Chapter 14

[English text for this chapter is available]

śaunaka uvāca |
kathayasva mahāprājña brāhmaṇasya kṛpārṇava |
māhātmyaṃ sarvavarṇānāṃ śreṣṭhasya kṛpayā ca me || 1 ||
[Analyze grammar]

sūta uvāca |
brāhmaṇaḥ sarvavarṇānāṃ gurureva dvijottama |
sarvāmarāśrayo jñeyaḥ sākṣānnārāyaṇaḥ prabhuḥ || 2 ||
[Analyze grammar]

kuryātpraṇāmaṃ yo vipraṃ haribuddhyā tu bhūsuram |
bhaktyā tasya dvijaśreṣṭha varddhate saṃpadādikam || 3 ||
[Analyze grammar]

na namedbrāhmaṇaṃ dṛṣṭvā helayāpi ca garvitaḥ |
chedanaṃ tu tasya śiraḥ kartumicchetsadā hariḥ || 4 ||
[Analyze grammar]

kṛtāparādhaṃ vipraṃ ye dviṣaṃti pāpabuddhayaḥ |
hariṃ dviṣaṃti te jñeyā nirayaṃ yāṃti dāruṇam || 5 ||
[Analyze grammar]

yaḥ kartuṃ prārthanāṃ vipraṃ paśyetkrodhena cāgatam |
kṛtāṃtaścakṣuṣostasya taptasūcīṃ dadāti vai || 6 ||
[Analyze grammar]

kurute bhūsuraṃ mūḍho bhartsanaṃ yo narādhamaḥ |
yamadūtā mukhe tasya taptalohaṃ dadaṃti ca || 7 ||
[Analyze grammar]

yeṣāṃ niketane bhuṃkte kṣmāsuro vai tapodhanaḥ |
suparvāṇaiḥ svayaṃ kṛṣṇo bhuṃkte teṣāṃ niketane || 8 ||
[Analyze grammar]

naśyaṃti sarvapāpāni dvijahatyādikāni ca |
kaṇamātraṃ bhajedyastu viprāṃghrisalilaṃ naraḥ || 9 ||
[Analyze grammar]

yo naraścaraṇaudhautaṃ kuryāddhastena bhaktitaḥ |
dvijātervacmi satyaṃ te sa muktaḥ sarvapātakaiḥ || 10 ||
[Analyze grammar]

putrahīnā ca yā nārī mṛtavatsā ca yāṃganā |
saputrā jīvavatsā sā dvijapadmāṃghrisevanāt || 11 ||
[Analyze grammar]

brahmāṃḍe yāni tīrthāni tāni tīrthāni sāgare |
udadhau yāni tīrthāni tiṣṭhaṃti dvijapādayoḥ |
dvijāṃghrisalilairnityaṃ secitaṃ yasya mastakam || 12 ||
[Analyze grammar]

sa snātaḥ sarvatīrtheṣu sa muktaḥ sarvapātakaiḥ |
śṛṇu śaunaka vakṣyāmi māhātmyaṃ pāpanāśanam || 13 ||
[Analyze grammar]

viprapādodakasyāhamitihāsaṃ tapodhana |
āsītpurā dvijaśreṣṭha vaiśyavṛttiparāyaṇaḥ || 14 ||
[Analyze grammar]

śūdro bhīmo dvāpare ca brahmahatyāsahasrakṛt |
niṣṭhuraḥ sarvadā tuṣṭaḥ samahānvaiśyayā punaḥ || 15 ||
[Analyze grammar]

