāpāśramaṃ prati || 24 ||
[Analyze grammar]

vidadhadvāyuvegena pṛthvīṃ khuravilakṣitām |
dūrvāṃkurānmukhāgreṇa caraṃstatra mahāśrame || 25 ||
[Analyze grammar]

munayo yāvadādāya darbhānsnātuṃ gatā nadīm |
śatrughnaḥ śatrusenāyāstāpanaḥ śūrasaṃmataḥ || 26 ||
[Analyze grammar]

tāvatprāpa munervāsaṃ cyavanasyātiśobhitam |
gatvā tadāśrame vīro dadarśa cyavanaṃ munim || 27 ||
[Analyze grammar]

sukanyāyāḥ samīpasthaṃ tapomūrtimivasthitam |
vavaṃde caraṇau tasya svābhidhāṃ samudāharan || 28 ||
[Analyze grammar]

śatrughnohaṃ raghupaterbhrātā vāhasya pālakaḥ || 29 ||
[Analyze grammar]

namaskaromi yuṣmabhyaṃ mahāpāpopaśāṃtaye |
iti vākyaṃ samākarṇya jagāda munisattamaḥ || 30 ||
[Analyze grammar]

śatrughna tava kalyāṇaṃ bhūyānnaravararṣabha |
yajñaṃ pālayamānasya kīrtiste vipulā bhavet || 31 ||
[Analyze grammar]

citraṃ paśyata bho viprā rāmo'pi makhakārakaḥ |
yannāmasmaraṇādīni kurvaṃti pāpanāśanam || 32 ||
[Analyze grammar]

mahāpātakasaṃyuktāḥ paradāraratā narāḥ |
yannāmasmaraṇodyuktā muktā yāṃti parāṃ gatim || 33 ||
[Analyze grammar]

pādapadmasamutthena reṇunā grāvamūrtibhṛt |
tatkṣaṇādgautamārdhāṃgī jātā mohanarūpadhṛk || 34 ||
[Analyze grammar]

māmakīyasya rūpasya dhyānena premanirbharā |
sarvapātakarāśiṃ sā dagdhvā prāptā surūpatām || 35 ||
[Analyze grammar]

daityā yasya manohārirūpaṃ pradhanamaṇḍale |
paśyaṃtaḥ prāpuretasya rūpaṃ vikṛtivarjitam || 36 ||
[Analyze grammar]

yogino dhyānaniṣṭhā ye yaṃ dhyātvā yogamāsthitāḥ |
saṃsārabhayanirmuktāḥ prayātāḥ paramaṃ padam || 37 ||
[Analyze grammar]

dhanyo'hamadya rāmasya mukhaṃ drakṣyāmi śobhanam |
payojadalanetrāṃtaṃ sunasaṃ subhrusūnnatam || 38 ||
[Analyze grammar]

sā jihvā raghunāthasya nāmakīrtanamādarāt |
karoti viparītā yā phaṇino rasanā samā || 39 ||
[Analyze grammar]

adya prāptaṃ tapaḥpuṇyamadya pūrṇā manorathāḥ |
yaddrakṣye rāmacaṃdrasya mukhaṃ brahmādidurllabham || 40 ||
[Analyze grammar]

tatpādareṇunā svāṃgaṃ pavitraṃ vidadhāmyaham |
vicitrataravārtābhiḥ pāvaye rasanāṃ svakām || 41 ||
[Analyze grammar]

ityādi rāmacaraṇasmaraṇaprabuddha |
premavrajaprasṛtagadgadavāgudaśruḥ |
śrīrāmacaṃdra raghupuṃgavadharmamūrte |
bhaktānukaṃpakasamuddhara saṃsṛtermām || 42 ||
[Analyze grammar]

jalpannaśrukalāpūrṇo munīnāṃ puratastadā |
nājñāsīttatra pārakyaṃ nijaṃ dhyānena saṃsthitaḥ || 43 ||
[Analyze grammar]

śatrughnastaṃ muniṃ prāha svāminno makhasattamaḥ |
kriyatāṃ bhavatā pādarajasā supavitritaḥ || 44 ||
[Analyze grammar]

mahadbhāgyaṃ raghupateryadyuṣmanmānasāṃtare |
tiṣṭhatyasau mahābāhuḥ sarvalokasupūjitaḥ || 45 ||
[Analyze grammar]

ityuktaḥ saparīvāraḥ sarvāgniparisaṃvṛtaḥ |
jagāma cyavanastatra pramodahradasaṃplutaḥ || 46 ||
[Analyze grammar]

hanūmāṃstaṃ padāyāṃtaṃ rāmabhaktamavekṣya ha |
śatrughnaṃ nijagādāsau vaco vinayasaṃyutaḥ || 47 ||
[Analyze grammar]

svāminkathayasi tvaṃ cenmahāpuruṣasuṃdaram |
rāmabhaktaṃ munivaraṃ nayāmi svapurīmaham || 48 ||
[Analyze grammar]

iti śrutvā mahadvākyaṃ kapivīrasya śatruhā |
ādideśa hanūmaṃtaṃ gaccha prāpayataṃ munim || 49 ||
[Analyze grammar]

hanūmāṃstaṃ muniṃ svīye pṛṣṭha āropya vegavān |
sakuṭuṃbaṃ nināyāśu vāyuḥ kha iva sarvagaḥ || 50 ||
[Analyze grammar]

āgataṃ taṃ muniṃ dṛṣṭvā rāmo matimatāṃ varaḥ |
arghyapādyādikaṃ cakre prītaḥ praṇayavihvalaḥ || 51 ||
[Analyze grammar]

dhanyo'smi munivaryasya darśanena tavādhunā |
pavitrito makho mahyaṃ sarvasaṃbhārasaṃbhṛtaḥ || 52 ||
[Analyze grammar]

iti vākyaṃ samākarṇya cyavano munisattamaḥ |
uvāca premanirbhinna pulakāṃgo'tinirvṛtaḥ || 53 ||
[Analyze grammar]

svāminbrahmaṇyadevasya tava vāḍavapūjanam |
yuktameva mahārāja dharmamārgaṃ prarakṣituḥ || 54 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
cyavanāśrame hayagamanonāma ṣoḍaśo'dhyāyaḥ || 16 ||
[Analyze grammar]