Chapter 22

[English text for this chapter is available]

nārada uvāca |
evaṃ te kathitaṃ rājannarmadātīrthamuttamam |
purā gaṃdharvakanyānāṃ śāpajaṃ bhayamulbaṇam || 1 ||
[Analyze grammar]

nāśitaṃ tanmahārāja revājalakaṇāgninā |
revājalakaṇasparśānmukto bhavati mānavaḥ || 2 ||
[Analyze grammar]

yudhiṣṭhira uvāca |
bhagavanbahukanyābhiḥ śāpo laṃbhi kathaṃ kutaḥ |
kasyāpatyāni tāstāsāṃ nāma kiṃ kīdṛśaṃ vayaḥ || 3 ||
[Analyze grammar]

kathaṃ revājalasparśādvipākācchāpasaṃbhavāt |
vimuktāḥ kutra tāḥ sasnuḥ sarvaṃ me kathaya prabho || 4 ||
[Analyze grammar]

narmadātīrthamāhātmyaṃ camatkārakaraṃ bhavet |
śravaṇādapi pāpānāṃ malanāśanamucyate || 5 ||
[Analyze grammar]

narmadānarmadāśabdo yena kenaciducyate |
tasya syācchāśvatī muktiryāvadācaṃdra tārakam || 6 ||
[Analyze grammar]

vyāhṛtaṃ bhavatā pūrvaṃ revāmāhātmyamuttamam |
tathāpi caritaṃ sādho yadetattannigadyatām || 7 ||
[Analyze grammar]

atha cottamavārtāyā sevitavyā manīṣibhiḥ |
ataḥ pṛcchāmi vipreṃdra revāmāhātmyamuttamam |
itihāsaṃ vada vibho kanyānāṃ caritojjvalam || 8 ||
[Analyze grammar]

nārada uvāca |
śrūyatāṃ rājaśārdūla dharmagarbhāparā kathā |
yathāraṇirvahnigarbhā dharmmastu brahmasūriva || 9 ||
[Analyze grammar]

gaṃdharvaḥ śukasaṃgītistasya kanyā pramohinī |
suśīlasya suśīlā ca susvarā svaravedinaḥ || 10 ||
[Analyze grammar]

sutārā caṃdrakāṃtasya caṃdrikā suprabhasya ca |
imāni varanāmāni tāsāmapsarasāṃ nṛpa || 11 ||
[Analyze grammar]

kumāryaḥ paṃca sarvāstā vayasā subhagāḥ punaḥ |
bhāṣaṃte ca mithastāstu bhaginya iva sarvadā || 12 ||
[Analyze grammar]

caṃdrādiva viniṣkrāṃtāścaṃdrikā iva sojjvalāḥ |
caṃdrānanāḥ sukeśyaśca caṃdrakāṃtāivojjvalāḥ || 13 ||
[Analyze grammar]

deveṣvetā vilāsinyaḥ kaumudyaḥ kairaveṣviva |
lāvaṇyapiṃḍasaṃbhūtā divyarūpā manoharāḥ || 14 ||
[Analyze grammar]

udbhinnakucapadminyaḥ ketakya iva mādhave |
utpannayauvanaiḥ kāṃtā vallīva navapallavaiḥ || 15 ||
[Analyze grammar]

hemagaurāśca hemābhā hemābharaṇabhūṣitāḥ |
hemacaṃpakamālinyo hemacchavisuvāsasaḥ || 16 ||
[Analyze grammar]

svaragrāmāvalīhāsu vividhā mūrcchanāsu ca |
tālavādyavinodeṣu veṇuvīṇāpravādane || 17 ||
[Analyze grammar]

mṛdaṃganādasaṃbhinnalāsyamadhyalayeṣu ca |
citrādiṣu vinodeṣu kalāsu ca viśāradāḥ || 18 ||
[Analyze grammar]

evaṃbhūtāśca tāḥ kanyā mumuhuḥ krīḍanairvaraiḥ |
pitṛbhirlālitāḥ sarvāśceruśca dhanadālaye || 19 ||
[Analyze grammar]

