Chapter 22

[English text for this chapter is available]

śaunakauvāca |
māhātmyaṃ brūhi sarvajña śṛṇvatāṃ pāpanāśanam |
sarvaprāṇihitārthāya tulasyā anukaṃpayā || 1 ||
[Analyze grammar]

sūta uvāca |
tulasyāḥ parisare yasya kānanaṃ tiṣṭhati dvija |
gṛhasya tīrtharūpatvānnāyāṃti yamakiṃkarāḥ || 2 ||
[Analyze grammar]

tulasyāḥ kānanaṃ vipra sarvapāpaharaṃ śubham |
ropayaṃti narāḥ śreṣṭhāste na paśyaṃti bhāskarim || 3 ||
[Analyze grammar]

ropaṇaṃ pālanaṃ sevāṃ darśanaṃ sparśanaṃ tu yaḥ |
kuryyāttasya praṇaṣṭaṃ syātsarvapāpaṃ dvijottama || 4 ||
[Analyze grammar]

komalaistulasīpatrairarcayaṃti hariṃ tu ye |
kālasya sadanaṃ vipra te na yāṃti mahāśayāḥ || 5 ||
[Analyze grammar]

gaṃgādyāḥ saritaḥ śreṣṭhā viṣṇu brahma maheśvarāḥ |
devaistīrthaiḥ puṣkarādyaistiṣṭhaṃti tulasīdale || 6 ||
[Analyze grammar]

yo yuktastulasīpatraiḥ pāpī prāṇānvimuñcati |
viṣṇorniketanaṃ yāti satyametanmayoditam || 7 ||
[Analyze grammar]

tulasīmṛttikālipto yuktaḥ pāpaśatairapi |
vimuṃcati naraḥ prāṇānsa yāti harimandiram || 8 ||
[Analyze grammar]

yo naro dhārayedvipra tulasīkāṣṭhacaṃdanam |
tasyāṅgaṃ na spṛśetpāpaṃ sa yāti paramaṃ padam || 9 ||
[Analyze grammar]

tulasīkāṣṭhamālāṃ tu kaṇṭhasthāṃ vahate tu yaḥ |
apyaśaucopyanācāro bhaktyā yāti harergṛham || 10 ||
[Analyze grammar]

dhātrīphalakṛtāmālā tulasīkāṣṭhasaṃbhavā |
dṛśyate yasya dehe tu sa vai bhāgavato naraḥ || 11 ||
[Analyze grammar]

tulasīdalajāṃ mālāṃ kaṇṭhasthāṃ vahate tu yaḥ |
viṣṇūcchiṣṭāṃ viśeṣeṇa sa namasyo divaukasām || 12 ||
[Analyze grammar]

yaḥ punastulasīmālāṃ kaṇṭhe kṛtvā janārdanam |
pūjayetpuṇyamāpnoti pratipuṣpaṃ gavāyutam || 13 ||
[Analyze grammar]

dhārayanti na ye mālāṃ haitukāḥ pāpabuddhayaḥ |
narakānna nivartaṃte dagdhāḥ kopāgninā hareḥ || 14 ||
[Analyze grammar]

na jahyāttulasīmālāṃ dhātrīmālāṃ viśeṣataḥ |
mahāpātakasaṃhartrīṃ dharmakāmārthadāyinīm || 15 ||
[Analyze grammar]

spṛśecca yāni lomāni dhātrīmālā kalau nṛṇām |
tāvadvarṣasahasrāṇi vasate keśavālaye || 16 ||
[Analyze grammar]

nivedya keśave mālāṃ tulasīkāṣṭhasaṃbhavām |
vahate yo naro bhaktyā tasya vai nāsti pātakam || 17 ||
[Analyze grammar]

tulasīkāṣṭhamālāṃ tu pretarājasya dūtakāḥ |
dṛṣṭvā naśyanti dūreṇa vātoddhūtaṃ yathā dalam || 18 ||
[Analyze grammar]

tulasyā vipine dhātryāśchāyāsu yo narottamaḥ |
piṇḍaṃ dadāti pitaro muktiṃ yānti dvijottama || 19 ||
[Analyze grammar]

pāṇau mūrdhni gale caiva karṇayośca mukhe dvija |
dhātrīphalaṃ yastu dhatte sa vijñeyo hariḥ svayam || 20 ||
[Analyze grammar]

dhātrīpatraiḥ phalairvipra śrīhariṃ cārcayeddvija |
koṭijanmārjitaṃ pāpaṃ pūjayā naśyati sakṛt || 21 ||
[Analyze grammar]

