Chapter 113

[English text for this chapter is available]

raṃbhovāca |
tapa etatparityajya kiṃvā lokayase śubhe |
tapasaḥ kṣaraṇaṃ syādvai puruṣasyāpi ciṃtanāt || 1 ||
[Analyze grammar]

aśokasuṃdaryuvāca |
tapasi me mano līnaṃ nahuṣasyāpi kāmyayā |
na māṃ cālayituṃ śaktā devāsuramahoragāḥ || 2 ||
[Analyze grammar]

enaṃ dṛṣṭvā mahābhāge me manaścalate bhṛśam |
raṃtumicchāmyahaṃ gatvā evamutsukatāṃ gatam || 3 ||
[Analyze grammar]

evaṃ viparyayaścāsīnmanaso me varāvane |
tanme tvaṃ kāraṇaṃ brūhi yadyasti jñānamuttamam || 4 ||
[Analyze grammar]

āyuputrasya bhāryāhaṃ devaiḥ sṛṣṭā mahātmabhiḥ |
kasmānme dhāvate ceta utsukaṃ raṃtumeva ca || 5 ||
[Analyze grammar]

raṃbhovāca |
sarveṣveva mahābhāge deharūpeṣu bhāmini |
vasatyātmā svayaṃ brahmajñānarūpaḥ sanātanaḥ || 6 ||
[Analyze grammar]

yadyapi prakriyābaddhairiṃdriyairupakāribhiḥ |
mohapāśamayairbaddhastathā siddhastu sarvadā || 7 ||
[Analyze grammar]

prakṛtiṃ naiva jānāti jñānavijñānakīṃ kalām |
ayaṃ śuddhaśca dharmajña ātmā vetti ca suṃdari || 8 ||
[Analyze grammar]

gacchaṃtyapi manastāpamenaṃ dṛṣṭvā mahāmatim |
pāpamevaṃ parityajya satyamevaṃ pradhāvati || 9 ||
[Analyze grammar]

bhartāyamāyuputraste etatsatyaṃ na saṃśayaḥ |
anyaṃ dṛṣṭvā viśaṃketa puruṣaṃ pāpalakṣaṇam || 10 ||
[Analyze grammar]

evaṃ vidhiḥ kṛto devaiḥ satyapāśena baṃdhitaḥ |
yadasyā āyuputropi bhartṛtvamupayāsyati || 11 ||
[Analyze grammar]

evamākarṇitaṃ bhadre ātmanā taṃ ca suṃdari |
tadbhāvasatyasaṃbaṃdhaṃ parigṛhya sthitaḥ svayam || 12 ||
[Analyze grammar]

anyaṃ bhāvaṃ na jānāti āyuputraṃ ca viṃdati |
prakṛtirnaiva te devi patiṃ jānāti cāgatam || 13 ||
[Analyze grammar]

evaṃ jñātvā pradhānātmā tavādyaiva pradhāvati |
ātmā sarvaṃ prajānāti ātmā devaḥ sanātanaḥ || 14 ||
[Analyze grammar]

ayameṣa sa vīreṃdro nahuṣo nāma vīryavān |
tasmādgacchati cetaste satyaṃ saṃbaṃdhamicchate || 15 ||
[Analyze grammar]

jñātvā cāyoḥ sutaṃ bhadre anyaṃ caiva na gacchati |
etatte sarvamākhyātaṃ śāśvataṃ tvanmanogatam || 16 ||
[Analyze grammar]

huṃḍaṃ hatvā mahāghoraṃ samare dānavādhamam |
tvāṃ nayiṣyati svasthānamāyośca gṛhamuttamam || 17 ||
[Analyze grammar]

hṛto daityena vīreṃdro nijapuṇyena śeṣitaḥ |
bālyātprabhṛti vīreṃdro viyuktaḥ svajanena vai || 18 ||
[Analyze grammar]

pitṛmātṛvihīnastu gato vṛddhiṃ mahāvane |
yāsyatyeva piturgehaṃ tvayaiva saha sāṃpratam || 19 ||
[Analyze grammar]

evamābhāṣitaṃ śrutvā raṃbhāyāḥ śivanaṃdinī |
harṣeṇa mahatāviṣṭā tāmuvāca samudrajām || 20 ||
[Analyze grammar]

ayameva sa satyātmā mama bhartā suvīryavān |
mano me dhāvate'tyarthaṃ śokākulitavihvalam || 21 ||
[Analyze grammar]

nāsti cittasamo devo jānāti suviniścitam |
satyametanmayā dṛṣṭaṃ sucitraṃ cāruhāsini || 22 ||
[Analyze grammar]

manobhavasamānaṃ tu puruṣaṃ divyalakṣaṇam |
na dhāvati mahāceta enaṃ dṛṣṭvā yathā sakhi || 23 ||
[Analyze grammar]

tathā na dhāvate bhadre puṃsamanyaṃ na manyate |
enaṃ gaṃtavyamāvābhyāṃ sakhībhirgṛhameva hi || 24 ||
[Analyze grammar]

