Chapter 4

[English text for this chapter is available]

vātsyāyana uvāca |
bhujagādhīśvareśāna dharābhāradharakṣama |
śṛṇvekaṃ saṃśayaṃ mahyaṃ kṛpayā kathayasva tam || 1 ||
[Analyze grammar]

raghunāthasya gamanaṃ vanaṃ prati yadā hyabhūt |
tadā prabhṛti dehena sthitā śūnyena cetasā || 2 ||
[Analyze grammar]

tadviprayogavidhurā kṛśadehātiduḥkhitā |
sumukhānmaṃtriṇaḥ śrutvā raghunāthaṃ samāgatam || 3 ||
[Analyze grammar]

kathaṃ jaharṣa kimabhūtkīdṛśaṃ tatra cihnitam |
rāmacaṃdrasya saṃdeśahartāraṃ kimuvāca sā || 4 ||
[Analyze grammar]

etanme saṃśayaṃ chiṃdhi raghunāthaguṇodayam |
yathāvacchṛṇvate mahyaṃ kathayasva prasādataḥ || 5 ||
[Analyze grammar]

śeṣa uvāca |
sādhupṛṣṭaṃ mahābhāga dvijavaryapuraskṛta |
tanme nigadataḥ sākṣācchṛṇuṣvaikamanāḥ kila || 6 ||
[Analyze grammar]

sā vai tadvadanāṃbhoja cyutaṃ rāmāgamāmṛtam |
pītvā pītvā babhūvāho sthagitāṃgena vihvalā || 7 ||
[Analyze grammar]

kiṃ me svapno vimūḍhāyāḥ kiṃ vā bhramakaraṃ vacaḥ |
mamavai maṃdabhāgyāyāḥ kathaṃ rāmekṣaṇaṃ punaḥ || 8 ||
[Analyze grammar]

bahunā tapasā kṛtvā prāpto'yaṃ vai sutaḥ śiśuḥ |
kenacinmama pāpena viprayogaṃ gataḥ punaḥ || 9 ||
[Analyze grammar]

sumaṃtrinkuśalī rāmaḥ sītālakṣmaṇasaṃyutaḥ |
kathaṃ māṃ smarate vīro vanacārī suduḥkhitām || 10 ||
[Analyze grammar]

iti sā vilalāpoccai raghunāthasmṛtiṃ gatā |
na niveda nijaṃ kiṃcitparakīyaṃ vimohitā |
sumukho'pi tathā dṛṣṭvā duḥkhitāṃ mātaraṃ bhṛśam || 11 ||
[Analyze grammar]

vījayāmāsa vāsograiḥ saṃjñāmāpa ca sā punaḥ |
uvāca jananīṃ saumyaṃ vacoharṣakaraṃ muhuḥ || 12 ||
[Analyze grammar]

raghunāthāgamasmāra hṛṣṭāṃ tāṃ vyadadhātpunaḥ |
mātarviddhi gṛhaṃ prāptaṃ raghunāthaṃ salakṣmaṇam || 13 ||
[Analyze grammar]

sītayā sahitaṃ paśya cāśīrbhirabhiyuṃkṣva ca |
iti tathyaṃ vacaḥ śrutvā sumukhena prabhāṣitam || 14 ||
[Analyze grammar]

yādṛśaṃ harṣamāpede tādṛśaṃ vedmyahaṃ nahi |
utthāya cājire prāptā romāṃcitatanūruhā || 15 ||
[Analyze grammar]

harṣavihvalitāṃgyaśru muṃcaṃtī rāmamaikṣata |
tāvatsa rāmo rājeṃdro narayānamadhiśritaḥ || 16 ||
[Analyze grammar]

prāptaḥ svamāturbhavanaṃ kaikeyyāḥ sunayaḥ puraḥ |
kaikeyyapi trapābhāranamrā rāmaṃ puraḥsthitam || 17 ||
[Analyze grammar]