yajñādevāśca munayastīrthāni kārtike dvija |
dhātrīvṛkṣaṃ samāśritya tiṣṭhanti kārtike sadā || 22 ||
[Analyze grammar]

dhātrīpatraṃ kārtike ca dvādaśyāṃ tulasīdalam |
cinoti yo naro gacchennirayaṃ yātanāmayam || 23 ||
[Analyze grammar]

dhātrīchāyāsu yo vipra cānnaṃ bhunakti kārtike |
annasaṃsargajaṃ pāpamāvarṣaṃ tasya naśyati || 24 ||
[Analyze grammar]

tulasīvanamadhye ca dhātrīmūle ca kārtike |
kuryāddharyarcanaṃ vipra vaikuṇṭhaṃ yāti sa dhruvam || 25 ||
[Analyze grammar]

tulasīmūladeśe'pi sthitaṃ vāri dvijottama |
gṛhṇāti mastake bhaktyā pāpī yāti harergṛham || 26 ||
[Analyze grammar]

tulasīpatragalitaṃ yastoyaṃ śirasāvahet |
sarvatīrtheṣu sa snātaścāṃte yāti harergṛham || 27 ||
[Analyze grammar]

purā kaściddvijaśreṣṭho dvāpare'bhūnmahāmune |
snātvaikadā tulasyai sa vanaṃ datvā gṛhaṃ gataḥ || 28 ||
[Analyze grammar]

ādityo varcasā nāmnā mārttaṃḍa iva puṇyataḥ |
tṛṣārto bhakṣakaḥ kaścidāgato bahukalmaṣaḥ || 29 ||
[Analyze grammar]

tulasyāmūlatastoyaṃ pītvā cāsau hatāṃhasaḥ |
tvarayāpyāgato vyādho nāmnā yaścāsimarddanaḥ || 30 ||
[Analyze grammar]

uvāca bhuktaṃ cānnaṃ ca bhuktvā bhagnaṃ gataḥ kimu |
kṛtvā me pākabhāṃḍasthaṃ cāgato hiṃsakasya te || 31 ||
[Analyze grammar]

vivyādha taṃ gataprāṇaṃ netuṃ vai śamanājñayā |
āgatāḥ kiṃkarāḥ kruddhāḥ pāśamudgarapāṇayaḥ || 32 ||
[Analyze grammar]

baddhvā netuṃ manaścakrurāgatā viṣṇukiṃkarāḥ |
tadā chittvā carmapāśaṃ syaṃdane taṃ manohare || 33 ||
[Analyze grammar]

tūrṇamārohayāmāsuḥ papracchurvinayānvitāḥ |
te'pi puṇyena bhoḥ saṃtaḥ kena vai nīyate'pyasau || 34 ||
[Analyze grammar]

ūcuste'sau purā rājā puṇyaṃ bahutaraṃ kṛtam |
akaroddharaṇaṃ kāṃcitsuṃdarīṃ cāṃganāmayam || 35 ||
[Analyze grammar]

anena cāṃhasā rājā gato vai śamanakṣayam |
tatrakleśaṃ tu yuṣmābhirdattaṃ vai śamanājñayā || 36 ||
[Analyze grammar]

tāmramayyāstriyāsārddhaṃ krīḍāṃ suptvā cakāra saḥ |
taptāyāṃ lohaśayyāyāṃ vaiklavyaṃ karmaṇā nṛpa || 37 ||
[Analyze grammar]

taptāyobhīṣaṇaṃ taptaṃ lohastaṃbhaṃ yamājñayā |
tataḥ sthitaḥ samāliṃgya bhuktvā duḥkhaṃ ciraṃ nṛpaḥ || 38 ||
[Analyze grammar]

siktaḥ kṣārāṃbudhārābhiranyairvai śamanālaye |
tato narakaśeṣe ca pāpayonau muhurmuhuḥ || 39 ||
[Analyze grammar]

janmāsādya ciraṃ duḥkhamanubhūtaṃ svakarmaṇā |
tulasīmūlakaṃ vāri pītvā yāti harergṛham || 40 ||
[Analyze grammar]

idānīṃ tadvacaḥ śrutvā gatādūtā yathāgatāḥ |
tena sārddhaṃ viṣṇudūtā gatā vaikuṃṭhamaṃdiram || 41 ||
[Analyze grammar]

māhātmyaṃ kathitaṃ brahmantulasyāḥ pāpanāśanam |
kurvaṃti sevāṃ ye bhaktyā na jāne kiṃ bhavenmune || 42 ||
[Analyze grammar]