evamābhāṣya sā raṃbhā gamanāyopacakrame |
gamanāyotsukāṃ jñātvā nahuṣasyāṃtikaṃ prati || 25 ||
[Analyze grammar]

tāmuvāca tato raṃbhā kasmāddevi na gamyate |
sūta uvāca |
sakhyā ca raṃbhayā sārddhaṃ nahuṣaṃ vīralakṣaṇam || 26 ||
[Analyze grammar]

tasyāṃtikaṃ susaṃprāpya preṣayāmāsa tāṃ sakhīm |
enaṃ gaccha mahābhāge nahuṣaṃ devarūpiṇam || 27 ||
[Analyze grammar]

kathayasva kathāmetāṃ tavārthe āgatā yataḥ |
raṃbhovāca |
evaṃ sakhi kariṣyāmi supriyaṃ tava suvrate || 28 ||
[Analyze grammar]

evamuktvā gatā raṃbhā nahuṣaṃ rājanaṃdanam |
cāpabāṇadharaṃ vīraṃ dvitīyamiva vāsavam || 29 ||
[Analyze grammar]

pratyuvāca gatā raṃbhā sakhyā vacanamuttamam |
āyuputra mahābhāga raṃbhāhaṃsamupāgatā || 30 ||
[Analyze grammar]

śivasya kanyayā vīra tayāhaṃ paripreṣitā |
tavārthaṃ devadevena devyā devena vai purā || 31 ||
[Analyze grammar]

bhāryārūpaṃ varaṃ śreṣṭhaṃ sṛṣṭaṃ lokeṣu durlabham |
duṣprāpyaṃ tu naraśreṣṭhairdevai seṃdraistapodhanaiḥ || 32 ||
[Analyze grammar]

gaṃdharvaiḥ pannagaiḥ siddhaiścāraṇaiḥ puṇyalakṣaṇaiḥ |
svayameva samāyātaṃ tavārthe śṛṇu sāṃpratam || 33 ||
[Analyze grammar]

strīratnaṃ tanmahāprājña saṃpūrṇaṃ puṇyanirmitam |
aśokasuṃdarī nāma tavārthaṃ tapasi sthitā || 34 ||
[Analyze grammar]

atyarthaṃ tu tapastaptaṃ bhavaṃtamicchate sadā |
evaṃ jñātvā mahābhāga bhajamānāṃ bhajasva hi || 35 ||
[Analyze grammar]

tvāmṛte sā varārohā puruṣaṃ naiva yācate |
nahuṣeṇa tayoktaṃ tu śrutvāvadhāritaṃ vacaḥ || 36 ||
[Analyze grammar]

pratyuttaraṃ dadau cātha raṃbhe me śrūyatāṃ vacaḥ |
tattu sarvaṃ vijānāmi yattvayoktaṃ mamāgrataḥ || 37 ||
[Analyze grammar]

mamāgre kathitaṃ pūrvaṃ vaśiṣṭhena mahātmanā |
sarvameva vijānāmi asyāstu tapa uttamam || 38 ||
[Analyze grammar]

śrūyatāṃ kāraṇaṃ bhadre yathāsaukhyaṃ bhaviṣyati |
ahatvā dānavaṃ huṃḍaṃ na gacchāmi varāṃganām || 39 ||
[Analyze grammar]

sarvametatsuvṛttāṃtamahaṃ jāne tathaiva hi |
mamārthe tava saṃbhūtistapaśca caritaṃ tvayā || 40 ||
[Analyze grammar]

mama bhāryā na saṃdeho bhavatī vidhinā kṛtā |
mamārthe niścayaṃ kṛtvā tapa ācaritaṃ tvayā || 41 ||
[Analyze grammar]

hṛtā tasmātsupāpena bhavatī niyamānvitā |
sūtigṛhādahaṃ tena dānavenādhamena vai || 42 ||
[Analyze grammar]

bālabhāvasthito devi pitṛmātṛvinā kṛtaḥ |
tasmāttaṃ tu haniṣyāmi huṃḍaṃ vai dānavādhamam || 43 ||
[Analyze grammar]

paścāttvāmupaneṣye'haṃ vaśiṣṭhasyāśramaṃ prati |
evaṃ kathaya bhadraṃ te raṃbhe matpriyakāriṇīm || 44 ||
[Analyze grammar]

evaṃ visarjitā tena satvaraṃ sā gatā punaḥ |
aśokasuṃdarīṃ devīṃ kathayāmāsa tasya ca || 45 ||
[Analyze grammar]

samāsena tathā sarvaṃ raṃbhā sā dvijasattama |
aśokasuṃdarī sā tu avadhārya subhāṣitam || 46 ||
[Analyze grammar]

nahuṣasya suvīrasya harṣeṇa ca samanvitā |
tasthau tatra tayā sārddhaṃ susakhyā raṃbhayā tadā || 47 ||
[Analyze grammar]

bhartuśca kīdṛśaṃ vīryamiti paśyāmi vai sadā || 48 ||
[Analyze grammar]

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre nahuṣākhyāne trayodaśādhikaśatatamo'dhyāyaḥ || 113 ||
[Analyze grammar]