Chapter 2

[English text for this chapter is available]

śeṣa uvāca |
atha taddarśanotkaṇṭhā vihvalīkṛtacetasā |
punaḥ punaḥ smṛto bhrātā bharato dhārmikāgraṇīḥ || 1 ||
[Analyze grammar]

uvāca ca hanūmaṃtaṃ balavaṃtaṃ samīrajam |
prasphuraddaśanavyāja candrakāṃtihatāṃdhakaḥ || 2 ||
[Analyze grammar]

śṛṇu vīra hanūmaṃstvaṃ madgiraṃ bhrātṛnoditām |
ciraṃtanaviyogena gadgadīkṛtavihvalām || 3 ||
[Analyze grammar]

gaccha taṃ bhrātaraṃ vīra samīraṇatanūdbhava |
madviyogakṛśāṃ yaṣṭiṃ vapuṣo bibhrataṃ haṭhāt || 4 ||
[Analyze grammar]

yo valkalaṃ parīdhatte jaṭāṃ dhatte śiroruhe |
phalānāṃ bhakṣaṇamapi na kuryādvirahāturaḥ || 5 ||
[Analyze grammar]

parastrī yasya māteva loṣṭavatkāṃcanaṃ punaḥ |
prajāḥ putrānivodrakṣedbāṃdhavo mama dharmavit || 6 ||
[Analyze grammar]

madviyogajaduḥkhāgnijvālādagdhakalevaram |
madāgamanasaṃdeśa payovṛṣṭyāśu siṃcatam || 7 ||
[Analyze grammar]

sītayā sahitaṃ rāmaṃ lakṣmaṇena samanvitam |
sugrīvādikapīṃdraiśca rakṣobhiḥ sabibhīṣaṇaiḥ || 8 ||
[Analyze grammar]

prāptaṃ nivedaya sukhātpuṣpakāsanasaṃsthitam |
yena me so'nujaḥ śīghraṃ sukhameti madāgamāt || 9 ||
[Analyze grammar]

iti śrutvā tato vākyaṃ raghuvīrasya dhīmataḥ |
jagāma bharatāvāsaṃ naṃdigrāmaṃ nideśakṛt || 10 ||
[Analyze grammar]

gatvā sa naṃdigrāmaṃ tu maṃtrivṛddhaiḥ susaṃyatam |
bharataṃ bhrātṛvirahaklinnaṃ dhīmāndadarśa ha || 11 ||
[Analyze grammar]

kathayaṃtaṃ maṃtrivṛddhānrāmacaṃdrakathānakam |
tadīya padāpāthoja makaraṃdasunirbharaḥ || 12 ||
[Analyze grammar]

namaścakāra bharataṃ dharmaṃ mūrtiyutaṃ kila |
vidhātrā sakalāṃśena sattvenaiva vinirmitam || 13 ||
[Analyze grammar]

taṃ dṛṣṭvā bharataḥ śīghraṃ pratyutthāya kṛtāṃjali |
svāgataṃ ceti hovāca rāmasya kuśalaṃ vada || 14 ||
[Analyze grammar]

ityevaṃ vadatastasya bhujo dakṣiṇato'sphurat |
hṛdayācca gataḥ śoko harṣāsraiḥ pūritānanaḥ || 15 ||
[Analyze grammar]

vilokya tādṛśaṃ bhūpaṃ pratyuvāca kapīśvaraḥ |
nikaṭe hi puraḥ prāptaṃ viddhi rāmaṃ salakṣmaṇam || 16 ||
[Analyze grammar]

rāmāgamanasaṃdeśāmṛtasiktakalevaraḥ |
prāpayaddharṣapūraṃ hi sahasrāsyo na vedmyaham || 17 ||
[Analyze grammar]

jagāda mama tannāsti yattubhyaṃ dīyate mayā |
dāso'smi janmaparyaṃtaṃ rāmasaṃdeśahārakaḥ || 18 ||
[Analyze grammar]

vasiṣṭho'pi gṛhītvārghyaṃ maṃtrivṛddhāḥ suharṣitāḥ |
jagmuste rāmacaṃdraṃ ca hanumaddarśitādhvanā || 19 ||
[Analyze grammar]

dṛṣṭvā dūrātsamāyāṃtaṃ rāmacaṃdraṃ manoramam |
puṣpakāsanamadhyasthaṃ sasītaṃ sahalakṣmaṇam || 20 ||
[Analyze grammar]

rāmo'pi dṛṣṭvā bharataṃ pādacāreṇa saṃgatam |
jaṭāvalkalakaupīna paridhānasamanvitam || 21 ||
[Analyze grammar]