kautukādekadā paṃca militvā māsi mādhave |
kanyā maṃdārapuṣpāṇi vicinvaṃtyo vanādvanam || 20 ||
[Analyze grammar]

gaurīṃ samārādhayituṃ svarāṃganāḥ kadācidacchodasarovaraṃ yayuḥ |
hemāṃbujāni pravarāṇi tāḥ punastasmādupādāya varotpalaiḥ saha || 21 ||
[Analyze grammar]

vaiḍūryaśuddhasphaṭikaprakuṭṭime snātvā tu ghaṭṭe paridhāya cāṃbaram |
maunena ca sthaṃḍilapiṃḍikāmayīṃ suvarṇamuktābharaṇāṃ vinirmamuḥ || 22 ||
[Analyze grammar]

samarcitāṃ caṃdanagaṃdhakuṃkumairabhyarcya gaurīṃ varapaṃkajādibhiḥ |
nānopahāraiḥ śubhabhaktibhāvitā lāsyaprayogairnanṛtuḥ kumārikāḥ || 23 ||
[Analyze grammar]

gāṃdharvamāśritya paraṃ svaraṃ tato geyaṃ svabhāvadhvanibhiḥ samūrchanam |
eṇīdṛśastāḥ prajaguḥ kalākṣaraṃ tārapravṛddhaṃ gatibhiśca susvaram || 24 ||
[Analyze grammar]

tasminsubhāve rasavarṣaharṣaṃ kanyāsvalaṃ nirbharacittavṛttiṣu |
acchodatīrthe pravare tadāgataḥ snātuṃ munervedanidheḥ sutograjaḥ || 25 ||
[Analyze grammar]

rūpeṇa niḥsīmataro varānanaḥ praphullapadmāyatalocano yuvā |
vistīrṇavakṣāḥ subhujo'tisuṃdaraḥ śyāmacchaviḥ kāmaivāparo hi saḥ || 26 ||
[Analyze grammar]

sa brahmacārī suśikho hi śobhate daṃḍena yukto dhanuṣeva manmathaḥ |
eṇājinaprāvaraṇaḥ samudradhṛghemābhamauṃjīkaṭimekhalaḥ paraḥ || 27 ||
[Analyze grammar]

taṃ dṛṣṭvā brāhmaṇaṃ bālāstāstatra sarasastaṭe |
jahṛṣuḥ kautukāviṣṭā ayaṃ no bhavitātithiḥ || 28 ||
[Analyze grammar]

saṃtyaktagītanṛtyāstāstasyālokanalālasāḥ |
hariṇyo lubdhakeneva viddhāḥ kāmena sāyakaiḥ || 29 ||
[Analyze grammar]

paśyapaśyeti jalpaṃtyo mugdhāḥ paṃca sasaṃbhramam |
tasminvipravare yūni kāmadevabhramaṃ yayuḥ || 30 ||
[Analyze grammar]

punaḥpunastamabhyarcya nayanaiḥ paṃkajairiva |
paścādvicāramārabdhamapsarobhiḥ parasparam || 31 ||
[Analyze grammar]

yadyayaṃ kāmadevo hi ratihīnaḥ kathaṃ bhavet |
athavāhyaśvinau devau tāvubhau yugacāriṇau || 32 ||
[Analyze grammar]

gaṃdharvaḥ kinnaro vātha siddho vā kāmarūpadhṛk |
ṛṣiputro'thavā kaścitkaścidvā manujottamaḥ || 33 ||
[Analyze grammar]

asti vā kaścidevāyaṃ dhātrā sṛṣṭo hi naḥ kṛte |
yathābhāgyavatāmarthe nidhānaṃ pūrvakarmabhiḥ || 34 ||
[Analyze grammar]

tathāsmākaṃ kumārīṇāṃ gauryānīto varottamaḥ |
karuṇājalakallola labdhādrī rkṛtacittayā || 35 ||
[Analyze grammar]

mayā vṛtastvayā cāyaṃ tvayā vṛtastathānayā |
evaṃ paṃcasukanyāsu vadaṃtīṣu nṛpottama || 36 ||
[Analyze grammar]

