Chapter 7

[English text for this chapter is available]

śaunaka uvāca |
kathayasva mahāprājña golokaṃ yāti karmaṇā |
sumate dustarātkena janaḥ saṃsārasāgarāt |
rādhāyāścāṣṭamī sūta tasyā māhātmyamuttamam || 1 ||
[Analyze grammar]

sūta uvāca |
brahmāṇaṃ nārado'pṛcchatpurā caitanmahāmune |
tacchṛṇuṣva samāsena pṛṣṭavānsa iti dvija || 2 ||
[Analyze grammar]

nārada uvāca |
pitāmaha mahāprājña sarvaśāstravidāṃ vara |
rādhājanmāṣṭamī tāta kathayasva mamāgrataḥ || 3 ||
[Analyze grammar]

tasyāḥ puṇyaphalaṃ kiṃvā kṛtaṃ kena purā vibho |
akurvatāṃ janānāṃ hi kilbiṣaṃ kiṃ bhaveddvija || 4 ||
[Analyze grammar]

kenaiva tu vidhānena karttavyaṃ tadvrataṃ kadā |
kasmājjātā ca sā rādhā tanme kathaya mūlataḥ || 5 ||
[Analyze grammar]

brahmovāca |
rādhājanmāṣṭamīṃ vatsa śṛṇuṣva susamāhitaḥ |
kathayāmi samāsena samagraṃ hariṇā vinā || 6 ||
[Analyze grammar]

kathituṃ tatphalaṃ puṇyaṃ na śaknotyapi nārada |
koṭijanmārjitaṃ pāpaṃ brahmahatyādikaṃ mahat || 7 ||
[Analyze grammar]

kurvaṃti ye sakṛdbhaktyā teṣāṃ naśyati tatkṣaṇāt |
ekādaśyāḥ sahasreṇa yatphalaṃ labhate naraḥ || 8 ||
[Analyze grammar]

rādhājanmāṣṭamī puṇyaṃ tasmācchataguṇādhikam |
merutulyasuvarṇāni datvā yatphalamāpyate || 9 ||
[Analyze grammar]

sakṛdrādhāṣṭamīṃ kṛtvā tasmācchataguṇādhikam |
kanyādānasahasreṇa yatpuṇyaṃ prāpyate janaiḥ || 10 ||
[Analyze grammar]

vṛṣabhānusutāṣṭamyā tatphalaṃ prāpyate janaiḥ |
gaṃgādiṣu ca tīrtheṣu snātvā tu yatphalaṃ labhet || 11 ||
[Analyze grammar]

kṛṣṇaprāṇapriyāṣṭamyāḥ phalaṃ prāpnoti mānavaḥ |
etadvrataṃ tu yaḥ pāpī helayā śraddhayāpi vā || 12 ||
[Analyze grammar]

karoti viṣṇusadanaṃ gacchetkoṭikulānvitaḥ |
purā kṛtayuge vatsa varanārī suśobhanā || 13 ||
[Analyze grammar]

sumadhyā hariṇīnetrā śubhāṃgī cāruhāsinī |
sukeśī cārukarṇī ca nāmnā līlāvatī smṛtā || 14 ||
[Analyze grammar]

tayā bahūni pāpāni kṛtāni sudṛḍhāni ca |
ekadā sādhanākāṃkṣī niḥsṛtya purataḥ svataḥ || 15 ||
[Analyze grammar]

gatānyanagaraṃ tatra dṛṣṭvā sujña janānbahūn |
rādhāṣṭamīvrataparānsuṃdare devatālaye || 16 ||
[Analyze grammar]

gaṃdhapuṣpairdhūpadīpairvastrairnānāvidhaiḥ phalaiḥ |
bhaktibhāvaiḥ pūjayaṃto rādhāyā mūrtimuttamām || 17 ||
[Analyze grammar]

kecidgāyaṃti nṛtyaṃti paṭhaṃti stavamuttamam |
tālaveṇumṛdaṃgāṃśca vādayaṃti ca ke mudā || 18 ||
[Analyze grammar]

tāṃstāṃstathāvidhāndṛṣṭvā kautūhalasamanvitā |
jagāma tatsamīpaṃ sā papraccha vinayānvitā || 19 ||
[Analyze grammar]

bhobhoḥ puṇyātmāno yūyaṃ kiṃ kurvaṃto mudānvitāḥ |
kathayadhvaṃ puṇyavaṃto māṃ caiva vinayānvitām || 20 ||
[Analyze grammar]

tasyāstu vacanaṃ śrutvā parakāryahiteratāḥ |
ārebhire tadā vaktuṃ vaiṣṇavā vratatatparāḥ || 21 ||
[Analyze grammar]

rādhāvratina ūcuḥ |
bhādre māsi sitāṣṭamyāṃ jātā śrīrādhikā yataḥ |
aṣṭamī sādya saṃprāptā tāṃ kurvāma prayatnataḥ || 22 ||
[Analyze grammar]

