Chapter 38

[English text for this chapter is available]

nārada uvāca |
vārāṇasyāśca māhātmyaṃ tasyāṃ tīrthāni ca prabho |
kathitāni samāsena tīrthānyanyāni saṃśṛṇu || 1 ||
[Analyze grammar]

tato gayāṃ samāsādya brahmacārī samāhitaḥ |
aśvamedhamavāpnoti gamanādeva bhārata || 2 ||
[Analyze grammar]

yatrākṣayyavaṭo nāma triṣu lokeṣu viśrutaḥ |
pitṝṇāṃ tatra vai dattamakṣayaṃ bhavati prabho || 3 ||
[Analyze grammar]

mahānadyāmupaspṛśya tarpayetpitṛdevatāḥ |
akṣayānprāpnuyāllokānkulaṃ caiva samuddharet || 4 ||
[Analyze grammar]

tato brahmasaro gacchedbrahmāraṇyopasevitam |
puṃḍarīkamavāpnoti prabhātamiva śarvarī || 5 ||
[Analyze grammar]

sarasi brahmaṇā tatra yūpaśreṣṭhaḥ samucchritaḥ |
yūpaṃ pradakṣiṇaṃ kṛtvā vājapeyaphalaṃ labhet || 6 ||
[Analyze grammar]

tato gaccheta rājeṃdra dhenukaṃ lokaviśrutam |
ekārātroṣito rājanprayacchettiladhenukām || 7 ||
[Analyze grammar]

sarvapāpaviśuddhātmā somalokaṃ vrajeddhruvam |
tatra cihnaṃ mahārāja adyāpi hi na saṃśayaḥ || 8 ||
[Analyze grammar]

kapilā sahavatsā vai parvate vicaratyutaḥ |
savatsāyāḥ padānyasyā dṛśyaṃte'dyāpi bhārata || 9 ||
[Analyze grammar]

teṣūpaspṛśya rājeṃdra padeṣu nṛpasattama |
yatkiṃcidaśubhaṃ pāpaṃ tatpraṇaśyati bhārata || 10 ||
[Analyze grammar]

tato gṛdhravaṭaṃ gacchetsthānaṃ devasya śūlinaḥ |
snāyāttu bhasmanā tatra saṃgamya vṛṣabhadhvajam || 11 ||
[Analyze grammar]

brāhmaṇena bhaveccīrṇaṃ vrataṃ dvādaśavārṣikam |
itareṣāṃ tu varṇānāṃ sarvapāpaṃ praṇaśyati || 12 ||
[Analyze grammar]

gaccheta tata udyaṃtaṃ parvataṃ gītanāditam |
sāvitraṃ tu padaṃ tatra dṛśyate bharatarṣabha || 13 ||
[Analyze grammar]

tatra saṃdhyāmupāsīta brāhmaṇaḥ saṃśitavrataḥ |
upāstāhi bhavetsaṃdhyā tena dvādaśavārṣikī || 14 ||
[Analyze grammar]

yonidvāraṃ ca tatraiva viśrutaṃ bharatarṣabha |
tatrābhigamya mucyeta puruṣo yonisaṃkaṭāt || 15 ||
[Analyze grammar]

śuklakṛṣṇāvubhau pakṣau gayāyāṃ yo vasennaraḥ |
punātyāsaptamaṃ rājankulaṃ nāstyatra saṃśayaḥ || 16 ||
[Analyze grammar]

eṣṭavyā bahavaḥ putrā yadyapyeko gayāṃ vrajet |
yajeta vāśvamedhena nīlaṃ vā vṛṣamutsṛjet || 17 ||
[Analyze grammar]

tataḥ phalguṃ vrajedrājaṃstīrthasevī narādhipa |
aśvamedhamavāpnoti siddhiṃ ca paramāṃ vrajet || 18 ||
[Analyze grammar]

tato gaccheta rājeṃdra dharmapṛṣṭhaṃ samāhitaḥ |
yatra dharmo mahārāja nityamāste yudhiṣṭhira || 19 ||
[Analyze grammar]

dharmmaṃ tatrābhisaṃgamya vājimedhaphalaṃ labhet |
tato gaccheta rājeṃdra brahmaṇastīrthamuttamam || 20 ||
[Analyze grammar]

tatrābhigamya brahmāṇamarcayenniyatavrataḥ |
rājasūyāśvamedhābhyāṃ phalaṃ prāpnoti bhārata || 21 ||
[Analyze grammar]

tato rājagṛhaṃ gacchettīrthasevī narādhipa |
upaspṛśya tatastatra kakṣīvāniva modate || 22 ||
[Analyze grammar]

yakṣiṇyā naityakaṃ tatra prāgagnipuruṣaḥ śuciḥ |
yakṣiṇyāstu prasādena mucyate brahmahatyayā || 23 ||
[Analyze grammar]

