Chapter 120

[English text for this chapter is available]

kuṃjala uvāca |
kāmodākhyaṃ puraṃ divyaṃ sarvadevasamākulam |
sarvakāmasamṛddhyarthamapaśyannāradastataḥ || 1 ||
[Analyze grammar]

kāmodāyā gṛhaṃ prāpya praviveśa dvijottamaḥ |
kāmodāṃ tu tato dṛṣṭvā sarvakāmasamākulām || 2 ||
[Analyze grammar]

tayā saṃpūjito vipraḥ suvākyaiḥ svāgatādibhiḥ |
divyāsane samārūḍhastāṃ papraccha dvijottamaḥ || 3 ||
[Analyze grammar]

sukhena sthīyate bhadre viṣṇutejaḥ samudbhave |
anāmayaṃ ca papraccha āśīrbhirabhinaṃdya tām || 4 ||
[Analyze grammar]

kāmodovāca |
prasādādbhavatāṃ viṣṇoḥ sukhena vartayāmyaham |
kathayasva mahāprājña tvaṃ praśnottarakāraṇam || 5 ||
[Analyze grammar]

mahāmohaḥ samutpanno mamāṃge munipuṃgava |
vyāpakaḥ sarvalokānāṃ mamāṃge matināśakaḥ || 6 ||
[Analyze grammar]

tasmānnidrā samutpannā yathā martyeṣu vartate |
suptayā tu mayā dṛṣṭaḥ svapno vai dāruṇo mune || 7 ||
[Analyze grammar]

kenāpyuktaṃ sametyaiva purato dvijasattama |
avyakto'sau hṛṣīkeśaḥ saṃsāraṃ sa gamiṣyati || 8 ||
[Analyze grammar]

tadā prabhṛti duḥkhena vyāpitāhaṃ mahāmate |
tanme tvaṃ kāraṇaṃ brūhi bhavāñjñānavatāṃ varaḥ || 9 ||
[Analyze grammar]

nārada uvāca |
vātikaḥ paittikaścaiva kaphajaḥ sānnipātikaḥ |
svapnaḥ pravartate bhadre mānaveṣu na saṃśayaḥ || 10 ||
[Analyze grammar]

na jāyate ca deveṣu svapno nidrā ca suṃdari |
ādityodayavelāyāṃ dṛśyate svapna uttamaḥ || 11 ||
[Analyze grammar]

satsvapno mānavānāṃ hi puṇyasya phaladāyakaḥ |
anyadevaṃ pravakṣyāmi svapnasya kāraṇaṃ śubhe || 12 ||
[Analyze grammar]

mahāvātāṃdolanaiśca calaṃtyāpo varānane |
truṭaṃtyaṃbukaṇāḥ sūkṣmāstasmādudakasaṃcayāt || 13 ||
[Analyze grammar]

bahireva pataṃtyete nirmalāṃbukaṇāḥ śubhe |
punarlayaṃ prayāṃtyete dṛśyādṛśyā bhavaṃti vai || 14 ||
[Analyze grammar]

tadvatsvapnasya vai bhāvaḥ kathyate śṛṇu bhāmini |
ātmā śuddho viraktastu rāgadveṣavivarjitaḥ || 15 ||
[Analyze grammar]

paṃcabhūtātmakānāṃ ca muṣitvaiva suniścalaḥ |
ṣaḍviṃśatisu tatvānāṃ madhye caiṣa virājate || 16 ||
[Analyze grammar]

śuddhātmā kevalo nityaḥ prakṛteḥ saṃgatiṃ gataḥ |
tadbhāvairvāyurūpaiśca calate sthānato yadā || 17 ||
[Analyze grammar]

ātmanastejasaścaiva pratitejaḥ prajāyate |
aṃtarātmā śubhaṃ nāma tasya eva prakathyate || 18 ||
[Analyze grammar]

payasaśca yathā bhinnā bhavaṃtyaṃbukaṇāḥ śubhe |
ātmanastu tathā teja aṃtarātmā prakathyate || 19 ||
[Analyze grammar]

sa hi pṛthvī sa vai vāyuḥ sa cāpyākāśa eva hi |
sa vai toyaṃ sa dīpyeta ete paṃca purā kṛtāḥ || 20 ||
[Analyze grammar]

ātmanastejaso bhūtā malarūpā mahātmanaḥ |
tasyāpi saṃgatiṃ prāptā ekatvaṃ hi prayāṃti te || 21 ||
[Analyze grammar]

svātmabhāvapradoṣeṇa nāśayaṃti varānane |
tatpiṃḍamanyamicchaṃti vāraṃ vāraṃ varānane || 22 ||
[Analyze grammar]

teṣāṃ krīḍāvihāroyaṃ sṛṣṭisaṃbaṃdhakāraṇam |
udakasya taraṃgastu jāyate ca vilīyate || 23 ||
[Analyze grammar]

punarbhūtiḥ punarhānistādṛśasya punaḥ punaḥ |
apāṃ rūpasya dṛṣṭāṃtaṃ tadvadeṣāṃ na saṃśayaḥ || 24 ||
[Analyze grammar]

