Chapter 16

[English text for this chapter is available]

śaunaka uvāca |
karmaṇā kena bhoḥ sūta cainasāṃ saṃkṣayo bhavet |
śrīhareśca kṛpā bhūyāttadvadasvānukaṃpayā || 1 ||
[Analyze grammar]

sūta uvāca |
śṛṇu śaunaka vakṣyāmi śṛṇvatāṃ pāpanāśanam |
yena viṣṇoḥ kṛpā syādvai vṛjinakṣayakāriṇī || 2 ||
[Analyze grammar]

paurṇamāsyāṃ tu yo vipra bhaktibhāvasamanvitaḥ |
kuryyānnānāvidhānena saparyyāṃ śrījagadvibhoḥ || 3 ||
[Analyze grammar]

kaluṣaṃ tasya naśyeta koṭijanmārjitaṃ mune |
tasminśrīramaṇasyāsya kṛpā jātā bhaveddhruvam || 4 ||
[Analyze grammar]

dvādaśyāmannadānaṃ yo bhaktyā kuryāddvijātaye |
tasya naśyaṃti pāpāni tamāṃsī vāruṇodaye || 5 ||
[Analyze grammar]

yo naraḥ śrīhariṃ kuryātsnapanaṃ payasā dvija |
tatprītiḥ śrīhareḥ sadyo dvādaśyāṃ śarkarādibhiḥ || 6 ||
[Analyze grammar]

maṃtraṃ vinā tu yo vipra dadyācchrīharaye kila |
pāṣāṇasadṛśaṃ puṣpaṃ dātā yāti adhogatim || 7 ||
[Analyze grammar]

kṣmāsurāya ca mūrkhāya pāṣāṇasadṛśaṃ tu yat |
dadyāddānaṃ naro yo vai tasya puṇyaṃ na vidyate || 8 ||
[Analyze grammar]

vidyāhīno dvijo mohāddānaṃ gṛhṇāti mūḍhadhīḥ |
kālānalaṃ yathā jīrṇaṃ tena sa nirayaṃ vrajet || 9 ||
[Analyze grammar]

yathā dārumayo hastī mṛgaścitramayo yathā |
vidyāhīno dvijo vipra trayaste nāmadhārakāḥ || 10 ||
[Analyze grammar]

yathādhvanisthitaṃ vāri pavanārkeṇa śuddhyati |
bhaktyā tu pārṣadaṃ dṛṣṭvā tasya naśyati kalmaṣam || 11 ||
[Analyze grammar]

yo naraścāśvine māsi saghṛtānpūrṇimā dine |
dadyācchrīharaye lājānkrīḍārthaṃ tu varāṭikām || 12 ||
[Analyze grammar]

bhaktyā yāti hareḥ sthānaṃ punarāvṛttivarjitaḥ |
na dadyādyo naro mohāttasminna tuṣṭido hariḥ || 13 ||
[Analyze grammar]

varāṭikāṃ yāvatīṃ yo haraye paurṇimādine |
tāvaddinaṃ hareḥ sthānaṃ cāśvine saṃvaseddhruvam || 14 ||
[Analyze grammar]

karavīrapure hyāsītpurā śūdro'pi nirddayaḥ |
kāladvijo dvijaśreṣṭha nāmnā pāpī bhayaṃkaraḥ || 15 ||
[Analyze grammar]

svakāryanirataḥ so'pi svāmikāryapraṇāśakaḥ |
ekadā paṃcatāṃ yāto yamadūtā bhayaṃkarāḥ || 16 ||
[Analyze grammar]

āgatāstaṃ samānetuṃ yamasyatu niketanam |
baddhvā ninyuśca taṃ dṛṣṭvā pṛṣṭavānsacivaṃ yamaḥ || 17 ||
[Analyze grammar]

yama uvāca |
asya kiṃ vidyate'mātya karmāpi ca śubhāśubham |
kathayasva samūlaṃ tu citragupta vicakṣaṇa || 18 ||
[Analyze grammar]

citragupta uvāca |
asau pāpī durācāraḥ svāmikāryapraṇāśakaḥ |
nāsti puṇyaṃ cāṇumātraṃ narake paripacyatām || 19 ||
[Analyze grammar]

śatamanvantaraṃ rājannāgayonau ca niṣṭhuraḥ |
pāṣāṇe janma cāsādya gṛhe sthātuṃ niraṃtaram || 20 ||
[Analyze grammar]

sūta uvāca |
tāvatkālaṃ tato vipra niraye sa papāta ha |
tato'pyaśmagṛhe nāgayonau jātaḥ suduḥkhitaḥ || 21 ||
[Analyze grammar]

ekadā cāśvine māsi paurṇamāsīdine dvija |
lājānvarāṭikā nāgo bilātprākṣepayadbahiḥ || 22 ||
[Analyze grammar]

patitā sā hareragre pāpamasya svayaṃ hariḥ |
tūrṇaṃ tu nāśayāmāsa dayālurduḥkhanāśakaḥ || 23 ||
[Analyze grammar]

kadācitprāptakālastu paṃcatvaṃ sa jagāma ha |
yamadūtāstamānetuṃ cāgatā bahuśo dvija || 24 ||
[Analyze grammar]

baddhvā netuṃ yadā cakruryamasya sadanaṃ prati |
tadāgatā viṣṇudūtāḥ śaṃkhacakragadādharāḥ || 25 ||
[Analyze grammar]

pāśaṃ chittvā rathe divye tamāśugatakilbiṣam |
tatra cāropayāmāsuḥ yamadūtāḥ palāyitāḥ || 26 ||
[Analyze grammar]

tato niketanaṃ viṣṇornāgastairveṣṭito yayau |
tatra tasthau hareragre punarāvarttivarjitaḥ || 27 ||
[Analyze grammar]

bhaktyā yo haraye dadyāllājāṃśca saghṛtāndvija |
varāṭikāṃ tasya puṇyaṃ na jāne kiṃ bhaveddhruvam || 28 ||
[Analyze grammar]

ya imaṃ śṛṇuyādvipra cādhyāyaṃ pāpanāśanam |
tasya naśyaṃti pāpāni śrīhareḥ kṛpayāpi ca || 29 ||
[Analyze grammar]

iti śrīpādmemahāpurāṇe brahmakhaṃḍe sūtaśaunakasaṃvāde ṣoḍaśo'dhyāyaḥ || 16 ||
[Analyze grammar]