Chapter 9

[English text for this chapter is available]

sūta uvāca |
uttareṣu ca bho viprā dvīpeṣu śrūyate kathā |
evaṃ tatra mahābhāgā bruvatastannibodhata || 1 ||
[Analyze grammar]

ghṛtatoyaḥ samudrotha dadhimaṃḍodakoparaḥ |
surodasāgaraścaiva tathānyo dugdhasāgaraḥ || 2 ||
[Analyze grammar]

paraspareṇa dviguṇāḥ sarve dvīpā dvijarṣabhāḥ |
parvatāśca mahāprājñāḥ samudraiḥ parivāritāḥ || 3 ||
[Analyze grammar]

gaurastu madhyame dvīpe girirmanaḥśilo mahān |
parvataḥ paścime kṛṣṇo nārāyaṇasakho dvijāḥ || 4 ||
[Analyze grammar]

tatra ratnāni divyāni svayaṃ rakṣati keśavaḥ |
prasannaścābhavattatra prajānāṃ vyadadhātsukham || 5 ||
[Analyze grammar]

śaradvīpe kuśastaṃbo madhye janapadasya ha |
saṃpūjyate śālmaliśca dvīpe śālmalike dvijāḥ || 6 ||
[Analyze grammar]

krauṃcadvīpe mahākrauṃco girī ratnacayākaraḥ |
saṃpūjyate bho vipreṃdrāścāturvarṇyena nityadā || 7 ||
[Analyze grammar]

gomaṃtaḥ parvato viprāḥ sumahānsarvadhātukaḥ |
yatra nityaṃ nivasati śrīmānkamalalocanaḥ || 8 ||
[Analyze grammar]

mokṣibhiḥ saṃgato nityaṃ prabhurnārāyaṇohariḥ |
kuśadvīpe tu vipreṃdrāḥ parvato vidrumaiścitaḥ || 9 ||
[Analyze grammar]

sunāmā ca sudurdharṣo dvitīyo hemaparvataḥ |
dyutimānnāma vipreṃdrāstṛtīyaḥ kumudo giriḥ || 10 ||
[Analyze grammar]

caturthaḥ puṣpavānnāma paṃcamastu kuśeśayaḥ |
ṣaṣṭo harigirirnāma ṣaḍete parvatottamāḥ || 11 ||
[Analyze grammar]

teṣāmaṃtaraviṣkaṃbho dviguṇaḥ pravibhāgaśaḥ |
audbhidaṃ prathamaṃ varṣaṃ dvitīyaṃ reṇumaṃḍalam || 12 ||
[Analyze grammar]

tṛtīyaṃ surathaṃ nāma caturthaṃ laṃbanaṃ smṛtam |
dhṛtimatpaṃcamaṃ varṣaṃ ṣaṣṭhaṃ varṣaṃ prabhākaram || 13 ||
[Analyze grammar]

saptamaṃ kāpilaṃ varṣaṃ saptaite varṣalaṃbakāḥ |
eteṣu devagaṃdharvāḥ prajāśca muditā dvijāḥ |
viharaṃti ramaṃte ca na teṣu mriyate janaḥ || 14 ||
[Analyze grammar]

na teṣu dasyavaḥ saṃti mlecchajātyo'pi vā dvijāḥ |
gauraprāyo janaḥ sarvaḥ sukumāraśca sattamāḥ || 15 ||
[Analyze grammar]

avaśiṣṭeṣu sarveṣu vakṣyāmi dvijapuṃgavāḥ |
yathā śrutaṃ mahāprājñā varṇyate śṛṇuta dvijāḥ || 16 ||
[Analyze grammar]

krauṃcadvīpe mahābhāgāḥ krauṃco nāma mahāgiriḥ |
krauṃcātparo vāmanako vāmanādaṃdhakārakaḥ || 17 ||
[Analyze grammar]

aṃdhakārātparo viprā mainākaḥ parvatottamaḥ |
mainākātparato viprā goviṃdo giriruttamaḥ || 18 ||
[Analyze grammar]

goviṃdātparataścaiva puṃḍarīko mahāgiriḥ |
puṃḍarīkātparaścāpi procyate duṃdubhisvanaḥ || 19 ||
[Analyze grammar]

purastāddviguṇasteṣāṃ viṣkaṃbho munipuṃgavāḥ |
deśāṃstatra pravakṣyāmi tanme nigadataḥ śṛṇu || 20 ||
[Analyze grammar]

krauṃcasya kuśalo deśo vāmanasya manonugaḥ |
manonugātparo deśa uṣṇo nāma tapodhanāḥ || 21 ||
[Analyze grammar]