śrutvā tadvacanaṃ tatra kṛtamādhyāhnikakriyaḥ |
ciṃtayāmāsa medhāvī kiṃ kṛtvā sukṛtaṃ bhavet || 37 ||
[Analyze grammar]

gādhisaṃbhavaparāśarādayaḥ kaṃḍudevalamukhāśca ye dvijāḥ |
te'pi yogi balino vimohitāḥ līlayā tadabalābhiradbhutam || 38 ||
[Analyze grammar]

yoṣitāṃ nayanatīkṣṇasāyakairbhrūlatāsudṛḍhacāpanirgataiḥ |
dhanvinā makaraketunā hataḥ kasya no patati vāmano mṛgaḥ || 39 ||
[Analyze grammar]

tāvadeva nayadhīrvirājate tāvadeva janatābhayaṃ bhavet |
tāvadeva dhṛtacittatā bhṛśaṃ tāvadeva gaṇanā kulasya ca || 40 ||
[Analyze grammar]

tāvadeva tapasaḥ pragalbhatā tāvadeva śamasevanaṃ nṛṇām |
yāvadeva lalanekṣaṇā sa vairmādyate drutamadairna pūruṣaḥ || 41 ||
[Analyze grammar]

mohayaṃti madayaṃti rāgiṇaṃ yoṣitaḥ svalalitairmanoharaiḥ |
modayaṃti madayaṃti māmimā dharmarakṣaṇaparaṃ hi svairguṇaiḥ || 42 ||
[Analyze grammar]

māṃsaraktamalamūtranirmite yoṣitāṃ vapuṣi nirguṇe'śucau |
kāminastu parikalpya cārutāmāviśaṃti suvimūḍhacetasaḥ || 43 ||
[Analyze grammar]

dāruṇā hi parikīrtitāṃganā sādhubhirvimalabuddhibhirbudhaiḥ |
yāvadeva na samīpagā imāstāvadeva hi gṛhaṃ vrajāmyaham || 44 ||
[Analyze grammar]

samīpaṃ tasya yāvanna āgacchaṃti varastriyaḥ |
vaiṣṇavena prabhāveṇa tāvadaṃtardadhe dvijaḥ || 45 ||
[Analyze grammar]

tasya yogabalādbhūpa gatasyādarśanaṃ tadā |
dṛṣṭvā tadadbhutaṃ karma vaiṣṇavabrahmacāriṇaḥ || 46 ||
[Analyze grammar]

vitrastanayanā bālā kuraṃgya iva kātarāḥ |
saṃkrāṃtanayanāḥ śūnyā dadṛśustā diśodaśa || 47 ||
[Analyze grammar]

kanyā ūcuḥ |
iṃdrajālaṃ sphuṭaṃ vetti māyāṃ jānāti vā punaḥ |
dṛṣṭo'pyadṛṣṭarūpobhūdityūcustāḥ parasparam || 48 ||
[Analyze grammar]

vyāptaṃ ca hṛdayaṃ tāsāṃ tadaiva virahāgninā |
jvaladdāvānaleneva susnigdhaṃ sarvakānanam || 49 ||
[Analyze grammar]

tyajeṃdrajālikāṃ vidyāṃ kāṃta darśaya satvaram |
ātmānaṃ na hi te yuktaṃ prāggrāse makṣikopamam || 50 ||
[Analyze grammar]

hā kaṣṭaṃ darśitaḥ kasmāddhātrā tvaṃ ghaṭitaḥ kutaḥ |
jñātaṃ mahānusaṃtāpaheturnaḥ svaṃ vinirmitaḥ || 51 ||
[Analyze grammar]

kaccitte nirdayaṃ cetaḥ kaccidasmāsu no matiḥ |
kaccitkrūro'si he kāṃta kaccinmuṣṇāsi no manaḥ || 52 ||
[Analyze grammar]

kaccinna pratyayosmā su kaccidasmānparīkṣase |
kaccinnirmamatā śīlaḥ kaccinmāyāviśāradaḥ || 53 ||
[Analyze grammar]