śūdrācāraparibhraṣṭo bhīmo'sau gurutalpagaḥ |
pratyekaṃ vacmi kiṃ tasya dasyoḥ saṃkhyā na vidyate || 16 ||
[Analyze grammar]

pāpānāṃ muniśārdūla bhīmasya duṣṭacetasaḥ |
ekadā sa gataḥ kaścidbrāhmaṇasya niveśanam || 17 ||
[Analyze grammar]

gatvā taṃ tasya gehāttu dravyaṃ netuṃ mano dadhe |
tatrovāsa brāhmaṇasya bahirdvārasamīpataḥ || 18 ||
[Analyze grammar]

dainyayuktaṃ vacaḥ prāha kṣmāsuraṃ sa tapodhanam |
bho svāminśṛṇu me vākyaṃ dayāluriva manyate || 19 ||
[Analyze grammar]

kṣudhārto'haṃ dehi cānnaṃ prāṇā yāsyaṃti me drutam || 20 ||
[Analyze grammar]

brāhmaṇa uvāca |
kṣudhārtta śṛṇu me kaścidvākyaṃ kartuṃ na vidyate |
pākaṃ me taṃḍulāni tvaṃ nītvā bhuṃkṣva yathāsukham || 21 ||
[Analyze grammar]

nāsti me janako mātā nāsti sūnuḥ sahodaraḥ |
nāsti jāyā mātṛbaṃdhurmṛtāḥ sarve vihāya mām || 22 ||
[Analyze grammar]

tiṣṭhāmyeko gṛhe'karmā bhāgyahīnotithe hariḥ |
eko me vasatau cāsti na jāne tadvinā kila || 23 ||
[Analyze grammar]

bhīma uvāca |
mama kaściddvijaśreṣṭha nāsti sevāṃ tavāpi ca |
śūdro'haṃ nilaye jātyā kṛtvā sthāsyāmi te sadā || 24 ||
[Analyze grammar]

sūta uvāca |
iti tasya vacaḥ śrutvā sānaṃdaḥ kṣmāsurastadā |
pākaṃ vidhāya tūrṇaṃ sa dadāvannaṃ tapodhana || 25 ||
[Analyze grammar]

so'pi harṣasamāyuktastasthau tatra dvijālaye |
sevāṃ kurvansnehayuktāṃ bhūsurasya manoharām || 26 ||
[Analyze grammar]

adya śvo vā haniṣyāmi dravyamasya mamāpi ca |
netuṃ yadā kariṣyāmi neṣyāmi nātra saṃśayaḥ || 27 ||
[Analyze grammar]

parāmṛśya ca hṛdyaṃtaḥ kṛtvā tasya kriyāṃ vadet |
pādadhautādikaṃ cāsau śirasā gatapātakaḥ || 28 ||
[Analyze grammar]

ācamyāṃghrijalaṃ dadhrecchadmanā pratidinaṃ dvijaḥ |
ekadā hārakaḥ kaściddravyaṃ netuṃ samāgataḥ || 29 ||
[Analyze grammar]

utpāṭya rātrāvararaṃ gato'sau tadgṛhāṃtaram |
dṛṣṭvā bhīmaṃ prahārārthaṃ daṃḍahastaḥ samāgataḥ || 30 ||
[Analyze grammar]

hārako mastakaṃ tasya chittvā tūrṇaṃ palāyitaḥ |
atha tasya bhaṭā viṣṇoḥ śaṃkhacakragadādharāḥ || 31 ||
[Analyze grammar]

samāyātāstathā netuṃ bhīmaṃ taṃ vītakilbiṣam |
syaṃdanaṃ cāgataṃ divyaṃ rājahaṃsayutaṃ dvija || 32 ||
[Analyze grammar]

tatrārūḍho yayau viṣṇorbhavanaṃ durlabhaṃ kila |
māhātmyaṃ bhūmidevasya mayā te tatprakīrtitam |
śṛṇuyādyo naro bhaktyā tasya pātakanāśanam || 33 ||
[Analyze grammar]

iti śrīpādme mahāpurāṇe brahmakhaṃḍe sūtaśaunakasaṃvāde brāhmaṇamāhātmyaṃ |
nāma caturdaśo'dhyāyaḥ || 14 ||
[Analyze grammar]