uṣṇātparaḥ prāvarakaḥ prāvarādaṃdhakārakaḥ |
aṃdhakārakadeśāttu munideśaḥ paraḥ smṛtaḥ || 22 ||
[Analyze grammar]

munideśātparaścaiva procyate duṃdubhisvanaḥ |
siddhacāraṇasaṃkīrṇo gauraḥ prāyojanaḥ smṛtaḥ || 23 ||
[Analyze grammar]

ete deśāḥ samākhyātā devagaṃdharvasevitāḥ |
puṣkare puṣkaro nāma parvato maṇiratnavān || 24 ||
[Analyze grammar]

tatra nityaṃ prasarati svayaṃ devaḥ prajāpatiḥ |
paryupāsaṃti taṃ nityaṃ devāḥ sarve maharṣayaḥ || 25 ||
[Analyze grammar]

vāgbhirmanonukūlābhiḥ pūjayaṃti dvijottamāḥ |
jaṃbūdvīpātpravarttante ratnāni vividhāni ca || 26 ||
[Analyze grammar]

dvīpeṣu teṣu sarveṣu prajānāṃ munisattamāḥ |
viprāṇāṃ brahmacaryeṇa satyena ca damena ca || 27 ||
[Analyze grammar]

ārogyāyuṣpramāṇābhyāṃ dviguṇaṃ dviguṇaṃ tataḥ |
ete janapadā viprā dvīpeṣu teṣu sattamāḥ || 28 ||
[Analyze grammar]

uktā janapadā yeṣu dharmaścaikaḥ pravarttate |
īśvaro daṃḍamudyamya svayameva prajāpatiḥ || 29 ||
[Analyze grammar]

dvīpānetānmunivarā rakṣaṃstiṣṭhati sarvadā |
sa rājā sa śivo viprāḥ sa pitā sa pitāmahaḥ || 30 ||
[Analyze grammar]

gopāyati dvijaśreṣṭhāḥ prajāḥ sa dvijapaṃḍitāḥ |
bhojanaṃ cātra vipreṃdrāḥ prajāḥ svayamupasthitam || 31 ||
[Analyze grammar]

siddhameva mahābhāgā bhuṃjate taddhi nityadā |
tataḥ paraṃ mahāśailo dṛśyate lokasaṃsthitiḥ || 32 ||
[Analyze grammar]

caturasro mahāprājñaḥ sarvataḥ parimaṃḍalaḥ |
tatra tiṣṭhaṃti vipreṃdrāścatvāro lokasaṃmatāḥ || 33 ||
[Analyze grammar]

diggajā hi muniśreṣṭhā vāmanairāvatāṃ janāḥ |
supratīkastathā viprāḥ prabhinnakaraṭāmukhāḥ || 34 ||
[Analyze grammar]

tasyāhaṃ parimāṇaṃ na saṃkhyātumihamutsahe |
asaṃkhyātaḥ sunityaṃ hi tiryagūrddhvamadhastathā || 35 ||
[Analyze grammar]

tatra vai vāyavo vāṃti digbhyaḥ sarvābhya eva ca |
asaṃbaṃdhā muniśreṣṭhāstānnigṛhṇaṃti te dvijāḥ || 36 ||
[Analyze grammar]

puṣkaraiḥ padmasaṃkāśairvikarṣaṃti mahāprabhaiḥ |
śatadhā punarevāśu te tānmuṃcaṃti nityaśaḥ || 37 ||
[Analyze grammar]

śvasadbhirmukhanāsābhyāṃ diggajairiva mārutāḥ |
āgacchaṃti dvijaśreṣṭhāstatra tiṣṭhaṃti vai prajāḥ || 38 ||
[Analyze grammar]

yathoddiṣṭaṃ mayā proktaṃ sanirmāṇamidaṃ jagat |
śrutvedaṃ pṛthivīmānaṃ puṇyadaṃ ca manonugam || 39 ||
[Analyze grammar]

śrīmāṃstarati vipreṃdrāḥ siddhārthaḥ sādhusaṃmataḥ |
āyurbalaṃ ca kīrttiśca tasya tejaśca varddhate || 40 ||
[Analyze grammar]

yaḥ śṛṇoti samākhyātuṃ parvaṇīdaṃ dhṛtavrataḥ |
prīyaṃte pitarastasya tathaiva ca pitāmahāḥ || 41 ||
[Analyze grammar]

iti śrīpādme mahāpurāṇe svargakhaṃḍe navamo'dhyāyaḥ || 9 ||
[Analyze grammar]