ātmā na naśyate devi tejo vāyurna naśyati |
na naśyato dharākāśau na naśyaṃtyāpa eva ca || 25 ||
[Analyze grammar]

paṃcaiva ātmanā sārddhaṃ prabhavaṃti prayāṃti ca |
ātmādayo hyamī bhadre nityarūpā na saṃśayaḥ || 26 ||
[Analyze grammar]

piṃḍa eva praṇaśyeta teṣāṃ saṃjāta eva ca |
viṣayāṇāṃ sudoṣaiḥ sa rāgadveṣādibhirhataḥ || 27 ||
[Analyze grammar]

prāṇāḥ prayāṃti vai piṃḍātpaṃcapaṃcātmakā dvija |
piṃḍāṃte vasate ātmā pratirūpastu tasya ca || 28 ||
[Analyze grammar]

aṃtarātmā yathā cāgneḥ sphuliṃgastu prakāśate |
tathā prakāśamāyāti dṛśyādṛśyaḥ prajāyate || 29 ||
[Analyze grammar]

śuddhātmā ca paraṃ brahma sadā jāgarti nityaśaḥ |
aṃtarātmā prabaddhastu prakṛteśca mahāguṇaiḥ || 30 ||
[Analyze grammar]

annāhāreṇa saṃpuṣṭairaṃtarātmā sukhaṃ vrajet |
susukhājjāyate mohastasmānmanaḥ pramuhyati || 31 ||
[Analyze grammar]

paścātsaṃjāyate nidrā tāmasī layavarddhinī |
nāḍīmārgeṇa yaḥ sūryo merumullaṃghya gacchati || 32 ||
[Analyze grammar]

tadā rātriḥ prajāyeta yāvannodayate raviḥ |
viṣayāṃdhakārairmuktastu aṃtarātmā prakāśate || 33 ||
[Analyze grammar]

bhāvaistattvātmakānāṃ tu paṃcatattvaiḥ prapoṣitaiḥ |
pūrvajanmasthitaiḥ piṃḍairaṃtarātmā pragṛhyate || 34 ||
[Analyze grammar]

sa yāsyati ca vai sthānamuccāvacaṃ mahāmate |
saṃsāra aṃtarātmā vai doṣairbaddhaḥ praṇīyate || 35 ||
[Analyze grammar]

kāyaṃ rakṣati jīvātmā paścāttiṣṭhati madhyagaḥ |
udānaḥ sphurate tīvrastasmācchabdaḥ prajāyate || 36 ||
[Analyze grammar]

śuṣkā bhastrā yathā śvāsaṃ kurute vāyupūritā |
tadvacchabdavaśācchvāsamudānaḥ kurute balāt || 37 ||
[Analyze grammar]

ātmanastu prabhāveṇa udāno balavānbhavet |
evaṃ kāyaḥ pramugdhastu mṛtakalpaḥ prajāyate || 38 ||
[Analyze grammar]

tato nidrā mahāmāyā tasyāṃgeṣu prayāti sā |
hṛdi kaṃṭhe tathā cāsye nāsikāgre pratiṣṭhati || 39 ||
[Analyze grammar]

bāhū saṃkucya saṃtiṣṭheddhṛdgato nābhimaṃḍale |
ātmanastu prabhāvācca udāno nāma mārutaḥ || 40 ||
[Analyze grammar]

prajāyate mahātīvrā balarodhaṃ karoti saḥ |
yathā rajjvā prabaddhastu dāru kīladharaḥ sthitaḥ || 41 ||
[Analyze grammar]

tathā cātmāsu saṃlagnaḥ prāṇavāyurna saṃśayaḥ |
aṃtarātmaprasaktastu prāṇavāyuḥ śubhānane || 42 ||
[Analyze grammar]

buddhivadrohito bhadre aṃtarātmā pradhāvati |
pūrvajanmārjitānvāsānsmṛtvā tatra pradhāvati || 43 ||
[Analyze grammar]

tatra saṃstho mahāprājñaḥ svecchayā ramate punaḥ |
evaṃ nānāvidhānsvapnānaṃtarātmā prapaśyati || 44 ||
[Analyze grammar]

uttamāṃśca viruddhāṃśca karmayuktānprapaśyati |
girīṃstathā sudurgāṃśca uccāvacānprapaśyati || 45 ||
[Analyze grammar]

tadeva vātikaṃ viddhi kaphavattadvadāmyaham |
jalaṃ nadīṃ taḍāgaṃ ca payaḥ sthānāni paśyati || 46 ||
[Analyze grammar]

agniṃ ca paśyate devi bahukāṃcanamuttamam |
tadeva paittikaṃ viddhi bhāvyaṃ caiva vadāmyaham || 47 ||
[Analyze grammar]

prabhāte dṛśyate svapno bhavyo vābhavya eva ca |
karmayukto varārohe lābhālābhaprakāśakaḥ || 48 ||
[Analyze grammar]

svapnasyāpi avasthā me kathitā varavarṇini |
tadbhāvyaṃcavarāroheviṣṇoścaivabhaviṣyati || 49 ||
[Analyze grammar]

tannimittaṃ tvayā dṛṣṭo duḥsvapnaḥ sa tu prekṣitaḥ || 50 ||
[Analyze grammar]