maṇināgaṃ tato gacchedgosahasraphalaṃ labhet |
naityakaṃ bhuṃjate yastu maṇināgasya mānavaḥ || 24 ||
[Analyze grammar]

daṣṭasyāśīviṣeṇāsya na viṣaṃ kramate nṛpa |
tatroṣya rajanīmekāṃ sarvapāpaiḥ pramucyate || 25 ||
[Analyze grammar]

tato gaccheta brahmarṣergautamasya vanaṃ nṛpa |
ahalyāyā hrade snātvā vrajeta paramāṃ gatim || 26 ||
[Analyze grammar]

abhigamya śriyaṃ rājanviṃdate śriyamuttamām |
tatrodapāno dharmmajña triṣu lokeṣu viśrutaḥ || 27 ||
[Analyze grammar]

tatrābhiṣekaṃ kurvīta vājimedhamavāpnuyāt |
janakasya tu rājarṣeḥ kūpastridaśapūjitaḥ || 28 ||
[Analyze grammar]

tatrābhiṣekaṃ kṛtvā ca viṣṇulokamavāpnuyāt |
tato'vināśanaṃ gacchetsarvapāpapramocanam || 29 ||
[Analyze grammar]

vājimedhamavāpnoti somalokaṃ ca gacchati |
gaṃḍakīṃ ca samāsādya sarvatīrthajalodbhavām || 30 ||
[Analyze grammar]

vājapeyamavāpnoti sūryalokaṃ ca gacchati |
tato dhruvasya dharmajña samāviśya tapovanam || 31 ||
[Analyze grammar]

guhyakeṣu mahābhāga modate nātra saṃśayaḥ |
karmadāṃ tu samāsādya nadīṃ siddhaniṣevitām || 32 ||
[Analyze grammar]

puṃḍarīkamavāpnoti somalokaṃ ca gacchati |
tato viśālāmāsādya nadīṃ trailokyaviśrutām || 33 ||
[Analyze grammar]

agniṣṭomamavāpnoti svargalokaṃ ca gacchati |
atha māheśvarīṃ dhārāṃ samāsādya narādhipa || 34 ||
[Analyze grammar]

aśvamedhamavāpnoti kulaṃ caiva samuddharet |
divaukasāṃ puṣkariṇīṃ samāsādya naraḥ śuciḥ || 35 ||
[Analyze grammar]

na durgatimavāpnoti vājapeyaṃ ca viṃdati |
atha māheśapadaṃ gacchedbrahmacārī samāhitaḥ || 36 ||
[Analyze grammar]

māheśvarapade snātvā vājimedhaphalaṃ labhet |
tatra koṭistu tīrthānāṃ viśrutā bharatarṣabha || 37 ||
[Analyze grammar]

kūrmarūpeṇa rājeṃdra asureṇa durātmanā |
hriyamāṇā hṛtā rājanviṣṇunā prabhaviṣṇunā || 38 ||
[Analyze grammar]

tatrābhiṣekaṃ kurvīta tīrthakoṭyāṃ narādhipa |
puṃḍarīkamavāpnoti viṣṇulokaṃ ca gacchati || 39 ||
[Analyze grammar]

tato gacchennaraśreṣṭha sthānaṃ nārāyaṇasya ca |
sadā sannihito yatra harirvasati bhārata || 40 ||
[Analyze grammar]

yatra brahmādayo devā ṛṣayaśca tapodhanāḥ |
ādityāvasavorudrā janārdanamupāsate || 41 ||
[Analyze grammar]

śālagrāma iti khyāto viṣṇoradbhutakarmaṇaḥ |
abhigamya trilokeśaṃ varadaṃ viṣṇumacyutam || 42 ||
[Analyze grammar]

aśvamedhamavāpnoti viṣṇulokaṃ ca gacchati |
tatrodapāno dharmajña sarvapāpapramocanaḥ || 43 ||
[Analyze grammar]

samudrāstatracatvāraḥ kūpe sannihitāḥ sadā |
tatropaspṛśya rājeṃdra na durgatimavāpnuyāt || 44 ||
[Analyze grammar]

abhigamya mahādevaṃ varadaṃ viṣṇumavyayam |
virājate yathā soma ṛṇairmukto yudhiṣṭhira || 45 ||
[Analyze grammar]

jātismaraṃ upaspṛśya śuciḥ prayatamānasaḥ |
jātismaratvaṃ prāpnoti snātvā tatra na saṃśayaḥ || 46 ||
[Analyze grammar]

vaṭeśvarapuraṃ gatvā arcayitvā ca keśavam |
īpsitāṃllabhate lokānupavāsānna saṃśayaḥ || 47 ||
[Analyze grammar]

tatastu vāmanaṃ gatvā sarvapāpapraṇāśanam |
abhivādya hariṃ devaṃ na durgatimavāpnuyāt || 48 ||
[Analyze grammar]

bharatasyāśramaṃ gatvā sarvapāpapramocanam |
kauśikīṃ tatra seveta mahāpātakanāśinīm || 49 ||
[Analyze grammar]