kacciccitte praveṣṭuṃ ca vetsi vijñānalāghavam |
kaccinniṣkramaṇopāyaṃ na jānāsi kutaḥ punaḥ || 54 ||
[Analyze grammar]

kaccidvināparādhaṃ tu kimasmāsu prakupyase |
kaccidduḥkhaṃ na jānāsi pareṣāṃ vipralaṃbhanam || 55 ||
[Analyze grammar]

tvaddarśanaṃ vinā naṣṭā hṛdayeśvara sāṃpratam |
na jīvāmo'tha jīvāmaḥ punastvaddarśanāśayā || 56 ||
[Analyze grammar]

vayaṃ ca nīyatāṃ tatra śīghraṃ yatra gato bhavān |
tvaddarśanaharo dhātā vyadhānmodāṃkuracchidām || 57 ||
[Analyze grammar]

sarvathā darśanaṃ dehi kāruṇyaṃ bhaja sarvathā |
paryyaṃtaṃ na prapaśyaṃti kasya citsujanā janāḥ || 58 ||
[Analyze grammar]

itthaṃ vilapyatāḥ kanyāḥ pratīkṣya ca bahukṣaṇam |
piturbhayādgṛhaṃ gaṃtuṃ śīghramārebhire tataḥ || 59 ||
[Analyze grammar]

tatpremanigaḍairbaddhā bhṛśaṃ virahaviklavāḥ |
kathaṃciddhairyamālaṃbya tāḥ svaṃsvaṃ gṛhamāgatāḥ || 60 ||
[Analyze grammar]

āgatya patitāḥ sarvā mātṝṇāṃ tu samīpataḥ |
kimetanmātṛbhiḥ pṛṣṭāḥ kutaḥ kālātyayo'bhavat || 61 ||
[Analyze grammar]

krīḍaṃtyaḥ kinnarībhistu sārddhaṃ saṃgatakaṃ yadā |
saṃsthitāstena na jñāto divaso'cchodasarovare || 62 ||
[Analyze grammar]

pathi śrāṃtā vayaṃ mātaḥ saṃtāpastena nastanau |
mohena mahatā vaktuṃ na kenāpyutsahāmahe || 63 ||
[Analyze grammar]

ityuktvā luṭhitāstatra maṇibhūmau kumārikāḥ |
ākāraṃ gopayaṃtyastā mugdhā jalpaṃti mātṛbhiḥ || 64 ||
[Analyze grammar]

kācinnartayati krīḍāmayūraṃ na mudā tadā |
na pāṭhayati taṃ kīraṃ paṃjare'nyā kutūhalāt || 65 ||
[Analyze grammar]

lālayennakulaṃ nānyā nollāpayati sārikām |
aparātīva saṃmugdhā naiva khelati sārasaiḥ || 66 ||
[Analyze grammar]

bhejire na vinodaṃ tā remire naiva maṃdire |
ūcire bāṃdhavairnālaṃ vīṇāvādyaṃ na cakrire || 67 ||
[Analyze grammar]

kalpadrumaprasūnaṃ yatsarvaṃ taccānalopamam |
maṃdārakusumāmodi na papurmadhuraṃ madhu || 68 ||
[Analyze grammar]

yoginya iva tāḥ kanyā nāsāgranyastalocanāḥ |
alakṣyadhyānasaṃtānāḥ puruṣottamamānasāḥ || 69 ||
[Analyze grammar]

caṃdrakāṃtamaṇicchanne sravadvāriṇi kaṃdare |
kṣaṇaṃ vātāyane sthitvā jalayaṃtragṛhekṣaṇam || 70 ||
[Analyze grammar]

racayaṃti kṣaṇaṃ śayyāṃ dīrghikāṃ bhojinīdalaiḥ |
vījyamānāḥ sakhībhistāḥ śītalairnalinīdalaiḥ || 71 ||
[Analyze grammar]

itthaṃ yugasamāṃ rātrimanayaṃstā varastriyaḥ |
kathaṃciddhāraṇaṃ kṛtvā vihvalāḥ sajvarā iva || 72 ||
[Analyze grammar]

