Chapter 5

[English text for this chapter is available]

śeṣa uvāca |
athābhiṣiktaṃ rāmaṃ tu tuṣṭuvuḥ praṇatāḥ surāḥ |
rāvaṇābhidhadaityeṃdra vadhaharṣitamānasāḥ || 1 ||
[Analyze grammar]

devā ūcuḥ |
jaya dāśarathe surārtihañjayajaya dānavavaṃśadāhaka |
jaya devavarāṃganāgaṇagrahaṇavyagrakarāridāraka || 2 ||
[Analyze grammar]

tavayaddanujeṃdra nāśanaṃ kavayo varṇayituṃ samutsukāḥ |
pralaye jagatāṃtatīḥ punargrasase tvaṃ bhuvaneśalīlayā || 3 ||
[Analyze grammar]

jaya janmajarādiduḥkhakaiḥ parimuktaprabaloddharoddhara |
jaya dharmakarānvayāṃbudhau kṛtajanmannajarāmarācyuta || 4 ||
[Analyze grammar]

tava devavarasya nāmabhirbahupāpā api te pavitritāḥ |
kimu sādhudvijavaryapūrvakāḥ sutanuṃ mānuṣatāmupāgatāḥ || 5 ||
[Analyze grammar]

haraviriṃcinutaṃ tava pādayoryugalamīpsitakāmasamṛddhidam |
hṛdi pavitrayavādikacihnitaiḥ suracitaṃ manasā spṛhayāmahe || 6 ||
[Analyze grammar]

yadi bhavānna dadhātyabhayaṃ bhuvo madanamūrti tiraskarakāṃtibhṛt |
suragaṇā hi kathaṃ sukhinaḥ punarnanubhavaṃti ghṛṇāmaya pāvana || 7 ||
[Analyze grammar]

yadā yadāsmāndanujāhi duḥkhadāstadā tadā tvaṃ bhuvi janmabhāgbhaveḥ |
ajo'vyayo'pīśavaro'pi sanvibho svabhāvamāsthāya nijaṃ nijārcitaḥ || 8 ||
[Analyze grammar]

mṛtasudhāsadṛśairaghanāśanaiḥ sucaritairavakīrya mahītalam |
amanujairguṇaśaṃsibhirīḍitaḥ praviśa cāśu punarhi svakaṃ padam || 9 ||
[Analyze grammar]

anādirādyojararūpadhārī hārī kirīṭī makaradhvajābhaḥ |
jayaṃ karotu prasabhaṃ hatāriḥ smarāri saṃsevitapādapadmaḥ || 10 ||
[Analyze grammar]

ityuktvā te surāḥ sarve brahmeṃdrapramukhā muhuḥ |
praṇemurarināśena prīṇitā raghunāyakam || 11 ||
[Analyze grammar]

iti stutyātisaṃhṛṣṭo raghunātho mahāyaśāḥ |
provāca tānsurānvīkṣya praṇatānnatakaṃdharān || 12 ||
[Analyze grammar]

śrīrāma uvāca |
surā vṛṇuta me yūyaṃ varaṃ kiṃcitsudurllabham |
yaṃ ko'pi devo danujo na yakṣaḥ prāpa sādaraḥ || 13 ||
[Analyze grammar]

surā ūcuḥ |
svāminbhagavataḥ sarvaṃ prāptamasmābhiruttamam |
yadayaṃ nihataḥ śatrurasmākaṃ tu daśānanaḥ || 14 ||
[Analyze grammar]

yadāyadā'suro'smākaṃ bādhāṃ paridadhāti bhoḥ |
tadā tadeti kartavyametāvadvairināśanam || 15 ||
[Analyze grammar]

tathetyuktvā punarvīraḥ provāca raghunaṃdanaḥ |
śrīrāma uvāca |
surāḥ śṛṇuta madvākyamādareṇa samanvitāḥ || 16 ||
[Analyze grammar]

bhavatkṛtaṃ madīyairvaiguṇairgrathitamadbhutam |
stotraṃ paṭhiṣyati muhuḥ prātarniśi sakṛnnaraḥ || 17 ||
[Analyze grammar]

tasya vairi parābhūtirna bhaviṣyati dāruṇā |
na ca dāridryasaṃyogo na ca vyādhiparābhavau || 18 ||
[Analyze grammar]

madīyacaraṇadvaṃdve bhaktisteṣāṃ tu bhūyasī |
bhaviṣyati mudāyukte svāṃte puṃsāṃ tu pāṭhataḥ || 19 ||
[Analyze grammar]

ityuktvā so'bhavattūṣṇīṃ naradevaśiromaṇiḥ |
surāḥ sarve prahṛṣṭāste yayurlokaṃ svakaṃ svakam || 20 ||
[Analyze grammar]

raghunātho'pi bhrātṝṃstānpālayaṃstātavadbudhān |
prajāḥ putrāniva svīyāllāṃlayaṃllokanāyakaḥ || 21 ||
[Analyze grammar]

yasmiñchāsati lokānāṃ nākālamaraṇaṃ nṛṇām |
na rogādi parābhūtirgṛheṣu ca mahīyasī || 22 ||
[Analyze grammar]

netiḥ kadāpi ddaśyeta vairijaṃ bhayameva ca |
vṛkṣāḥ sadaiva phalino mahī bhūyiṣṭhadhānyakā || 23 ||
[Analyze grammar]

putrapautraparīvāra sanāthī kṛtajīvanāḥ |
kāṃtā saṃyogajasukhairnirastavirahaklamāḥ || 24 ||
[Analyze grammar]