rājasūyasya yajñasya phalaṃ prāpnotimānavaḥ |
tato gaccheta dharmajña caṃpakāraṇyamuttamam || 50 ||
[Analyze grammar]

tatroṣya rajanīmekāṃ gosahasraphalaṃ labhet |
atha goviṃdamāsādya tīrthaṃ paramasammatam || 51 ||
[Analyze grammar]

upoṣya rajanīmekāmagniṣṭomaphalaṃ labhet |
tatra viśveśvaraṃ dṛṣṭvā devyā saha mahādyutim || 52 ||
[Analyze grammar]

mitrāvaruṇayorlokānprāpnuyādbharatarṣabha |
trirātropoṣitastatra agniṣṭomaphalaṃ labhet || 53 ||
[Analyze grammar]

kanyāvasathamāsādya niyato niyatāśanaḥ |
manoḥ prajāpaterlokānāpnoti bharatarṣabha || 54 ||
[Analyze grammar]

kanyāyāṃ ye prayacchaṃti dānamaṇvapi bhārata |
tadakṣayamiti prāhurṛṣayaḥ saṃśitavratāḥ || 55 ||
[Analyze grammar]

niṣṭhāvāsaṃ samāsādya triṣu lokeṣu viśrutam |
aśvamedhamavāpnoti viṣṇulokaṃ ca gacchati || 56 ||
[Analyze grammar]

ye tu dānaṃ prayacchaṃti niṣṭhāyāḥ saṃgame narāḥ |
te yāṃti naraśārdūla brahmalokamanāmayam || 57 ||
[Analyze grammar]

tatrāśramo vasiṣṭhasya triṣu lokeṣu viśrutaḥ |
tatrābhiṣekaṃ kurvāṇo vājapeyamavāpnuyāt || 58 ||
[Analyze grammar]

devakūṭaṃ samāsādya devarṣigaṇasevitam |
aśvamedhamavāpnoti kulaṃ caiva samuddharet || 59 ||
[Analyze grammar]

tato gaccheta rājeṃdra kauśikasya munerhradam |
tatra siddhiṃ parāṃ prāpa viśvāmitro'tha kauśikaḥ || 60 ||
[Analyze grammar]

yatra māsaṃ vaseddhīraḥ kauśikyāṃ bharatarṣabha |
aśvamedhasya yatpuṇyaṃ tanmāsenādhigacchati || 61 ||
[Analyze grammar]

sarvatīrthavaraṃ caiva yo vaseta mahāhradam |
na durgatimavāpnoti viṃdyādbahusuvarṇakam || 62 ||
[Analyze grammar]

kumāramabhigamyātha vīrāśramanivāsinam |
aśvamedhamavāpnoti śakralokaṃ sa gacchati || 63 ||
[Analyze grammar]

naṃdinyāṃ ca samāsādya kūpaṃ tridaśasevitam |
naramedhasya yatpuṇyaṃ tatprāpnoti kurūdvaha || 64 ||
[Analyze grammar]

kālikāsaṃgame snātvā kauśikyāruṇayoryataḥ |
trirātropoṣito vidvānsarvapāpaiḥ pramucyate || 65 ||
[Analyze grammar]

urvaśītīrthamāsādya tathā somāśramaṃ budhaḥ |
kuṃbhakarṇāśrame snātvā pūjyate bhuvi mānavaḥ || 66 ||
[Analyze grammar]

tathā kokāmukhe snātvā brahmacārī samāhitaḥ |
jātismaratvaṃ prāpnoti dṛṣṭametatpurātanaiḥ || 67 ||
[Analyze grammar]

sakṛnnadīṃ samāsādya kṛtārtho bhavati dvijaḥ |
sarvapāpaviśuddhātmā svargalokaṃ ca gacchati || 68 ||
[Analyze grammar]

ṛṣabhadvīpamāsādya sevya krauṃcaniṣūdanam |
sarasvatyāmupaspṛśya vimānastho virājate || 69 ||
[Analyze grammar]

audyānakaṃ mahārāja tīrthaṃ muniniṣevitam |
tatrābhiṣekaṃ kurvīta sarvapāpaiḥ pramucyate || 70 ||
[Analyze grammar]

brahmatīrthaṃ samāsādya puṇyaṃ brahmarṣisevitam |
vājapeyamavāpnoti naro nāstyatra saṃśayaḥ || 71 ||
[Analyze grammar]

tataścaṃpāṃ samāsādya bhāgīrathyāṃ kṛtodakaḥ |
daṃḍārpaṇaṃ samāsādya gosahasraphalaṃ labhet || 72 ||
[Analyze grammar]

lāviḍhikāṃ tato gacchetpuṇyāṃ puṇyaniṣevitām |
vājapeyamavāpnoti vimānasthaśca pūjyate || 73 ||
[Analyze grammar]