prātarvyomamaṇiṃ dṛṣṭvā manyamānāḥ svajīvitam |
vijñāpya mātaraṃ svāṃsvāṃ gaurīṃ pūjayituṃ gatāḥ || 73 ||
[Analyze grammar]

snātvā tena vidhānena puṣpairdhūpaistathā punaḥ |
vidhāya pūjanaṃ devyā gāyaṃtyastatra tāḥ sthitāḥ || 74 ||
[Analyze grammar]

etasminnaṃtare vipraḥ snātuṃ so'pi samāgataḥ |
piturāśramatastasmādacchode'tra sarovare || 75 ||
[Analyze grammar]

mitraṃ dṛṣṭvaiva rātryaṃte padminya iva kanyakāḥ |
tatphullanayanā jātāstaṃ dṛṣṭvā brahmacāriṇam || 76 ||
[Analyze grammar]

gatvā tatraiva tāḥ kanyā samīpaṃ brahmacāriṇaḥ |
savyāpasavyabaṃdhena bhujapāśaṃ ca cakrire || 77 ||
[Analyze grammar]

gato'si priya pūrvedyurgaṃtumadya na labhyate |
vṛtastvaṃ nūnamasmābhirnātra te'sti vicāraṇā || 78 ||
[Analyze grammar]

ityukto brāhmaṇaḥ prāha prahasanbāhupāśagaḥ |
yuṣmābhirucyate bhadramanukūlaṃ priyaṃ vacaḥ || 79 ||
[Analyze grammar]

prathamāśramaniṣṭhasya kiṃtu naśyeta me vratam |
vidyābhyasanaśīlasya nābhūtpāraṃ guroḥ kule || 80 ||
[Analyze grammar]

āśrame yatra yo dharmo rakṣaṇīyaḥ supaṃḍitaiḥ |
vivāho'yamato manye na dharma iti kanyakāḥ || 81 ||
[Analyze grammar]

ākarṇya vipravākyāni vipramūcurvarastriyaḥ |
sakaladhvanisotkaṃṭhyo kokilāiva mādhave || 82 ||
[Analyze grammar]

dharmādartho'rthataḥ kāmaḥ kāmātsukhaphalodayaḥ |
ityevaṃ niścayajñāste varṇayaṃti vipaścitaḥ || 83 ||
[Analyze grammar]

sakāmo dharmabāhulyātpurataste samutthitaḥ |
sevyatāṃ vividhairbhogaiḥ svacchābhūmiriyaṃ yataḥ || 84 ||
[Analyze grammar]

śrutvā tadvacanaṃ tāsāṃ prāha gaṃbhīrayā girā |
tathyaṃ vo vacanaṃ kiṃtu mamāpyāvaśyakaṃ vratam || 85 ||
[Analyze grammar]

prāpyānujñāṃ guroḥ kurve vivāhakarma nānyathā |
ityuktāḥ punarūcustāḥ sphuṭaṃ mūḍho'si suṃdara || 86 ||
[Analyze grammar]

siddhauṣadhaṃ brahmadhiyā rasāyanaṃ siddhirnidhiḥ sādhukulā varāṃganāḥ |
maṃtrastathā siddharasaśca dharmato mune niṣevyāḥ sudhiyā samāgatāḥ || 87 ||
[Analyze grammar]

kāryaṃ nu daivādyadi siddhimāgataṃ tasminnupekṣāṃ na ca yāṃti nītigāḥ |
yasmādupekṣā na punaḥ phalapradā tasmānna dīrghīkaraṇaṃ praśasyate || 88 ||
[Analyze grammar]

viṣādapyamṛtaṃ grāhyamamedhyādapi kāṃcanam |
nīcādapyuttamāṃ vidyāṃ strīratnaṃ duṣkulādapi || 89 ||
[Analyze grammar]

sāṃdrānurāgāḥ kulajanmanirmalāḥ snehārdracittā sugiraḥ svayaṃvarāḥ |
kanyā surūpāḥ khalu cāruyauvanā dhanyā labhaṃte'tra narāstu netare || 90 ||
[Analyze grammar]

kva vayaṃ surasuṃdaryyaḥ kva bhavāṃstāpaso baṭuḥ |
durghaṭasya vidhānena manye dhātaiva paṃḍitaḥ || 91 ||
[Analyze grammar]

tasmādasmānidānīṃ tu svīkuryyātmaṃgalaṃ bhavān |
gāṃdharveṇa vivāhena anyathā nopajīvanam || 92 ||
[Analyze grammar]