novāca kiṃcinmahatīṃ ciṃtāṃ prāptavatī muhuḥ |
sūryavaṃśadhvajo rāmo mātaraṃ vīkṣya lajjitām || 18 ||
[Analyze grammar]

uvāca sāṃtvayaṃstāṃ ca vākyairvinayamiśritaiḥ |
śrīrāma uvāca |
mātarmayā vanaṃ gatvā sarvamācaritaṃ tathā || 19 ||
[Analyze grammar]

adhunā karavai kiṃ vā tvadājñāto jananyaho |
mayā nyūnaṃ kṛtaṃ nāsti kathaṃ māṃ nekṣyase punaḥ || 20 ||
[Analyze grammar]

āśīrbhirabhinaṃdyainaṃ bharataṃ māṃ ca vīkṣaya |
iti śrutvāpi tadvākyaṃ sā namravadanānagha || 21 ||
[Analyze grammar]

śanaiḥ śanaiḥ pratyuvāca rāma gaccha svamālayam |
rāmo'pi śrutvā vacanaṃ jananyāḥ puruṣottamaḥ || 22 ||
[Analyze grammar]

namaskṛtya yayau gehaṃ sumitrāyāḥ kṛpānidhiḥ |
sumitrā putrasahitaṃ rāmaṃ dṛṣṭvā mahāmanāḥ || 23 ||
[Analyze grammar]

ciraṃjīva ciraṃjīva hyāśīrbhiriti cābhyadhāt |
mātuśca rāmabhadro'pi caraṇau praṇipatya ca || 24 ||
[Analyze grammar]

pariṣvajya mudāyukto jagāda vacanaṃ punaḥ |
ratnagarbhe mama bhrātrā kenāpi na kṛtaṃ tathā || 25 ||
[Analyze grammar]

yathāyamakaroddhīmānmamaduḥkhāpanodanam || 26 ||
[Analyze grammar]

rāvaṇena hṛtā sītā mayā yatprāpyate punaḥ |
mātastatsarvamāviddhi lakṣmaṇasya viceṣṭitam || 27 ||
[Analyze grammar]

dattāmāśiṣamāgṛhya śirasāyaṃ sumitrayā |
nijamātuśca bhavanaṃ prayayau vibudhairvṛtaḥ || 28 ||
[Analyze grammar]

mātaraṃ vīkṣya hṛṣitāṃ nijadarśanalālasām |
svayānādavaruhyāśu caraṇāvagrahīddhariḥ || 29 ||
[Analyze grammar]

mātā taddarśanotkaṃṭhā vihvalīkṛtamānasā |
pariṣvajya pariṣvajya rāmaṃ mudamavāpa sā || 30 ||
[Analyze grammar]

śarīre romaharṣo'bhūdgadgadā vāgabhūttadā |
harṣāśrūṇi tu soṣṇāni pravāhaṃ prāpurāpadāt || 31 ||
[Analyze grammar]

jananīṃ vīkṣya vinayī tāṭaṃkadvayavarjitām |
karākalpa padākalparahitāṃ bibhratīṃ tanum || 32 ||
[Analyze grammar]

kiṃcitsvadarśanāddhṛṣṭāṃ kṛśāṃgīṃ tāṃ sa śokabhāk |
duḥkhasya samayo nāyamiti matvā jagāda tām || 33 ||
[Analyze grammar]

śrīrāma uvāca |
mātarmayā tvaccaraṇau cirakālaṃ na sevitau |
tataḥ kṣamasvāparādhaṃ bhāgyahīnasya vai mama || 34 ||
[Analyze grammar]

ye putrā mātāpitrorna śuśrūṣāyāṃ samutsukāḥ |
te maṃtavyāḥ parā mātaḥ kīṭakā retaso bhavāḥ || 35 ||
[Analyze grammar]

kiṃ kurve janakājñāto gato vai daṃḍakaṃ vanam |
tatrāpi tvatkṛpāpāṃgāttīrṇo'smi duḥkhasāgaram || 36 ||
[Analyze grammar]