nityaṃ śrīraghunāthasya pādapadmakathotsukāḥ |
kadāpi paraniṃdāsu vācasteṣāṃ bhavaṃti na || 25 ||
[Analyze grammar]

kāravo'pi kadā pāpaṃ nācaraṃti manasyaho |
raghunāthakarāghātaduḥkhaśaṃkābhiśaṃsinaḥ || 26 ||
[Analyze grammar]

sītāpatimukhāloka niścalībhūtalocanāḥ |
lokā babhūvuḥ satataṃ kāruṇyaparipūritāḥ || 27 ||
[Analyze grammar]

rājyaṃ prāptamasāpatnaṃ samṛddhabalavāhanam |
ṛṣibhirhṛṣṭapuṣṭaiśca ramyaṃ hāṭakabhūṣaṇaiḥ || 28 ||
[Analyze grammar]

saṃpuṣṭamiṣṭāpūrtānāṃ dharmāṇāṃ nityakartṛbhiḥ |
sadā saṃpannasasyaṃ ca suvasukṣetrasaṃyutam || 29 ||
[Analyze grammar]

sudeśaṃ suprajaṃ svasthaṃ sutṛṇaṃ bahugodhanam |
devatāyatanānāṃ ca rājibhiḥ parirājitam || 30 ||
[Analyze grammar]

supūrṇā yatra vai grāmāḥ suvittarddhivirājitāḥ |
supuṣpakṛtrimodyānāḥ susvāduphalapādapāḥ || 31 ||
[Analyze grammar]

sapadminīkakāsārā yatra rājaṃti bhūmayaḥ |
sadaṃbhā nimnagā yatra na yatra janatā kvacit || 32 ||
[Analyze grammar]

kulānyeva kulīnānāṃ varṇānāṃ nādhanāni ca |
vibhramo yatra nārīṣu na vidvatsu ca karhicit || 33 ||
[Analyze grammar]

nadyaḥ kuṭilagāminyo na yatra viṣaye prajāḥ |
tamoyuktāḥ kṣapā yatra bahuleṣu na mānavāḥ || 34 ||
[Analyze grammar]

rajoyujaḥ striyo yatra nādharmabahulā narāḥ |
dhanairanaṃdho yatrāsti jano naiva ca bhojane || 35 ||
[Analyze grammar]

anayaḥ syaṃdano yatra na ca vairājapūruṣaḥ |
daṃḍaḥ paraśukuddālavālavyajanarājiṣu || 36 ||
[Analyze grammar]

ātapatreṣu nānyatra kvacitkrodhoparodhajaḥ |
anyatrākṣikavṛṃdebhyaḥ kvacinna paridevanam || 37 ||
[Analyze grammar]

ākṣikā eva dṛśyaṃte yatra pāśakapāṇayaḥ |
jāḍyavārtā jaleṣveva strīmadhyā eva durbalāḥ || 38 ||
[Analyze grammar]

kaṭhorahṛdayā yatra sīmaṃtinyo na mānavāḥ |
auṣadheṣveva yatrāsti kuṣṭhayogo na mānave || 39 ||
[Analyze grammar]

vedho yatra suratneṣu śūlaṃ mūrtikareṣu vai |
kaṃpaḥ sātvikabhāvottho na bhayātkvāpi kasyacit || 40 ||
[Analyze grammar]

saṃjvaraḥ kāmajo yatra dāridryakaluṣasya ca |
durllabhatvaṃ sadaivasya sukṛtena ca vastunaḥ || 41 ||
[Analyze grammar]

ibhā eva pramattā vai yuddhe vīcyo jalāśaye |
dānahānirgajeṣveva tīkṣṇā eva hi kaṃṭakāḥ || 42 ||
[Analyze grammar]

bāṇeṣu guṇaviśleṣo baṃdhoktiḥ pustake dṛḍhā |
snehatyāgaḥ khaleṣveva na ca vai svajane jane || 43 ||
[Analyze grammar]

taṃ deśaṃ pālayāmāsa lālayaṃllālitāḥ prajāḥ |
dharmaṃ saṃsthāpayandeśe duṣṭe daṃḍadharopamaḥ || 44 ||
[Analyze grammar]

evaṃ pālayato deśaṃ dharmeṇa dharaṇītalam |
sahasraṃ ca vyatīyurvai varṣāṇyekādaśa prabhoḥ || 45 ||
[Analyze grammar]

tatra nīcajanācchrutvā sītāyā apamānatām |
svāṃ ca niṃdāṃ rajakatastāṃ tatyāja raghūdvahaḥ || 46 ||
[Analyze grammar]

pṛthvīṃ pālayamānasya dharmeṇa nṛpatestadā |
sītāṃ virahitāmekāṃ nideśena surakṣitām || 47 ||
[Analyze grammar]

kadācitsaṃsado madhye hyāsīnasya mahāmateḥ |
ājagāma muniśreṣṭhaḥ kuṃbhotpattirmunirmahān || 48 ||
[Analyze grammar]

gṛhītvārghyaṃ samuttasthau vasiṣṭhena samanvitaḥ |
janatābhirmahārājo vārdhiśoṣakamāgatam || 49 ||
[Analyze grammar]

svāgatena susaṃbhāvya papraccha tamanāmayam |
sukhopaviṣṭaṃ viśrāṃtaṃ babhāṣe raghunaṃdanaḥ || 50 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
agastyasamāgamonāma paṃcamo'dhyāyaḥ || 5 ||
[Analyze grammar]