goghātajanitaṃ pāpaṃ steyajaṃ brahmaghātajam |
parastrīharaṇāccaiva tathā ca gurutalpajam || 23 ||
[Analyze grammar]

viśvāsaghātajaṃ caiva strīhatyājanitaṃ tathā |
etāni nāśayatyāśu kṛtā yā cāṣṭamī nṛṇām || 24 ||
[Analyze grammar]

teṣāṃ ca vacanaṃ śrutvā sarvapātakanāśanam |
kariṣyāmyahamityeva parāmṛṣya punaḥ punaḥ || 25 ||
[Analyze grammar]

tatraiva vratibhiḥ sārddhaṃ kṛtvā sā vratamuttamam |
daivātsā paṃcatāṃ yātā sarpaghātena nirmalā || 26 ||
[Analyze grammar]

tato yamājñayā dūtāḥ pāśamudgarapāṇayaḥ |
āgatāstāṃ samānetuṃ babaṃdhuratikṛcchrataḥ || 27 ||
[Analyze grammar]

yadā netuṃ manaścakruryamasya sadanaṃ prati |
tadāgatā viṣṇudūtāḥ śaṃkhacakragadādharāḥ || 28 ||
[Analyze grammar]

hiraṇmayaṃ vimānaṃ ca rājahaṃsayutaṃ śubham |
chedanaṃ cakradhārābhiḥ pāśaṃ kṛtvā tvarānvitāḥ || 29 ||
[Analyze grammar]

rathe cāropayāmāsustāṃ nārīṃ gatakilbiṣām |
ninyurviṣṇupuraṃ te ca golokākhyaṃ manoharam || 30 ||
[Analyze grammar]

kṛṣṇena rādhayā tatra sthitā vrataprasādataḥ |
rādhāṣṭamīvrataṃ tāta yo na kuryyācca mūḍhadhīḥ || 31 ||
[Analyze grammar]

narakānniṣkṛtirnāsti koṭikalpaśatairapi |
striyaśca yā na kurvaṃti vratametacchubhapradam || 32 ||
[Analyze grammar]

rādhāviṣṇoḥ prītikaraṃ sarvapāpapraṇāśanam |
aṃte yamapurīṃ gatvā pataṃti narake ciram || 33 ||
[Analyze grammar]

kadācijjanmacāsādya pṛthivyāṃ vidhavā dhruvam |
ekadā pṛthivī vatsa duṣṭasaṃghaiśca tāḍitā || 34 ||
[Analyze grammar]

gaurbhūtvā ca bhṛśaṃ dīnā cāyayau sā mamāṃtikam |
nivedayāmāsa duḥkhaṃ rudaṃtī ca punaḥ punaḥ || 35 ||
[Analyze grammar]

tadvākyaṃ ca samākarṇya gato'haṃ viṣṇusaṃnidhim |
kṛṣṇe niveditaścāśu pṛthivyā duḥkhasaṃcayaḥ || 36 ||
[Analyze grammar]

tenoktaṃ gaccha bho brahmandevaiḥ sārddhaṃ ca bhūtale |
ahaṃ tatrāpi gacchāmi paścānmamagaṇaiḥ saha || 37 ||
[Analyze grammar]

tacchrutvā sahito daivairāgataḥ pṛthivītalam |
tataḥ kṛṣṇaḥ samāhūya rādhāṃ prāṇagarīyasīm || 38 ||
[Analyze grammar]

uvāca vacanaṃ devi gacchehaṃ pṛthivītalam |
pṛthivībhāranāśāya gaccha tvaṃ marttyamaṃḍalam || 39 ||
[Analyze grammar]

iti śrutvāpi sā rādhāpyāgatā pṛthivīṃ tataḥ |
bhādre māsi site pakṣe aṣṭamīsaṃjñike tithau || 40 ||
[Analyze grammar]

vṛṣabhāno ryajñabhūmau jātā sā rādhikā divā |
yajñārthaṃ śodhitāyāṃ ca dṛṣṭā sā divyarūpiṇī || 41 ||
[Analyze grammar]

rājānaṃ damanā bhūtvā tāṃ prāpya nijamaṃdiram |
dattavānmahiṣīṃ nītvā sā ca tāṃ paryapālayat || 42 ||
[Analyze grammar]

iti te kathitaṃ vatsa tvayā pṛṣṭaṃ ca yadvacaḥ |
gopanīyaṃ gopanīyaṃ gopanīyaṃ prayatnataḥ || 43 ||
[Analyze grammar]

sūta uvāca |
ya idaṃ śṛṇuyādbhaktyā caturvargaphalapradam |
sarvapāpavinirmuktaścāṃteyātiharergṛham || 44 ||
[Analyze grammar]

iti śrīpādme mahāpurāṇe brahmakhaṃḍe brahmanāradasaṃvāde śrīrādhāṣṭamīmāhātmyaṃ |
nāma saptamo'dhyāyaḥ || 7 ||
[Analyze grammar]