rāvaṇena hṛtā sītā laṃkāyāṃ gamitā punaḥ |
tvatkṛpāto mayā labdhā taṃ hatvā rākṣaseśvaram || 37 ||
[Analyze grammar]

sīteyaṃ tvaccaraṇayoḥ patitā vai pativratā |
saṃbhāvayāśu cakitāṃ tvatpādārpitamānasām || 38 ||
[Analyze grammar]

iti śrutvā tu tadvākyaṃ pādayoḥ patitāṃ snuṣām |
āśīrbhirabhiyujyaināṃ babhāṣe tāṃ pativratām || 39 ||
[Analyze grammar]

sīte svapatinā sārddhaṃ ciraṃ vilasa bhāmini |
putrau prasūya ca kulaṃ svakaṃ pāvaya pāvane || 40 ||
[Analyze grammar]

tvatsadṛśyaḥ patiparāḥ patiduḥkhasukhānugāḥ |
bhavaṃti duḥkhabhāginyo na hi satyaṃ jagattraye || 41 ||
[Analyze grammar]

videhaputri svakulaṃ tvayā pāvitamātmanā |
rāmapādābjayugalamanuyāṃtyā mahāvanam || 42 ||
[Analyze grammar]

kiṃ citraṃ yatpumāṃsastu vairikoṭiprabhaṃjanāḥ |
yeṣāṃ gehe satī bhāryā svapatipriyavāñchikā || 43 ||
[Analyze grammar]

ityuktvā raghunāthasya bhāryāmaṃcitalocanām |
tūṣṇīṃ babhūva hṛṣitā prahṛṣṭasvatanūruhā || 44 ||
[Analyze grammar]

atha bhrātāsya bharataḥ pitrā dattaṃ nijaṃ mahat |
rājyaṃ nivedayāmāsa rāmacaṃdrāya dhīmate || 45 ||
[Analyze grammar]

maṃtriṇaste prahṛṣṭāṃgā daivajñānmaṃtrakovidān |
āhūya sumuhūrtaṃte papracchuḥ paramādarāt || 46 ||
[Analyze grammar]

śubhe muhūrte sudine śubhanakṣatrasaṃyute |
abhiṣekaṃ mahārājye kārayāmāsurudyatāḥ || 47 ||
[Analyze grammar]

saptadvīpavatīṃ pṛthvīṃ vyāghracarmaṇi suṃdare |
likhitvopari rājeṃdro mahārājodhitasthivān || 48 ||
[Analyze grammar]

taddinādeva sādhūnāṃ manāṃsi pramudaṃ yayuḥ |
duṣṭānāṃ cetaso glānirabhavatparatāpinām || 49 ||
[Analyze grammar]

striyastu patibhaktyā ca pativrataparāyaṇāḥ |
manasāpi kadā pāpaṃ nācaraṃti janā mune || 50 ||
[Analyze grammar]

daityādevāstathā nāgā yakṣāsuramahoragāḥ |
sarve nyāyapathe sthitvā rāmājñāṃ śirasā dadhuḥ || 51 ||
[Analyze grammar]

paropakaraṇeyuktāḥ svadharmasukhanirvṛtāḥ |
vidyāvinodagamitā dinarātrikṣaṇāḥ śubhāḥ || 52 ||
[Analyze grammar]

vāto'pi mārgasaṃsthānāṃ balānnāharate mahān |
vāsāṃsyapi tu sūkṣmāṇi tatra caurakathā nahi || 53 ||
[Analyze grammar]

dhanado hyarthināṃ rāmaḥ kāruṇyaśca kṛpānidhiḥ |
bhrātṛbhiḥ sahito nityaṃ gurudevastutiṃ vyadhāt || 54 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe |
raghuvarasya rājyābhiṣekonāma caturtho'dhyāyaḥ || 4 ||
[Analyze grammar]