amātyānbhrātṛveṣeṇa samaveṣāñjaṭādharān |
nityaṃ tapaḥ kliṣṭatayā kṛśarūpāndadarśa ha || 22 ||
[Analyze grammar]

rāmo'pi ciṃtayāmāsa dṛṣṭvā vai tādṛśaṃ nṛpam |
aho daśarathasyāyaṃ rājarājasya dhīmataḥ || 23 ||
[Analyze grammar]

putraḥ padātirāyāti jaṭāvalkalaveṣabhṛt |
na duḥkhaṃ tādṛśaṃ me'nyadvanamadhyagatasya hi || 24 ||
[Analyze grammar]

yādṛśaṃ madviyogena caitasya parivarttate |
aho paśyata me bhrātā prāṇātpriyatamaḥ sakhā || 25 ||
[Analyze grammar]

śrutvā māṃ nikaṭe prāptaṃ maṃtrivṛddhaiḥ suharṣitaiḥ |
draṣṭuṃ māṃ bharato'bhyeti vasiṣṭhena samanvitaḥ || 26 ||
[Analyze grammar]

iti bruvannarapatiḥ puṣpakānnabhasoṃ'gaṇāt |
bibhīṣaṇahanūmadbhyāṃ lakṣmaṇena kṛtādaraḥ || 27 ||
[Analyze grammar]

yānādavatatārāśu virahātklinnamānasaḥ |
bhrātarbhrātaḥ punarbhrātarbhrātarbhrātarvadanmuhuḥ || 28 ||
[Analyze grammar]

dṛṣṭvā samuttīrṇamimaṃ rāmacaṃdraṃ surairyutam |
bharato bhrātṛvirahaklinnaṃ dhīmāndadarśa ha |
harṣāśrūṇi pramuṃcaṃśca daṃḍavatpraṇanāma ha || 29 ||
[Analyze grammar]

raghunātho'pi taṃ dṛṣṭvā daṃḍavatpatitaṃ bhuvi |
utthāpya jagṛhe dorbhyāṃ harṣālokasamanvitaḥ || 30 ||
[Analyze grammar]

utthāpito'pi hi bhṛśaṃ nodatiṣṭhadrudanmuhuḥ |
rāmacaṃdrapadāṃbhojagrahaṇāsaktabāhubhṛt || 31 ||
[Analyze grammar]

bharata uvāca |
durācārasya duṣṭasya pāpino me kṛpāṃ kuru |
rāmacaṃdra mahābāho kāruṇyātkaruṇānidhe || 32 ||
[Analyze grammar]

yaste videhajā pāṇisparśaṃ krūramamanyata |
sa eva caraṇo rāma vane babhrāma matkṛte || 33 ||
[Analyze grammar]

ityuktvāśrumukho dīnaḥ parirabhya punaḥ punaḥ |
prāṃjaliḥ puratastasthau harṣavihvalitānanaḥ || 34 ||
[Analyze grammar]

raghunāthastamanujaṃ pariṣvajya kṛpānidhiḥ |
praṇamya ca mahāmaṃtrimukhyānāpṛcchya sādaram || 35 ||
[Analyze grammar]

bharatena samaṃ bhrātrā puṣpakāsanamāsthitaḥ |
sītāṃ dadarśa bharato bhrātṛpatnīmaniṃditām || 36 ||
[Analyze grammar]

anasūyāmivātreḥ kiṃ lopāmudrāṃ ghaṭodbhuvaḥ |
pativratāṃ janakajāmamanyatananāma ca || 37 ||
[Analyze grammar]

mātaḥ kṣamasva yadaghaṃ mayā kṛtamabuddhinā |
tvatsadṛśyaḥ patiparāḥ sarveṣāṃ sādhukārikāḥ || 38 ||
[Analyze grammar]

jānakyāpi mahābhāgā devaraṃ vīkṣya sādaram |
āśīrbhirabhiyujyātha samapṛcchadanāmayam || 39 ||
[Analyze grammar]

vimānavaramārūḍhāste sarve nabhasoṃ'gaṇe |
kṣaṇādālokayāṃcakre nikaṭe svapituḥ purīm || 40 ||
[Analyze grammar]

iti śrīpadmapurāṇe pātālakhaṃḍe rāmāśvamedhe śeṣavātsyāyanasaṃvāde |
rāmarājadhānīdarśanonāma dvitīyo'dhyāyaḥ || 2 ||
[Analyze grammar]