śrutvā vākyaṃ tataḥ prāha brāhmaṇo dharmavittamaḥ |
bho mṛgākṣyaḥ kathaṃ tyājyo dharmo dharmadhanairnaraiḥ || 93 ||
[Analyze grammar]

dharmaścārthaścakāmaśca mokṣaścaitaccatuṣṭayam |
yathoktaṃ phaladaṃ jñeyaṃ viparītaṃ tu niṣphalam || 94 ||
[Analyze grammar]

nākāle'haṃ vratī kuryāmato dāraparigraham |
na kriyā phalamāpnoti kriyākālaṃ na vetti yaḥ || 95 ||
[Analyze grammar]

yato dharmavicāre'sminprasaktaṃ mama mānasam |
tasmācchṛṇuta he kanyā na samīhe svayaṃvaram || 96 ||
[Analyze grammar]

evaṃ jñātvāśayaṃ tasya samīkṣyaiva parasparam |
karātkaraṃ vimucyātha jagrāhāṃghriṃ pramohinī || 97 ||
[Analyze grammar]

bhujau jagṛhatustasya suśīlā susvarā tathā |
āliliṃga sutārā ca vaktraṃ cuṃbati caṃdrikā || 98 ||
[Analyze grammar]

tathāpi nirvikāro'sau pralayānalasannibhaḥ |
śaśāpa brahmacārī tāḥ krodhenātyaṃtamūrchitaḥ || 99 ||
[Analyze grammar]

piśācya iva māṃ lagnā tatpiśācyo bhaviṣyatha |
evaṃ tenāśu śaptāstāstaṃ tyaktvā purataḥ sthitāḥ || 100 ||
[Analyze grammar]

kimetacceṣṭitaṃ pāpaṃ hyanāgasi viceṣṭayā |
priyaṃkṛto'priyaṃkṛtvā dhiktvāṃ dharmakṛtāṃtakam || 101 ||
[Analyze grammar]

anurakteṣu bhakteṣu mitreṣu drohakāriṇaḥ |
puṃso lokobhayoḥ saukhyaṃ nāśametīti naḥ śrutam || 102 ||
[Analyze grammar]

tasmāttvamapi naḥ śāpātpiśāco bhava satvaram |
ityuktvāpi ca tā bālā niḥśvasaṃtyaḥ krudhākulāḥ || 103 ||
[Analyze grammar]

tadevānyonyasaṃraṃbhāttasminsarasi pārthiva |
tāḥ kanyā brahmacārī ca sarve paiśācyamāgatāḥ || 104 ||
[Analyze grammar]

sa piśācaḥ piśācyastāḥ kraṃdamānāḥ sudāruṇam |
kṣapayaṃti vipākāṃstānpūrvopāttasya karmmaṇaḥ || 105 ||
[Analyze grammar]

svakāle prabhavatyeva pūrvopāttaṃ śubhāśubham |
svacchāyāmiva durvāraṃ devānāmapi pārthiva || 106 ||
[Analyze grammar]

kraṃdaṃti pitarastāsāṃ mātarastatra tatra ca |
bhrātaraścaiva bālānāṃ daivaṃ hi duratikramam || 107 ||
[Analyze grammar]

ataūrdhvaṃ piśācāste āhārārthaṃ suduḥkhitāḥ |
itastataśca dhāvaṃto vasaṃti sarasastaṭe || 108 ||
[Analyze grammar]

iti śrīpādme mahāpurāṇe svargakhaṃḍe dvāviṃśodhyāyaḥ || 22 ||
[Analyze grammar]